1 Lichobha limo bhangi bha Mafalisayo na bhabhajigana malagilo ga Amusa bhakibha bhabhokite ku Yelusalemu bhakalondanikanga nnongi ja Ayesu. 2 Bhakabhonanga bhanapunji teno bha Ayesu bhatenda kulyee chakulya kwa mabhoko mahakwa, yaani panga kuha maha handa chiipalikwa na chiiyobhalilike na akanahota.

3 Maana Mafalisayo na Bhayahudi bhoa ngalyee chakulya pangali kuha mpaka pahindindili kubhokana na chiiyobholilike na akanahota bhabhe. 4 Kabhele, ngalyee chilebhe choachela kubhoka kuchoko, pangali kuha kwa kuchijelejea oti. Kabhele kutekubhee na kuyobhelela kongi bhakupokile kubhoka lolo, handa henela namuna ja kuhijoa hikombe na hikalango na yoombo ya kutelekela.

5 Bahi, Mafalisayo na bhabhajigana Malagilo ga Amusa bhakaakonya Ayesu, "Kwa niki bhanapunji bhinu bhalyee chakulya pangali kuha mabhoko handa chiiyobhalilike, ila hulyenganga chaakulya pangali kuha mabhoko gabhenji?" 6 Ayesu akaajangulanga, "Akaandende mundu mwaangota! Alondohi Aisaya akalondola maha nnani jinunji pabhakajaandika,

‘Annoongo alobhola, bhandu habha, kundopea kwa malobhe tu,

nambo mumitima yabhenji, ngahobhalela nenga.

7 Kunyopa kwabhenji ngabha kwammbone,

maana ngani hiijiganwa nga

malagilo ga bhandu tu ila ngabha gakubhoka kwa Annoongo.’"

8 "Mwangota nnekanga amuli ya Annoongo na nkagulanga chiiyobhalilike na bhandu."

9 Ayesu bhakapunda kulongela, "Mwaangota mmanyanga kulekanga malagilo ga Annoongo kwa kupenya kwinunji nkagulanga chiiyobhalilinge kwa akanahota. 10 Maana Amusa bhakalobhola, ‘Mwaatopeange atati bhinu na anyongo bhinu’ na ‘Bhoa bhala bhabhaatukana atati bhabhe na anyongo bhabhe akomekwe.’ 11 Nambo mwangota mwajigananga, ‘Handa amundu bhakweti chilebhe chakubhehe chakombola kwaajangatila atati bhabhe au anyongo bhabhe, penapo akalobhola kubhehe chilebhe chenecho nga Kolibani,’ yaani chibhekitwe ligongo lya Annoongo, 12 kwa kutenda henela, ngapaalikwa kabhele kwaajangatila atati bhabhe au anyongo bhabhe. 13 Henela chinbheluanga lilobhe lya Annoongo kwa ligongo lya chinnyobhalilinge mwangota. Kabhele ntendanga hilebhe hijingi ya namuna jenejo."

14 Ayesu akalikema kabhele lyenilyela lilubhalo lya bhandu, akaalobholelanga, "Nyoonikiange mwabhoa, na mugamanye malobhe ga Annoongo. 15 Chakwa chilebhe chichajiingila amundu yakubhehe chaatenda amundu bhakoto kondekwa na Annoongo. Nambo chichibhoka nkati nga chichaatenda amundu bhakoto kondekwa na Annoongo." 16 Amundu bhabhakweti na machikilo ga kujoanikia na bhajoanikie.* 17 Ayesu pabhakalileka lilubhalo lya bhandu na kujiingila kaja, bhanapunji bhabhe bhakakonya maana ja kulongela kwa kuhiya. 18 Ayesu bhakaalobholelanga, "Bholi, na mwaangota ngaelewanga? Bholi, ngahimanyanga kubhehe chilebhe chichaajingila amundu kubhoka panja, ngaatenda amundu bhakoto kondekwa na Annoongo? 19 Ligongo amundu handa bhalile chilebhe ngaajingila muntima, ila mulutumbo, ngapena chibhoka panja ja mmele na kujaula kuliinda" Kwa kulongela henela, Ayesu bhakatenda yaakulya yoha hikondekwe nnongi ja Annoongo.

20 Bhakapunda kulongela, "Chichibhoka nkati ja amundu nga chichaatenda bhakoto kondekwa nnoongi ja Annoongo. 21 Kwa kubhee kubhoka nkati ja ntima gwa amundu, kubhoka kuganikia kubhou, na uloloi na bwihi na kukoma, 22 ngoongola na kulokolila hilebhe na ubhou na unami, na bwiu, na kuponja, na kulokolila ngoongola na mbwinya, na upumbavu. 23 Mabhou haga goha gabhoka nkati ja amundu, na genago kwaatenda amundu bhakoto kondekwa nnoongi ja Annoongo."

24 Ayesu bhakobhoka ku Galilya bhakajaula kubhandikila chilambo cha ku Tilo. Konokwe bhakajiingila mu nyuumba jimo na bhangapala amundu bhoabhala bhaimanye, nambo bhangakombola kuchiiya. 25 Konokwe ku Tilo kukibha na haikege bhamo, yakubhee amwali bhabhe bhakibha na mahoka, pabhakajoa kubhee Ayesu bhabhi penipala, bhakajaula na kwaatindibhalila majugwa. 26 Bhakaajopa Ayesu bhammokee amwali bhabhe mahoka, nambo haikege bhenabho bhakibha ngabha Ayahudi, bhakibha bhabhelikwe ku Foinike, mu chilambo cha ku Silia. 27 Ayesu bhakaalobholela, "Mwaleke bhana bhajukutange oti, ngayammbone kutola chaakulya cha bhana na kuhipekea himbwa."

28 Nambo bhena haikege akaajangula, "Nga kweli chinnongile Hangwana, hata himbwa hibhii pahi ja mecha kulyee upolo gwa bhana."

29 Ayesu akaalobholela, "Ligongo ntekujangula maha, nnyabhule kaja, lihoka lyabhokite amwali bhinu."

30 Bahi, bhajaula kwaachakwe, bhakaakolela amwana bhagoolikwe pachindanda, na mahoka gakibha gabhookite.

31 Ngapena Ayesu bhakabhoka chilambo cha ku Tilo, bhakapetela ku Sidoni, bhakahika litanda lya ku Galilaya na kuhika mahali pa Dekapoli maana gakwe hilambo komi. 32 Konokwe, bhandu bhakannetela Ayesu amundu bhamo bubu yakubhee kabhele bhakibha na chimamata, bhakaapembelela bhaajopele na bhaabhekele mabhoko ili kwaalamia. 33 Ayesu bhakaabheka nnyeenje na lilubhalo lya bhandu, bhakaabhekela ngoonji mmachikilo, bhakaunila mata na kwakwaa lulimi. 34 Ngapena bhakalola kunani kulihunde, bhakatulua mboomo kwakolela kiha, bhakaalobholela, "Epata," maana gakwe, "Nnyoanikie." 35 Popopo machikilo gakwe gakajogoka na lulimi lwake lukalegeleka, bhakajemeka kulongela maha. 36 Ayesu bhakaakanikianga bhakotokunnobholelanga mundu joa jola nnani ja chikubho chenecho. Nambo chibhakapunda kwaakelebhuanga, ngapena bhakapundanga kujeneanga ngani yeneyo. 37 Bhandu bhakakangachanga muno, bhakalobholanga, "Bhateendite goa maha, bhatekwaatenda bhankomela kujoanikia, na bubu kulongela!"