1 फाशुउ मोशे बाबल्योअ लाकड़ाआ एक आगीइ देवान्यो बी बोणावयो; तों पास आथ नांबो आन पास आथ पोलो ओतो, एहें कोइत तों शार खुण्यो बोण्यो आन तिन आथ उसो ओतो. 2 तिये तियाआ शारु खुणापोअ शार हिंगे बोणाये, देवान्यो आन हिंगे पुरा एकाज लाकड़ुउ बोणायोतो; आन तिये तियाहा तांबावाअहीं मोडाड़्यो. 3 आन मोशे देवान्याआ आखो सामान, मोन्जे तोपल्ये, पावड़े, वाटकी, दाताल पावड़े, खाआं हाडीइलोअ बासने, ओं आखो सामान तांबाआ बोणायो. 4 तिये देवान्याआ सोमकीर सुटीइ निसे तांबाआ सारी बोणायी; ते देवान्याआ निसे आरदाम रोत उसे ओती. 5 तिये तांबाआ सारीइ शारु मेरेए शार कोड़ी ठासाम टाकीत बोणायी, ते तिये तियामेहें डांडा टाकीत उसलीत लेत जाअलोअ काजे बोणायी. 6 फाशोअ तियें डांडाहा बाबल्योअ लाकड़ाआ बोणावयो आन तांबावाअहीं मोडाड़्यो. 7 ताहां तिये देवान्याहा उसलीत लेत जाअलोअ काजे तियाआ मेरे कोड़ीमेहें डांडा टाक्या. देवान्याहा तिये रिपा वाअहीं कावलो बोणायो.

8 तिये तोपल्यो आन तियाआ बेनू पाया तांबाआ बोणाया, ओं मिलापवाला तोंबाआ बाअणापोअ सेवा कोअनारी बोईंइ आरहाआ तांबो ओतो.

9 फाशोअ तिये खोली बोणायी; आन तियाहा देहामाआ वोल्यीइ खोलीइ काजे पात्ला हुतोअ पोड़दा बोणाया आन ते आखाज एक होव आथ नांबा ओता; 10 तियांआं कोअते विही खांबे, आन तियांआं तांबाआ विही खाड्डा बोणाया; खांबोअ आकड़ी आन तियाहा जुड़ीइलोअ बांदपोट्टी सांदीइ बोणायी. 11 आन पालामाआं वोल्यीइ खोलीइ काजे पात्ला हुतोअ पोड़दा बोणाया आन ते आखाज एक होव आथ नांबा ओता; खांबोअ आकड़ी आन तियाहा जुड़ीइलोअ बांदपोट्टी सांदीइ बोणायी. 12 आन बुट्टामाआं वोल्यीइ खोलीइ काजे पात्ला हुतोअ पोड़दा बोणाया आन ते आखाज पोन्नास आथ नांबा ओता; तियांआं कोअते दोहो खांबे आन दोहो पाया ओता, आन खांबोअ आकड़ी आन तियाआ बांदीइलोअ बांदपोट्टी सांदीइ ओती. 13 आन उगताआ वोगेहे बी ते पोन्नास आथोअ ओता. 14 खोलीइ बाअणाआ एकी वोलेहे पोनर आथ नांबा जुड़ीत बोणावल्या पोड़दा ओता; आन तियाआ काजे तिन खांब आन तिन खाड्डा ओता. 15 खोलीइ बाअणाआ एकी वोलेहे बी तेहेलोज बोण्योतो; आन खोलीइ बाअणाआ यी वोलेन तिवोल पोनर पोनर आथोअ पोड़दा बोणायाते; आन तियांआं कोअते तिन तिन खांब, आन तिन तिन खाड्डा बी ओता. 16 खोलीइ शारु वोग्याआ आखा पोड़दा पात्ला हुतोअ वाअहीं बोणल्या साअकाआ ओता. 17 आन खांबोअ खाड्डा तांबाआ, आन आकड़ान बांदपोट्टी सांदीइ ओती, आन तियांआं मुंडे बी सांदी वाअहीं मोडाड़्येते, आन खोलीइ आखा खांब सांदीइ बांदपोट्टी वाअहीं जुड़्याते. 18 खोलीइ बाअणाआ पोड़दा नक्शीइ काम कोअल्यो, निला, जामण्या आन रात्ला रंगोअ कपड़ाआ, आन पात्ला हुतोअ कपड़ाआ बोणल्या ओता; आन ते विही आथ नांबा ओता, आन ते खोलीइ जागे पास आथ उसा बोणायाते. 19 आन तियांआं काजे शार खांब, आन खांबोअ काजे तांबाआ पाया शार ओता; तियांआं सेंडी सांदी वाअहीं मोडाड़्यीते, आन तियांआं बांदपोट्टी सांदीइ ओती. 20 रोअलाअ आन खोलीइ शारु वोल आखा खुटा तांबा वाअहीं बोणायाते.

21 साक्शीपत्राअ रोअलाअ सामान जो लेवीइ सेवा-साकरीइ काजे बोण्यो, आन जियाआ गणती आरोन पुंजाराआ पोर्‍यू ईतामारोअ वाअहीं मोशेए कोल्या वाअहीं ओवोतो, तियाआ खुलासु ओ होय.

22 जियी जियी वस्तुहू बोणावीइलाअ आदेश यहोवा देवे मोशेहे आप्युतो तियाहा यहुदाआ पारवाड़ीइ बसालेल, जो हुरोअ पोर्‍याआ पोर्‍यू आन ऊरीइ पोर्‍यू ओतू तिये बोणावी देदो. 23 आन तियाअरी दानोअ पारवाड़ीवाले, अहिसामाकोअ पोर्‍यू, अहलियाब ओतू, जो नक्शी काडनारु आन कोरवीइनारु आन निलो, जामण्यो आन रात्ला रंगोअ आन पात्ला हुतोअ साअकापोअ सित्रे काडनारु हुशार कारागिर ओतू.

24 सोका जागाआ पुरा कामोमेहें जों भेटेए होनो लागो तों सोका जागाआ तोलाआ इसाबे एक हाजार बेन किलो ओतो. 25 आन मंडड़ीइ गोणल्या माअहोंअ भेटेए सांदी सोका जागाअ तोलाआ हिसाबो वाअहीं तिन हाजार शार होव ओती. 26 मोन्जे जेतेहे विही वोरहोअ आन तिया रोत जाअखा वोयोअ गोणाअये, ते सोव लाख तिन हाजार पास होव पोन्नास माटी ओता, आन एकेका जोओंपोअ रोत सोका जागाआ तोलाआ इसाबो वाअहीं आरदो तोलो, जों एक बेका एतोहो ओवेहे तों जोड़्यो.✝ 27 आन तो लगबग तिन हाजार शार होव किलो गिऱ्याम सांदी सोका जागाआ आन विसमेर्‍याआ पोड़दाआ बेनु खाड्डाआ काजे लागो. एकेक एक खाड्डू एकेक किक्कारोअ* बोण्यू. 28 आन सातरा होव सत्तरेन पास शेकेल सांदी खांबाआ काजे, आकड़ीइ काजे, खांबाआ सेंडी मोडाड़ीलोअ काजे, आन आन बांदपोट्टी बोणावीलोअ काजे लागी. 29 साड़े सोवीस टनो रोत वादार तांबो देवोअ काजे भेट आप्यो. 30 तों लेत कोइत तियाहा काजे मिलापवाला तोंबाआ बाअणाआ खाड्डा, तांबाअ देवान्यो, तांबाआ सारी, आन देवान्याआ आखो सामान; 31 आन खोलीइ शारु वोल खाड्डा, आन मिलापवालू तोंबु, आन खोलीइ शारु वोलेहे खुटा बी बोणाया.