1 Ayesu pabhakibha mu Nyuumba ja Annongo, bhakaabhonanga akaakola hilebhe bhabhikulekelanga chadaka yabhenji mu lichanduku lya chadaka mu Nyuumba ja Annoongo, 2 Bhakaabhona kabhele nhelwa nhocho bhabhikulekela senti hibhele monomwe. 3 Ayesu bhakalobhola, "Kweli ndendakunnobholelanga habha haikege bhabhatekuwelwa na hangwana bhabhe nga bhabhatekulekela chadaka ngolongwa kupunda bhandu bhoha. 4 Ligongo bhandu bhoha bhabhohitinge kubhoka mu hilebhe hiipundite kubhoka mu hilebhe yabhenji. Nambo habhabha mu kulaga kwabhe bhabheekile yoha hibhabhinayo ligongo lya umomi gwabhe."

5 Bhandu kachoko bhanapunji Ayesu bhatendita kulongelanga nnani ja Nyuumba ja Annoongo, namuna chibhakaalakia kwa maganga gagaalalie Nyuumba ja Annoongo na chadaka yakubhee bhandu bhaabhokie Annoongo. Bahi Ayesu bhakalobhola, 6 "Gangani goha gammonanga pambani, machobha gapakuhika yakubhehe lyakwa hata liganga limo lilipakuhigalila nnani ja liganga lyengi, ligongo kila chilebhe chipakuhalibika."

7 Bhakaakonya, "Bhannyigana, hilebhe heye hipakubhokela lii? Nga hilolelo niki hiipakutulangia twenga kubhehe gatendakubhandikila kuteendeka?"

8 Ayesu bhakaajangulanga, "Mmangange miho, bhakoto kuntembanga. Maana bhajingi bhapakubhokelanga kupetela lina lyangu, kila bhamo bhabikulobhola bhenabho, nga nenga na, mwangota pampakubhonanga henela muhimanye kubhee muda gonogwe gubhandikile! Nambo mwangota nkotokwaakagulanga. 9 Bahi, pampakujoanga ngani ja ngoondo na ukomu, nkotokujogopanga, ligongo hipaalikwa gabhokele oti genago na kupela kwakwe ngaabhokela gunakamo."

10 Penapo bhakapunda kulongela, "Bhandu bha chilambo chimo bhapakupotananga na bhandu bha chilambo chengi na ukolo gongi. 11 Kupakubhehe malendemelo makolongwa ga undopi, njala na hitamwa jakujogoa. Kupakubhee na hilebhe ya kujogoha na hilolelo hikolongwa kubhoka Kunani Kulihunde. 12 Nambo kabula goha gangabhokela, bhapakunkamulanga mwangota na kunpotekanga. Bhapakunpelekanga mu Nyuumba ja majopelo na kuntabhanga muligelecha, npakubhekwa nnoongi ja Akolo bha mamulaka na akaakolongwa kupetela lina lyangu. 13 Nambo hikubho yeneyo hipakupeanga upenyo gwa kwaalobholelanga bhandu hikubho yangau. 14 Nambo nkoto kubhee na bhoga mu mitima jinunji nnani ja chimapakulongelanga kabula ja bhanganhukumulanga, 15 Kwa kubhee nenga mbakunpekehanga malobhe gakulongela na malango yakubhee jwakwa hata akaapwati bhinu bhapakombolanga kutaukananga mwangota. 16 Akaabhelei bhinu na anung'una bhinu na akaalongo bhinu na akaaganja bhinu bhapakunng'alukanga mwangota na bhangi bhinu bhapakunkoma. 17 Bhandu bhoa bhapakunchimwanga mwangota ligongo lya kungagula nenga. 18 Nambo mboomo yinu hipakubhee maha muno machobha goha. 19 Bhenibhala bhabhapakutungamanika mpaka kulepa nga bhapakubhee na umomi gwa machobha goha."

20 "Pampakulola Chilambo cha ku Yelusalemu chitekutimbililwa na manyemba, mmanyange yakubhehe machobha gakubomolekwa chilambo chenecho gabhandikile. 21 Penapo, bhabhabhilinge ku Yudea bhabhutukilange kumatombi, bhenibhala bhabhabhilinge ku chilambo cha Yelusalemu bhabhokange, na bhenibhala bhabhabhilinge kumigonda bhakoto kubhujanga kunnyini. 22 Kwa kubhee gono gupakubhee nga muda gwa kulepa mabhou gagatendikwe ili hikweele hikubho yoha hibhajandike Annoongo. 23 Bhapakulaganga bhenibhala akahikege bhabhile na chitumbo na akahikege bhabhile na ilemba ya kujongea, kwa kubhee mu machobha genago kupakubhee na hibhini ngolongwa muno na kuchimwa kwa Annoongo kupakwaahikila bhena bhandu bha chilambo cha ku Isilaeli. 24 Bhangi bhapakomwa kwa upanga, bhangi bhapakupetulikwa na kwaatabha muchitabho, bhangi bhapakupetulikwa kwa machili kubhoka kungondo na kwaapwilingania mu hilambo yengi. Chilambo cha ku Yelusalemu chipakutawaliwa na bhandu bhanga Bhayahudi na bhandu bha hilambo yengi mpaka muuda pagupakweela."

25 "Kupakubhee na hilolelo mu liobha na mwehi na ndondwa. Pambani pachilambo, bhandu bhapakulaganga na kujogopaanga ligongo lya kulindimila kwa mawimbi ga mubahali. 26 Bhandu bhapakuhinduka ligongo lya bhoga, kwa kubhona hikubho hiipakubhokela pachilambo. Kwa kubhee machili ga gakubhoka kulihunde gapakupukunyika. 27 Penapo chibhapakunola nenga Amwana bha Amundu ndenda kuhika Kunani kulihunde pamo na makakala na ung'anyimo mkolongwa. 28 Muda chikubho chenecho chiipakujemeka kutendeka, nnyemange na kujiinula mimutwe jinunji kunani, Kwa maana ukomboi gwinu gutekubhanduikila."

29 Ngapena Ayesu bhakaalobholelanga kulandanikiha kongo, nlolekeange nkongo gugukemwa ntini na mikongo jengi joha. 30 Chimmona yakubhee mikongo jijingi jijemike kuhipuka mahamba, mmanyange kubhee muda gwa chuku gubhandikile. 31 Yela yela, handa mmonitinge hikubho yeneyo hitenda kubhokela muimanyange yakubhehe ukolo gwa Annoongo gubhandikile kubhokela. 32 Ndenda kunlobholelanga kweli, ubhelei gugupakugalola genago ngapelahopo mpaka hikubho yoha chiipakubhokela 33 Lihunde na chilambo chipakupela, nambo malobhe gangu gapakutama machobha goa.

34 "Mmangange miho, mitima jinunji ikoto kutopelwa na umomi gwa kulokolila, na kung'wee ugembe na kupupulikila nnani ja umomi. hata lichobha helyo lipakubhokela kwa kung'ang'anuka handa ntambo pagutangila chinyama. 35 Kwa kubhee lichobha helyo lipakwahikila bhandu bhoa bhabhatama pachilambo poha. 36 Ncheange na kujopa machobha goha, kongo mwajope Annoongo machobha goha ili nkombolange kuokoka kwa haga goha gagapakubhokela, na nkombolange kujema nnoongi ja Mwana bha Amundu."

37 Bahi, kila muhi Ayesu bhakibha bhatenda kujigana bhandu mu Nyuumba ja Kujopela na kilo bhatenda kujaula kugoloka ku litombi lilikemwa Mizeituni. 38 Bhandu bhoha bhakibha bhatenda kujimuka kundabhi muno na kujaula kwaajohanikiha Ayesu.