1 "फाशोअ देवोअ हजरीइ तोंबाआ काजे दोहो पोड़दा बोणावाड़जी; तियांहां निला, जामण्या आन रात्ला हुतो वाअहीं हिंवल्या हाना हुतोअ दोहो तुकड़ाम रोत तिया रंगोअ हुतो वाअहीं बोणावाड़जी. 2 एकेक पोड़दू विहीन आंठ आथ पोलू शार आथ जोवे: आखा पोड़दा एकाज मापोअ जोवे. 3 पास पोड़दा एकमेकाअरी जुड़ल्या जोवे; फाशाआ ए जे बाकी पास पोड़दा रोय तेबी एकमेकाअरी जुड़ल्या जोवे. 4 आन जिहीं ए पोड़दा जुड़ात जाये तिहींइ बेनू मेरेपोअ निले फुन्दे लागाड़जा 5 बेनू कोरेपोअ पोन्नास पोन्नास फुन्दे एहलेहे लागाड़जा जे ते हुंबरा हुंबर ओय. 6 आन होनाआ पोन्नास आकाड़ा बोणावाड़जा; आन तिया पोड़दाहा तियांज आकाड़ा वाअहीं एक बिहीराहा जुड़जा के तोंबु एक बोणे."

7 "फाशोअ रोअलाअ तोंबापोऱ्याआ तोंबाआ काजे बोकड़ाआ सिंग्याआ ईग्यार पोड़दा बोणावाड़जा. 8 एकेक पोड़दू तीस आथ नांबू आन शार आथ पोलू जोवे; ईग्यार पोड़दा एकाज मापोअ जोवे. 9 पास पोड़दा आंगेज आन फाशाआ सोव पोड़दा आंगेज जुड़वुहूं लागाड़जा, आन साहावा पोड़दाहा तोंबाआ आगाड़ी मुउड़ीत कोइत वाली देजा. 10 आन तु पोन्नास आकड़ा तिया पोड़दाआ मेरेए भागोम रोत जो बाअथे रोत जोड़े आन पोन्नास आकड़ा बिहीरी वोग रोत पोड़दाआ मेरेए भागोम रोत जो बाअथे रोत जोड़ता आवे एहेलोहो बोणावाड़जा. 11 आन इसत्लेए पोन्नास आकड़ा बोणावजा, आन आकड़ाहा फुन्दामेहें लागाड़ीत कोइत तोंबाहा जुड़जा के तो जुड़ात एक ओत जाय. 12 आन तोंबाआ पोड़दाहा लटकीइल्यु भाग, मोन्जे जो आरदू भाग रोय, तो तोंबाआ सेवट्याआ भागोम लागीत रोय. 13 आन तोंबाआ पोड़दाआ लांबीम रोत आथ पोइत कोइत इंहीं, आन आथ पोइत कोइत तिहीं मोंडपोहो टापीइलोअ काजे तियाआ बेनू वोल टांगाइत रोल्यो जोवे."

14 "ताहरोअ तोंबाआ काजे रात्ला रंगोवाअहीं मेडाआ वातड़ा सांबड़ाआ टापीइलोअ वस्तु बोणावजा आन सुस नावोअ मासाआ सांबड़ाआ बी एक फांगीइलोअ बोणावजी.

15 "फाशोअ रोअलाआ मोंडपोहो उबो कोइलोअ काजे बाबल्योअ लाकड़ाआ रिपे बोणावाड़जा. 16 एकेक सोवकट दोहो आथ नांबी आन डेड़ आथ सोवड़ी जोवे. 17 एकेका रिपामेहें रोत एक बिहीराहा जुड़ल्याज बेन बेन डुसा जोवे; तोंबापोअ आखा रिपाहा एहें कोइत बोणावाड़जा. 18 मंडपोअ काजे जे रिपे तु बोणावाड़ीही तियांम रोत विही रिपे ते देहामोअ वोल जोवे; 19 आन विही रिपाआ निसे सांदीइ सालीही कुर्सी बोणावाड़जी, मोन्जे एक एका रिपाआ निसे तियाआ बोहीइलोअ काजे बेन बेन कुर्सी जोवे. 20 मंडपोअ बिहीरी वोगेहे मोन्जे पालामाअहें काजे विही रिपे बोणावाड़जा; 21 आन तियांआं काजे सालिही सांदीइ पाया बोणावाड़जा, मोन्जे एक एका रिपाआ निसे बेन बेन पाया जोवे. 22 मंडपोअ फासाड़ी वोल, बुट्टामा भागोअ काजे सोव पाट्ये बोणावाड़जा. 23 आन फासाड़ी भागोअ तोंबाआ खुणाआ काजे बेन पाट्ये बोणावाड़जी; 24 आन ते निसे रोत बेन बेन भागोअ जोवे, आन बेनू भाग उपऱ्याआ मुन्काअहीं जाआं एक एका आकड़ामेहें जुड़ात जाये; बेनू रिपाआ ओज आकार जोवे; ए बेनू खुणाआ काजे रोय. 25 आन आंठ रिपे जोवे, आन तियाआ सांदीइ होल कुर्सी रोय; मोन्जे एक एका रिपाआ निसे बेन बेन कुर्सी रोय."

26 "फाशोअ बाबल्योअ लाकड़ाआ पास आडवा डांडा बोणावजा, मोन्जे मंडपोअ एकी वोल रिपाआ काजे पास, 27 आन मंडपोअ बिहीरी वोल रिपाआ काजे पास डांडा, आन रोअलाअ जो भाग बुट्टामाअहें फासाड़ी वोल रोये, तियाआ काजे पास आडवा डांडा बोणावजा. 28 विसमेऱ्याआ आडवा डांडा जो रिपाआ विसमेहें ओय तो तोंबाआ एकी मेरे रोत ते बिहीरी मेरे जाआं पोते. 29 फाशोअ रिपाहा होना वाअहीं मोडाड़जा, आन तियाआ आकड़ा जे आडवा डांडाहां वातड़ो कोइत रोय तियांहां बी होनाअ वाअहीं मोडाड़जा; आन आडवा डांडाहां बी होना वाअहीं मोडाड़जा. 30 आन रोअलोअ तोंबाआ जागाहा एहें कोइत बांदजा के जेहेलोहो आंय ताहूं या डोगो पोअ देखाड़्योहो."

31 "फाशोअ निला, जामण्या आन रात्ला रंगोअ आन पात्ला हुतोअ बोणावल्या साअका वाअहीं एक विसमेऱ्युउ पोड़दू गुथीत कोइत बोणावाड़जा; तियापोअ वारुहूं करुबोअ सित्रे बोणावजा. 32 आन तियाहा होना वाअहीं मोडाड़ल्या बाबल्योअ लाकड़ाआ शार खांबोपोअ टांगजा, तियाआ आकड़ा होनाआ जोवे, आन ते सांदीइ शार कुर्सी पोअ उबा रोअहूं जोवे. 33 आन विसमेऱ्याआ पोड़दाहा आकड़ीइ निसे आलवीत कोइत, तिया विसमेहें साक्शी पत्राआ पेटीइ मायते लेत जाजा, एहें कोइत तो विसमेऱ्युउ पोड़दू तुमाआ काजे सोका जागाहा जाअखा सोका जागा रोत आलाग कोइत रोअहूं जोवे.✝ 34 फाश्योअ वादार सोका जागाम साक्शीइ पेटीपोअ दयासनोअ टापणो मिकजा. 35 आन तिया पोड़दाआ बारथे आराम कोइलाआ पालामाअहें पांगात मिकजा; आन तियाआ देहामाअहें टेबलोअ हुंबर दिवू मिकजा."

36 "फाशोअ तोंबाआ बाअणाआ काजे निला, जामण्या आन रात्ला रंगोअ आन पात्ला हुतोअ बोणावल्या साअका वाअहीं जिया पोअ सित्रे काड्ये ओय, एक पोड़दू बोणावजा. 37 आन या पोड़दाआ काजे बाबल्योअ पास खांब बोणावजा, आन तियांहां होना वाअहीं मोडाड़जा; तियांआं आकड़ा होनाअ जोवे, आन तियांआं काजे तांबाअ पास कुर्सी टाकाड़ीत कोइत बोणावजा."