1 Akolo Ateofilo, bhandu bhajingi bhatekuchimilanga kujandika ngani hiitendikwe pakati jitu. 2 Bhatekujaandikanga handa chibhakatulubholelanga na bheni bhala bhabhaibhonite hikubho heyo kwa miho gabhenji kubhoka kandahi, na kutangacha ujumbe. 3 Kwa henela hakolo Ateopilo baada ja kulolekea maha hilebhe kubhokela kandai, na nenga monite yammbone ninyandikile maha kila chilebhe. 4 ndenda henela ili namwenga nkombole kuhimamya mwabhene ukweli gwa genigala gabhannyigine.

5 Muda Ahelode pabhakibha apalume bha Kuyuda, kukabhehe na bhakukung'a jumo lihina lyakwe Achakalia, bha chibhoga cha bhakukung'a chichikemwa Kuabiya. Hanu bhabhe bhakibha bhakemwa Aelizabeti chibhoga cha akung'i Aaluni. 6 Bhoha bhabhele bhakibhanga bhandu bhammbone nnongi ja Annoongo, bhakibhanga bhatenditakutamanga kwa kukamulanga amuli na malagilo goha ga Hangwana. 7 Nambo bhangabhanganga bhatekujaliwanga kupata bhana kwakubhe Aelizabeti bhakibha ntoonga na bhena bhoha bhabhele bhakibhanga bhatekongopalaanga muno. 8 Lichobha limo Azakalia pajikibha chaamu jabhe ja kutenda lihengo lya kukung'a mu Nyuumba ja Annoongo, 9 Azakalia bhakaagulikwa kwa gudugudu, handa chiiyobholilike, ili bhajingile mu Nyuumba ja Annoongo ligongo lya bhapukie ubani. 10 Bhandu bhajingi muno, bhakibhanga bhakondikininge panja bhatendita kujopa muda gonogwe gwa kupukiha ubhani. 11 Akaatumichi bha Kunani Kulihunde bha Hangwana akaabhokela Azakalia monomwe nkati, bhakaajemelela upande gwa kunnelo gwa litatali lya kubhokea mbeeko kwa Annoongo lya kupukia ubhani. 12 Azakalia pabhakabhona bhena antumichi bha Kunani Kulihunde bha Hangwana bhakahechuka muno, bhakajogopa. 13 Nambo Antumichi bha kunani kulihunde bha Annoongo bhakaalobholela, "Azakalia, nkotokujogopa, kwa kubhehe Annoongo bhatekujohanikiha kujopa kwinu, na Aelizabeti hanubhinu bhapakummelekela mwana mwanalome, namwenga mpakumpekeha lihina lyakwe yohana. 14 Mpakuhekela muno na mpakuhachukila muno na bhandu bhajingi bhapakuhangalala muno ligongo lya kubhelekwa kwabhe. 15 Apakubhehe nkolongwa nnoongi ja Hangwana. Ngang'we divai na choha chela chakolelwa, apakutwelela Mboomo ja Annoongo lichobha lya kubhelekwa kwabhe. 16 Ayohana bhapakwaabhujia bhandu bhajingi bha Kuichilaeli kwa Hangwana Annoongo bhabhenji. 17 Bhena bhapakwaalongolea nnongi ja Hangwana na bhena bhapakubhehe na machili na Mboomo handa ja halondoi Aeliya. Bhapakuhitendebhua mitima ya atati yaajendele bhana bhabhenji na bhapakwatendanga bhabhangajoanga bhagananikie ngani yaambone na bhaabhekelange maha Bhandu bhabhe."

18 Achakalia bhakaakonya bhena akaatumichi bha Kunani Kulihunde bha Hangwana, "Nga chilebhe niki chichipa kunangiha chikubho heche? Nenga nga chihokolo na hanu bhangu bhatekongopala."

19 Antumichi bhena bha Kunani kulihunde bhakaajangula Azakalia, "Nenga nga Agabulieli, antumichi bha Annoongo ndumitwe kulongela na mwenga, Ngani heje Jammbone. 20 Nangocheni, ligongo mwangajohanikia ganannobholile mpakubhehe ngalongela, nkombola hopo kulongela mpaka lichobha chigapakubhokela genago ligongo mwanganyohanikia malobhe gangu, na genago gapakubhokela kwa muda gwakwe."

21 Wakati gonogwe, bhandu bhoha bhatendita kwaalendelela Azakalia kongo bhabhi kangachanga kwaniki bhakaabhite muno mu Nyuumba ja Annoongo. 22 Pabhakabhoka panja, bhakombola hopo kulongela nabho. Bahi bhandu bhakahimanya kubhehe bhaibhonite yakangachika Mu Nyuumba ja Annoongo. Nambo bhatendita kulongela nabho kwa hilolelo kwa mabhoko, ligongo bhakibha ngakombola kulongela.

23 Pabhakajomola machobha gabhe gakutenda lihengo lyabhe lya kukung'a mu Nyuumba ja Annoongo, Azakalia bhakabhuja kwaachabhe. 24 Baada ja machobha Aelizabeti hanu bhabhe bhakajukuta chitumbo. Bhakatama nkati kwa mihei nhano. Bhakalobhola, 25 "Hene nga chibhandendile Hangwana mu machobha gangani bhatekongolee kiha na bhandendile gammbone."

26 Mu mwehi gwa sita gwa chitumbo cha Aelizabeti Annoongo bhakaatuma Agabulieli antumichi bha kunani Kulihunde gwa Hangwana bhajaule kono mu chilambo cha Kunazaleti kono Kugalilaya, 27 kwa haikege jumo nhenja bhabhankema Amalia bhabhalombwite na mundu bhamo lihina lyake Achupu bha lilagwa cha Adaudi. 28 Antumichi bha Kunani Kulihunde bhakahika na kwaachalimia, "Hangwana bhabhii pamo na mwenga ntekubhalikiwa!"

29 Amalia pabhajowinaje malobhe hago bhakachikonya muno na kuganikiha muno maana ja chalamu heyo. 30 Nambo antumichi bha Kunani Kulihunde bha Annoongo, bhakalobholela Amalia, "Nkontokujogopa Annoongo bhatekuntendela gammbone. 31 Kwakubhehe, mpakupata chitumbo mpakubheleka mwana mwanalome na mwenga mpakumpekea lihina lyake Ayesu. 32 Bhenabho bhapakubhehe amundu bha mamulaka na bhapakwakema amwana bha Annoongo Bhabhabhii Nnani Muno. Na bhena bhapakubhehe ukolo handa atati bhabhe Adaudi. 33 Henela bhapakuchihukumula chilagwa cha Ayakobo machobha goha na ukolo gwabhe ngabhehe na majomokelo!"

34 Amalia bhakaajangula, "Hikomboleka bholi genago na nenga naamanya hopo mwanalome?"

35 Antumichi bha Kunani Kulihunde gubhaajangwilaje Amalia, "Mboomo ja Annoongo jipakunhikila na machili gabhe Annoongo bhabhabhile kunani muno gapakunwekela handa nheka na bhenabho bhabhabhile kwa ligongo lya Annoongo bhabhapakubhelekwa bhapakemwa Mwana jwa Annoongo. 36 Nnole halongo bhinu Aelizabeti, bhenabho bhabhakakemwa ntonga bhapetwile chitumbo bhabhi bhakongopile, na gongo nga mwehi gwabhe gwa chita kwa bhenabho yakubhehe bhandu bhakaimanyanga kubhehe ntonga. 37 Kwa maana chaakwa chilebhe changakomboleka kwa Annoongo."

38 Amalia bhakalobhola, "Nenga nga antumichi bha Hangwana, nndendele handa chinnongile." Ngapena bhenibhala Antumichi bha Kunani Kulihunde bhakajaula.

39 Mu machobha gogogo Amalia bhakatabha ulendo kujenda kwa chindema mpaka chilambo chimo chichibhile mu matombi ga Yudea. 40 Konokwe Amalia bhakajingila mu nyuumba ja Azakalia, bhakaachalimia Aelizabeti. 41 Aelizabeti pabhalijoa lilobhe lya Amalia bhabhi kwaachalimia, popopo mwana jwakibha mulutumbo lwa Aelizabeti bhakajemeka kuhina hina. Na bhena Aelizabeti bhakatweelelwa na Mboomo ja Annoongo, 42 bhakalobhola kwa lilobhe likolongwa, "Mwenga ntekutendelwa gammbone na kupunda hakaikege bhoha, na jono jumpakummeleka bhaatendile gammbone. 43 Nambo kwaniki chilebhe heche chibhokile nenga hata anyoogolo bha Hangwana bhangu bhaike kwachangu? 44 Pangajoha ntenda kunjalimia, kachoko tu mwana jwabhile mulutumbo lwangu bhakahina hina kwa kuhangalala. 45 Mbaya jinu mwenga chibhantendile gammbone kila chinnongile chipakutendekwa."

46 Ngapena Amalia bhakalobhola,

"Ntima ngwangu gutenda kwaatukucha Hangwana,

47 ndenda kuhachuka Mu Annoongo bhabhile amwokochi bhangu.

48 Kwa kubhehe bhatekulolekea kiha bhatekungombokela kuchitulua kwa antumichi bhabhe. Henela kubhokela nangocheni hibhelei yoha hipakungema nenga ndendwile gammbone.

49 Kwa kubhehe Annoongo bhena hakola machili goha bhandendite makolongwa,

lihina lyabhe bhene jika jabhe nga bhammbone muno.

50 kiha jabhe kwa bhandu bhabhaatopea Anoongo muno,

hutama machobha goha chibhelei kwa chibhelei.

51 Bhateendite makolongwa kwa machili gabhe,

bhatekwapwilingania bhabhakolite na mbwinya mu maganikilo ga mu mitima jabhenji.

52 bhatekwabhoa akaapalume kubhoka mu mamulaka gabhenji nambo bhatekwakweanga bhabhachituluanga,

53 Bhabha kweti njala bhatekwajukutia hilebhe yammbone na akola hilebhe bhatekwaleka bhangali chilebhe.

54 Bhatekuchijangatila antumichi jwabhe Aisilaeli,

bhakombokile ahadi jabhe jakwaakolela kiha.

55 Handa chikaalobhelolea akaatati bhitu na handa jibhakaalobholela kwa akahokolo bhitu,

Abulaimu na ubhelehi gwabhe goha machobha goha."

56 Amalia bhakatama kwa Aelizabeti kwa muda gwa mihehi jitatu ngapena bhakabhuja kwaachabhe.

57 Muda gwa kuchijogola kwabhe Aelizabeti gukaika nabhena bhakachijogola mwana mwanalome. 58 Andami na bhandu bha halongo bhabhe bhakapatanga ngani yakubhehe Hangwana bhatekwaabhonela kiha ngolongwa, bhakaahachukanga pamo na akaalongo bhabhe Aelizabeti. 59 Lichobha lya nane bhakahikanga kuhina mwana, hakaanung'una bhabhe bhakapalita kumpekehanga lihina lya Achakalia, atati bhabhe. 60 Nambo hanyongo bhabhe bhakalobholela, "Ngabha bahi apakemwa Ayohana." 61 Akaanung'una bhabhe bhakaalobholela, "Mbona jakwa johajola mu chilagwa chabhe jwene lihina Ayohana." 62 Bhandu bhakaakonya kwa hilolelo atati bhabhe Azakalia bhapatange kuimanya atati bhabhe bhakapala bhampekehe lihina niki. 63 Nabhena bhakajopa chibao chakujandikila, na bhakajaandika henela, "Lihina lya mwana nga Ayohana" Na bhandu bhoha bhakakangacha. 64 Popopo Azakalia bhakajemeka kulongela kabhele bhabhi kwalumbalila Annoongo. 65 Akaandami bhoa bhakajingilwanga na nkangachiko, na ngani heyo jikajenela kooha mu chilambo cha hitombi ya Kuyudea. 66 Bhoha bhabhakajohanikia hikubho heyo, bhakaganikianga mu mitima yabhenji bhakalobholanga, "Bholi, Mwana hojo hapakubhe mundu jwa mamuna niki?" Maana hakika machili ga Hangwana gakibha pamo na jonojwe.

67 Ngapena Azakalia, atati bhabhe Ayohana bhakatwelelwa Mboomo ja Annoongo nabhena bhakalobhola ulondoi hogo,

68 "Bhalumbalilwe Hangwana Annoongo bha ku Isilaeli,

kwa kubhehe bhatekwahikilanga na kwakomboa bhandu bhabhe.

69 Bhate kutupekea mwokochi akola machili,

mmelehi jwa Adaudi antumichi bhabhe.

70 Handa Annoongo chibhakalobhola pena kandai

kupetela akaalondoi bhabhakabhekwa ligongo lyabhe,

71 kubhehe bhapakutubhoa mmabhoko ga akapwati bhitu

na kubhoka kwa bhandu bhabhatuchimwaanga.

72 Bhakalobhola bhapakulangia kiha kwa akanohota bhitu, na kwaatendelanga gammbone

na kombokela lilagano bhabhakalibheka ligongo lya bhena mweene.

73 Handa chibhakalagia atati bhitu Aibulahimu kwa kulapila,

yakubhehe bhapakutupekea twenga bhalaka.

74 bhapakutubhoa kubhoka mmabhoko ga akaapwati bhitu,

ili kutukombolea twenga kwaatumikila pangali bhoga,

75 na kubhehe upande gwabhe na kondekwa nnoongi jabhe mu machobha gitu goha.

76 Na mwenga mwanangu, mpakemwa alondohi bha Annoongo bhabhabhi kunani muno,

mpakwalongolela Hangwana na kwaalakia ndela ligongo lya bhena.

77 Kwatangachianga bhandu yakubhe bhapakuokolewanga

kwa ndela ja kulekelelwa yaambi yabhenji.

78 Ligongo lya kuchitimalika na kiha ya Annoongo bhitu.

na nhana gwa wokopu gwabhe gupakutumulikila kubhoka kunani,

79 na nhana gukombole kwaamulikilanga bhoha bhabhatamanga mu lubhendu lukolongwa lwa malilo, na kututandaa mu ndela ja amani."

80 Mwana jonojwe hakakola, na bhakapata machili mu mboomo. Na mwana jonojwe akatama palulemba mpaka lichobha lyaakachilangia kwa bhandu bha kuisilaeli.