1 Lichobha lya kupomolela palikajomoka, Amalia bha ku Magidala, Amalia anyongo bhabhe Ayakobo na Asalome bhakahemelanga mahuta gakunungila bhakajaulanga kugupakala mmele gwa Ayesu. 2 Kundabhi tuputupu, lichobha lya jumapili, kachoko tu lihobha palikajemeka kupiita bhakajaulanga kulikabhuli. 3 Na bhenaangota pabhakibha nndela bhatendita konyananga, "Nga ganiki bhabhapakutubhokea lyalyee liganga kubhoka pannyango gwa likabhuli?" 4 Pabhakibha bhabhandikile na kuhika bhakalolanga, bhakalibhonanga liganga lyela litekukuegelela kutali kubhoka penipala pannyango gwa likabuli. 5 Pabhakajingila mulikabuli, bhakammona nkakombo bhamo bhawaalite ngobho jihuhu, bhataamite upande gwa kunnelo gwa lyela likabhuli, na bhenaangota bhakakangachanga muno.

6 Nambo bhenibhala nkakombo bhakaalobholelanga, "Nkotokangachanga, ntendakunnolea Ayesu bha ku Nazaleti bhabhakaabhamba panchalaba. Bhayookite, bhakwa pambani. Nnolange mahali pabhakanng'oneka." 7 Nambo nnyaulange nkaalobholelange bhanapunji pangali kwaalibhalila Apetulo kubhehe, "Bhatendakunnongolelanga kujaula ku Galilaya. Konokwe mpakummonanga handa chibhakannobholelanga."

8 Henela Apetulo bhakabhokanga monimola mulikabhuli mu bhakaachika Ayesu bhabhikubhutukanga, kwaa kubhee bhenibhala haikege bhakalendemelanga kwa bhoga nkolongwa na kangacha. Bhangannobholelanga amundu bhoabhala chilebhe choachela, kwa ligongo bhakajogopanga muno.

9 Ayesu pabhakayoka kundabhi tuputupu lichobha lya Jumapili, bhakajemeka kwaabhokela Amalia bha ku Magidala, bhenibhala Ayesu bhabhakaabhoa mahoka saba.* 10 Amalia bha ku Magidala bhakajaula, akaalobholelanga bhenibhala bhabhakibha pamo na Ayesu, penapo bhatendita kujembanga minyembo ya kumalilo na kuguta. 11 Nambo pabhakajoanga kubhehe Ayesu bhabhii bhamomi na kubhehe Amalia bha ku Magidala bhaabhonite, bhangahobhalelanga.

12 Baada ja genago Ayesu bhakaabhokelanga bhanapunji bhabhele bhabhii na kumio kongi. Bhanapunji habho bhatendita kubhoka ku Yelusalemu kujaula kumigonda. 13 Pabhakaamanya bhakabhujanga, na kwaalobholelanga akaajabhenji, hata henela bhangahobhalelanga.

14 Baadae Ayesu bhakaabhokelanga bhanapunji komi na bhamo bhabhakibhanga pabhatendita kulyee chaakulya. Bhakaakalipilanga ligongo lya kulimba kwa mitima yabhenji na henela yakubhee bhakakananga kwaahobhalelanga bhenibhala bhabhakammona kubhee Ayesu bhayokite. 15 Ngapena bhakaalobholelanga, "Nnyaulange pachilambo poha, nkatangachange Ngani Jammbone kwa bhandu bhoa. 16 Amundu bhoabhala bhabhahobhalela na kubatichwa bhapakuhokolewa, nambo amundu bhoabhala bhangahobhalela bhapakuhukumilikwa. 17 Na hilolelo heye hipakulongana na bhenibhala bhabhahobhalilinge, bhapakutumianga mamulaka gangu kubhoanga mahoka na bhapakulongelanga kwa chilongelo chiyono. 18 Handa bhakamwilinge lijoka na hata bhang'wilinge choachela chichibhii na uchongo, ngahulaanga. Bhapakwaabhekela akaatamwa mabhoko, na bhenaangota bhapakulamanga."

19 Bahi, Hangwana Ayesu pabhakajomola kulongela nabho, bhakapetulikwa kunani kulihunde, bhakatama upande gwa kunnelo gwa Annoongo. 20 Ngapena bhanapunji bhabhe bhakajendanga kila mahali bhabhi kwaatangachianga bhandu Ngani Jammbone. Hangwana bhakatenda lihengo pamo na bhenaangota na kulichibiticha lilobhe lyabhe kwa hilolelo hiikalongana na jene Ngani Jammbone.