1 Ayesu na bhanapunji bhabhe, bhakahikanga kuntundu ja litanda lya ku Galilaya mu chilambo cha Bhagelasi. 2 Ayesu pabhakatuluka kubhoka mu ntumbwi, amundu bhamo bhabhakachukilwa na lihoka bhakabhoka kumakabuli, bhakakongana nabho. 3 Amundu bhenabho bhatendita kutama kumakabuli na wala bhaakwa amundu bhangi bhoabhala bhabhakakombola kwaatabha kwa minyololo. 4 Kwakubhee mala ijingi bhakaatabha kwa ngamulo na minyololo mmabhoko na mmakongono, nambo bhakakombola kuheketa gena minyololo na kuikajula yene ngamulo, na bhakwa amundu bhabhakakombola kwahibhila. 5 Kilo na muhi bhakatama kumakabuli na kumatombi bhabhikupalia lilobhe na kuchiheketaheketa kwa maganga.

6 Pabhakammona Ayesu kwa kutali, bhakaabhutukila na kutindibhala majugwa nnoongi jabhe. 7 Bhakalongela kwa lilobhe likolongwa, "Mmpala niki kubhoka kwaachangu, mwenga Ayesu Amwana bha Annoonngo bhabhabhile kunani muno? Kwa lina lya Annoongo, ndendakunyoopa nkotokunagia!" 8 Bhakalongela henela kwa kubhehe Ayesu bhatekunnobholela, "Lihoka, mmoke kwa habha amundu."

9 Bahi, Ayesu bhaakonya, "Lina linu aganiki?"

Nabhena bhakajangula, "Lina lyangu nga linyemba, maana twenga tubhii bhajingi!" 10 Penapo genigala mahoka gakaajopa Ayesu akoto kugabhenganga kubhoka panja ja chenichee chilambo.

11 Pakibhakibhanga penapo pakibha na lilubhalo likolongwa lya magolobhe bhabhikulyenganga pachielelo cha litombi. 12 Bahi, gena mahoka gakaapembelela Ayesu, "Ntupeleke kwa genigala magolobhe, ntulekelange tukaajingilange." 13 Bahi Ayesu bhakaalekeleanga. Bahi gena mahoka gakabhokanga, gakaajingilanga genigaila magolobhe. Lilubhalo lyoha lya magolobhe likagwee pa chenichela chielelo chikolongwa mpaka mulitanda, na kutibhila mmachi gakawee na bhabhakibhanga handa elupu jibhele.

14 Bhabhalianga genigaa magolobhe bhakabhutukanga, bhakatangachanga ngani jenejo kunnyini na muijiji. Bhandu bhakahikanga kubhona hiikapitila. 15 Bhakahikanga kwa Ayesu, bhakammona na amundu bhala bhala bhabhakachukilwa na mahoka bhatemite pahi, bhawalite ngobho kongo bhatondwibhe, bhakajogopanga. 16 Bhandu bhapakabhololanga ngani hejo bhakaakongolelanga bhangi hikubho hiikaapata bhena amundu bhabhakachukilwa na mahoka na genigaa magolobhe. 17 Ngapena, bhakajemekanga kwaapembelea Ayesu bhabhoke mu chilambo chabhenji. 18 Ayesu pabhakwelita mu ntumbwi, bhenibhala amundu bhabhakibha na mahoka bhakaajopa kulongana nabho. 19 Nambo Ayesu bhakaakanila. Nambo bhakaalobholela, "Nnyabhule kaaja kwa akaalongo bhinu, nkaalobholele hilebhe yoha Hangwana hibhakantendela na namuna chibhakankolelekea kiha." 20 Bahi, bhena amundu bhakajaula, bhakajemeka kutangacha konokwe ku chilambo cha ku Dekapoli maana gakwe hilambo komi, ngani yoha Ayesu hibhantendile, bhandu bhoa bhakakangachanga.

21 Ayesu bhakajoomboka kabhele upaande gwa bhele gwa litanda lya ku Galilaya kwa ntumbwi. Pabhakibha nngulugulu ja litanda nkutuli nkolongwa gwa bhandu gukakondekana kubhandikila na bhenabho. 22 Penapo bhakahika jumo jwa akaakolo bha Nyuumba ja konganilana Bhayahudi bhakemitwa Ayailo. Pabhakammona Ayesu, bhakatindibhala majugwa na kotima nnoongi ja makongono ga Ayesu, 23 bhakaajopa bhabhikulongela, "Mwali jwangu nga ntamwa tweja tweja atendakubhandikila kuwee. Choonde tujende, nkaabhekela mabhoko ginu, bhapate kulama na kubhee bhamomi."

24 Bahi, Ayesu bhakajaula pamo na bhenabho. Bhandu bhajingi muno bhakaakagula, bhakibhanga bhajingi bhakaatindila na kwaaminya minya. 25 Pakati jabhenji pakibha na haikege bhamo bhabhalwala chitamwa cha ncholocholo kwa yaaka komi na hibhele. 26 Haikege bhenabho bhakalaga muno na kwaajendela akaaganga bhajingi. Na bhakatumia mbiya yabhe yoha, nambo bhangapata mbaya na penapo hali jabhe jikapunda kubhee jangalimmbone. 27 Pabhakahijoa ngani ya Ayesu, na henela bhakachipekenya pa lilubhalo bhakaajendela Ayesu kwa kuyeto kwaakwaa ngobho jabhe. 28 Bhakatenda henela, ligongo bhakachilobholela mwena muntima gwabhe, "Handa ngwaite ngobho jabhe tu, mbakulama."

29 Popopo miyahi jabhe jikakotoka kuolola, nabhena bhakachijohanikiha kubhehe mmele gwabhe jojolo gulamite. 30 Popopo Ayesu bhakang'ang'anuka kubhee machili gabhe ga kulamia gateendite lihengo. Bahi bhakatendebhukila lyenilyela lilubhalo lya bhandu bhajingi, bhakakonya, "Aganiki bhabhakwaite ngobho jangu?"

31 Bhanapunji bhabhe bhakaajangula, "Ntendakubhona namuna bhandu chibhamminya minya, mpakumanya bholi bhabhankwaite?"

32 Nambo Ayesu bhakapunda kulola koha koha ili bhaabhone bhabhaakwaaite. 33 Penapo bhena haikege, bhabhikuimanya gagatendikwe kwaachabhe, bhakabhoka kongo bhabhikulendemela kwa bhoga, bhakatindibhala majugwa na kotima nnongi ja Ayesu na kulongela ukweli goa. 34 Ayesu bhakaalobholela, "Aganja bhangu, kuhobhalela kwinu kutekunnamia. Nnyabhule kwa kuhengwa, kulaga kwinu kujoomwike."

35 Ayesu pabhakibha tangu bhatendakulongela, bhandu bhakahikanga kubhoka kaja kwa bhenibhala akolo bha Nyuumba ja konganilana Bhayahudi, bhakannobholela, "Mwali jwinu ajomwike. Kwa niki kwaabhua Bhabhajigana?"

36 Nambo Ayesu bhangajohanikiha chibhalongilinge bhakaalobholela akolo bha Nyuumba ja konganilana, "Nkotokujogopa, nhobhalele tu." 37 Ayesu bhangapala kulongana na amundu bhoabhala ila nga Apetulo na Ayakobo na Ayohana anung'una bhabhe Ayakobo. 38 Bhakahikanga kaja kwa Ayailo na bhena Ayesu bhakajoa nyenye, nguto na minyembo ja kumalilo. 39 Pabhakajingila nkati, akaalobholelanga, "Mboni mpotanga nyenye na kuguta? Mwali jwangajomoka, bhatekugoloka tu." 40 Nambo bhenibhala bhandu bhakaaheka kwa kwaabhelua, bahi, akaabhoanga bhoa panja, na akaapetulanga atati bhabhe na anyongo bhabhe jono mwali na bhenibhala bhanapunji bhabhe bhenibhala bhabhakibha nabho, bhakajingilanga mu chumba chibhakang'oneka jono mwali. 41 Ngapena bhakaakamula lubhoko, bhakaalobholela, "Talita, kumi," maana gakwe, "Mwali, ndendakunnobholela nnyimuke!" 42 Popopo amwali bhakajema, bhakajemeka kujenda. Amwali jonojwe bhakibha na yaaka komi na hibhele. Bhandu bhabhakibhanga bhabhakangachanga muno. 43 Ayesu bhakaakanikia muno bhakotokunnobholela amundu bhoabhala chiibhokile, nabhena bhakaakulumikianga akaabhelei bhabhe bhaapekee jonijoo mwali chaakulya.