1 Pabhakajomola machobha genago, Ayesu akabhuja mu chilambo cha ku Kapelenaumu, bhandu bhakapatanga ngani kubhehe abhujite kubhatama. 2 Bahi, bhakahikanga bhandu bhajingi muno, kubhehe pangaigala hata pachoko bhakatwelelanga mpaka panlyango. Kongo Ayesu abhikwaatangachianga lilobhe lya Annoongo. 3 Ngapena bhandu teno bhakahikanga na kwaaletela Ayesu amundu jwaapolite mmele, abhi atekupetulikwa na bhandu ncheche. 4 Henela, bhangakombolanga kwaapeleka kubhandikila na Ayesu ligongo lya nkutuli gwa bhandu bhajingi. Bhakakwelanga nnani ja chipagala bhakapobholananga mahali pabhakibha Ayesu. Pabhakapatanga upenyo, bhakantulua jono mundu abhi agolikwe pachindanda. 5 Ayesu pabhakabhona bhatenda kunhobhalela, akaalobholela bhena amundu jwaapolite mmele, "Aganja bhangu ndekunlekelela mabhou ginu."

6 Bhabhajigananga Malagilo ga Amusa bhangi. Bhabhakibhanga bhatamitinge penapo bhakaganikianga mu mitima yabhenji, 7 "Bhakombola bholi kulongela henela? Habhabha atendakwaaponja Annoongo! Nga ganiki jwaakombola kulekelea ubhou ila nga Annoongo jika jabhe?"

8 Popopo Ayesu akamanya kuganikila kwabhenji, akaakonyanga, "Mboni ng'anikianga henela mu mitima yinunji? 9 Nga chikubho niki chichibhile cha kupepeka muno, kwaalobholela habha amundu bhabhapolite mmele, ‘Ntekulekelelwa gabhou ginu,’ au kwaalobholela, ‘Nyimuke! Mpetule chindanda chinu nnyabhule?’ 10 Bahi, mbala muimanye kubhehe Mwana jwa amundu atekola mamulaka ga kwaalekelea bhandu mabhou gabhenji pachilambo." Ngapena Ayesu akannobholela amundu bhenibhala bhabhapolite mmele, 11 "Ndendakunnobholela nnyeme, ntole chindanda chinu nnyabhule kaja!"

12 Popopo mundu jonojwe jwaapolite mmele akajema, na akatola chindanda chabhe, akajenda nnongi ja bhandu bhoa. Bhandu bhoa bhakakangachanga na kwaalumbalila Annoongo na kulongela, "Twangabhona hopo chilebhe handa chenjeni."

13 Ayesu akajaula kabhele nngulugulu ja litanda lwa ku Galilaya. Bhandu bhajingi bhakaajendela, nabhena bhakajemeka kwaajigananga. 14 Pabhatendita kupeta, bhakaabhona Alawi amwana bha Aalufayo, bhataamite panyumba ja kutochea kodi. Ayesu akannolobholela, "Nngagule!" Alawi bhakajema, na kwaakagula Ayesu.

15 Ngapena Ayesu pabhakibha pakaja pa Alawi, kulyee ndalilo, pamo na akaatocha kodi bhajingi na bhabhatenditinge gabhou Akaatocha kodi bhajingi na bhabhatenditinge gabhou na bhanapunji bhabhe ligongo pakibha na bhandu bhajingi bhabhakankagula. 16 Bhabhajigana Maligalilo ga Amusa bhangi bhabhakibhanga Mafalisayo pabhakammona Ayesu bhabhikulyee pamo na bhandu bhabhatenditinge gabhou na akaatocha kodi, bhakaakonyanga bhenibhala bhanapunji bhabhe, "Kwa niki Ayesu bhatendakulyee pamo na akaatocha kodi na bhabhatendanga gabhou?"

17 Ayesu pabhakajoa genago, akaajangulanga, "Bhandu bhangalwalanga ngaakema hopo aganga, bhabhampala nga bhenibhala bhabhalwalanga. Nangaika kwaakemanga bhandu bhammbone, ila bhenibhala bhabhatenditinge gabhou."

18 Wakati gumo bhanapunji bha Ayohana na bhanapunji bha Mafalisayo bhatendita kutabha. Bahi bhandu bhakahikanga, bhakaakonya Ayesu, "Kwa niki bhanapunji bha Ayohana na Mafalisayo bhatendakutabhanga, nambo bhanapunji bhinu mwenga ngatabhanga?" 19 Ayesu akaajangula, "Bholi, bhabhaalalike kuulombela bhapaalikwa kutabhanga wakati hangwana ulombela bhabhii pamo na bhenaangota? Wakati goha pabhakibha pamo na hangwana ulombela ngakombolanga kutabha. 20 Nambo wakati gupakuhika yakubhehe hangwana ulombela apakubhoka pakati jabhenji, nga pena bhapakutabhanga."

21 "Bhandu ngaheketanga chibhamba cha ngobho jiyono na kutotela mu ngobho ja lolo. Handa bhatenditinge henela, chenecho chibhamba chiyono chipakujonjokea lipobhole mu jenejo ngobho ja lolo, na jenejo ngobho jipakuhalibika muno. 22 Wala bhandu ngalekelanga divai jiyono mu mihuko ja lolo jijitotitwe na limbendela. Handa bhatenditinge henela, divai hejo hipakuipapulana yeneyo mihuko ja limbendela, na jenejo divai jipakujitika na mihuko ja limbendela jipakupapuka. Divai jiyono jilekelwa mu mihuko ja mambendela!"

23 Lichobha limo lya Kupomolela Bhayahudi, Ayesu atendita kujenda mu migonda ja chakulya handa mapemba. Pabhakibha bhatendakujenda, bhanapunji bhabhe Ayesu bhakajemekanga kukeleta maache handa ga mapemba. 24 Mafalisayo bhakannobholela, "Nnyonikie! Kwa niki bhatendanga chikubho changapaalikwa kutenda Lichobha lya Kupomolela?" 25 Ayesu akaajangulanga, "Bholi, mwangachomanga mu Majaandiko ga Annoongo chibhakatenda Adaudi wakati bhena na akaajabhe pabhakibhanga na njala? 26 Adaudi akajiingila nkati ja Nyuumba ja Annoongo, akalyee mikate hiibhekitwe nnongi ja Annoongo. Chikubho chenjeni chikatendekwa na Aabiatali pabhakibha akung'i akolongwa. Na nga akaakung'i jika jabhenji nga bhabhapalikwanga kulyee mikate jenejo, nambo Adaudi akalyee, kabhele akaapekeanga na akaajabhe." 27 Bahi, Ayesu akaalobholelanga, "Lichobha lya Kupomolela likabhekwa ligongo lya kwaajangatila bhandu na ngabha bhandu kubhee akaabhanda bha Lichobha lya Kupomolela! 28 Kabhele, nenga Mwana jwa Aadamu nga Hangwana bha Lichobha lya Kupomolela."