1 Ayesu bhakabhoka kuloochi lwa Yolodani bhakibha bhatekutwelela Mboomjo ja Annoongo bhakaatandaha na mboomo ja Annoongo kujaula palulemba. 2 Konokwe bhakaajiga na alichetani kwa machobha makomi ncheche. Muda goha bhakibha bhanga lyehe chohachela, na baada ja machobha hago bhakabhehe na njala. 3 Ngapena alichetani bhakaalobholela, "Handa mwenga nga amwana bha Annoongo, ntendebhue maganga kubhehe nkate." 4 Ayesu gubhaajangwiliaje, "Jijaandikwe mu chitabu cha Annoongo amundu bhalama hopo kwa kulyehe nkate jika." 5 Ngapena lichetani bhakaapetula mpaka kulitombi kundepela na kwaalangiha guna kamo palume jabhe joha pachilambo. 6 Ngapena lichetani bhakaalobholela Ayesu, "Mbakunpekeha ukolo goha na kuhalala kwakwe ligongo heye yoha mbatite nenga na ndenda kombola kwaapekeha joha jola junampalana. 7 Na yoha heye mbakumpekeha kubhehe jinu handa mpakungotimiha na kunyopa." 8 Ayesu gubhajangwilaje, "Lichetani hitekujaandikwa mu majandiko ga Annoongo,

‘Mpakwakotimila Hangwana Annoongo bhinu,

na kwaachalila bhenabho jika jabhe!’"

9 Alichetani bhakaatola Ayesu na kumpeleka mpaka Kuyeluchalemu, na kwabheka nnani ja Nnaala gwa Nyuumba Ja Annoongo na kwaalobholela, "Handa mwenga nga mwana bha Annoongo, nchigwie pahi kubhoka pambani. 10 Kwakubhe hitekujaandikwa,

‘Annoongo bhapakwaatumanga akatumichi bhabhe bha kunani kulihunde bhannendele,’

11 na kabhele, ‘Bhapakumpetula mmabhoko gabhenji

nkoto kobhanduka lukongono lwinu paliganga.’"

12 Nambo Ayesu bhakaajangula, "Bhakaalobholela kabhele hitekujaandikwa, ‘Nkotokwaajiga Hangwana Annoongo bhinu.’ "

13 Lichetani pabhakajomola kwaalenga kwa kila ndela, bhakanneka kwa muuda gugupaalikwa.

14 Penapo Ayesu bhakabhuja ku Galilaya bhabhi bhatwelile Mboomo ja Annoongo, na ngani yabhe hikajenela mu Kugalilaya na hilambo yoha hiikabhandikila. 15 Nabhena bhakibha bhatenda kwajigananga bhandu mu nyuumba ya kongana Bhayahudi na bhandu bhoha bhakibha bhaalumbalila bhenabho.

16 Bahi, Ayesu bhakajaula mu chilambo cha ku Nazaleti, chilambo chibhakakolile, na Lichobha lya Kupomolela jijikakemwa Sabato, bhakajingila mu nyuumba ja kongananga Bhayahudi. Bhakajema ili bhachoome majandiko ga Annoongo kwa lilobhe. 17 Bhakapokela chitabu cha Aisaya, halondoi bha Annoongo, na bhakachiiligula bhakalolea bhakakongana na chehemu jijijandikwe henela.

18 "Mboomo ja Hangwana jibhi pamo na nenga,

kwakubhehe bhatekuhagula

kubhaletela akahaocho Ngani Jammbone.

Bhatekunduma nintangachiange bhabhakatabhwa kujogolekwa kwabhenji,

na bhangalolanga bhakombolange kulola kabhele,

bhandumite kwalekelelanga bhabhabhabhonelwa.

19 Na kutangacha chaaka cha Hangwana chichikondekwa."

20 Baada ja kuchoma, bhakachiiliga chitabu chela, bhakaapekeha antumichi, ngapena bhakatama, bhandu bhoha bhabhakabhehe mu Nyuumba ja konganilanga Bhayahudi bhakaalolekea miho. 21 Ngapena Ayesu bhakajemeka kwaalobholelanga, "Leleni majandiko gangani gatekwela handa chintekujohanga." 22 Bhandu bhoha bhakaapala na bhakakangachanga malobhe ga mmbone gabhatendita kulongela, bhakibha bhatenda kukonyana, "Ngati, habha ngabha mwana jwa Achupu?" 23 Ayesu bhakalobholelanga, "Niimanyi mpanobholela chilongelo heche, ‘Anng'anga, nchilamie mwabhene.’ Hikubho hiitendite konikola ku Kapelenaumu mugatende na pambani kwaachinu." 24 Bhakaendelea kulongela, "Kweli nannobholelanga, bhakwa halondoi bha Annoongo bhakondekwa mu chilambo chabhe. 25 Nambo, nnyohanikiange! kweli kukibha na bhawelwa bhajingi mu chilambo cha ku Isilaeli wakati gwa Aelia. Kunani kukatabhwa na hula jakibha hopo kwa yaaka hitatu na miheyi sita, kukabhe na njala ja likuluta mu chilambo choha. 26 Hata henela, Aelia bhangalagikiwa kwa bhawelwa bhoha bhala ila kwa haikege hawelwa bha ku Selepati mu chilambo cha Kusidoni. 27 Kabhele, mu chilambo cha ku Isilaeli wakati gwa Aelisha kukibha na akatamwa mambujupuju bhajingi. Hata henela, bhakwa bhohabhala bhabhakalama ila tu Anaamani amundu kubhoka chilambo cha ku Silia." 28 Bhandu bhoha bhabhakibha mu jenijela nyuumba ja konganilanga Bhayahudi pabhakajohanga genago bhakachimwanga na kutumbala muno. 29 Bhakajemanga, bhakaapia panja Ayesu bhakakamula chiminya nkwekwe na kwaapeleka kundepela ja litombi, ili bhaanokolele palichembo. 30 Nambo Ayesu bhakapeta pakati jabhenji, bhakajaula.

31 Ngapena Ayesu bhakatuluka mpaka ku Kapelenaumu ku ngome ja ku Galilaya, na Lichobha lya Kupomolela bhakajemeka kujigana bhandu. 32 Bhakakangachanga muno na majigano gabhe, bhakajigana kwa mamulaka. 33 Na mu nyuumba ja konganilanga Bhayahudi na mundu bhabhakibha bhabhapoganikwe na mahoka, bhakapota nyenye kwa lilobhe likolongwa na kongo bhabhikulongela. 34 "Mpala kututenda niki mwe mwa Ayesu bha ku Kunachaleti? Bholi, ntekuhika kututiniha? Ndenda kummanya yakubhehe mwenga nga ganiki. Mwenga nga bhammekitwe ligongo lya Annoongo!" 35 Ayesu bhakaakalipila bheni bhala lihoka, bhakilobhola, "Nkotoke jii Mummoke mundu hojo!" Pena jono lihoka likaagwia pahi mundu jola nnoongi ja bhandu na likaabhoka pangali kwaulaha nnnongi ja bhoha. 36 Bhandu bhoha bhakakangachanga, bhatendita kulobholelana, "Lyende nga lijigano lya namuna niki, habha amundu bhatekola uwecho na machili gakulumikiha mahoka gabhoke na genago gatenda kubhoka." 37 Ngani ja Ayesu hikajenela kila mahali hiikatindila mu chehemu joha.

38 Ayesu bhakabhoka mu jeni jela Nyuumba ja konganilanga Bhayahudi na bhakajaula kaja kwa Asimoni. Bhakaajopa Ayesu bhaalamie hakibhabhe Asimoni kwa kubhehe bhakibha na chitamwa chikolongwa. 39 Bahi, Ayesu bhakahika na kujema kubhandikila nabho, bhakachikalipila cheni chela chitamwa, na chenecho chikaaleka. muda gogogo haikege bhakajinuka na kujemeka kwatumikilanga. 40 Lyobha palikatipika, bhandu bhoha bhakibhanga na akaatamwa bhabhenji kubhokela kutali kutali bhakaaletanga kwa Ayesu, na bhena bhakabheeka mabhoko gabhe nnani ja kila atamwa, na kwaalamianga. 41 Na genago mahoka gakabhokanga kwa bhandu bhajingi, bhakapotanga nyenye bhakilobhola, "Mwenga nga amwana bha Annoongo!" Nambo Ayesu bhakaakalipilanga na kwaahibhilanga bhakoto kulobhola, kwa maana mahoka bhakaamanya kubhehe bhenabho nga Akilichito bhammekitwe ligongo lya Annoongo.

42 Malabhi jakwe tuputupu, Ayesu bhakabhoka kujaula chehemu pa jika jabhe. Bhandu bhatendita kwaaloleha. Na pabhakahikanga chehemu jibhabhile, bhakalenga kwaahibhila bhakoto kubhoka. 43 Nambo Ayesu bhakaalobholelanga, "Mbalikwa kutangacha Ngani Jammbone ja Ukolo gwa Annoongo mu hilambo yengi, kwa kubhehe chenecho nga Annoongo chibhandumite ndende." 44 Henela bhakaendelea kutangacha lilobhe lya Annoongo mu Nyuumba ja konganilanga Bhayahudi konokwe Kuyudea.