1 Lichobha limo lya Kupomolela, Ayesu bhatendita kupeta mu migonda ga ngano, na bhanapunji bha Ayesu bhakajemekanga kukeleta ngano, bhakabhoanga mbeju kwa mabhoko gabhenji, bhakalyenganga. 2 Mafalisayo bhangi bhakabhakonyanga, "Kwa niki ntendanga chikubho changapaalikwa Lichobha lya Kupomolela?" 3 Ayesu bhakaajangulanga, "Bholi, mwangachoma namuna chibhakatenda Adaudi pamo na akaajabhe pabhakibhanga na njala? 4 Adaudi bhakajingila mu Nyuumba ja Annoongo na kutola mikate jijakabhekwa ligongo lya kulegwa na akaakung'i, bhakalyee na kwaapekehanga akaajabhe. jangapaalikwa mundu kulyee jene mikate nga akaakung'i jiakabhenji." 5 Henela Ayesu bhakaalobholelanga, "Mwana bha Amundu nga bhabhile na mamulaka mu Lichobha lya Kupomolela."

6 Mu Lichobha lyengi lya kupomolela, Ayesu bhakajingila mu Nyuumba ja konganilananga Bhayahudi, bhakajigana bhandu. Monimola nkati pakibha na amundu bhabhapolite lubhoko lwabhe lwa kunnelo. 7 Bhabhajigana malagilo ga Amusa na Mafalisayo bhakalolea pabhalemwite ili bhakombolange kwahukumula Ayesu na henela bhatendita kulendelanga bhabhone handa bhakaalamia amundu Lichobha lya Kupomolela. 8 Nambo Ayesu bhakaimanya kuganikia kwabhenji, bhakaalobholela bhenibhala bhabhapolite lubhoko, "Nnyinuke, nnyeme nnongi ja bhandu bhoha." Bhenibhala amundu bhakajaula na kujema nnongi ja bhandu. 9 Ngapena Ayesu bhakaalobholela, Ndenda kukonyaanga, "Bholi, nga yammbone kutenda chilebhe chibhou au chilebhe chammbone mu lichobha lya kupomolela? Kuguokoa umomi gwa mundu au kugutiniha?" 10 Ayesu bhakabhalola bhandu bhoha upande goha, ngapena bhakaalobholela bheni amundu bhabhapolite bhandu, "Na bhenabho bhakalunyulula lubhoko lwabhe na lubhoko lukabhehe na machili." 11 Nambo Mapalisayo bhakatumbala muno bhakajemeka kukonyana akaachinabhene bhakalobholelana namuna ja kwatendela Ayesu ubhou.

12 Lichobha limo Ayesu bhakajaula kulitombi kujopa, na bhena bhakacheha konokwe kilo mpaka tuputupu bhabhikwaajopa Annoongo. 13 Pajikahika kundabhi bhakaakema bhanapunji bhabhe, pakati jabhenji akaahagulanga bhandu komi na bhabhele akabhakema akaandundame. 14 Asimoni bhabhakemwa lihina Apetulo lihina libhakalipata na Ayesu na Aandulea anung'un bhabhe Asimoni na Ayakobo na Ayohana na Apilipo na Abatolomayo. 15 Amatayo na Atoma, Ayakobo mwana jwa Aalufayo na Asimoni bhabhapotanila chilambo chabhe, 16 Ayuda mwana jwa Ayakobo na Ayuda Aichikaliote bhenibhala bhabhakaakana Ayesu.

17 Ayesu pabhakatuluka na akaandundame bhabhe kubhoka kulitombi, Ayesu bhakajema pachitwela, Pena pakibha na libhoga likolongwa lya bhanapunji bhabhe na nkutuli gwa bhandu bhabhabhokitinge pande yoha ya Kuyuda na bhabhabhokitinge Kuyeluchalemu na bhabhabhokitinge mu hilambo ya kumbwani ja Kutilo na Kuchidoni. 18 Bhandu bhenabho bhakahikanga kwaajonikia Ayesu na kulamia hitamwa yabhenji, hiyoyo bhenabho bhandu bhabhakahikanga na mahoka bhakahikanga kulamiwa. 19 Bhandu bhoha bhakapalanga kwakwaha Ayesu, kwa kubhehe machili gatendita kwaabhoka na kwalaamianga bhandu.

20 Ayesu akaatendebhukilanga bhanapunji bhabhe, na kulobhola,

"Nchikonjanga mwangota akaahocho, bhantekutendelwa gammbone na Annoongo,

kwa kubhehe ukolo gwa Annoongo nga gwinunji!"

21 "Nchikonjanga mwangota bhammilinge na njala nangocheni,

ligongo baadae bhapakunnyukutianga.

Nchikonjanga mwangota bhanng'utanga nangocheni,

kwa kubhehe baadaye mpakuheka kwa kuhangalala!"

22 "Nchikonjanga mwangota ikabhe bhandu bhapakunchimwanga, na kutama kutali na mwangota na kwaatukana na kwalobholelanga malobhe gangalimmbone, kwa ligongo lya lihina lya Amwana bha Amundu! 23 Nhangalalange na kukina wakati pagapakupiitila hikobho yene kwa ligongo chawadi jinunji nga ngolongwa kunani kulihunde. Kwa ligongo akaakolo bhabhenji bhakaatendelenga henela akaalondoi bha Annoongo."

24 "Nambo mpakulaganga mwangota bhammilinge mataajili,

ligongo mpokilinge umomi gwammbone."

25 "Mpakulaganga bhannyukutanga nangocheni,

kwa ligongo mpakubhanganga na njala.

Mapakulaganga mwangota bhanhekanga nangocheni

ligongo baadae mpakugutanga na kuombolechanga."

26 "Mpakulaganga handa bhandu bhoha bhannumbalilanga,

ligongo akanahota bhabhenji bhakaatendelanga hela hela akaalondoi bha umani."

27 Ndendakunkongolelanga mwangota bhannyohanikianga, mwapalange akapwati bhinunji, mwatendeelange gammbone bhenibhala bhabhanchimwanga. 28 Mwaatendelange gammbone bhabhaalani, na mwajopelange kwa Annoongo bhenibhala bhabhantendelanga gangammbone. 29 Mundu handa bhampotite lijegwa limo mwatendebhukie lijegwa lya bhele, mundu hana bhampokite likoti linu nkoto kwaahibhila na ngobho ja nkati. 30 Joha jola jwapakunnyopa mupekee, na mundu handa bhampokite chilebhe chinu nkotokulonga bhammujikihe. 31 Mwandetendelange bhangi hela hela handa chimpalanga bhantendelange.

32 "Handa mwapalitinge tu bhanibhala bhabhampalanga, bholi, mpakupatanga hiingwa niki? Kwakubhe hata hakaakola mabhou bhaapalanga bhenibhala bhabhaapalanga" 33 Kabhele, handa mwatendilinge gammbone bhenibhala jika bhabhantendelanga gammbone, mpakupata chiniki? Hata bhabhakolite mabhou bhatendanga hela hela. 34 Handa mwakopichinge bhenibhala tu bhang'anikia kubhujianga kila chilebhe, bholi, nnangianga gammbone niki? Hata bhabhakolite mabhou kwakopechanga akaakola mabhou bhanjenji kongo bhabhikuganikia kulepwa maha. 35 Ila mwangota mwapalange akapwati bhinu na kwatendelanga gammbone. Nkopechange panga lolela kunnepanga, na tucho jinunji jipakubhehe ngolongwa, mwangota mpakubhehe bhana bha Annoongo bhabhabhii. Kwakubhe bhenabho nga bhammbone bhangu bhangalimmbone na bhangali na chukulani na bhabhabhilinge hakabhou. 36 Nkolange kiha handa atati bhinu Annoongo chibhabhile na kiha.

37 "Nkotokwaukumulanga bhangi, na mwangota ngahukumulwanga, nkotokwakokolekelanga bhangi, na mwaangota Annoongo ngakokolekwanga, mwalekelele bhangi, namwangota Annoongo bhapakunkekelea. 38 Mwapangange bhandu bhangi hilebhe na Annoongo bhapakumpekeanga mwangota. Kubhehe, mpakupokelanga mmabhoko ginunji chipemo chichitwelile, chikachinyindilwa na kutwelela hikapukunyikwa mpaka kujitika. Kwakubhe chipemo chelachela chintumianga kwa bhangi nga chochocho chibhapakutumia Annoongo kwaachinu." 39 Ayesu akaabholelanga kabhele kulandana kongoni, Bholi, jwangalola bhatendakombola kuntandaa jwangalola nnyakwe, Ngabha! Bhoha bhapakutumbukilanga mulihembo. 40 Mwanapunji ngampeta bhabhajigana bhabhe, nambo kila mwanapunji handa bhajomwile kuchijigana bhabhee handa bhabhajigana bhabhe. 41 Kwa niki nchibhona chipalamande mu liho lya nnung'una jwinu, nambo popopo ngachilola chitela chichibhile mu liho linu? 42 Au, nkombola bholi kunnobholela nnung'una jwinu, "Nnung'una, nnendeoti, nimmoe chipalamande chichibhile mu liho linu. Kongoni ngabhona chitela chichibhile mu liho linu mwabhene? Mwandendemundu mwenga! Mmohe oti chipalamnde chichibhile mu liho linu, na penapo mpakulola maha kwa kombola kuchibhoa chipalamande chichibhile mu liho lya nnung'una jwinu."

43 "Gwakwa nkongo gwammbone guguogola mabibo gabou, wala nkongo gwangali mbone ngaogola mabibo gammbone. 44 Kila nkongo gutendakumanyika na mabhobho kubhokana na mabibo gakwe. Bhandu ngakombolanga kabha mabibo ga makuju kubhoka mu chitekete cha miibha au zabibu mu nkongo ja michoonda. 45 Mundu jwammbone kubhoka hikubho yammbone kubhoka mu ntima gwabhe, na mundu jwangali mmbone kubhoha gangali mmbone gagabhile mu ntima gwabhe, ligongo amundu kubhoa genigala gagatwelile mu ntima gwabhe."

46 "Kwa niki ndendakungemanga nenga, ‘Hangwana, Hangwana,’ nambo ngatendanga gambaala nenga? 47 Mbakunnangianga namuna chibhabhile amundu bhabhaika kwaachangu na kujoonikia malobhe gangu na kugatumia? 48 Bhenabho bhalandana na amundu bhabhachenga nyuumba, bhabhakehema pahi muno mpaka kugukolela mwaala na kujemeka kuchenga kubhokela penapo. Pajikakoma hula ngolongwa muno machi gakatweelela na kujipota nyuumba jenejo na jangapukunyika, ligongo jikachengwa nnani ja mwaala. 49 Nambo johajola jwaoanikie malobhe gangu bhakotokutenda choachela, bhena bhalandana na amundu bhabhachengite nyuumba nnani ja nhanga, pangali kuhemba pahi muno. Pajikakoma hula ngolongwa machi gakatwelela kujipota nyuumba jenejo na kubomoka joha.!"