Êxodo 39

पुंजाराआ आंगड़े तियार कोइलो

1 फाशोअ मोशे यहोवा देवोअ आदेशोअ पुरमाणे, सोकाआ जागाआ सेवाआ काजे निला, जामण्या आन रात्ला रंगोअ वारुहूं हाजे साअके विंइत बोणावये आन आरोनोअ काजे बी सोके आंगड़े बोणावये;

2 तिये एपोदोहो होनो, आन निला, जामण्या आन रात्ला रंगोअ कपड़ाआ, आन पात्ला हुतोअ बोणल्या कपड़ाआ बोणावयो. 3 आन तियां होनाहा टेपरीत कोइत तियाआ पात्रे बोणावये, आन तियां पात्राहा कात्रीत कोइत तात बोणावयी, आन तियी तातेहे निला तियां बुद्दीमान कारागिरों, जामण्या आन रात्ला रंगोअ साअकामेहें, आन सिणा हुतोअ बोणावल्या साअकामेहें पोवी देदी. 4 तियां एफोदोअरी खांदपोट्टी जुड़ी देदी; तियाआ बेनू सेंडी जुड़ी देदी. 5 तियां कंबर पोट्टू विंइयू आन तो एफोदोहो लागाड़्यु, ओ पोट्टू बी एफोदोअ होसुज मोन्जे होनाआ आन निला, जामण्या आन रात्ला रंगोअ कपड़ाआ, आन पात्ला हुतो वाअहीं बोणल्या कपड़ाआ बोण्युतो; यहोवा देवे मोशेहे कोयो तेहें कोइत कोअयो. 6 तियें सुलेमानी मोंड्या कोरवीत कोइत तियामेहें इस्राएलोअ बारा पोर्‍याआ नावे, जेहें ठासु पाड़त्ले तेहें कोइत कोरव्ये, आन होनाआ जालीवाला खाताम पोवी देदा. 7 आन तिये तियांहां एपोदोअ खांदपोट्टीपोअ लागाड़्या, जिया वाअहीं इस्राएलोअ काजे ओर कोअनारा मोंड्या ठोरे; जेहें कोइत यहोवा मोशेहे आदेश आप्युतो.

सातीइ पोट्टाआ बोणावट

8 तिये सातीइ पोट्टाहा एपोदोअ होस होनाआ, आन निला, जामण्या आन रात्ला रंगोअ कपड़ाआ, आन पात्ला हुतोअ बोणल्या कपड़ाआ नक्शीइ काम कोअल्या कामोअ जेहें बोणायो. 9 सातीइ पोट्टू शोवकड़्यू ओवहूं जोवे काजे बेनी वोल हारको बोणायो, आन तो एक बिलास नांबो आन एक बिलास पोलो बोणायो. 10 आन तियां तियामेहें शार रांगीमेहें मोंड्या जुड़्या, आन पेल्लीइ रांगीमेहें माणिक्य; पद्यराग आन लालड़ी जुड़्या; 11 आन बिहीरी रांगीमेहें मरकत, निलमणी आन हिरा ओता. 12 आन तिसरी रांगीमेहें लसम, सुर्यकांत आन निलम; 13 आन शोवथी रांगीमेहें फिरोजा, सुलेमानी डोण, आन यशब जुड़्या; ए आखा होनाआ जालीवाला तातेम पोवी देदा. 14 आन एं मोंड्ये इस्राएलोअ पोर्‍याआ गणतीइ अनुसार बारा ओते; बारा पारवाड़ी मेहें रोत एका एकाआ नाव जेहें कोइत साप पाड़े तेहें कोत तेहेंज कोरव्यो. 15 आन तियें सातीइ पट्टू नाड़ाआ होस गुथल्या सोका होनाअ हाकोल बोणावीत कोइत लागाड़्यी; 16 फाशोअ तियें होनाआ बेन बांगड़्यी, आन होनाअ बेन कोड़ी बोणावीत कोइत बेनू सेवड़ा सातीइ पोट्टाआ जागे उपोअ बेनू मेरेपोअ लागाड़्यी. 17 ताहां तियां होनाआ बेनू गुथल्यी हाकलीही सातीइ पोट्टाआ सेंडीपोअ बेनू कोड़ीमेहें लागाड़्यी. 18 आन गुथल्या हाकलीइ बेनू सेड़ाहा तियां जुड़ीत कोइत एपोदोअ सामने बेनू खांदपोट्टीपोअ लागाड़्या. 19 ताहां तियें होनाआ बेन कोड़ी बोणावीत कोइत सातीइ पोट्टाआ बेनू सेंडीपोअ तियाआ तियी कोरेपोअ, एपोदोअ मायते भागोमेहें ओती तिहीं लागाड़्यी. 20 आन तियां होनाआ फाशीइ बेन कोड़ी बोणावीत कोइत एपोदोअ बेनू खांदपोट्टीपोअ मिकीत निसे रोत तियाआ सामने, आन जुड़ीइलोअ जागे रोत एपोदोअ काडल्यी नक्शीइ पोट्टापोअ लागाड़्यो. 21 ताहां तियें सातीइ पोट्टाहा तियीइ कोड़ी वाअहीं एफोदोअ कोड़ीमेहें निला दोरा वाअहीं एहेलोहो बांद्यो के तों एपोदोअ काडल्या सातीइ पोट्टापोअ रोय, आन सातीइ पोट्टू एपोदोअ रोत आलाग ने ओवुहूं जोवे; जेहें कोइत यहोवा देवे मोशेहे हुकूम आप्युतो.

बाकी पुंजाराआ आंगड़ाआ बोणावट

22 ताहरोअ एपोदोअ काजे आखो निला रंगोअ कोट बोणावया. 23 आन तियाआ बोणाविलोअ एहेलोह ओवो के तियाआ विसमेहें एक डुसू मेक्यु, आन डुसाआ शारु वोल एक कोर बोण्यी के ते फाटीत ने सेके. 24 तियां तियाआ निसेए कोरेपोअ निला, जामण्या आन रात्ला रंगोअ कपड़ाआ डाड़ींबे बोणावये. 25 तियां सोका होना वाअहीं गोंठी बी बोणावीत कोइत कोटोअ निसे शारु वोल डाड़ींबाआ विस-विसमेहें लागाड़्यी. 26 मोन्जे कोटोअ निसे शारु वोल एक होनाआ गोंठी, आन एक डाड़ींबो, फाशीइ एक गोंठी आन एक डाड़ींबो लागाड़्यो एहें कोइत ओवो के ओ कोट पोवित कोइत सेवाआ काम कोए; जेहें कोइत यहोवा मोशेहे हुकूम आप्युतो.

27 फाशोअ तियें आरोन, आन तियाआ पोर्‍याअ काजे पात्ला हुतोअ साअकाआ कोट बोणावया. 28 आन पात्ला हुतोअ कपड़ाआ पागड़ी, आन पात्ला हुतोअ कपड़ाआ हाजी टोपी; आन पात्ला हुतोअ साड्डो, 29 आन पात्ला हुतोअ साअकाआ आन निला, जामण्या आन रात्ला रंगोअ नक्शीइ काम कोअल्यो कंबरेए पोट्टू; यां आखाहा जेहें कोइत यहोवा देवे मोशेहे आदेश आप्युतो तेहेंज कोइत बोणावयो. 30 फाशोअ तियें सोका टोपापोऱ्यीइ सुटीइ काजे होनाआ सोकी पोट्टी बोणावयी; आन सापोअ काजे तियामेहें नावे कोरव्ये, मोन्जे "यहोवाआ काजे सोके." 31 आन तियें तियामेहें निलु दोरू लागाड़्यु, जिया वाअहीं तो उपोअ पागड़ी पोअ रोय, जेहें कोइत यहोवा मोशेहे आदेश आप्युतो.

काम पुरो ओवीइलोअ

32 एहें कोइत मिलापवाला तोंबाआ आखो काम सेलाअयो, आन जिया जिया कामोअ हुकूम यहोवा मोशेहे आप्यु तो, इस्राएलो तियाआ पुरमाणे कोअयो. 33 ताहां ते रोअलाअ तोंबाआ वस्तु मोशेए जागे लेताये, मोन्जे गोल कोड़ी, रिपे, आकड़ी, खांबे, पाया एतोहो आखो सामान. 34 आन रात्ला रंगोवाअहीं रंगवीइल्या मेडाआ सांबड़ाआ टापणो, आन सुस नावोअ वोडा मासाआ सांबड़ो, आन विसमेर्‍युउ पोड़दू; 35 डांडाअरी साक्शीइ पेटी, आन दयासनोअ टापणो; 36 रोटाआ टेबलोअरीज आखो सामान, आन भेटेए रोटू; 37 आखा सामानोअरीज सोका होनाआ बोणावल्यू दिवाआ खांब, आन तियाआ होबाड़ल्यू दिवू, उजालो आपे तेहें तेल; 38 होनाअ देवान्यो, आन सोको तेल; आन हाजी गोंदाण्यी आगरबत्ती, आन तोंबाआ बाअणाअ पोड़दा; 39 तांबाअ सारी, डांडाअरीज आखो सामान आन तांबाअ देवान्यो; आन तोपल्यो; 40 खांब आन पायाअरीज खोलीइ पोड़दा, आन खोलीइ बाअणाअ पोड़दा, आन दोरा, आन खुटा, आन मिलापवाला तोंबाआ सेवाआ आखो सामान; 41 सोका जागामेहें सेवा कोइलाआ वेले पोइलाआ नक्शी कोअल्ये आंगड़े, आन आरोन पुंजाराआ सोके आंगड़े, आन तियाआ पोर्‍याअ आंगड़े, जियांहां पोवित कोइत तियांहां पुंजाराआ काम कोइलाआ ओतो. 42 मोन्जे जो जो आदेश यहोवा मोशेहे आप्युतो तियाआ पुरमाणे इस्राएल आखो काम कोअयो. 43 ताहां मोशे आखो काम वारुहूं यहोवा देवोअ आदेशोअ पुरमाणे तियां कोअयो तों पाल्यो ताहां तिये आन मोशे तियांहां आशिर्वाद आप्यू.