Êxodo 30

तुमाणाआ देवान्यो

1 "फाश्यो तुम्हावीलोअ काजे बाबल्योअ लाकड़ाआ देवान्यो बोणावजा. 2 तियाआ लांबी एक आथ आन सोवड़ाय एक आथोअ जोवे, तों शारी खुणे सोका होनाआ वाअहीं निपल्यो जोवे, आन बेन आथ उसी जोवे, आन तियाआ हिंगे तियाआज डुन्का वाअहीं बोणावजा. 3 आन देवान्याआ उपऱ्युउ भाग आन तियाआ शारु खुणा आन तियाआ हिंगे ओं आखो सोका होना वाअहीं मोडाड़जा, आन तियाआ शारी वोलेहे होनाआ एक वाड़ बोणावजा. 4 आन तियी वाड़ीइ निसे तियाआ हुंबाहुंब बेनू वोलेहे होनाआ बेन बेन कोड़ी बोणावीत कोइत ते बेनू वोल लागाड़जा, तिहींमेहें डांडा कालीत आखलीइता आवुहूं जोवे. 5 डेंगारा बाबल्योअ लाकड़ाआ बोणावीत कोइत तियाहा होना वाअहीं मोडाड़जा. 6 आन तु तियाहा तिया पोड़दाआ आगाड़ी मिकजी जो साक्शीपत्राआ पेटीइ आगाड़ी होय, मोन्जे पापोअ माफी टापणाआ आगाड़ी जो साक्शी पत्राआ उपोअ होय, तिहीं आंय ताहूं मिल्या कोअहीं. 7 आन तियी देवान्यो पोअ आरोन हाजी गोंदेए तुमाणू पेटाड़्या कोए; दाड़ीइज वेगीइ जेहेलाम दिवाहा वारुहूं कोए तेहेलाम तो तुमाणू पेटाड़े, 8 आन फाश्योअ हांजेए वेले जेहेलाम आरोन दिवू पेटाड़े ताहां तुमाणू पेटाड़्या कोए, ओ तुमाणो यहोवाअ आगाड़ी पिड़ीन पिड़ी जाआं पेटाड़ते रोय. 9 तिया देवान्यापोअ तुमू कोड्लीज जातीइ तुमाणू मा कोअहा, आन ने तियापोअ गाराहा आन ने तियापोअ शांतीइ गाराहा आन ने ओनोअ भेट कोइलो; ने तियापोअ रोहोअ गाराहा कोइलो. 10 आरोन वोरह्योम एक वारी तियाआ हिंगोपोअ पापोअ माफीइ काजे गाराहा कोअहूं जोवे, पापोअ माफीइ काजे रक्ताआ गाराहा आपुहूं जोवे; ओं देवान्यो यहोवा काजे जास्ती सोको होय."

जिवोअ माफीइ फालू

11 ताहां यहोवा मोशेहे कोयो, 12 "जेहेलाम तु इस्राएलोअ गणती लेनू वोलही, ताहां गोणतामेहें जियांआं गोणती ओत गोयीय तें जिवज्योअ जिवोअ काजे यहोवाहा गाराहा भेट आपे, जिया वाअहीं जेहेलाम तु तियांआं गोणती कोअया कोअहो तेहेलाम काअलीज ओड़सन तियांपोअ आवीत ने पोड़े. 13 जेतेहे माअहें गोणाइत जाय तें सोका जागाम सालताय तिया इसाबो वाअहीं आरदू शेकेल आपे ओं शेकेल*30:13 शेकेल एक शेकेल ताहां विही गिऱ्याम होय विही गेरे रोहे, यहोवाअ भेट आरदू शेकेल*30:13 आरदू शेकेल सोव गिऱ्यामोअ एतोहो जोवे.✝30:13 निर्ग 38:25-26; मत्तय 17:26 14 विही वोरहोअ नेत तियाआ रोत जाअखा वोयोअ जेतेहे गोणाय तियाम रोत एक एक जोंअ यहोवाआ काजे भेट आपे. 15 जेहेलाम तुमाआ जिवोअ कोअते गाराहा कोत यहोवा देवोअ सामने भेट कोअहा, ताहां कुन्बी माअहें आरदा शेकेलो रोत वादार ने आपुहूं जोवे; आन ने गरीब माअहें तियापरोत कम आपुहूं जोवे. 16 आन तु इस्राएलवालापोअ रोत पोशा टोलू कोइत ते मिलापवाला तोंबाम काम लागाड़जा; आन इस्राएलवाला कोअते गाराहाआ काजे ते पोशा यहोवा देवोअ आगाड़ी ओरेए काजे ठोरे."

तांबाआ तोपल्यो

17 यहोवा मोशेहे कोयो, 18 "तुवीइलाअ काजे तांबाआ एक तोपल्यो, आन तियाआ बुंद्यो बी तांबाआज बोणावजा. तियाहा मिलापवाला तोंबुउ आन देवान्याआ विसमेहें मिकीत कोइत तियामेहें पाईं पोई देजा;✝30:18 निर्ग 38:8 19 आन तियामेहें आरोन आन तियाआ पोऱ्या तियांआं आथेन गुडा तुव्या कोए. 20 जाहां जाहां ते मिलापवाला तोंबामेहें फोहे ताहां ताहां ते आथेन गुडा पाअयों वाअहीं तुवुहूं जोवे, नेत ते मोईत जाय; आन जियी जियी वेले ते देवान्याआ जागे सेवा कोए, मोन्जे यहोवा काजे गाराहा पेटाड़ा आवे, ताहां ताहां ते आथेन गुडा तुवुहूं जोवे, एहेलोहो ने ओवुहूं जोवे के ते मोइत जाय. 21 ओं आरोन आन तियाआ पिड़ीन पिड़ीइ पारवाड़ीइ काजे हादाजोल्म्यीइ रिती ओत जाय."

सोको कोअल्यो तेल

22 फाश्यो यहोवा मोशेहे कोयो, 23 "तु हाजाम हाजो गोंदाण्यो तेल, मोन्जे सोका जागाआ काजे शेकेलोअ अनुसार पास होव शेकेल तिया तियाआ निहील्यू हाजू गुंदाअनारु सिक, आन तियाआ आरदो, मोन्जे आड़ी होव शेकेल हाजो गुंदाअनारो दालसिनीइ साड़, आन हाजाम हाजी गुंदाअनारी आगरबत्ती, 24 आन सोव किलो तेजपान, आन शार लिटर जेयतुनोअ तेल लेत कोइत, 25 तियांआं अभिशेकोअ सोको तेल, मोन्जे हाजी गोंदेए काजे गुंदाअनारो तेल बोणावजा; ओं अभिशेकोअ सोको तेल ठोरे. 26 आन तियाहा मिलापवाला तोंबुउ, आन साक्शीपत्राआ पेटीइ, 27 आन टेबल आन तियाअरीइ आखी वस्तु, दिवाआ थुड़ो आन तियाअरीइ सामान आन तुमाणाआ देवान्यो, 28 आन आखा सामानोअरीज गाराहाआ काजे आगीइ देवान्यो, आन बुंद्याअरीज तोपल्याआ अभिशेक कोअजा, 29 आन तियांहां सोको कोअजा, जियावाअहीं तों जाअखो सोको ठोरे; आन जों किबी तियाहा टेकीत जाय तों सोको ओत जाय. 30 फाश्यो आरोनोहों तियाआ पोऱ्याअरी निवड़ कोअजा, आन एहेंकोइत तियांहां माआ काजे पुंजाराआ काम कोए तेहें सोको कोअजा. 31 आन इस्राएलोहो माआं ओ हुकूम कोत आपजा, ‘ओं तेल तुमाआ पिड़ीन पिड़ी जाआं माआ काजे सोको कोअल्यो तेल रोय. 32 ओं एखा माअहोंअ डिलोअरी हारीइलोअ काजे मा वापराहा, आन सान्बीत कोइत तियाआ हारको किज मा बोणावहा; ओं सोको होय, ओं तुमाआ काजे बी सोको रोय. 33 जों कोडो याआ होस किबी बोणावे, नेत जों कोडो याम रोत बिहीरा एखा पारकाहा हारे, तियाहा तियाआ माहूंम काडी देजा.’"

सोको हाजो गोंदाण्यो वस्तु

34 फाश्युउ यहोवा देव मोशेहे कोयो, "तु, हाजो गोंदाण्यो मासालो मोन्ज्ये नोखी*30:34 नोखी एकी जातीइ हाजो गोंदाण्यो ठिबाआ होसऱ्योअ वस्तु, गोंदाण्यु रोहो, गोंदाण्यी वस्तु आन गुगलाआ सिक लेतावजी, ओं आखो एक हारको जोवे. 35 आन तियांआं गोंद मोन्जे खारो सान्बीत कोइत गुंदाअनारा अत्तरोअ होस हाजो आन सोको गुंदाअनारो तेल बोणावजा. 36 आन तियाम रोत थोड़ोक कुटीत कोइत हानो कोइ देजा, ताहां तियाम रोत थोड़ोक मिलापवाला तोंबाम साक्शीपत्राअ आगाड़ी, जिहीं आंय ताहूं मिल्या कोअहीं, तिहीं मिकजी; तो तुमाआ काजे वोडो सोको रोय. 37 जे हाजी गुंदाअनारी वस्तु तु बोणावही, सान्बीत बोणावल्यी वस्तु तुमू सोताआ काजे मा बोणावहा; ते वस्तु यहोवा देवोअ काजे तुमू सोकी मानजा. 38 जों कोडो वास लेअलोअ कोअते सोताआ काजे बोणावे तियाहा माआ माहूंम रोत काडी देजा."✝30:38 निर्ग 36:38