Êxodo 8

दुसरी पिड़ा:

डेटके

1 तिहीं रोत यहोवा देवे मोशेहे कोयो, "फारोअ जागे जात कोइत को, ‘यहोवा ताहूं एहें कोहे के: माआं माअहोंहों माआं भक्ती कोए तेहें जाअहूं दे. 2 तु जर तेहें ने कोअही, ताहां आंय ताआ पुरा देसोहो डेटके मोकलीत कोइत डोंड आपिहीं. 3 आन नील खाडीम डेटके एतेज पोआइत जाय, ते ताआ राजवाड़ाअहें आवे आन ते ताआ हुवीइलोअ खुलीमेहें ताआ आथरुपोअ, आन ताआ कर्मसाऱ्योंअ कोअमेहें आन ताआ आखा माअहोंअ कोअमेहें, तेतोज नाहां पोन ताआ आंड्लो आन रांदीत खाअलाअ बासनोमेहें सोड़ीत लागे; 4 तें डेटके तापोअ, ताआ माअहों पोअ आन ताआ कर्मसाऱ्यों पोअ आन आखापोअ सोड़ीत लागे.’"

5 फाशुउ यहोवा देव मोशेहे कोयो, "आरोनोहो को, के तियाआ डेंगार खाडीपोअ, खोबरीपोअ आन धरणोपोअ आथ उसू कोइत तोइत रोय आन डेटके मिसर देसोम पोआत गोये." 6 ताहां आरोन मिसर देसोअ आखाअ पाअयोंअ जागा पोअ तियाआ आथ उसू कोइत रोयू; आन डेटके आवीत कोइत मिसर देसोहो टापित लेदू.✝8:6 भजन 105:30 7 पोन जादूगार बी मिसर देसोपोअ तियांआं जादू-मंतर कोइत डेटके लेत आवया.

8 ताहां फारो राजे मोशेहे आन आरोनोहो हादीत कोयो, "यहोवा देवोह रावणी कोआ के तो यां डेटकाहां माआं जागे रोते आन माआं माअहोंअ जागे रोत सेटे कोई देअहूं जोवे; आन आंय इस्राएलवाला माअहोंहों जाअहूं देहीं, मोन्ज्ये तें यहोवा देवोहो गाराहा आपित सेके."

9 ताहां मोशे फारो राजाहा कोयो, "आंय ताआ वोतीइ प्रार्थना कोइलाआ काजे खुस होये, पोन एतीज गोठ कोत दे के आंय केती वेले ताआ वोतीइ रावणी कोओ, के तापोअ आन ताआ कोअमेहें, ताआ कर्मसाऱ्यों पोअ आन ताआ माअहोंपोअ रोत यहोवा देव डेटके दुर कोई देय, आन निस्ते नील नोयीम एतेज रोय."

10 तिये कोयो, "हांदाआ माआं काजे प्रार्थना कोअजी." मोशे तियाहा कोयो, "तुमे कोयो तेहेंज कोइत ओवे, मोन्ज्ये ताहूं मुंदू पोडुहूं जोवे के आमाआं परमेश्वर यहोवाआ हारकू बिहीरु कोड्लूज देव कायनाहां. 11 आन डेटके ताआ जागे रोते आन ताआ कोअमेहें रोते, ताआ कर्मसाऱ्योंअ जागे रोते आन ताआ माअहोंअ जागे रोते सेटे ओत जाय, निस्ते नील खाडीम एतेज रोय." 12 ताहां मोशे आन आरोन फारो राजाअ सामने रोत निहींत जाता रोया; आन मोशे यहोवा देवोह रावणी कोअयी के तें डेटके फारोपोअ मोकल्ये तें सेटे ओत जाय. 13 आन यहोवा देवे मोशे कोयो तेहेंज कोइत कोअयो; आन डेटके कोअमेहें, खोलीमेहें, गावोमेहें आन खेतोमेहें मोइत गोये. 14 माअहें तियां डेटकाआ टिग कोइ देदा, आन पुरु देस गोंदारुन गोंदारु वोलीत गोयू. 15 पोन फारो राजे देख्यो के ओमे आराम जोड़्युहू ताहां यहोवा देवोअ कोल्याआ परमाणे फाशुउ तियाआ मोन वातड़ो कोइत लेदो, आन तियांआं गोठी ने उनाअयू.

तिसरी पिड़ा:

पिहवे

16 फाश्योअ यहोवा देवे मोशेहे कोयो, "आरोनोहो को, ‘तु ताआ डेंगार उसलीत पुयींपोऱ्याआ तुलाहा लागाव, तिया तुलावाअहीं मिसर देसोम पिहवे बोणित जाअहूं जोवे.’" 17 ताहरोअ आरोने तियाआ आथोमेऱ्यीइ डेंगार विसीत पुयींपोऱ्याआ तुलापोअ लागावयी, आन तिहीं वाअहीं आखा मिसर देसोम तुलाआ पिहवे बोणित गोये. तें जनवारोपोअ आन माअहोंपोअ पिहवे ओत गोये. 18 ताहां जादूगारों बी तियांआं जादू-मोंतरोवाअहीं तुलामेहें रोत पिहवे बोणाविलोअ कोशित कोअयी, पोन ते ने कोइत सेका. तें पिहवे जनवार आन माअहों पोअ तेहेलेज रोत गोये. 19 ताहां जादूगारों फारो राजाहा कोयो, "ओं ते देवोअ आथऱ्योअ*8:19 आथऱ्योअ आंगूउ काम होय." तेबी यहोवा देवोअ कोल्या परमाणे फारो राजाअ मोन वातड़ो ओवतो गोयो, आन तिये मोशे आन आरोनोअ गोठ ने मान्यू.✝8:19 लुक 11:20

शोवथी पिड़ा:

डाहां

20 फाश्योअ यहोवा देवे मोशेहे कोयो, "हांदाआ वेगीइ जात कोइत फारो राजाआ सामने जात उबू रोजी, तो खाडीअहें आवे, तेहेलाम तु तियाहा कोजी, ‘यहोवा देव ताहूं कोहे: माआं माअहोंहों माआं भक्ती कोए तेहें जाअहूं दे. 21 जर तु माआ माअहोंहों ने जाअहूं देही, ताहां उनाइत ले, आंय तापोअ आन ताआ कर्मसाऱ्यों पोअ, ताआ माअहों पोअ डाहांआं गोअड़ी मोकलीहीं आन मिसरवालाआं कोएं आन तियांआं रोअलाआ जागू बी डाहां वाअहीं पोआत जाय. 22 तेदिहीं आंय गोशेन देसोहो जिहीं माआं माअहें रोतेहे तियांहां आलांग कोअहीं, पोन तेदिहीं तियामेहें डाहें ने रोय; मोन्ज्ये तिया वाअहीं तू जाईंत लेअहूं जोवे के, धरतीपोअ*8:22 धरतीपोअ देसोअ विसमेहें आंयज यहोवा देव होय. 23 आन आंय माआ माअहों में आन ताआ माअहोंअ विसमेहें गालो मेकिहीं. ओ समत्कार हांदाआ ओवे.’" 24 ताहां यहोवा देवे तेहेंज कोइत कोअयो, फारोअ कोअमेहें आन तियाआ कर्मसाऱ्योंअ कोअमेहें, आखा मिसर देसोमेहें डाहांआं टोलान टोला पोआइत गोया, आन डाहां वाअहीं तियाआ देसोअ नुकसान ओवो.✝8:24 भजन 78:45

25 ताहां फारो राजे मोशे आन आरोनोहो हादाड़ीत कोयो, "तुमू जावा आन याज देसोमेहें तुमाआ देवोअ काजे गाराहा आपा."

26 मोशे कोयो, "काहाके आमाआ देवोअ काजे एहें कोइलोअ बोराबर कायनाहां के आमू मिसरवालाआं सिसड़ाअली वस्तु गाराहा आपो; आन जर आमू मिसरवालाआं देखताइज तियांआं सिसड़ाअली वस्तु गाराहा आपो*8:26 सोड़वो ताहां तें आमुहूं डोणाटतीज ने माइत टाकी देय के? 27 आमू रानोमेहें तिन दिही जाआं सालीत जाहूं आन आमाआं देव यहोवाअ काजे तो जेहलोहो कोय तेहेलोहो गाराहा आमू आपहूं."

28 फारो राजे कोयो, "आंय तुमुहूं रानोमेहें तुमाआं यहोवा देवोहो गाराहा आपे तेहें काजे जाअहूं देहीं; पोन वादार सेटे मा जाहा. माआं वोतीइ प्रार्थना कोआ."

29 ताहां मोशे उत्तर आप्यो, "उनाआ, आंय ताआ जागे रोत निहींत जाहीं तेहेलाम आंय यहोवा देवोहो प्रार्थना कोअहीं के डाहांआं टोला जाता रोय, आन ताआ आन ताआ कर्मसाऱ्योंअ आन माअहोंअ जागे रोत हांदाआज सेटे ओत जाय; पोन आगाड़ी रोत आमाआं यहोवा देवोहो गाराहा आपीइलोअ काजे जाहूं, ताहां फारो ठोगित कोइत आमुहूं ने रुकुहूं जोवे."

30 ताहां मोशे फारोअ जागे रोत बारथे निहींत कोइत यहोवा देवोह प्रार्थना कोअयी. 31 आन मोशेए कोल्या परमाणे यहोवा देवे डाहांआं टोलू फारो आन तियाआ कर्मसारी आन तियाआ माअहोंअ जागे रोत दूर कोई देदू; एक बी डाहों ने रोयो. 32 ताहां फारो यी फेरे बी तियाआ मोन कठीण कोअयो, आन तियां माअहोंहों जाअहूं ने देदे.