1 तिहीं रोत यहोवा देवे मोशेहे कोयो, "फारोअ जागे जात कोइत को, ‘इब्री माअहोंअ देव यहोवा ताहूं एहें कोहे: माआं माअहोंहों जाअहूं दे के तें माआं भक्ती कोइत सेके. 2 जर तु तियांहां ने जाअहूं देही, फाश्युउ बी तोइत रोही, 3 ताहां पालीत लेजी, आंय ताहूं एहेलुहू डोंड आपिहीं, के ताआ जे कोड़ा, गोदड़े, उटड़े, मेडे, डोगरेन बोकड़े एहेलेहे जनवारे होय तियांपोअ यहोवा देवोअ पाअयू आथ पोड़े आन जुदी वोडी मोराय साले. 4 पोन यहोवा देव इस्राएलवालाआ जनवारोंमेहें आन मिसरवालाआ जनवारोअ विसमेहें गालो मेकिहीं, इस्राएलवालाआ एक बी ने मोए’." 5 फाश्योअ यहोवा एहें कोत कोइत एक वेल ठरव्यी, "आंय ओं काम या देसोम हांदाआ कोअहीं."

6 बिहीरे दिहे यहोवा देवे तेहेंज कोअयो; आन मिसरवालाआ तोम आखे जनवारे मोइत गोये, पोन इस्राएलवालाआ एक जनवार बी ने मोयो.✝ 7 आन फारो राजा माअहोंहों मोकल्ये, पोन इस्राएलवालाआ एक बी जनवार ने मोअयोतो. ते बी फारोअ मोन वातड़ोज रोयो, तिये माअहोंहों जाअहूं ने देदो.

8 फाश्योअ यहोवा देवे मोशेहे आन आरोनोहो कोयो, "तुमू बेनू जोओं बाठीमेहें रोत एक मुठ खाआं लेतावा, आन मोशे तो खाआं फारोअ सामने जुगोमेहें उडाड़ी देय. 9 ताहां तो सिणो तुलो बोणित पुरा मिसर देसोमेहें माअहूं आन जनवार बेनुपोअ फुपला आन फोड़क्ये बोणित जाय."✝ 10 तियाह काजे बाठीमेऱ्युउ मुठ पोइत खाआं लेत कोइत फारोअ सामने उबा रोया, आन मोशे तो खाँआं जुगोम हावाआ वोल उडाड़ी देदू, ताहां तो माअहों आन जनवारोंअ पोअ फुपला आन फोड़क्ये बोणित गोये. 11 तियां फोड़क्याआ वोजेसे ते जादूगार मोशेए सामने उबा रोत ने सेक्या, काहाके ते फोडक्ये जेहेलेहे आखा मिसरवाला माअहोंहों लागे तेहेलेज जादुगारोहों बी उबरीत पोड़्येते. 12 पोन यहोवा देवे फारोअ मोनोहो फाशोअ वातड़ो कोइ देदो, जेहलोहो यहोवा देवे मोशेहे कोयोतो, तिये तियांआं गोठ ने मान्यू.

13 फाशुउ यहोवा देवे मोशेहे कोयो, "हांदाआ वेगऱ्युउ उठीत फारोअ सामने उबू रोजी, आन तियाहा कोजी, इब्री माअहोंअ देव यहोवा एहें कोहे: माआं माअहोंहों माआं भक्ती कोए तेहें जाअहूं दे. 14 नेते आंय तापोअ* आन ताआ कर्मसाऱ्यों पोअ आन ताआ माअहोंपोअ आखी जातीइ पिड़ा टाकीहीं, जिहींवाअहीं तु जाईंत लेही के पुरी धरतीपोअ माआ होस बिहीरु कोडो देव कायनाहां. 15 जर आंय आथ उठाड़तू ताहां तू आन ताआ माअहुंहूं पिड़ा वाअहीं माईंत टाकतु आन तुमूं धरतीपोअ रोत एकसोट्येज आरवात जाते. 16 पोन खरीज आंय ताहूं एताआ काजे जिवतू रोअहूं देदू के आंय माआं सेक्ती ताहूं देखाडीत सेको, आन माआं नाव पुरी धरतीपोअ गाजाड़ो.✝ 17 केहें ओमे जाआं तु माआं माअहोंअ सामने सोताहा वोडू सोमजेहे, आन तियांहां जाअहूं नाहां देतू? 18 होंबल, हांदाआ आंय यीज वेले एहेलेहे वोडे वोडे गारे पाडीहीं, एहेलेहे गारे मिसर देस थापन ओयुय तोयोंअ रोत ओमे जाआं केदीहींज ने पोड़्येय. 19 तियाहा काजे ओमे माहुंहूं मोकलीत तुमाआ कोर्‍येए जनवारे आन सापड़ा जागामेहें जो किबी ओय तो मामार हाजा जागाम लेत जात रोअहूं जोवे; नेत जेते माअहें आन कोर्‍येए जनवारे सापड़ाम रोत जाय आन कोअमेहें ने जाय तियांपोअ गारे पोड़े, आन तें मोइत जाये." 20 तियाह काजे फारोअ थोड़ाक कर्मसारी जे देवोअ गोठीही बित सालताते तियां जिव जिवोअ सेवकोहों आन जनवारोहों कोअमेहें लेताया. 21 पोन जियां यहोवा देवोअ गोठीपोअ ध्यान ने लागाड़्यो तियां सोताआ सेवक आन जनवारे सापड़ेज रोअहूं देदे.

22 ताहां यहोवा देवे मोशेहे कोयो, "ताआ आथ जुगोअहें उसू कोअ मोन्ज्ये आखा मिसर देसोअ माअहों, जनवारों आन खेतोअ आखी निली कामायीपोअ गारे पोड़े." 23 ताहां मोशे तियाआ डेंगारिही जुगोअहें उसी कोअयी, आन यहोवा देवोअ सेक्तीवाअहीं जुग गाजो वोल्यो आन गारे पोड़े वोल्ये आन आग धरतीपोअ जाआं आवी वोल्यी. एहें कोइत यहोवा देवे मिसर देसोपोअ गारे पाड़्ये. 24 जे गारे पोडतेते तियांअरी आग बी पेलीत ओती, आन ते गारे एहेलेहे ओते के जोयोंअ रोत मिसर देस थापन ओतू तोयोंअ रोत एहेलेहे गारे केदिहींज नाहां पोड़्ये.✝ 25 तिहीं वाअहीं पुरा मिसर देसोम आखे माअहें, आखे जनवारे गारा वाअहीं मोइत गोये. आन खेतोमेऱ्यीइ आखी कामाय आन सापड़ामेऱ्येए आखे साड़े बी मुड़ात पोड़्ये.✝ 26 निस्ते गोशेन इलाखामेऱ्येए इस्राएलवाले रोत्ले तिहीं एतेज गारे नाहां पोड़्ये.

27 ताहां फारो राजे मोशेहे आन आरोनोहो हादाड़्या आन तियांहां कोयो, "यी फेरे मी पाप कोअयुहू; यहोवा देव खोरु होय, आन आंय आन माआं माहें पापी होय. 28 यहोवा देवोहो प्रार्थना कोआ; वाद्लाआ गाजीइलोअ आन गाराआ वोर्‍हात तोम जाअखुज ओत गोयू; ओमे ताहां आंय तुमुहूं जाअहूं देहीं, आन तुमु ने रुकाअहा."

29 मोशे तियाहा कोयो, "होयरोम रोत निहींताज आंय यहोवा देवोअहें आथ उसा कोअहीं, ताहां वाद्लाआ गाजीइलोअ बोंद ओत जाय आन गारे बी फाशे ने पोड़े, इंहीं वाअहीं तु जाईंत लेही के धरती यहोवा देवोओज होय. 30 तेबी माहूं मुंदू होय के, ओमेज बी तु आन ताआ कर्मसारी देवोह बित नाहां सालता."

31 होंण आन काठ्ये गोंवें गारावाअहीं मोइत गोये, काहाके काठ्ये गोंवें निहींवीत गोयेते आन होंण फुला वोल्याते. 32 पोन एक बी गोंव नुकसान ने ओवो, काहाके गोवें हांहतेहे पाकत्ले.

33 जाहां मोशे फारोअ जागे रोत होयरोअ बारथे जात कोइत यहोवा देवोअहें आथ उसा कोइत प्रार्थना कोअयी ताहां वाद्लो गाजीइलाअ आन गारे पोडीइलाअ बोंद ओवो आन तिहीं रोत वादार वोर्‍हात ने पोड्यू. 34 जेहेलाम वोरहात, गारे, आन गाजीइलोअ बोंद ओवो, तेहेलाम फारो ओं देख्योन ताहरुउ मोन कड़क कोइत लेदोन फाशुउ तिया पाप कोअयू. 35 आन एहें कोइत फारोअ मोन कोठीण ओवतो गोयो, आन तिये इस्राएल वालाहां जाअहूं ने देदे, जेहें कोइत यहोवा मोशे वाअहीं कोवाड़्योतो.