1 फाशोअ एलीम इंहीं रोत इस्राएलोअ आखी मंडड़ी, मिसर देसोम रोत निहींये ताहां बिहीरा मोयनाआ पोनरवे दिहे, एलीम आन सिनाय डोगोअ विसमेहें सिन नावोअ जंगलोमेहें आवीत पोती. 2 जंगलोमेहें इस्राएलोअ आखी मंडड़ी मोशे आन आरोनोअ विरुद्दामेहें टुटणे वोल्ये. 3 आन इस्राएलवाले तियांहां कोने वोल्ये, "जेहेलाम आमू मिसर देसोमेहें माहोंअ आंडीइ जागे बोहीत कोइत ताराईत रोटू खाताते, ताहां जर आमू यहोवाआ आथो वाअहीं माइत टाकाअते बी तेबी तों हाजो ओतो; पोन तुमू आमुहूं या जंगलोमेहें या आखा समाजोहो फुके माइलोअ काजे काडीत लेत आवयाहा."✝

4 ताहां यहोवा मोशेहे कोयो, "पाला, आंय तुमाआ काजे जुगोम रोत खाअलोअ वस्तु टाकीहीं; आन एं माअहें दाड़ीइज बारथे जात कोइत दाड़ीइज रोटा टोलू कोए, तिया वाअहीं आंय तियांआं परिक्शा कोअहीं के तें माआ नियमो पोअ सालतेहे के नाहां.✝ 5 आन एहलोहो ओवे के साहावा दिही तो खाणो बिहीरा दिहो रोत बेन भाग जाअखो रोये, याअकाजे जों किबी तें तिया दिही टोलू वालहा, तियाहा तियार कोइत मिका."

6 तिहीं वाअहीं मोशे आन आरोने आखा इस्राएलोहो कोयो, "हांस्तीइ वेले तुमू जाईंत लेहा, के जो तुमुहूं मिसर देसोम रोत काडीत लेतायुहू तो यहोवा होय, 7 हांदाआ वेगीइ तुमुहूं यहोवाआ उजालो देखाय; काहाके तुमू जिया देवोअ विरुद्दाम टुटणीइतेहे तिये उनाइत लेदोहो, आन आमू कि होय, के तुमू आमापोअ टुटण्या कोअताहा." 8 जेहेलाम मोशे कोयो, "ओं तेहेलाम ओवे जेहेलाम यहोवा हांस्तीइ वेले तुमुहूं खाअला काजे माहां आन वेगीइ रोटू आपे; काहाके तुमू जे तियापोअ टुटणीइतेहे तियाहा तो उनाअहे. आन आमू कि होय? तुमाआ टुटणीइलोअ आमाअरी नाहां पोन यहोवाअरी होये."✝

9 फाशोअ मोशे आरोनोहो कोयो, "इस्राएलोहो आखी मंडड़ीही हुकुम आपे के यहोवाअ आगाड़ी तियाआ हुंबर आवे, काहाके तियांआं टुटणे कोइला उनाअयुहू." 10 आन एहलोहो ओवो के जेहेलाम आरोन इस्राएलोअ आखी मंडड़ीअरी एहेलीज गोठी कोअया कोअतुतो के उसकाहीज तियां जंगलोअ वोल नजर टाकीत कोइत पाल्यो, आन तियांहां यहोवाआ उजालो वाद्लामेहें देखाओ वोल्यो. 11 ताहां यहोवा मोशेहे कोयो, 12 आंय "इस्राएलवालाआ टुटणीइलोअ उनाअयुहू. तियांहां को, दाड़ीइज हांजेपोअ तुमू माहां खाहा आन वेगीइ तुमू जोवे तेतु रोटू खाहा, ताहां तुमुहूं मुंदू जाय के आंय तुमाआं देव यहोवा होय."

13 तेदिहीं हांजे पोअ लावे सिड़े आखू पोड़ावू पोइत बोहीत गोये, वेगीइ वेले पोड़ावाआ मेरे जागेज साकलो पोड्यो.✝ 14 जेहेलाम साकलो उगात गोयो ताहां पुयीं पोअ वाहीं एवडेहे खोरपण्ये जेहें पोड़ीत रोल्ये देख्ये. 15 जाहां तों देखीत इस्राएलवाले माअहें एकान एकाहा फुसे वोल्ये, "ओं की होय?" काहाके तियांहां ओं की होय तो ने मुंदू ओतू.

मोशे तियांहां कोयो, "देव ओं ओन तुमुहूं खाय तेहें काजे तुमुहूं आप्योहो.✝ 16 जो आदेश यहोवा आप्युहू तो ओ होय: तुमू तियाम रोत तुमाआ गरज ओय तेतोज खाअलाअ लेजा. मोन्जे तुमु तुमाआ माअहुंउं गणतीइ इसाबो वाअहीं एका एक जोंअ फासाड़ी आँठ वाटकी मोन्जे एक ओमेर* टोलू कोअजा; जियाआ पोड़ावामेहें जेतेहे ओय ते तियांआंज काजे टोलू वाल्या कोए."

17 आन इस्राएलवाला तेहेंज कोअयो; आन कोडे जाअखो कोडे थोड़ोज टोलू वाल्यो. 18 जेहेलाम तियां ओमेरो वाअहीं माप्यो, ताहां जियापोअ जाअखो ओतो तियाआ जाअखो ने ओवो, आन जियापोअ थोड़ो ओतो तियाहा कमी ने ओवो;✝ काहाके एकेक माहुंउं तियांआं खाणो मापोवाअहीं लेदोतो. 19 फाशोअ मोशे तियांहां कोयो, "कोडोज यामेहें रोत उगारीत वेगीइ जाआं मा मिकहा." 20 तेबी तियां मोशेए गोठ ने मान्यी; याअकाजे जेहेलाम थोड़ेक माअहें तियाम रोत थोड़क वेगीइ जांआं मिकीत रोये, ताहां तिया मेहें किड़ा पोड़ीत गोया आन तो गोंदाओ वोल्यो; ताहां मोशेहे तियांपोअ खोत लागी. 21 ते वेगीइ जाआं दाड़ीइज तियांहां जोवे तेतोहो टोलू वालीत लेतेते, आन जेहेलाम जाअखो तोपतोतो तेहेलाम, तो ओगलीत जातो तो.

22 फाशोअ एहलोहो ओवो के साहावा दिही तियां बेन भाग, मोन्जे एका माअहों फासाड़ी बेन बेन ओमेर वाटीत लेदो, आन मंडड़ीइ आखा पुडारी आवीत कोइत मोशेहे कोत देदे. 23 मोशे तियांहां कोयो, "यहोवा एहें कोहे के, हांदाआ आरामोअ दिही मोन्जे यहोवाआ काजे सोकू दिही आरामोअ रोय, याअकाजे तुमुहूं जो रांदीइलोअ ओय तियाहा रांदा, आन जों सुड़वीइलोअ ओय तों सुड़वा, आन यामेहें रोत जों वासाय तियाहा वेगीइ जाआं मिकीत रोवा."✝ 24 जेहेलोहो तियां मोशेए या आदेशोअ पुरमाणे वेगीइ जाआं मिकीत रोये, ताहां तो ने खाराब ओवो, आन तियामेहें किड़ा ने पोड़्या. 25 ताहां मोशे तियांहां कोयो, "आज ओंज खावा, काहाके आज यहोवाआ आरामोअ दिही होय; याअकाजे आज तुमुहूं तो सापड़ा मेहें ने जोड़े. 26 सोव दिही ते तुमू टोलू वालहा; पोन सांतवू दिही आरामोअ दिही होय, तियामेहें तो ने जोड़े."

27 तेबी थोड़ेक माअहें हांतवा दिही बी टोलू वालीइलोअ काजे बाअथे गोया, पोन तियांहां किज ने मिल्यो, 28 ताहां यहोवा मोशेहे कोयो, "तुमू केदिहीं जाआं माआ नियमोहों ने माननारे? 29 पाला, यहोवा जो तुमुहूं आरामोअ दिही आप्युहू, याअकाजे तो तुमुहूं साहावा दिहोअ दिही बेन दिहोअ रोटू तुमुहूं आपेहे; याअकाजे तुमू आपा जिव जिवोअ कोअ बोहीत रोजा, हांतवा दिहोहो कोडो जागापोअ रोत बाअथे मा जाहा." 30 तियाहा काजे माअहें हांतवा दिही आराम कोअयू.

31 इस्राएल वाले माअहें तिया वस्तुउ नाव मान्ना मेक्यो; धान्याआ आकारोअ होस आसलो बिजो ओतो, आन तियाआ होवाद मोदोअ बोणल्या सातड़ाआ होस ओतू.✝ 32 फाशोअ मोशे कोयो, "यहोवा जो आदेश आप्यू तो ओ होय के याम रोत ओमेर पोइत ‘मान्ना’ आपाआ पिड़ी पिड़ीइ काजे मिकीत रोजा, जिया वाअहीं ते जाएं के यहोवा आमुहूं मिसर देसोम रोत काडीत कोइत जंगलोमेहें केहेलुहू रोटू खावाड़तुतो." 33 ताहां मोशे आरोनोहो कोयो, "एक बासोन लेत कोइत तियाम मान्ना पोइत लेत कोइत तियाहा यहोवा देवोअ आगाड़ी मेकी दे कि तो तुमाआं पिड़ीइ काजे मिकीत रोय."✝ 34 जेहेंकोइत यहोवा मोशेहे आदेश आप्युतो, तियाआ अनुसार आरोने तियाहा साक्शीइ पेटीइ आगाड़ी तोअयो के तो तिहीं मिकीत रोय. 35 इस्राएल जाअहूं जाआं वोहती कनान देसोम ने पोत्ये ताअहूं जाआं, मोन्जे सालही वोरह्ये जाआं मान्ना खाते रोये; ते जाअहूं जांआं कनान देसोम हाद्दीम ने पोत्ये ताअहूं जाआं मान्ना खाते रोये.✝ 36 एक ओमेर ते एफाआ* दाहवू भाग होय.