1 "फाश्यो तु इस्राएलोम रोत ताआ पाही आरोन, आन नादाब, अबीहू, एलाजार आन ईतामार नावोअ तियाआ पोर्‍याहा माआ काजे पुंजाराआ काम कोए तेहें ताअरी लेतावजी. 2 आन ताआ पाही आरोनोअ काजे मानपान आन होबाआ कोअते सोके आंगड़े बोणावजी. 3 आन जेत्ता जोआं बुद्दीवाला कारागीर होय, जियांहां आंय बुद्दी आपनारा आत्मा वाअहीं पुरा पोअयाहा, तियांहां तु आरोनोअ आंगड़े बोणावीइलाआ आदेस आप के तो माआ काजे पुंजाराआ काम कोइलाआ काजे सोका बोणुहूं जोवे. 4 जे आंगड़े तियांहां बोणावीलोअ होय ते एं होय, मोन्ज्ये सातीइ पट्टू, आन एपोद*, आन कोट, आन शार खुण्यो नांबो आंगड़ो, पागड़ी आन पोट्टू; एं सोके आंगड़े ताआ पाही आरोन आन तियाआ पोर्‍याआ कोअते बोणावजी के ते माआ कोअते पुंजाराआ काम कोए. 5 आन ते होनाअ आन निला जामण्या आन रात्ला रंगोअ आन पात्ला हुतोअ कापड़ लेजा."

6 "तो एपोदोहो होना आन निला, जामण्या आन रात्ला रंगोअ कपड़ाआ आन पात्ला हुतोअ कपड़ाआ बोणावजा, जो हाजा कारागिरोअ काम कोअनाराआ आथोअ काम जोवे. 7 तो एहें कोइत जोड़ाअहूं जोवे के तियाआ बेनू खांदपोट्टाआ सेड़ा एकमेकाअरी जुड़ात रोय. 8 आन एपोद बांदीइलाआ काजे बोणावल्यी जे पट्टी तियाआ बोणावट तियाआ होसुज जोवे, आन आरी लागतीज जोवे, आन होनाआ आन निलो, जामण्यो आन रात्ला रंगोवाले आन पात्ला हुतोअ कपड़ाआ जोवे. 9 फाशेए बेन सुलेमानी मोंड्या लेत कोइत तियांपोअ इस्राएलोअ पोर्‍याआ नाव कोरवीइजा, 10 तियांआं नावो मेहें रोत सोव नावे एका मोंड्या पोअ, बिहीरा पोअ सोव, एहें कोइत इस्राएलोअ पोर्‍याअ जल्माआ पुरमाणे कोरवीइजा. 11 मोंड्या कोरवीइनाराआ कामोंअ होस जेहें कोइत सापू कोरवीइतेहे, तेहेंज कोइत तियां बेन मोंड्या पोअ इस्राएलोअ पोर्‍याआ नावे कोरवीइजा; आन तियांहां होनाआ कप्पा कप्पामेहें जुड़ी देजा. 12 आन बेनू किड़्याहा एपोदोअ बेनू खांदपोट्टीपोअ लागाड़जा, ते इस्राएलोअ ओर कोआड़नारा मोंड्या ठोरे; मोन्जे आरोन तियांआं नावे यहोवा आगाड़ी खांदोपोअ ओरेए काजे लागाड़ीत रोय. 13 फाशेए होनाआ कप्पा बोणावजा, 14 आन दोरीइ होस गुथल्यी बेन हाकल सोका होनाआ बोणावजा; आन गुथल्यी हाकल तियां खुणामेहें जुड़जा."

15 "फाशोअ न्यायोअ सातीइ पोट्टाहा बी कारागिरोअ कामोवाअहीं तियार कोइत लेजा, एपोदोअ होस होनाआ, आन निला, जामण्या आन रात्ला रंगोअ आन हाना पात्ला हुतोअ कपड़ाआ बोणावजा. 16 ओं शार खुण्यो बेनु वोल जोवे, आन तियाआ लांबी आन सोवड़ाय एकेक बिलासोअ जोवे. 17 आन तियामेहें शार ओली मोंड्या जुड़जा. पेहली रांगीमेहें मोगला डोणोअ शार मोंड्या ए होय: माणिक्य, पद्यराग आन लालड़ी जोवे; 18 दुसरी रांगीमेहें मरकत, निलमणी आन हिरा. 19 तिसरी रांगीमेहें लसम, सुर्यकांत आन निलम; 20 आन शोवथी रांगीमेहें फिरोजा, सुलेमानी डोण आन यशब रोय; ओं आखो होनाआ कप्पा कप्पामेहें जुड़जा. 21 इस्राएलोअ पोर्‍याअ जेतेहे नावे होय तेताहाज मोंड्या जोवे, मोन्जे तियांआं नावोअ गणतीइ अनुसार बारा नावे कोरवीइजा, बारा पारवाड़ी मेहें रोत एक एकाअ नावे एकेक किड़्यापोअ एहेलोहो कोरवीइजा जेहेलोहो सापू सापात जाय. 22 फाशोअ सातीइ पोट्टापोअ दोरीइ होस विईंत सोको होनाअ हाकली बोणावजा. 23 आन सातीइ पोट्टामेहें होनाआ बेन कोड़यी लागाड़जा, आन बेनु कोड़ीही सातीइ पोट्टाआ बेनु खांदोअ सेवड़ापोअ आगल्यीइ वोल लागाड़जा. 24 आन होनाआ बेनु विंइल्यी हाकलेहे तियी बेनु कोड़ीमेहें जे सातीइ पोट्टाआ सेवड़ापोअ लागाड़जा; 25 आन गुथल्या बेनु हाकलीइ बेनु सेड़ा बेनु खांदोपोअ जुड़वीत एपोदोअ बेनु खांदोअ पोट्टापोअ तियाआ आगाड़ी लागाड़जी. 26 फाशोअ होनाअ बेनु कोड़यी बोणावीत कोइत एपोदोअ निसर्‍याआ सेवड़ापोअ मायतीइ वोल लागाड़ीलोअ. 27 फाशोअ तिया होनाअ बेन कड़ी बोणावीत कोइत एपोदोअ बेनु सेवड़ा कोरेपोअ, निसे रोत तियाआ आगाड़ी आन तियाआ जुड़पाआ जागे पोन सातीइ पोट्टाआ निसर्‍याआ भागोम आगाड़ीइ वोल जुड़पाआ कलाकारी वाअहीं विईंल्या पोट्टाअरी लागाड़जा. 28 आन सातीइ पोट्टाआ तियाआ कोड़ी वाअहीं एपोदोअ कड़ी मेहें निला दोरा वाअहीं बांदजा, एहें कोइत तो एपोदोअ बोणावल्या पोट्टापोअ मजबुत बांदाइत रोय आन सातीइ पट्टू एपोद पोअ रोत आलाग ने ओवुहूं जोवे."

29 "जेहेलाम आरोन सोका जागामेहें जाय, तेहेलाम सातीइ पोट्टापोअ इस्राएलोअ बारा पारवाड़ीइ बारा घराणाआ नावे लागाड़ल्ये जोवे, जिया वाअहीं यहोवाआ आगाड़ी तियांआं ओर हादाफल रोय. 30 आन तु सातीइ पोट्टापोअ उरिम* आन थुम्मीमोहों मिकजी, आन जाहां जाहां आरोन यहोवाअ आगाड़ी आवे, ताहां ताहां ते तियांआं सातीपोअ लेत रोय. एहें कोइत आरोन इस्राएलोअ काजे यहोवाअ न्यायोहो तियाआ सातीपोअ लेत रोय."✝

31 "फाशोअ एपोदोअ कोअते कोट पुरो जामण्या रंगोअ बोणावजा. 32 तियाआ बोणाव एहेलुहू कोअजी के तियाआ विसमेहें मुन्को फोहाड़ुहूं डुसू जोवे, आन तिया डुसाआ शारु वोल विईंल्या दोरा वाअहीं कालोरोअ होस मजबुत कोअजी के तों ने फाटुहूं जोवे. 33 तियाआ निसेए भागोमेहें शारु वोल निला, जामण्या आन रात्ला रंगोअ कपड़ाआ डाड़ींबो बोणावजा, आन तियाआ विस विसमेहें शारु वोल होनाआ कागर्‍यी लागाड़जा, 34 मोन्जे एक होनाआ कागऱ्यी आन एक डाड़ींबो, फाशोअ एक होनाआ कागरी आन एक डाड़ींबो एहें कोइत कोटोअ निसा जागामेहें शारु वोल एहेलोज जोवे. 35 आन आरोन ओ कोट सेवा कोइलोअ वेले पोवे, के जाहां जाहां तो सोका जागाअ मायते यहोवाअ आगाड़ी जाय नेत बाअथे निहे, ताहां ताहां तियाआ शब्द होंबलाअहूं जोवे, नेते तो मोइत जाय."

36 "तु सोका होनाआ एक पोट्टी बोणावजी आन ताहरुउ तियापोअ जेहेलोहो सिक्कापोअ आक्शर कोरवीत लेखतेहे तेहेलोहो कोरवीइजी: ‘यहोवा देवोहो होपाअलो.’ 37 आन तियीही पागड़ीइरी लागाड़ीत हुंबे निंडेज निल्ला दोरा वाअहीं बांदजी. 38 आन तो आरोनोअ निंडाअपोअ रोअहूं जोवे, एताआ काजे के इस्राएलवाले माअहें जे सोकी वस्तुउ भेट आपिलोअ बाप्तिमेहें काविहीं सुकभुल ओत जाय, ताहां तियाआ दोस आरोनोपोअ लागे, एहें कोइत देव तुमाआं स्विकार कोए."

39 "आन कोट सिणा हुतोअ शार खुण्यो आंगड़ो गुथीत बोणावजी, आन एक पागड़ी बी हाजा मेर्‍याआ सिणा पात्ला हुतोअ कपड़ाआ बोणावजा, आन हाजा कारागीर कोअल्या कामोअ सोन्गावालू कंबरेए पोट्टू बोणावजी."

40 "फाशोअ आरोनोअ पोर्‍याआ कोअते आंगड़े, कंबर पोट्टू, टोपी बोणावजी, तियांआं एं आंगड़े वोडाय आन होबाआ काजे बोणावजी. 41 ताआ पाही आरोन आन तियाआ बेटाह्हाआ काजे एं आंगड़े पोवाड़ीत तियांपोअ तेल ओलीत कोइत आंगे कोअजी आन तियांहां पुंजारा कोत माआ काम कोए तेहें काजे अभिशेक कोअजी. 42 आन तियांआं काजे कंबरे रोत निसे जांआं टापाइत रोय तेहें काजे सुट बोणावजी आन तें हाजा मेर्‍योअ हुतोअ बोणावजी. 43 आरोन आन तियाआ पोर्‍या मिलन तोंबामेहें नेताहां सोका जागाम पुंजारा कोत सेवा कोआ जाय, तेहेलाम कायम ते सुट पोवुहूं जोवे नेते उगड़ाअलाज देखाअया, ताहां मोइत जाय. ओ आरोन आन तियाआ घराणाआ काजे हादाफल्युउ नियम होय."