Êxodo 20

दाहा आदेश

1 ताहां देवे एं आखे वसने कोये: 2 "आंय ताआ यहोवा देव होय. तुमू मिसर देसोम वेठाऱ्ये ओते, ताहां आंयुज तुमुहूं तिहीं रोत काडीत लेत आयुहू.

3 "तु माहूं सोड़ीत बिहीरा कोडाहाज देव कोत मा मानही.

4 "तु ताआ काजे कोड़ल्यी मुर्ती मा बोणावही; उसे जुगोमेएं नेत निसे धरतीपोअ नेत धरतीइ निसे पाअयोंमेएं, किहाआज मुर्ती मा बोणावही.✝20:4 निर्ग 34:17; लेवी 19:4; 26:1; कायदा 4:16 5 तु तियांहां टुंगू पोड़ीत मा वोंदही, आन तियांआं सेवा बी मा कोअही; काहाके आंय ठोटाय*20:5 ठोटाय जलन कोअनारु कोअनारु देव होय, आन जें माआं सीस कोअतेहे तियांहां डोंड आपत्लू; आंय तियांआं पोऱ्याआ पोर्‍याहा शार पिड़ी जाआं तियांआं आब्हाआ बोदले डोंड आपत्लू. 6 पोन जें मापोअ मेर कोअतेहे आन माआं आदेश मानतेहे तियांआं हाजारेन हाजार पिड़ीपोअ आंय दया कोअत्लू.✝20:6 निर्ग 34:6-7; गणती 14:18; कायदा 7:9-10

7 "तु ताआ यहोवा देवोअ नाव फालतू मा लेही; काहाके जो कोडो तियाआ नाव फालतू लेय, तियाहा तो डोंड आपे.✝20:7 लेवी 19:12

8 "आरामोअ दिहोहो ओर कोइत सोकू दिही कोत मानजी.✝20:8 निर्ग 16:23-30 9 सोव दिही जाआं तु मेहेंनत कोइत ताआ आखो कामकाज कोअजी;✝20:9 निर्ग 23:12 10 पोन सांतवू दिही ओ आरामोअ दिही कोत देवोअ काजे होप्युहू, ये दिहे तु, नेत ताआ पोऱ्ये, नेत पावरे, नेत डोगरे, नेत काअलोज पारको माहुंउं जों ताआ देसोम रोहे तों कीज कामकाज ने कोअहूं जोवे; 11 काहाके साहावा दिहोअ दिही यहोवा जुग, धरती, दोऱ्या, आन जों किबी तियाम होय, तों आखो बोणायो, आन हांतवे दिही आराम कोअयू; तियाहा काजे यहोवा देवे आरामोअ दिहोहो आशिर्वाद आप्यू आन सोकू ठरव्यु.

12 "तु ताआ आब्हाआ आन ताआ आयहीइ मानपान कोअजी, जिहीं वाअहीं जो देस ताआ देव यहोवा ताहूं आपेहे तियामेहें तू जाअखीलाहा दिही जाआं रोही."

13 "तु खुन मा कोअही.✝20:13 उत्प 9:6; लेवी 24:17; रोम 13:9; याकोब 2:11; मत्तय 5:21

14 "तु सिनालो मा कोअही.

15 "तु बांडगाय मा कोअही.✝20:15 लेवी 19:11

16 "तु कोडाआ विरुद्दाम ठोगोअ साक्शी मा आपही."

17 "तु कोडाआ कोओअ लालस मा कोअही; आन मा कोडाआ बोईंइ लालस कोअही, आन मा कोडा पावरोअ के बोलोद, गोदड़ाआ, के कोडाआ; कोड्लीज वस्तुउ लालस कोअही."

इस्राएल माअहोंहों बिकाणो

18 जाहां आखे माअहें वाद्लो गाजीइलोन विजलीइलो आन तुरीइ आवाज उनाअते जात डोगोपोअ तुमाणू पालते रोये, ताहां बिकेवाअहीं कापते जात सेटे सेटे उबे रोत गोये.✝20:18 इब्री 12:18 19 आन तें मोशेहे कोने वोल्ये, "तुज आमाअरी गोठी कोअजी, ताहांज आमू उनाअहूं; पोन देव आमाअरी गोठी ने कोअहूं जोवे, नेत आमू मोईत जाहूं."

20 मोशे माअहोंहों कोयो, "बिहा मा; काहाके देव तुमाआ परिक्शा लेअलोअ कोअते आयुहू, मोन्ज्ये तुमू तियाहा बिहा ताहां तुमू पाप ने कोअहा." 21 आन ते माअहें सेटेज उबे रोये पोन मोशे तिया जाडा आंदाराम गोयु जिहीं देव ओतू.

वेदीइ बाप्तिम नियम

22 ताहां यहोवा मोशेहे कोयो, "तु इस्राएलोहो माआ ए गोठी कोत आप: तुमू माअहें सोताहाज देख्येहे के आंय तुमाअरी जुगोम रोत गोठी कोअयीही. 23 तुमू माहूं सोड़ीत, मोन्जे तुमाआ कोअते सांदीइ नेत होनाआ देवे मा बोणावहा. 24 माआ काजे कादवोअ एक देवान्यो बोणावजा, आन तियापोअ आगीइ गाराहा, शांतीबली आपजा, तुमाआ मेडे, डोगरेन बोकड़े गाराहा आपजा. आन जिहीं जिहीं आंय माआ नावोअ ओर कोआड़ीहीं, तिहीं तिहीं आंय आवीत कोइत तुमुहूं आशिर्वाद आपीहीं. 25 आन जर तुमू माआ काजे डोणोअ देवान्यो बोणावहा, ताहां कोड़ल्या डोणोअ मा बोणावहा; नेते जिहीं तुमू तियापोअ आथ्यार लागाड़हा तिहीं तुमू तियाहा एठो कोई देहा. 26 आन तुमाआ डिल नागरो देखात पोड़े एहलोहो निहीणावालो देवान्यो माआ कोअते मा बोणावहा."