1 फाश्याआ यहोवा मोशेहे कोयो, 2 "उनाआ, आंय ऊरीइ पोऱ्या बसालेलोहो, जो हुरोअ पोर्‍याआ पोर्‍यू आन यहुदाअ पारवाड़ीइ होय, नाव तोइत हादोहो, 3 आन आंय तियाहा देवोअ आत्मा वाअहीं पोइत कोइत बुद्दी, हुशारी, आन आखी गोठी समज आप्यीही. 4 तो होनो, सांदी आन तांबाआ बाहरी बाहरी हुतारोअ कामे कोए; 5 आन जुड़ीइलोअ काजे मोंड्या जोड़ीत आपे; आन लाकड़ूपोअ नक्शीइ काम कोए. 6 आन उनाआ, आंय दानोअ पारवाड़ीम रोत अहिसामाकोअ पोऱ्या अहलियाबहो तियाअरी कोइ देहो; नेत जेतेहे हुशार होय तियां आखाहा बुद्दी आपोहो, जियाहा जेती वस्तुउ आंय ताहूं आदेश आप्यीही ते आखी ते बोणावे; 7 मोन्जे मिलापवाला तोंबु, आन साक्शीपत्राआ पेटी आन तियापोऱ्योअ दयासनोअ टापणो आन तोंबाआ आखो सामान, 8 आन सामानोअरीज बोहीत खाअलाआ टेबल, आन आखा सामानोअ आरीज सोका होनाअ दिवाआ खांब, आन तुमाणाआ देवान्यो, 9 आन आखा सामानोअरीज आगीइ देवान्यो, आन बुंद्याअरीज तोपल्यो, 10 आन विंइल्ये आंगड़े, आन आरोन पुंजारु या नातावाअहीं कामोअ सोके आंगड़े, आन तियाआ पोऱ्याआ आंगड़े, 11 आन अभिशेकोअ तेल, आन सोका जागाअ काजे हाजी गुंदाअनारी आगरबत्ती, ओं आखो तियां आखा आदेशोअ पुरमाणे बोणावुहूं जोवे जों आंय ताहूं कोत आप्योहो."

12 फाश्यो यहोवा मोशेहे कोयो, 13 "तु इस्राएलोहो ओं बी कोजी, ‘तुमू माआ आरामोअ दिहोहो मानजा, काहाके तुमाआ पिड़ीइ पिड़ीमेहें माआंन तुमाआ माअहों विसमेहें ए एक निशाणी ठऱ्यीही, तियी गोठीही तुमू जाईंत लेजा, के यहोवा आमाआं सोकू कोअनारु देव होय. 14 याआ कोअते तुमू आरामोअ दिहोहो मानजा, काहाके तो तुमाआ काजे सोकू ठऱ्युहू; जों तियाहा एठो कोए, तियाहा माईंत टाकी देअहूं जोवे; जों कोडो तिया दिहोमेहें किबी कामकाज कोए, तियाहा माआ माहूंम रोत काडी देजा. 15 सोव दिही ते कामकाज कोए, पोन सांतवू दिही वोडू आरामोअ दिही आन यहोवाआ काजे सोकू होय; याआ कोअते जों कोडो आरामोअ दिहोमेहें जों किबी कामकाज कोए तियाहा माईंत टाकजा.✝ 16 याआ कोअते इस्राएल आरामोअ दिहोहो मान्या कोअहूं जोवे, नेत पिड़ीन पिड़ी जाआं तियाहा हादाफोल्यीइ शप्पत जाईंत कोइत मान्या कोअहूं जोवे. 17 ते माआन इस्राएलोअ विसमेहें हादाजोलमाऱ्यीइ निशाणी रोय; काहाके सोव दिहोमेहें यहोवा जुग आन धरतीही बोणायी, आन सांतवे दिहे आराम कोइत तियाआ थाक मुड़्यी.’"✝

18 जेहेलाम देव मोशेअरी सिनाय डोगोपोअ ए गोठ कोइत लेदी, ताहां तिये तियाहा सोताआ आंगी वाअहीं आदेश लेखल्यी बेन डोणोअ पाटी आप्यी.