1 "बसालेल आन अहलियाब आन आखे हुशार माअहें जियांहां यहोवा देवे एहेलिही हुशार बुद्दी आन समज आप्यीते के तें यहोवाआ आखा आदेशोअ पुरमाणे सोका जागाआ सेवाआ काजे आखी जातीइ कामे कोइत सेके."

2 ताहां मोशे बसालेल आन अहलियाब आन आखा हुशार माअहोंहों जियांअ मोनोमेहें यहोवा देवे खास बुद्दी आप्यीते, या कामोमेहें मदत आन सेवा कोइलाआ तियांआं इश्शा ओती. 3 आन इस्राएलवाले माअहें जे जे भेट लेत आयेते, ते आखी भेट तियां मोशेए जागेहे रोत सोकू तोंबु बोणावीइलोअ काजे लेत आया. माअहें सोताआ खुसी वाअहीं तियांआं भेट लेत आविइलोअ सालुज मिक्यो. 4 आन सोका जागाम काम कोअनारा आखा खास बुद्दीवाला कारागिर तियांआं काम सोड़ीत कोइत मोशेए जागेहे आया, 5 आन कोना वोल्या, "जिया कामोहों कोइलाआ आदेश यहोवा देवे आप्युहू तियाहा जेतीही वस्तु जोवे तिया रोत बी जाअखो तें लेत आयेहे."

6 ताहां मोशे पोड़ावामेहें या आदेशोअ परसार कोआड़्यु, "माटी ओय, नेते बोईं ओय, कोडोज सोका जागाआ काजे भेट मा लेत आवहामे." ताहां माअहें भेट लेत आविलोअ बोंद ओवो 7 काहाके आखो काम बोणावीइलाअ काजे जेत्ता सामानोअ गरज ओती, तियाआ रोत जाअखो सामान पोतीत लागोतो.

8 काम कोअनारे जेतेहे बुद्दीमान कारागिर ओते तियें रोअलाअ जागाअ काजे पात्ला हुतोअ वाअहीं बोणल्ये आंगड़ाआ, आन निला, जामण्यो आन रात्ला रंगोअ हुतोअ दोहो पोड़दाआ फाकावाला देवदूतोअरीज सित्रे हिंव्ये. 9 एकेक पोड़दू आँठ्ठावीस आथ नांबू *आन शार आथ पोली ओतू; आखा पोड़दा एकाज मापोअ बोणायाते. 10 तिये पास पोड़दा एकान एकाअरी जोड़ी देदा, आन बिहीरे पास पोड़दा बी एकानेकाहा जोड़ी देदा. 11 आन जिहीं ए पोड़दा जुड़्या तिहीं बेनू कोरेपोअ तिये निला निला फांदा लागाड़्या. 12 तिये बेनू कोरे पोअ पोन्नास पोन्नास फांदा एहें कोइत लागाड़्या के ते एकान एकाअ सामने ओता.

13 आन तिये पोन्नास पोन्नास होनाआ आकड़ा बोणावया, आन तियां वाअहीं पोड़दाहा एकान एकाअरी जोड़ी देदे आन तियां आखाहा जोडीत कोइत एक रोअलाआ मंडप बोणित गोयू. 14 फाशोअ रोअलाआ तोंबाआ उपोअ तोंबाआ काजे तिये बोकड़ाआ सिंग्याआ ईग्यार पोड़दा बोणाया. 15 एक एक पोड़दाआ लांबी तीस आथ आन पोली शार आथोअ ओवी; आन ईग्यार पोड़दा एकाज मापोअ ओता. 16 तियामेहें रोत तिये पास पोड़दा आलाग आन सोव पोड़दा आलाग जोड़ी देदा. 17 आन जिहीं बेनू जोड़ी देदा तिहींइं कोरे पोअ पोन्नास पोन्नास फांदा लागाड़्या. 18 आन तिये तोंबा जुड़ीइलोअ काजे तांबाआ पोन्नास आकाड़ा बी बोणावया जिया वाअहीं तो एक ओत जाय. 19 आन तिये तोंबाआ काजे रात्ला रंगोवाअहीं रंगल्ये मेडाआ सांबड़ाआ एक फांगरुउ बोणायो आन तियापोअ सुस नावोअ मासाआ सांबड़ाआ टापणो बोणायो.

20 फाशोअ तिये रोअलाअ तोंबाआ काजे बाबल्योअ लाकड़ाआ रिपाहा उबे रोय तेहें काजे बोणावये. 21 एकेक रिपाआ लांबी दोह आथ आन पोली डेड़ आथोअ ओवी. 22 एकेका रिपामेहें रोत एकानेकाहा जुड़ीइलोअ काजे बेन बेन खाते बोणाये, मिलापवाला तोंबाआ आखे रिपे तिये एहेंज कोइत बोणावये.

23 तिये मिलापवाला तोंबाआ कोअते रिपाहा बोणावये के देहामोअ वोल विही रिपे लागे; 24 आन तिया विही रिपाआ निसे सांदीइ सालिही खाते, मोन्जे एकेक रिपाआ निसेए तियाआ बेन बुंद्याआ काजे तिये बेन खाते बोणाये. 25 आन मिलापवाला तोंबापोअ बिहीरी वोल, मोन्जे पालामाआ वोलेहे बी तिये विही रिपे बोणाये; 26 आन तियांआं काजे बी तिये सांदीइ सालही पाया, मोन्जे एक एकाअ रिपाआ निसे बेन बेन पाया बोणाया. 27 आन मिलापवाला तोंबाआ फासाड़ी वोल, मोन्जे बुट्टामाआ वोलेहे तिये सोव रिपे बोणावये. 28 आन फासाड़ीइ वोल्याआ भागोअ काजे खुणाआ काजे तिये बेन रिपे बोणावये. 29 ते निसे रोत बेन बेन भागोअ बोण्ये, आन बेनू भाग उपोअ जाआं एकेकी कोड़ीमेहें जुड़ी देदे; तिये तियां बेनू रिपाआ आकार एहलुज बोणावयू. 30 एहेंकोइत आँठ रिपे ओवे, आन तियांआं सांदीइ होल खाते ओवे; मोन्जे एक एक रिपाआ निसे बेन बेन खाते ओवे.

31 तिये बाबल्योअ लाकड़ाआ डांडा बोणाया, मोन्जे मिलापवाला तोंबाआ एकी वोलेहे काजे पास डांडा, 32 आन मिलापवाला तोंबाआ बिहीरी वोलेहे रिपाआ काजे पास डांडा, फासाड़ी बुट्टामाआ वोल ओतू तियाआ काजे बी पास डांडा बोणाया. 33 आन तिये विस मेऱ्याआ सोवकटीइ रिपाआ विसमेहें रोत तोंबाआ एकी मेरे रोत बिहीरी मेरे जाआं पोते एहेलोहो बोणायो. 34 आन रिपाहा तिये होना वाअहीं मोडाड़्ये, आन डांडाआ आलवीइलोअ कोड़्यी बी होनाआ बोणावयी, आन डांडा बी होनावाअहीं मोडाड़्या.

35 फाशोअ तिये निला, जामण्या आन रात्ला रंगोअ सिणा हुतोअ आंगड़ाआ विसमेऱ्युउ पोड़दू बोणावयू; तिया पोअ तिये करुबोअ सित्रे बोणावये. 36 तिये बाबल्योअ लाकड़ाआ शार खांबा बोणावया, आन तियांहां होना वाअहीं मोडाड़्या; आन तियांआं आकड़्यी होना वाअहीं मोडाड़्यी, तियांआं काजे तियें सांदीइ शार कुर्सी बोणावयी. 37 तिये तोंबाआ बाअणाआ काजे निला, जामण्या, रात्ला रंगोअ साअकाआ आन सिणा हुतोअ साअकाआ नक्शीइ काम कोअल्या पोड़दू बोणावयू. 38 आन तिये पास खांबा आन तियांअरी आकड़ा बी बोणावयी. तियांआं उपऱ्युउ भाग आन तियांआं जुड़ीइलोअ बांदपोट्टीही होना वाअहीं मोडाड़्यी; आन तांबाआ पास पाया बोणाया.