1 Kongo nga kujemeka kwa Ngani Jammbone jijaalenga Ayesu Kilisito, Amwana bha Annoongo. 2 Jikajemeka handa chijikajandikwa mu chitabu cha alondohi bha Annoongo Aisaya,

"Annongo bhakalobhola, ‘Naantuma anyumbe bhangu bhannongolele,

bhenabho apakunhalakia ndela jinu.’

3 Amundu bhatendakema kubhoka palulemba,

‘Munhalakiange Hangwana ndela jabhe,

nchiandaange kwaapokela Hangwana pabhapakuhika!’"

4 Henela anyumbe jonojwe akibha Ayohana Mmatichaji, bhakahika palulemba na kwaatangachianga bhandu na kwaabatichanga na abhikwalobholelanga bhandu bhalekange mabhou gabhenji ili Annoongo alekeleange mabhou gabhenji. 5 Bhandu bhajingi kubhoka chilambo cha ku Yudea na chilambo cha ku Yelusalemu bhakibhanga bhatendakwaajendelela na kwaajonikia Ayohana, bhakakoondanga mabhou gabhenji na kuilekanga, na bhena akaabatichanga mu loochi lwa ku Yolodani.

6 Ayohana akibha awalile chiwalo chichikatotwa kwa manjoja ga chinyama chichikemwa ngamia, na ng'oji gwa limbendela muchibhuno chabhe. Chakulya chabhe chakibha inune na bhuchi. 7 Nabhena bhakatangacha bhabhikulobhola, "Pambakubhoka nenga bhapakuhika bhabhabhii na machili muno kupunda nenga, yakubhehe nenga ngapaalikwa hata kotima na kujogola migoji ya champali yabhe. 8 Nenga ndendakummatichanga kwa machi, nambo bhenabho bhapakummatichanga kwa Mboomo ja Annoongo."

9 Machobha genago, Ayesu akahika mu chilambo ku Nazaleti, ja ku Galilaya, na akahika kwa Ayohana na akaabaticha mu loochi lwa ku Yolodani. 10 Popopo Ayesu pabhakachobhoka mmachi, akakubhona kunani kwa Annoongo kujogwike, na Mboomo ja Annoongo akaatulukia handa chibhatuluka nguunda, 11 na lilobhe lya Annoongo likajohanika kubhoka kunani kwa Annoongo libhikulobhola, "Mwenga nga Amwana bhangu junampala, ndekubhajilwa na mwenga."

12 Popopo Ayesu akalongolelwa na Mboomo ja Annoongo kujaula palulemba, 13 Ayesu bhakatama konokwe machobha makomi ncheche abhikujigwa na Lichetani. Akibha konokwe pamo na hinyama ya mmanyahi, na bhenaangota akaapangana mahengo bha kunani kulihunde bha Annoongo bhatendita kwahudumia.

14 Machobha gajingi gakapeta Ayohana bhakatabhwa kumagelecha. Ayesu akajaula mu chilambo cha ku Galilaya, bhabhikutangacha Ngaani Jammbone ja Annoongo, 15 bhakalobhola, "Machobha gabhandikile, machobha ga Annoongo kuhukumula. Nnekange mabhou ginunji na kuhobhalela Ngani Jammbone!"

16 Lichobha limo Ayesu pabhakibha bhatendakupeta ngulugulu mwa litamanda lya ku Galilaya, akaabhona akaakoka homba bhabhele, Asimoni na anung'una bhabhe bhakemitwa Aandulea bhabhikoka homba kwa lipelele. 17 Ayesu akaalobholelanga, "Ngagulange na nenga mbakunnyigananga kwaletanga bhandu kwaachangu handa chinkokanga homba." 18 Popopo bhakailekanga hipelele yabhenji, bhakaakagula. 19 Pabhakajaula nnongi kachoko, akaabhonanga Ayakobo na Ayohana, bhenaangota bhakibhanga bhana bha Azebedayo. Na bhenaangota kabhele bhakibhanga nkati ja ntumbwi gwabhenji bhabhikuhalakianga hipelele yabhenji. 20 Popopo Ayesu akaakemanga, na bhenaangota bhakaaleka atati bhabhe Azebedayo mu ntumbwi pamo na akaapangana mahengo, bhakaakagula Ayesu.

21 Ngapena Ayesu pamo na bhenibhala bhabhachijigana bhabhe bhakajaulanga mu chilambo cha ku Kapelenaumu na palikahika Lichobha lya Kupomolela kwa Bhayahudi, Ayesu akajingila mu Nyuumba ja kongalilana Bhayahudi, akajemeka kujigana. 22 Bhandu bhoha bhabhakannyonikia Ayesu bhakakangacha kwa majigano gakwe, kwakubhee ajigana handa bhabhajigana Malagilo ga Amusa ila ajigana handa mundu jwaabhile na ukolo.

23 Popopo nkati ja Nyuumba ja konganilana Bhayahudi pakibha na mundu jumo jwaakapoganikwa na mahoka, akapalia lilobhe bhabhilukolobhola, 24 "Mmii na niki na twenga, mwenga Ayesu bha ku Nazaleti? Bholi, ntekuhika kututinia? Niimanyi mwenga nga ganiki, mwenga nga junnetitwe kubhoka kwa Annoongo!"

25 Ayesu bhakalikalipila lyenilyela lihoka, akaalobholela, "Nkotoke! Mmoke kwa habha amundu!"

26 Lyenilyela lihoka likaapukunya kwa machili amundu bhenabho, ngapena bhakaguta kwa lilobhe likolongwa, bhakaabhoka. 27 Bhandu bhoha bhakakangachanga, bhakakonyananga, "Nga hikubho niki yenjeni? Bholi, nga majigano gayono kabhele, gagabhii na mamulaka Amundu habha kuhukumula hata mahoka na bhenaangota bhatendakwaakonda!"

28 Henela ngani ya Ayesu hikajenela chindema koha mu chilambo cha ku Galilaya.

29 Ayesu na bhanapunji bhabhe pabhakabhokanga mu Nyuumba ja konganilana Bhayahudi, Asimoni na Aandulea na Ayohana na Ayakobo bhakajaulanga mpaka kaja kwa Asimoni na Aandulea. 30 Bahi, haikege bhamo, haki bhabhe Asimoni, bhakibha pachindanda bhatendakulwala chitamwa, na bhenaangota bhakannobholela Ayesu ngani yabhe. 31 Ayesu akaajendela jono mwikege, akaakamula lubhoko, akannyimua. Na chenichela chitamwa akalama, akajemeka kwaatumikilanga.

32 Pajikahika kimuho na Lichobha lya Kupomolela palikajomoka, bhakaaletela Ayesu akaatamwa bhoha na bhabhakibhanga na mahoka. 33 Bhandu bhoha bha chenichela chilambo bhakakondekananga panja ja nlyango. 34 Nabhena Ayesu akaalamiyanga bhandu bhajingi bhabhakibhanga na hitamwa yengi yengi, akagabhenga mahoka gajingi, nambo angaalekelelanga gena mahoka kulongela chilebhe ligongo bhatendita kumanyanga bhena nga aganiki.

35 Malabhi jakwe, pangali tangu kuchee, Ayesu akabhoka, akajaula pantemela kwaajopa Annoongo, 36 Asimoni na akaajabhe bhajaulanga kwaalolela, 37 pabhakammona bhakannobholela, "Bhandu bhoha bhatendakunnolea mwenga." 38 Ayesu akaalobholelanga, "Tujaulange mu hijiji yengi hiibhandikile ngatangache konokwe Ngani Jammbone kabhele, maana ndekuhika kwa lihengo lyenelyo. 39 Ayesu bhakajaula mu chilambo choha cha ku Galilaya bhabhikutangachanga mu Nyuumba ya konganilana Bhayahudi na kugabhenga mahoka."

40 Amundu bhamo bhabhabhile na mambujupuju bhakaajendela Ayesu, bhakaatindibhalila majugwa, bhakaajopa, "Handa mpalite, mpakombola kunyelejea!" 41 Ayesu akaakole kiha, bhakanyulula lubhoko lwabhe, bhakaakwaa na kwaalobholela, "Ndendakupala! Nnyelejeike!" 42 Popopo amundu bhenabho akalama mambujupuju gabhe, bhakajelejeka. 43 Popopo Ayesu bhakaalobholela bhajaule na kwaanyamuka, 44 "Nkotokunnobholela amundu bhoahabhala ngani jenjeni, ila nnyabhule nkachilangie kwa akung'i na nkabhoe mbeeko ligongo lya kujelejeka kwinu handa chibhakalagia Amusa ili kwaalangianga bhandu kubhehe nnamite." 45 Nambo bhena amundu bhakajaula, bhakajemeka kujenea ngani jenejo koha na Ayesu bhangakombola kujiingila mu hilambo yabhenji kwa kubhonekana, hikapaalikwa bhatame panja mahali pantemela. Hata henela, bhandu bhakaajendela kubhoka ku kila upande.