1 फाश्योअ यहोवा मोशेहे कोयो, "पेल्लीइ पाटीइ होस बेन डोणोअ पाटी तियार कोइत ले; ताहां जें वसने पेल्लीइ पाटीपोअ लेख्येते, तेंज वसने आंय तियी पाटीपोअ लेखीहीं. 2 हांदाआ वेगीइ तियार रोजी, आन वेगीइ वेले सिनाय डोगो पोअ सोड़ीत कोइत तियाआ सेंडीपोअ माआ आगाड़ी उबू रोजी. 3 ताअरी कोडो ने सोडुहूं जोवे, आन डोगोपोअ कोडो माहुंउं काज ने देखाअहूं जोवे; आन मेडे, डोगरेन बोकड़े बी डोगोअ आगाड़ी ने सोरुहूं जोवे." 4 ताहां मोशे पेल्लीइ पाटीइ होस बेन आन पाटी बोणाया; आन वेगीज उठीत कोइत तियाआ आथो मेहें डोणोअ ते बेनू पाटी लेत कोइत यहोवाअ हुकूम नुसार सिनाय डोगो पोअ सोड़ीत लागू.

5 ताहां यहोवा वाद्लामेहें उतरीत कोइत तियाअरी तिहीं उबू रोत कोइत यहोवा नावोअ परसार कोअयू. 6 यहोवा तियाआ आगाड़ी ओत कोइत तियाआ नावोअ परसार कोअतूज जातु गोयु, "यहोवा, यहोवा, यहोवा देव मेरालू आन दयालू, आन मेर कोअनारु, खोत कोइलामेहें दिमू, आन जाअखू दायावालू आन सत्य,✝ 7 हाजार पिड़ी जाआं कायम मेर कोअनारु, खाराब काम आन गुना, आन पापोअ माफी कोअनारु होय, पोन तो गुनेगारोहो केहें बी कोइत निर्दुस ने ठरवे; तो वेगाआ डायहांआं खाराब कामोअ डोंड तियांआं बेटाह्हा नेत पोऱ्याआ पोऱ्या आन तियांआं पोर्‍याआ पोऱ्याहां बी आपनारु होय."

8 ताहां मोशे ताबुड़ धरतीइहें टुंगू पोड़ीत कोइत पागे पोड़्यु. 9 आन तिये कोयो, "प्रभु, जर ताआ मेरवानीइं नजर मापोअ ओय, ताहां प्रभु आमाआ विसमेहें ओत कोइत साल; एं माअहें डांबऱ्ये ते होय, तेबी आमाआ खाराब काम आन पापोअ माफ कोअ आन आमुहूं ताआ सोताआ खास भाग मानित कोइत स्विकार कोअ."

10 यहोवा देवे कोयो, "पाल, आंय एक शप्पत लेहो. ताआ आखा माअहुंउं सामने आंय एहेलेहे वोडे वोडे कामे कोअहीं जें धरतीपोअ आन आखा देसोमेहें केदिहीं ने ओवे; आन तें आखे माअहें जियांअ विसमेहें तु रोहे यहोवा देवोअ कामोंहों पाले; काहाके जों आंय तुमाआ काजे कोइलाआ होय तो बिइलोअ हारको काम होय. 11 जो आदेश आंय आज तुमुहूं आपोहो तियाहा तुमू मानजा. पाला, आंय तुमाआ आगाड़ी रोत एमोरी, कनानी, हित्ती, परिज्जी, हिव्वी, आन यबूसी माअहोंहों काडोहो. 12 तियाहा काजे तियारीम रोजा के जिया देसोम तु जानारु होय तिया देसोम रोनाराअरी शप्पत मा लेहा; एहेलोहो ने ओवुहूं जोवे के तो ताआ काजे फांदू ठोरे. 13 आन तियांआं देवान्याहां ओदारीत टाकजी, आन तियांआं भक्ती कोइलोअ खांबोहो तोड़ीत टाकजा, आन तियांआं आशेरा नावोअ मुर्तीही पाड़ीत टाकजी."✝

14 "बिहीरा कोडाहाज देव कोत मा मानही; काहाके यहोवा जियाअ नाव ठोटाय कोअनारु देव होय, खिजवात उठनारु देव होय. 15 हेअजी! तु तियांआं देसोअ माअहोंअरी शप्पत मा लेही, आन नेत तें तियांआं देवोअ फासाड़ी जात कोइत सोगदाय कोए, आन तियांआं सामने गाराहा कोए, आन एखु ताहूं नेवतो आपेन तु तियाआ गाराहा कोअल्यी वस्तु खाही. 16 आन तु तियांआं पोर्‍यीही ताआ पोर्‍याआ काजे लेत आवही आन ते पोऱ्यी खाराब विसारो वाअहीं तियांआं देवोअ पुंजन कोइलाआ काजे तियांआं वाते लागाड़े."

17 "तुमू देवोअ कोड़ल्यी मुर्ती मा बोणावहा आन तियीइ भक्ती मा कोअहा.✝

18 "विण खमीरोओ रोटाआ तिवार मानजा. तियामेहें माआ आदेसोअ पुरमाणे आबीब मोयनाअ ठरिवल्यी वेलेपोअ हांत दिही जाआं विण खमीरोअ रोटू खाया कोअजा; काहाके तुमू मिसर देसोम रोत आबीब मोयनामेहें निहीत आयेते."✝

19 "हारेक पेलठो माआ होय; आन बोलोद नेताहां, मेडो, ताआ पाल्ल्या मालधनो मेहें रोत जे पेल्लोअ ओय ते आखे माआ होय.✝ 20 गोदड़ाआ पेल्लाआ बासाआ हाटे मेडो आपीत कोइत सोड़वीत लेजी, जर तु तियाहा ने सोड़वीइनारु ओय तांहा तियाआ बोस तोड़ीत टाकजी. पोन तुमाआ आखा पेल्लाआ बेटाह्हा हाटे कोइत सोड़वीइजा.* कोडो बी ठाल्ले आथेज माआ सामने ने आवुहूं जोवे."

21 "सोव दिही जाआं काम कोअजा, पोन हाँतवे दिहे आराम कोअजा; नेत खेड़ीइलोअ आन वाडीलोअ टेमोहों बी आराम कोअजा.✝

22 "आन तु आठीवड़ाआ तिवार मानजी जो पेलठो फोलवो गोवोंअ तिवार कोवाअहे, आन वोरहोअ आखरीइ टेमोहों वाडीइलोअ तिवार मानजा.✝

23 "वोरह्योम तिन वारी ताआ आखा माटी इस्राएलोअ प्रभु यहोवाहा तियांआं सोब देखाड़े. 24 काहाके आंय बिहीरा देसोहो ताआ आगाड़ी रोत काडीत कोइत ताआ हींव वोदाड़ीहीं; आन वोरह्योमेहें तिन वारी तू ताआ देवोअ सामने हजर रोनू आवही, ताहां ताआ जागाआ कोडो लालस ने कोए.

25 "माआ गाराहा आपल्या रक्ताहा खमीरवाला रोटाअरी अर्पण ने कोअहूं जोवे. वल्हांडण तिवारोअ गाराहा आपल्या वस्तुमेहें रोत कीज वेगीइ जाआं मा रोअहूं देहा.✝

26 "पाकला ओनोअ पेलठो फोलवो ताआ देवोअ कोअमेहें लेत आवजी; बोकड़ाआ गिद्लाआ माहां तियाआ आयहीइ दुदोमेहें मा रांदही."✝

27 ताहां यहोवा देवे मोशेहे कोयो, "आंय कोयीही ए आखी गोठी लेखीत मिक; काहाके यींज गोठी वाअहीं आंय ताअरी आन इस्राएली माअहोंअरी शप्पत खादीही." 28 मोशे तिहीं देवोअरी सालिही दिही आन सालिही रात रोयू; ताअहूं जाआं तिये रोटू पाईं ने पिदो. आन तिये ते शप्पतोअ गोठ्यी बेन डोणोअ पाटी पोअ लेखी देदी.

29 जेहेलाम मोशे देवोअ साक्शीइ बेनू पाटी लेत निसे उतरीइतुतो, तेहेलाम देवोअरी गोठी कोइलाआ वाअहीं तियाआ मुखोअ पोअ रोत उजालो निहीतोतो, पोन तियाहा ओं ने मुंदू गोयू. के तियाआ मुखोअ पोअ रोत उजालो निहेंहे.✝ 30 जेहेलाम आरोन आन आखे इस्राएल मोशेहे पाल्यो के तियाआ मुखोअ पोअ रोत उजाला निहेंहे, ताहां ते तियाआ जागे जाअलाआ बित गोये. 31 पोन मोशे तियांहां हाद्ये ताहां आरोन आन इस्राएलोअ माअहोंअ पुडारी तियांअरी गोया ताहां मोशे तियांअरी गोठी कोउ वोल्यू. 32 तिहीं फासाड़ी आखे इस्राएल वाले माअहें मोशेए जागे आये आन जे गोठी सिनाय डोगोपोअ देवे तियाहा कोत आप्यीते ते आखी तिये तियांहां कोताप्यी. 33 जाअहूं मोशे माअहूंअरी गोगित ने नेवराअयू ताअहूं जाआं तो तियाआ सोब कापड़ वाअहीं टापित रोयू. 34 पोन कोड्ली बी वेले मोशे जेहेलाम देवोअ जागेहे गोठी कोउ जातुतो, तेहेलाम सोबी पोअ रोत कापड़ काडीत लेतुतो; फाशू बारथे आवतुतो तेहेलाम देवे जे गोठी कोयी ओय ते इस्राएल वालाहां माहुंहूं कोत आपतुतो. 35 मोशेए समकीइनारी सोब इस्राएलवाले माहें पालतेते, ताहां तो फाशुउ तियाआ सोब टापित लेतुतो; आन देवोअरी गोगीइलोअ काजे फाशुउ जाय ताअहूं जाआं तो कापड़ वाअहीं टापित मिकतुतो.