1 फाश्योअ यहोवा मिसर देसोमेहें मोशे आन आरोनोहो कोयो, 2 "ओज मोयनु तुमाआ कोअते सालोअ पेहलू मोयनु ठरे. 3 इस्राएलोअ पुरी मंडड़ीही ओं कोजा; याज मोयनाआ दाहवा दिहोमेहें तुमू तुमाआं जिव जिवोअ वेगाआ डायहांआं पुरमाणे, कुटूंबाआ डिठ एक मेडाआ बोसो लेत मिकजा; 4 आन जर एखा कुटूंबामेहें आखवो मेडो खाअलोअ काजे माअहें कमी पोड़तेय, ताहां तो जाअखा आहने रोनाराअरी माअहुंउं गोणतीइ परमाणे एक गिद्लू लेत मिकजा; आन तुमू हरेक जोओंअ खाअलाअ इसाबोवाअहीं गिद्लाआ इसाब मिकजा. 5 तुमाआ गिद्लू निर्दुस आन एका वोरह्योअ नर जोवे. तुमू तियाहा मेडामेएं नेत बोकड़ीमेहें रोत निवड़ीत लेजा.✝ 6 आन या मोयनाअ शोवदावे दिहे जाआं तियाहा बांदीत मिकजी, आन तेदिहींज हांजेए वेले इस्राएलोअ आखी टोलाआ माअहें गाराहा आपुहूं जोवे. 7 ताहां ते तियाआ रक्ताम रोत थोड़क रक्त लेत कोइत जिया कोअमेहें गिद्लाहा खाये तिया कोओअ बाअणाआ बेनू वोगेहे आन शोवकोटीपोअ लागाड़ी देअहूं जोवे. 8 आन तें तियाआ माहां तियीज राती आगीम पुजीत बिगर खमीरवाला रोटाअरी आन कड़वी वस्तुउरी खाअहूं जोवे.✝ 9 तियाहा मुनको, गुडा, आते नेहें आगीम पुजीत खाजा, निल्लोजे नेताहां पांअयोंम कीज मा रांदीत खाहा. 10 आन तिहींमेऱ्योअ वेगीइ जाआं कीज मा उगारहा, आन जर वेगीइ जाआं रोतीज बी जाय, ताहां तियाहा आगीमेहें पेटाड़ी देजा. 11 आन वल्हांडण तिवारोहो खाअलोअ नियम एहेलुहू होय: कंबर बांदीत, गुडाम खाहड़े पोवित आन आथम डेंगारेन उतवाल्ये खाअहूं जोवे; ओ तोम यहोवा देवोअ तिवार रोय."✝

12 "काहाके तियी राती आंय मिसर देसोअ विसमेहें रोत सोरकिहीं, आन मिसर देसोअ माहुंउं पेल्लोअ पोऱ्यो ओय नेत जनवारोअ पेल्लोअ बोसो ओय, आखाहा माअहीं; आन मिसर देसोअ आखा देवोहों बी डोंड आपिहीं; आंय यहोवा होय. 13 आन जियां कोअमेहें तुमू रोहा तियां पोअ तो रक्त तुमाआ काजे निशाणी रोय; मोन्ज्ये तिया रक्ताहा देखीत कोइत आंय तुमुहूं उनकावित जातू रोहीं, आन जाहां आंय मिसरवालाहां माअहीं, ताहां ते आफत तुमापोअ ने पोड़े आन तुमू ने आरवाअहा.✝ 14 आन या दिहोअ तुमुहूं ओर जोवे के तुमू या दिहोहो यहोवा देवोअ काजे तिवार कोत मानुहूं जोवे. ओ दिही तुमाआ हादाजल्म्युउ तिवार ठरुहूं जोवे."

15 फाशोअ देवे कोयो, "हांत दिही जाआं बिगर खमीरवालू रोटू खाया कोअजा; तिया दिहोअ पेल्लेए दिहेज खमीर काडीत टाकजा, तुमामेहें जो कोडो खमीरोअ वस्तु खाय ताहां तियाहा इस्राएल माअहूंमेहें रोते बारथे काडी देअहूं जोवे. 16 पेल्लेए दिहे एक पवित्र मेलू आन हांतवे दिहे बी एक पवित्र मेलू हादुहूं जोवे. यां बेनू दिहोंमेहें कीज काम ने कोअहूं जोवे; रांदीइलोअ काम सोड़ीत बिहीरो कोड्लोज काम ने कोअहूं जोवे. 17 तियाहा कोत तुमू बिगर खमीरोअ तिवार कोअहूं जोवे, काहाके तिये दिहे आंय तुमुहूं टोलान टोला पाडीत मिसर देसोम रोत बारथे काडीत लेतावयुहू; तियाह काजे ओ दिही तुमाआं आखाअ पिड़ीन पिड़ीइ काजे नियम कोत मानजा.✝ 18 पेहला मोयनाआ शोवदावा दिहोअ हांजेपोअ रोत एकविसवा दिहोअ हांजेपोअ जाआं तुमू बिगर खमीरोअ रोटू खाया कोअजा. 19 हांत दिही जाआं तुमाआं कोअमेहें थोड़ुक बी खमीर ने जोवे. जो कोडो बी खमीर वाली वस्तु खाय ताहां तो कोऱ्योअ ओय नेत बाऱ्योअ ओय, तियाहा इस्राएल वाला माअहूं मेहें रोत माइत टाकुहूं जोवे. 20 कोडो बी खमीर ने खाअहूं जोवे; तुमू जिहीं बी रोहा तिहीं बिगर खमीरोअ रोटूज खाजा."

21 ताहां मोशे आखा इस्राएलोअ डायाहां हादीत कोइत कोयो, "तुमू तुमाआ कुटूंबाआ डिठ एक एक गिद्लू लेत आवजा; आन वल्हांडण तिवारोअ काजे गाराहा आपजा. 22 आन तियाआ रक्त जो वाटकामेहें रोय तो एका आदाआ* डालखा वाअहीं बुस्कड़ीत दरवाजाआ सोवकोटोअ बेनू वोगेहे लागाड़जा; आन हुजे ताअहूं जाआं कोडो बी कोअमेहें रोत बारथे ने निहुंहूं जोवे. 23 काहाके यहोवा देव मिसर देसोम रोत पेहला उबजीइल्याहां माईंत सोरकीइतुज जाय; तियाह काजे जिहीं जिहीं तो रक्त सोवकटेपोअ आन बेनू वोगेहे लागाड़ल्यो देखाय, तिहीं तिहीं तियां बाअणाहां उनकावित जातु रोय, आन माअनाराहा तुमाआ कोअमेहें ने जाअहूं देय.✝ 24 तिहीं रोत ए रिती जोलिमक्यीज तुमाआं पिड़ीइ रिती कोत मानजा. 25 ताहां यहोवा देवे जेहें कोइत वायदो कोअयोहो तियाआ पुरमाणे तो देस आपे, आन तुमू जाहा तेहेलाम ओ नियम पालन कोअजा. 26 जेहेलाम तुमाआं पोऱ्ये तुमुहूं ओं फुसे, के ‘आपू ए रिती काहा मानतेहे?’✝ 27 ताहां तुमू तियांहां कोजा, ‘यहोवा देवे मिसरवालाहां माईंलोअ होमसे आपा इस्राएलवालाआं कोएं सोड़ीत आपाआ कुटूंबाहा वासाड़्ये, तिहींइं काजे तियाआ वल्हांडण तिवार मानत्ले.’" ताहां इस्राएलवालां पागे पोड़ीत देवोह जारीत लेदो. 28 इस्राएलवालां जात कोइत जो आदेश देवे मोशे आन आरोनोहो आप्युतो तेहेंज कोइत कोअयो.

29 एहेलोहो ओवो के पोरापोर रातीही मिसर देसोमेएं आखा पेल्लाअठीज उब्जीइनाराहां, यहोवा देवे राजगादीपोअ बोहनारा फारो राजाआ पोऱ्याहा लेत ते जेलेम रोनारा गुलामोअ जाआं आखाआ पेलठा पोऱ्याहां आन पाल्ल्या जनवारोअ पेलठा बासाहा जाआं माईंत टाक्ये.✝ 30 आन फारो रातीज उठीत बोठू, आन तियाआ आखा कर्मसारी आन आखे मिसरवाले उठ्ये, आन मिसर देसोमेहें जुदी जोरे रोड़ीत उठ्ये. आन एक बी एहेलोहो कोअ ने सुटो जियांअहीं कोडोज ने मोयोय. 31 ताहां फारो राजा राताम रात मोशे आन आरोनोहो हाद्या, आन कोयो, "तुमू आन तुमाआं इस्राएलवाले निहींत जावा, माआं देस सोड़ीत जाते रोवा; आन जेहेलोहो तुमू कोयो तेहेलोज जात कोइत तुमाआ यहोवा देवोअ भक्ती कोआ. 32 आन तुमू कोयोहो तेहेंज कोइत मेडे, डोगरेन बोकड़े नेहें लेत जावा; आन माहूं आशिर्वाद आपतेज जावा." 33 मिसरवाले इस्राएलवालापोअ दाबाव टाकीत कोतेते के, "आमाआं देस सोड़ीत मामार जाते रोवा, नेत आमू आखे मोइत जाहूं." 34 ताहरेए तें बिगर खमीरवालू केलवीइल्यू लोट पारातीइरीज बांदीत तियांआं खांदोपोअ मिकीत लेदू. 35 इस्राएलवालां मोशे कोयो तेहेंज कोइत मिसरवालापोअ होना-सांदीइ गोवणो आन आंगड़े मागित लेदे;✝ 36 यहोवा देवे मिसरवालाहां इस्राएलवाला पोअ एहेलेहे मेरवानी कोअये के तियां जों जों माग्यो तों आखो तियांहां आपी देदो. एहें कोइत इस्राएलवालां मिसरवालाहां लुटीत लेदे.✝

37 ताहां इस्राएलवाले रामसेस रोत सुक्कोतोअहें वाट लागे, तें बोईंन-पोऱ्ये सोड़ीत निस्ता पागे सालनारा मेएं माटी एताज सोव लाख एताहा ओता. 38 तियांअरी बिगर इस्राएलवाले एक गोवारु माअहें बी आरी गोये, आन मेडे, डोगरेन बोकड़े नेहें आरीज गोये. 39 आन जो केलवीइल्यू लोट आरी लेतेज आयेते, तियाआ तियां बिगर खमीरवालू रोटू बोणावयू; काहाके तें मिसरोम रोत निठले तेहेलाम तियांहां एतीही जाआं पारवाआ नाहां जोड़्यी के वाटे खाअलोअ रोटू रांदीत सेके, तिहींज वाअहीं तो लोट बिगर खमीरोअ ओतू.

40 इस्राएलवाले शार होवेन तीस वोर्ह्ये जाआं मिसर देसोमेहें रोयेते. ✝ 41 आन तियां शार होव तीस वोर्ह्ये फासाड़ी, तेदिहींज रोत यहोवा देवोअ पुरे माअहें मिसर देसोम रोत बारथे निहींत गोये. 42 यहोवा देव इस्राएलवालाहां मिसर देसोम रोत काडीत लेतावयू, तिहींइं वाखरी ते रात मानुहूं जोगीही होय; ए एहेलिही रात होय, जियीही इस्राएलवाले पिड़ीन पिड़ी जाआं मानिइलोअ जुरुड़ी होय.

43 फाशोअ यहोवा देवे मोशे आन आरोनोहो कोयो, "तिवारोअ नियम ओ होय: कोडोज पारको माहुंउं वल्हांडण तिवारोअ रोटू ने खाअहूं जोवे. 44 पोन जर वेसातू लेद्लू एखू पावर ओय, आन तियाआ खतना ओवू ओय, ताहां तो तिहींमेहें रोत खात सेकेहे. 45 पोन पारके आन मोजऱ्ये माअहें तिहींमेहें रोत ने खात सेकत्ले. 46 तिया तिवारोअ रोटू एकाज कोअमेहें खाअहूं जोवे; तिहींमेऱ्योअ कीज बी बारथे ने लेत जाअहूं जोवे; आन गाराहा आपल्या कोड्लाज आड ने मुड़ुहूं जोवे.✝ 47 आखा इस्राएलवालाआं काजे ओ तिवारोअ पालन कोइलोअ जुरुड़ी होय. 48 जर एखू पारको माहुंउं तुमाअरी रोतोय आन तुमाअरी तिवार मानुहूं होदे, ताहां तियाआ खतना कोइलोअ जुरुड़ी होय. ताहां तो इस्राएलवालाआं होस बोणे. ताहां देवोअ काजे तियाहा तिया तिवारोम भाग लेता आवे; पोन जियाअ खतना ने ओवू ओय तियाहा वल्हांडण तिवारोम भाग ने लेता आवे. 49 ओ नियम आखाआ काजे एक हारकुज होय, तो पारको ओय नेत इस्राएलवालो ओय."✝ 50 यहोवा देवे मोशे आन आरोनोहो जो आदेश आप्यू, तो आखा इस्राएलवाला पालन कोअयू. 51 एहें कोइत यहोवा देवे आखा इस्राएलवाला माहुंहूं मिसर देसोम बारथे काड्ये.