1 Lichobha lyengi lya Kupomolela Ayesu bhakajingila kabhele Mu nyuumba ja konganilana Bhayahudi na monimola nkati mwakibha na mundu jwaapolite lubhoko. 2 Mu nyuumba jenejo, Mafalisayo teno bhatendita kulendela bhaalamie amundu bhenabho Lichobha lya Kupomolela ili bhapatange kwaachitaki. 3 Ayesu akaalobholela bhena amundu bhabhapolite lubhoko, "Nnyeme nhike pambani pakati." 4 Penapo, bhakaakonyanga, "Bholi, hipaalikwa Lichobha lya Kupomolela kutenda chikubho chammbone au kutenda chikubho changalimmbone, kukoomboa umomi au kugukoma?" Nambo bhenaangota bhangalongelanga lilobhe. 5 Penapo Ayesu akaalolanga bhoa kwa lilaka, bhakabhona kiha mu ntima gwabhe ligongo lya kulepela kuhobhalela kwabhenji. Kabhele akaalobholela bhenibhala amundu, "Nnyulule lubhoko lwinu!" Nabhena akalunyulula lubhoko lwabhe, gukabhehe nkoto. 6 Popopo Mafalisayo bhakabhokanga panja, bhakalongelanga pamo na bhandu bha chibhoga cha bhandu chichajaangatila Ahelode namuna ja kwaakoma Ayesu.

7 Ayesu akabhoka penapo pamo na bhanapunji bhabhe, bhakajaula kubhandikila na litanda lya ku Galilaya, na lilubhalo lya bhandu bhajingi likaakagula. Bhandu habho bhabhokita ku Galilaya na ku Yudea. 8 Bhandu pabhakajoa genago gabhatendite bhandu bhajingi bhakaakagula Ayesu, kubhoka ku Yelusalemu na kubhoka ku Idumea, kuuwelo ja loochi lwa Yolodani, pamo na bhenibhala bhabhabhandikile hilambo ya ku Tilo na ku Sidoni. 9 Ayesu bhakaalobholela bhanapunji bhabhe bhaabhekele ntumbwi gumo ili nkondekano gwa bhandu gukoto kwaaminya minya ligongo lya bhandu bhajingi. 10 Kwa kubehe akaalamiha akaatamwa bhajingi bhenibhala akaatamwa bhatendita kunokolana ili bhakombolange kunkwaa. 11 Na bhandu bhabhakibhanga na mahoka pabhakammona, bhakajigwianga pahi nnongi jabhe na kupalia lilobhe, bhakalobhola, "Mwenga nga Amwana bha Annoongo!"

12 Nambo Ayesu akaakulumikiha kwa kalipa bhakoto kulobhola bhenabho nga aganiki.

13 Ayesu bhakakwela pachitombi, akaakemanga bhenibhala bhabhakaapala. Bahi, bhakaajendela, 14 nabhena bhakaahagulanga bhandu komi na bhabhele yakubhehe bhaakakemanga akaandundame bhakaalobholelanga ili bhatamange nabho, na bhaatumange kujaula kutangacha, 15 na bhabhee na mamulaka ga kwaabhenganga mahoka. 16 Bhandu bhabhaagwile nga habhabha, Asimoni yakubhehe Ayesu bhakaapekea lina, Apetulo, 17 Ayakobo na Ayohana, bhaana bha Azebedayo nambo Ayesu akabhakemanga Aboanelige, maana gakwe, "Bhana bha Nlindimilo" 18 Aandulea na Afilipo na Abatolomayo na Amatayo na Atomaso na Ayakobo amwana bha Aalufayo na Atadei na Asimoni bhabhapotanila chilambo chabhe, 19 na Ayuda Aisikalioti yakubhee baadaye bhakaagaluka Ayesu.

20 Ngapena Ayesu akabhuja kaja na nkutuli gwa bhandu gukakondekana kabhele, hata Ayesu na bhanapunji bhabhe bhangakombolanga kulyee chakulya ligongo bhatendita kwaahudumianga bhandu. 21 Akaalongo bhabhe pabhakapatanga ngani jenejo bhakajaula ili bhaapetule ligongo bhandu bhatendakulongelanga kubhehe, "Atamwa mpangai."

22 Na bhabhajigana bha Malagilo ga Amusa bhabhakatulukanga kubhoka ku Yelusalemu, bhakalobholanga, "Bhatekamulikwa na Abelizebuli akolo bha mahoka, nga maana bhatenda kwaabhenganga mahoka kwa machili ga akolo bha mahoka."

23 Penapo Ayesu bhakaakemanga, bhakaalobholelanga kwa kulandanakia, "Bholi, hikomboleka bholi, Lichetani kuchibhenga mweene? 24 Handa chilambo chimetunike mu mabhoga mabhoga, chilambo chenecho ngakomboleka kujema. 25 Kabhele, ikabhehe bhandu bha nyuumba jimo handa bhametunike malubhalo malubhalo, nyuumba jenejo jikombola hopo kujema. 26 Na handa ikabhehe lichetani atenda kuchikana mweene na handa atekumetunika ngakombola kujema na kujomoka kwabhe kutekubhandikila."

27 "Bhakwa amundu bhabhakombola kujingila mu nyuumba ja amundu bhabhakweti machili na kwaapokonyola hilebhe yabhe pangali kwaatabha. Handa bhaatabhite nga bhapakombola kwaapokonyola hilebhe yabhe."

28 "Kweli ndendakunnobholelanga, bhandu bhapakulekelelwa gabhou gabhenji goha na kwaaponja kwabhenji koha, 29 nambo bhabhapakulongela mabhou kwa Mboomo ja Annoongo, bhalekelelwa hopo machobha goha, bhapakubhehe na mabhou machobha goha." 30 Ayesu bhakalongela henela kwa ligongo bhatenditanga kulongelanga, "Bhatekamulikwa na mahoka."

31 Anyongo bhabhe Ayesu na akaanung'una bha Ayesu bha kweli bhakahikanga penapo, bhakajemanga panja, bhakaatuma amundu bhaakeme Ayesu. 32 Bhandu bhajingi bhakibha bhatamitinge kwa kwaatimbilila Ayesu, nabhena bhakaalobholela, "Anyongo bhinu na akaanung'una bhinu bhabhilinge panja, bhapalanga kummona."

33 Ayesu bhakaakonyanga, "Anyongo bhangu na akaanung'una bhangu nga achiganiki?" 34 Ngapena bhakaalolanga bhenibhala bhandu bhabhatamitinge kwa kwaatimbilila kila upande, bhakalobhola, "Nnyoonikie! Habhabha bhabhanyoanikianga nga akaanyongo bhangu na akaanung'una bhangu bha kweli! 35 Amundu bhoabhala bhabhatenda gabhapala Annoongo, bhenabho nga apwanga bhangu, na alombo bhangu, na anyongo bhangu."