1 "फाशुउ जो नियम ताहूं तियांहां समजाड़ीइलोअ होय तो ओ होय: 2 जर तुमू एखा इब्री पावरोहो वेसातू लेहा, ताहां तो सोव वोरह्ये जाआं सेवा कोअतू रोय, आन सांतवा वोरह्योम मोकलु ओत कोइत पागार लेत कोइत जातु रोय. 3 जर तो सोड़लुज आयुय, ताहां सोड़लुज जातु रोअहूं जोवे; आन जर लाडीइरी आयुय, ताहां लाडीइरीज जातू रोअहूं जोवे. 4 आन जर तियाआ मालख्ये तियाहा लाडी होदीत आप्यीये, आन तियीइ पोऱ्ये ओत गोयेय, ताहां तियाआ लाडी आन तें पोऱ्ये नेहें मालख्योअ रोय, पोन तो एखलुज सुटीत जातू रोअहूं जोवे.✝ 5 पोन जर तो पावर तियाआ मालख्योअरी रोअहूं होदतुये आन तियाआ मालख्योपोअ आन तियाआ बोईं-पोऱ्यापोअ मेर कोअतुये, आन सोड़ीत जाअलोअ ईश्शा ने ओय, 6 ताहां तियाआ मालिख तियाहा देवोअ सामने लेत जाअहूं जोवे; तिहीं रोत बाओअ जागे नेत सोवकोटीइ जागे लेत जात हुयाली टासणी वाअहीं तियाआ कान विंदी देअहूं जोवे. तिहीं रोत तो पावर तियाआ मालिख मोए ताअहूं जाआं सेवा कोअतू रोय."

7 "जर एखू तियाआ पोऱ्यीही पावरायीमेहें वेसीत खात जाय, ताहां तियीही माट्योअ होस पावरायीमेहें सुटका कायने जोड़े. 8 जर तियीइ मालिख तियीही लाडी बोणावीत खुस ने रोय, ताहां तियीही फाशीइ तियीइ आब्हाहा वेसी देत सोड़ली कोई देअहूं जोवे; पोन पारका माअहोंहों वेसीइलोअ तियाहा आधिकार कायनाहां. 9 जर तिये तियाआ बेटाह्हाअरी तियीइ वेहेवाल कोइ देदोय ताहां, तो तियीही पावरोअ होस नाहां पोन बेटिह्हीइ होस वागवुहूं जोवे. 10 जर मालिख बिहीरी लाडी बी होदे, तेबी पेल्लीइ बोईंइ खावटी, आंगड़े-पोतड़े आन तियीइ हक्क कमी ने पाडुहूं जोवे. 11 जर ए तिनू गोठी पुरी ने कोए, ताहां ते बोईं बिगर दाम सुकाड़्येज जाती रोअहूं जोवे."

12 "जों कोडो एखा माहुंहूं एतोहो देय के तों मोइत जाय ताहां तियाहा बी माईंत टाकुहूं जोवे.✝ 13 जर तो तियाआ माईलाअ काजे ने बोठू ओय, आन देवोअ ईश्शा वाअहीं तो तियाआ आथोम पोड़ीत गोयु ओय, ताहां एहेलाहा माहुंउं निकाइलोअ काजे आंय एक जागू ठरवीहीं जिहीं तो गुगदू वोले. 14 पोन जर कोडू जाईंजाईंज एखाहा देनू जाय आन तियाहा माईं देय, ताहां तियाहा माइलोअ काजे माआ देवान्याआ जागे रोत सेटे लेत जाजा."

15 "जों तियाआ आयहीही नेत आब्हाहा देनो जाय तियाहा माइत टाकी देअहूं जोवे.

16 "जों कोडो एखा माहुंहूं सोए, नेत लेत जात वेसी देय, नेत तियाआ जागे देखाय, ताहां तियाहा बी माईंत टाकजा.

17 "जो तियाआ आयहीही नेत आब्हाहा हाराप आपे तियाहा बी माईंत टाकजा.

18 "जर माअहें सुलाअतेय, ताहां बेनुहूं बी डोणोअ नेत तुंबावाअही एहलोहो देजा के ते ने मोए, पोन आथरुपोअ लोटीत रोय, 19 जेहेलाम तो उठीत कोइत डेंगारीइ आदारो वाअहीं बाअथे सालो-फिरो वोले, ताहां तियाहा देनारो माहुंउं निर्दुस ठोरे; तियी वेले खर्साआ कोअते नुकसान भरपायी आपी देअहूं जोवे, आन तियाहा हाजो कोई देअहूं जोवे.

20 "जर एखे मालख्ये तियाआ पावरोहो डेंगारी वाअहीं एतो देदो के तो तियाआ देद्लावाअहीं मोइत जाय, ताहां तों बोईं नेत माटी कोडो बी ओय, ताहां तिया मालख्योहो डोंड आपुहूं जोवे; 21 पोन जर तो एक, बेन दिही जिवतो रोयो, ताहां मालख्योहो डोंड ने आपुहूं जोवे, काहाके तो तियाआ धन होये.

22 "जर बेन माटी एकमेकाअरी सुलाअताये आन तियांआं धक्कू लागीत एखी पोटावाली बोईंइ पोऱ्यो पोड़ीत जाय, पोन कीज नुकसान ने ओवे, ताहां तियी बोईंइ माटी पोन्सामेहें जो डोंड ठरवे तो तियाहा पोअहूं पोड़े. 23 पोन जर तियी बोईंहीं काविंहीं नुकसान ओवे, ताहां जिवोअ बोदले जिव आपुहूं पोड़े, 24 डोआआ बोदले डोऊ, दातोअ बोदले दात, आथोअ बोदले आथ, गुडाआ बोदले गुडू, 25 आगीइ सटकाआ बोदले सटकू, जखमेए बोदले जखम आन मारोअ बोदले मार एहेलुहू डोंड आपुहूं जोवे.

26 "जर एखू मालिख तियाआ पावरोहो एहेलुहू मारु देय के तियाआ डोऊ फुटीत जाय, ते बोईं ओय नेते माटी, तियाहा सुटका कोइत जाअहूं देअहूं जोवे. 27 जर एखे मालख्ये एखा पावरोहो सोबीपोअ लागावतामेहें दात पाड़ीत टाक्युय, ताहां ते बोईं नेत माटी ओय, तियाहा दातोअ बोदले सुटका कोइत जाअहूं देअहूं जोवे."

28 "एखाआ बोलदे एखी बोईंहीं नेत माट्योहो सुंदीत माइत टाकी देय, ताहां तिया बोलदोहो दोगड़ाट्तीज माइत टाकुहूं जोवे, तियाआ माहां बी खाअहूं ने जोवे. पोन तिया बोलदोअ मालिख निर्दुस ठरे. 29 पोन जर तिया बोलदोअ हिंगो कोइत पेल रोतुज माअहोंहों सुंदीइलोअ टेव ओय, आन तियाआ मालख्योहो बी यी गोठीइ सुसना ओय, पोन तिये तिया बोलदोहो ने बांदीत मिक्यू तिहीं वाअहीं तो बोलोद एखा माट्योहो नेते बोईंहीं सुंदीत माईंत टाके, ताहां तो मालिख दोशी ठरे, तिया बोलदोहो डोणाटतीज माइत टाकुहूं जोवे, आन तिया मालख्योहो बी माईंत टाकुहूं जोवे. 30 पोन जर मोअनारा माहुंउं कुटुंबामेऱ्याआ माहुंहूं तिया मालख्योअ जिवोअ बोदले जे किम्मत ठरे ते तियाहा आपुहूं पोड़े. 31 जर बोलदे एखा पोऱ्याहा नेते पोऱ्यीही सुंदीत माए, तेबी ओज नियम लागू रोय. 32 एखे बोलदे जर पावरोहो सुंदीत माईंत टाके, ताहां तिया बोलदोअ धोणी तिया पावरोअ धोण्योहो तीस सांदीइ रुप्या आपुहूं जोवे आन तिया बोलदोहो दोगड़ाट्टीज माइत टाकुहूं जोवे. ओ नियम बोईंन माटी बेनुहूं हारकुज रोय."

33 "जर एखू वेए ने ताहां खाडू खुएं आन तिया पोअ कीज ने टापे, आन एखाआ बोलोद नेत गोदड़ो मांय पोड़े, 34 ताहां खाड्डाआ मालिख नुकसान भरपायी कोइत आपी देअहूं जोवे, आन जनवारोअ मालख्योहो तियाआ किम्मत आपुहूं जोवे आन मोल्यो जनवार तिया खाड्डावाला मालख्योअ रोय. 35 जर एखाआ बोलदे बिहीराआ बोलदोहो सुंदतीज माइत टाकी देय, ताहां जिवतू रोय तो बोलोद वेसीत बेनू मालिख निम्मे निम्मे पोशा वाटीत लेअहूं जोवे, आन तो मोल्यू बोलोद बी आरदू आरदू वाटीत लेअहूं जोवे. 36 पोन जर तो बोलद पेल्लूउज सुंदत्लू नावलाअतुये आन तियाआ मालख्ये तियाहा सुंदरा बोलदोहो मोकलू सोड़ल्याआ वाखरी दोशी ठरे; तो मोल्या बोलदोअ बोदले जिवतू बोलोद आपी देअहूं जोवे, आन मोल्यू बोलोद तो लेत जात रोअहूं जोवे."