Reino dos céus

Kulandanikia chilebhe cha bei ngolongwa chichiitwe

44 "Umwenye gwa kunani kwa Annoongo gulandana na hilebhe cha bei ngolongwa chichiitwe kumigonda. Mundu jumo bhakachibhona, na bhakahiya kabhele. Ngabhakaachuka muno muntima na bhakaula kuucha hilebhe yabhe yoa hibhakibha nayo, na bhakajaula kuguemela nng’onda gola."

Chilebhe cha bei ngolongwa chichikemwa lulu

45 "Kabhele, Umwenye gwa kunani kwa Annoongo gulandanika na mundu jumo bhabhatendita kulolea lulu jakuhalala. 46 Pabhakapata lulu jimo ja bei ngolongwa, bhakajenda kuucha hilebhe yoa yakibha nayo, bhakahemela lulu jela."

Kulengania na mbeju ja haladali

31 Ayesu akaalobholelanga bhandu kulandanikia kongi, "Umwenye gwa kuani kwa Annoongo gulandanika na mbeju njoko jijikemwa haladali, yakubhehe mundu jumo bhakaipetula na bhakapanda mu nng’onda gwabhe. 32 Jene mbeju nga njoko njoko muno kupeta mbeju yoa, nambo jimelite hubhehe ngolongwa kupeta mimela joha. Kola na kubhee nkongo nkolongwa na hijuni ya kunani bhatendakuhikanga na kuchenga hiyua mu matepo gabhe."

Kulengenikia na ngedule

33 Ayesu akaalobholela kulandanikia kongi, "Umwenye gwa kunani kwa Annoongo gutekulandanika henela. Mwikege bhapetula ngedule na kujihangalanga mu madebe gabhele ga ukobha gwa ngaano na ukobha goa gutendakutupuka."

Kulengania kwa maheya

24 Ayesu akaalobholela bhandu kulengania kongi, "Umwenye gwa kunani kwa Annoongo gutenda kulandana na mundu jwaapandite mbeju jammbone mu ng’onda gwabhe. 25 Nambo kilo bhandu pabhakagolola lugono, apwati bhabhe bhakahika, na bhapandikia maheya pakati ja nakaponga, na bhakajaula. 26 Bahi, mbeju pajikamela na kujemeka kutumbuka, maheya kabhele gakajemeka gutumbuka. 27 Akaatumichi bha akola nng’onda bhakaajabhulila, bhakaalobholela, ‘Hangwana, tweenga tupandite mbeju jammbone mu nng’onda gwinu. Bholi maheya gagabhile gabhoka koji?’ 28 Bhenabho bhakaajangula, ‘Apwati nga bhatendite henela.’ Bhenibhala akaatumichi bhakapundanga kwaakonyanga, ‘Bholi, mpala tujende tukagatupule?’ 29 Na jonojwe akaajangula, ‘Ngabha, nkotokugatupula, kwa kubhee pampakutupulanga maheya hago nkombola kutupula pamo na ngaano. 30 Nnekange ngaano na maheya gakole pamo mpaka machobha ga kuhuna. Gena machobha mbakwaalobholela bhakuuna, bhakondanike oti maheya bhagatabhe tabhe makendeka na kujochwa mooto. Nambo ngaano muihunange nkajibhekange mu ngokwe jangu.’"

Ayesu bhatendakuatambula nnani ja kulandanikia kwa nakaponga

36 Ngapena Ayesu akaatabhuka bhenibhala bhandu, bhakajingila mu nyuumba. Bhabhaajigana bhabhe bhakaajendelela, bhakaalobholela, "Ntuatambulile kono kulandanikia kwa nakaponga kumigonda."

37 Ayesu bhakaalobholela, "Amundu bhabhapandite mbeju jammbone mu nng’onda nga Mwana bha Amundu. 38 Nng’onda gola nga chilambo, mbeju jammbone nga bhenibhala bhandu yakubhee Umwenye nga gwabhenji. Nambo yeniyela nakaponga nga bhenibhala bhandu bha bhenibhala Abohu. 39 Akaapwati bhabhapandite genigala maheya nga Abohu. Mahuno nga kupela kwa chilambo na bhabhaunanga nga akaatumichi bha Annoongo bha kunani kwa Annoongo. 40 Handa chiibhile yeniyela nakaponga pagalondanikwa pamo na kujochwa mooto, nga chiipakubhee lichobha lya kupela chilambo, 41 Mwana bha Amundu bhapakwaatuma akaatumichi bha kunani kwa Annoongo bhabhalondanike kubhoka mu Umwenye gwabhe bhenibhala bhoa bhabhajambukia bhandu bhatendange mabohu, na bhoa bhabhatendite hilebhe hibohu, 42 na kwa kwaajeanga mu mooto gwa kalipa gwangahimaka machobha goha na konokwe bhapakugutanga na kuyaga mino. 43 Ngapena, bhenibhala bhandu bhammbone bhapakung’anyima handa lyobha mu Umwenye gwa Atati bhabhe. Henela bhabhakweti na machikilo ga kujahonikia na bhajohanikie!"

Lijogano kwa lipelele lya koka homba

47 "Kabhele, Umwenye gwa kunani kwa Annoongo gukalandanika na lipelele lilikachubhikwa mu bahali, likatangia homba yengi yengi. 48 Lipelele palikatweelela, bhandu bhakaliuta panja pajomo, bhakatama, bhakaagulanga homba yammbone na kubhabhekanga nkati ja mapakacha gabhe, na bhangammbone bhakailekelanga. 49 Nga chiipakubhee machobha ga kupela, akaatumichi bha Annoongo bha kunani kwa Annoongo bhapakupitila, bhapakubhalangana bhandu akaabohu na bhandu bhammbone, 50 na kwaajeanga bhenabho akaabohu mu mooto gwa kalipa gwangahimika machobha goha. Konokwe bhapakuguta na kuyaga mino."

Kuhangalala kwa kweli

3 "Bhapakuachukanga bhenibhala bhabhaalolea Annoongo,

kwa kubhee umwenye gwa Annoongo nga gwabhenji.

4 Bhapakuachukanga bhenibhala bhabhaumalanga nangocheni

kwa kubhee Annoongo bhapakwaapembelea.

5 Bhapakuachukanga bhabhabhii bhakutongamanika

kwa kubhee bhapakwapekeanga chilambo chibhee chabhenji.

6 Bhapakuachukanga bhabhapalanga muno kutenda gabhagapala Annoongo,

ligongo Annoongo bhapakwajangatilanga kutenda henela.

7 Bhapakuachukanga bhenibhala bhabhakolela kia bhangi,

kwa kubhee Annoongo bhapakwaabhonela kia.

8 Bhapakuachukanga bhabhabhilinge na ntima gwa kualala,

kwa kubhee bhapakwaabhona Annoongo.

9 Bhapakuachukanga bhenibhala bhabhakamuanga bhandu,

kwa kubhee jonojwe bhapakemwa bhaana bha Annoongo.

10 Bhapakuachukanga bhabhapotekwa ligongo lya kutenda gagapalikwa na Annoongo,

kwa kubhee umwenye gwa kunani kwa Annoongo nga gwabhenji."

11 "Ntekuachukanga mwangota handa bhandu bhapakuntukananga, kongo bhabhi kunnagianga na kumkopokeanga kila namuna ja ubohu ligongo lya nenga. 12 Nhachukange na kuhangalala kwa kubhee ngwahupa jinunji nga ngolongwa kunani kwa Annoongo. Henela nga chibhakaatendelanga akaalondoi bha Annoongo jwakibha tangu ja mwangota."

Nga bheneki bhabhabhile akolo mu Umwenye gwa Annoongo

1 Gonigola muda bhabhachijigana bhakaajendelela Ayesu, bhakaakonya, "Nga bheneki bhabhile akolongwa muno mu Umwenye gwa Annoongo?" 2 Ayesu akaankema mwana jumo na kunnyemea pakati jabhenji, 3 ngapena bhakalobhola, "Ndendakunnobholelanga kweli, handa ngatendebhuka kubhehe handa mwana, ngajingilanga mu Umwenye gwa Annoongo. 4 Henela, bhoabhala bhabhachitulua handa mwana jonjoni, bhenabho nga bhabhabhile akolongwa mu Umwenye gwa kunani kwa Annoongo.

14 Ayesu akalobhola, "Mwaalekange bhena bhana bhachoko bhaikange kwaachangu, wala nkotokwaahibhilanga, kwa kubhee Umwenye gwa kunani kwa Annoongo nga gwa bhandu bhabhilinge handa habha bhana."

23 Penapo Ayesu akaalobholela bhabhaajigana bhabhe, "Kweli ndendakunnobholelanga, hipakubhee kulimba kwa mundu jwabhi na hilebhe hijingi kujingila mu Umwenye gwa kunani kwa Annoongo. 24 Kabhele ndendakunnobholelanga, ngabha kulimba muno kwa chinyama chichikemwa ngamia kupeta palipobhole lya chindano, ila ngabha kwa mundu jwabhi na hilebhe hijingi kujingila mu Umwenye gwa Annoongo."

25 Bhabhaajigana bhabhe pabhakajoha genago, bhakakangachanga muno na kwaakonya, "Nga aganiki bahi jwaakombola kuokoka?"

26 Nambo Ayesu akabhalolanga, akabhalobholelanga, "Chikubho hecho ngakomboleka kwa bhandu, nambo kwa Annoongo goa gatenda komboleka."

Nimmanyangahopo mwangota

21 "Ngabha kila mundu jwaangema nenga, ‘Hangwana, Hangwana,’ apakujingilanga mu Umwenye gwa kunani kwa Annoongo, nambo jonijola jwapakupangananga chibhapala Atati bhangu jwabhile kunani kwa Annoongo.

19 Bahi, mundu joajola jwangajeketela hata lilagilo limo lichoko, na kwaajigana bhangi bhatendange henela, jonojwe apakubhee achoko muno mu umwenye gwa kunani kwa Annoongo. Nambo jonijola jwapakujeketela malagilo ga Annoongo na kwaajigana bhajingi jonojwe apakubhee akolo mu umwenye gwa kunani kwa Annoongo." 20 Ndenda kunnobholelanga kweli, handa ngatenda maha hikubho hiyaabhajila Annoongo handa chibhatendanga bhabhajigananga malagilo ga Amusa na Mafalisayo, ng’o ngajingilanga mu umwenye gwa Annoongo.

9 Bahi, henela nga chiipalikwa kujopa,

‘Atati bhitu jwammile kunani kwa Annoongo,

lihina linu lya kuhalala lilumbalilwe.

10 Umwenye gwinu guike.

Upalyo gwinu gutendeke pamba pachilambo handa kunani kwa Annoongo.

Majigano ga Ayohana Ambatichaji

1 Pagakapeta machobha gajingi Ayohana ambatichaji bhakapitila, bhakajemeka kutangacha lilobhe lya Annoongo mu likonja lya kuchilambo cha Yudea bhakatangacha bhabhi kulobhola, 2 "Mutendebhukange na kugalekanga mabohu ginunji, kwa kubhee Umwenye gwa Annoongo gutekubhandikila."

17 Kubhoka gono muda Ayesu akajemeka kutangacha Lilobhe lya Annoongo abhi kulobhola, "Nnekange mabohu ginu, kwa kubhee Umwenye gwa kulihunde gutekubhandikila!"

7 Nnyaulange nkaalobholelange bhandu, ‘Umwenye gwa kunani kwa Annoongo gubhandikile,’

11 Bahi ndendakunnobholelanga yakubhee bhandu bhajingi bhapakuhika kubhoka kuulabho na kuuwelo, na bhenaangota bhapakutamanga ili bhalyee pamo na Aaibulahimu, na Aisaka, na Ayakobo mu Umwenye gwa kunani kwa Annoongo.

11 Ndendakunnobholelanga kweli, pakati ja bhaana bhoa bha bhandu, bhangabhokela bhabhile akolo kupeta Ayohana Ambatichaji. Hata henela, bhenibhala bhabhile ahocho muno mu umwenye gwa kunani kwa Annoongo nga akolongwa kupunda Ayohana. 12 Kubhokela muda gwa Ayohana Ambatichaji mpaka nangocheni, umwenye gwa kunani kwa Annoongo gupetulikwa na bhandu bhabhi na machili, na bhandu bhabhilinge na machili bhapalanga kugutola kwa machili.

Kuchibhekela hilebhe hijingi kunani kulihunde

32 "Nkotokujogopa mwe mwa lilubhalo lichokochoko, ligongo Atati bhinu bhalolite yammbone kumpekeanga mwangota ukolo gwabhe.

5 Kwa ngani ja hikubho heye muimanyange kweli kubhee, mundu joajola jwaapangana ngongola, au mundu ahakwa au mundu abohu au mundu joajola jwaabhii jwa kulokolila, mundu jwaalokolila alandana na mundu jwaachalila chidimu, ngapata ng’o choachela mu umwenye gwa Akilisito na gwa Annoongo.