1 फाशोअ यहोवा देवे मोशेहे कोयो, "फाशुउ एक वारी जाआं मिसर देसोपोअ आंय एक पिड़ा मोकलोहो, तिहींइं फासाड़ी फारो तुमुहूं मिसर देसोमेहें रोत जाअहूं देये; तेतोज नाहां, पोन तो तुमुहूं खोरीज बारथे काडी देये. 2 ओमे आखा इस्राएलोअ माअहुंहूं माआं ए गोठ कोत देखाड़, के तुमू माटीन बोईं तुमाआं आहने रोनारा मिसर देसोअ रेवाशाआ होनोन सांदीइ गोवणो मागित लेजा." 3 ताहां यहोवा देवे मिसर देसोवालाहां इस्राएलोअ माअहूंपोअ मेरवानी कोइ देदो. तेतोज नाहां, पोन मिसर देसोअ फारोअ कर्मसारी आन आखे माअहें मोशेहे आखाम रोत वोडू कोत मानेतेते.

4 फाशुउ मोशे फारोहो कोयो, "देव कोहे, ‘आरदी राती आंय मिसर देसोअ विसमेहें रोत सालीहीं. 5 आन मिसर देसोमेएं राजगादीपोअ बोहनारा फारोअ सोआ रोत ते दोन्नो दोअनारी वेठाऱ्यीइ सोआ मिलीत पेल्लाअठीज उब्जीइल्ये आखेज मोइत जाय; आन बोकड़ा-वासड़ाआ बासे जें पेल्लाअठीज उब्जे तें आखेज मोइत जाय. 6 मिसर देसोम पेल एहेलोहो केदिहीं नाहां ओवो आन ने केदिहीं ओवे एहेलोहो रोड़ीइलोअ आवाज आवे. 7 पोन इस्राएली माअहूंपोअ हुंणो जाआं ने पोहे, आन तियांआं बोकड़ान वासड़ाहा बी कीज ने ओवे. इंहीं वाअहीं तुमुहूं जाआंत जाय, के आंय यहोवा देव इस्राएल आन मिसर देसोमेहें फरक कोइत मेकोहो.’ 8 ताहां एं ताआ वेठाऱ्ये मिसरवाले माहूं पागे पोड़ीत माआं भक्ती कोए आन कोय, ‘ताआ जों आखो ओय, तों लेत निहींत जा. तिहीं रोत आंय बी निहींत जाहीं.’" एहें कोत कोइत मोशे खोतेमेहें खिजवात फारोहो सोड़ीत निहींत गोयू.

9 यहोवा देवे मोशेहे कोयोतो के, "फारो राजा तुमाआ गोठी ने उनाय; काहाके मिसर देसोमेहें आंय जाअखीला समत्कार देखाड़ीत सेको." 10 मोशे आन आरोने ए आखा समत्कार कोइत देखाड़्या; पोन यहोवा देवे फारोअ दिल वातड़ो कोइ देदो, तिहीं वाअहीं तिये इस्राएलवालाहां ने जाअहूं देदे.