1 "एखे मेडे, डोगरेन बोकड़े सोअये ओय तियाहा की डोंड आपुहूं जोवे? एखे बोलोद नेत मेडो सोइत माईंत खादो नेताहां वेसी देदो ओय, ताहां तियाहा तोज वापिस कोअता ने आवनारो तिहीं वाअहीं, एका डोगराआ सोरीइ बोदले पास डोगरे आन एका मेडाआ बोदले शार मेडे आपुहूं जोवे. सोरीइ बोदले तो एहेलिही भरपायी कोअहूं जोवे. 2 जर बांड सोरी कोअतामेहें तोआयू, आन तियापोअ एहेलुहू मारु पोड़े के तो मोइत जाय, ताहां तियाआ खुनोअ गुनू ने लागे; 3 जर दिही उगीत जाय, ताहां तियाआ रक्ताआ गुनू लागे; बांडोहो नुकसान भरपाई कोअहूं पोड़े, जर तियापोअ किज ने ओय, ताहां तियाहा सोरीइ बोदले वेसी देअहूं जोवे. 4 जर सोअल्यू बोलोद, नेत गोदड़ो, नेत मेडो, नेत बोकड़ो तियाआ आथोम जिवतो मिले, ताहां तो तियाआ बेन भाग पोइत आपुहूं जोवे."

5 "जर एखु तियाआ डोगरेन बोकड़े एखाअ खेतोम नेत दाराक्शाआ मोलाम सारे, मोन्जे तियाआ डोगरान बोकड़ाहा एहेलोज सोड़ी देय के तो बिहीराआ खेतोम सोरीत लेय, ताहां तो तियाआ खेतोम रोत दाराक्शाआ वाड़ाम रोत हाजाम हाजो फोलवाम रोत नुकसान भरपाई आपुहूं जोवे."

6 "जर एखु तियाआ खेतोमेऱ्येए काटे पेटाड़ीलोअ काजे आग पेटाड़्यी आन वोडी आग पेटाइत उठ्यी आन सामनेवालाआ खेतोमेऱ्योअ उबलो ओन नेताहां आन खेत पेटाइत जाय, ताहां जिये आग पेटाड़्यी ओय तों नुकसान भरपायी पोई देअहूं जोवे."

7 "जर एखु बिहीरापोअ तियाआ पोशा नेत वस्तु मिके तेहें आप्यो ओय, आन तो तियाआ कोअ रोत सोआत जाय, ताहां बांड तोआत जाय ताहां बेन भाग तियाहा पोअहूं पोड़े. 8 जर बांड ने तोआय, ताहां कोओअ मालख्योहो देवोअ सामने लेत आवजा, मोन्जे मुंदू ओत जाय के तिये तियाआ पायहोअ मालमिलकते पोअ आथ लागाड़्यु के नाहां."

9 "बोलोद ओय, गोदड़े ओय, नेत मेडे नेत बोकड़े, नेत आंगड़े नेत एखी जातीइ टाकाअली वस्तुउ बाप्तिम तकराट आवे, जियाहा बेन जोआं माआ, माआ कोअताहा, ताहां बेनुहूं देवोअ* जागे लेत आवजा; आन देव जियाहा दोशी ठरवे, तो बिहीराहा बेन भाग पोइत आपुहूं जोवे."

10 "जर एखु तियाआ जागेवालाहा गोदड़ो, नेत बोलोद, नेत बोकड़ो, नेत मेडो नेताहां काअलोज बी जनवार मिके तेहें आपे, आन कोडोज ने पाले तेहेंज मोइत जाय, नेत सोआत जाय नेत ओड़ीत लेत जाय. 11 ताहां तियां बेनुउं विसमेहें यहोवा देवोअ शप्पत खावाड़ीइलोअ, ‘आंय तियाआ मालमिलकतो पोअ आथ नाहां टाक्यु;’ ताहां मालमिलकोतोअ मालिख तियाहा खोरो माने, आन बिहीराहा तियाहा थोड़क बी पोइत आपुहूं ने पोड़े. 12 जर तो हुदाअलीज तियाअहीं रोत सोआयोय, ताहां तों तियाआ मालख्योहो भरपायी कोइत आपुहूं जोवे.✝ 13 आन जर तो रानठ्या जनवारोअ वाअहीं माआयो ओय, ताहां तिया मोअल्या जनवारोहो पुरावाआ काजे लेत आवजा, ताहां तियाहा तियाआ नुकसान पोइत ने आपुहूं पोड़े."

14 "फाशोअ जर एखु कोडो बिहीरा पोअ जनवार मागित लेतावे, आन तिया मालिख आरी ने रोय आन जनवार दुखाअयो नेत मोईत जाय, ताहां तो तियाआ नुकसान पोई देअहूं जोवो, 15 जर तियाआ मालिख आरी ओय, ताहां बिहीराहा तियाआ नुकसान ने पोअहूं पोड़े; जर तो पाड़ाआ ओय, ताहां तियाआ नुकसान तिया पाड़ाजमेहें वोसुल ओत जाय."

16 "जर एखु माटी कुवारी पोऱ्यीही, जियीइ वेहेवालोअ गोठी ने ओवी ओय, ठोगित कोइत तियीइरी सिनालो कोए, ताहां तो देजो आपित कोइत तियीइरी वेहेवाल कोइत लेअहूं जोवे. 17 पोन तियाआ आब्हाआ इश्शा ने ओय, ताहां सिनालो कोअनारु कोज्याआ पोशा रितीइ पुरमाणे आपुहूं जोवे."

18 "डाखण विद्या कोअनारी बोईंहीं जिवती मा रोअहूं देहा.✝

19 "जों कोडो जनवारोअरी सिनालो कोए, तियाहा नक्की माइत टाकुहूं जोवे.✝

20 "जो कोडो यहोवा देवोहो सोड़ीत कोइत बिहीरा देवोहो गाराहा आपे तियाहा माईंत टाकुहूं जोवे.✝

21 "तुमाआ देसोम पारको माहुंउं आवे तियाहा तारास मा देहा आन दाबाव मा टाकहा; काहाके तुमू बी मिसर देसोम पारके ओते ओं ओर मिकजा.✝ 22 कोड्ली बी रोंडोअ बोईंही नेताहां विखावाला पोऱ्याहा तारास मा देहा. 23 जर तुमू तियांहां तारास देहा आन तें माहूं प्रार्थना कोए; ताहां आंय तियांआं प्रार्थना नक्कीज उनाअहीं. 24 ताहां माहूं खोत लागे ताहां आंय तुमुहूं तारवाआ लेत माईंत टाकीहीं, तुमाआं बोईं बी रोंडात जाय आन तुमाआं पोऱ्ये बी विखावाले ओत जाय."

25 "जर तुमे माआं एखा गरीब माहुंहूं उसन्यो पोशा आप्याये, ताहां हावकारोअ होस वियाज मा लेही आन पोशा वेगो आपुहूं जोवे कोत जोर मा देखाड़ही.✝ 26 जर एखू सोड़ीवताआ बोली कोअ साअको मिकीत जाय, ताहां दिही बुडताआ पेल तो तियाआ साअको वापिस कोइ देजी.✝ 27 काहाके तियाहा राती फांगीइलोअ बिहीरो कीज ने ओय, ताहां तियाहा राती हेलो लागे, एहेलामेहें तो मापोअ रावण्या कोए, ताहां आंय तियाआ रावणी उनाइत लेही, काहाके आंय मायालू देव होय."

28 "तुमू तुमाआ देवोहो दोस मा देहा, आन तुमाआ माअहोंअ पुडाऱ्योहों बी हाराप मा देहा.✝

29 "आन ताआ खेतोमेर्‍योअ पेहलो फोलवो आन फोलवामेएं पेहलू रोहो माहूं भेट कोअजी.

"ताआ पोऱ्यामेएं पेलठो पोऱ्यो माहूं होपी देजी. 30 तेहेंज कोइत वासड़ीइ पेहलो बासो आन मेडा-बोकड़ामेएं पेहली वेतेए गिद्लाहा माहूं भेट कोअजी. उबजे तेदिहीं रोत हांत दिही जाआं तें तियां आयहीइ जागे रोय, तिहीं रोत आंठवे दिहे तें माहूं आपुहूं जोवे."

31 "तुमू माआं खास निवड़ीइल्ये सोके माअहें होय, तियाहा काजे तुमू जोराखा जनवारो वेतरीत टाकल्या जनवारोहो मा खाहा, तियांहां हुंणाहां आपी देजा."✝