1 Bahi, Ayesu bhakaalobholelanga bhanapunji bhabhe kulandanikiha kongoni, ili kwaalangianga namuna chiipalikwa kwaajopa Annoongo machobha goha pangali kutotokela. 2 Bhakalobhola, "Mu chilambo chimo pakibha na aliwali yakubhee bhakibha ngaajogopa Annoongo wala kwaatopea amundu. 3 Mu chilambo hecho bhakibha nhwelwa jumo yakubhee bhatendita kuhika kwaachabhe mala kwa mala kwa aliwali bhenabho na bhabhikwaapembelea, ‘Choonde ndendakunyopa nnyaangatile ili ngombole kupata hilebhe yangu kubhoka kwa apwati bhangu!’ 4 Aliwali bhenabho bhatenditakana kwaajangatila nhelwa bhenabho kwa muuda ntandamao. Nambo bhakalobhola mumtima gwabhe, ‘Kwakubhee nenga ngaajogopa Annoongo wala nangali ngani amundu, 5 Nambo ligono nhelwa habha bhaendelea kunhabhua hipaalikwa naapekee chibhapala, ila handa ngaapeke bhapakunda kunhuabhua habhua machobha goha!’"

6 Ngapena Hangwana bhakalobhola, "Ng'anikiange muno genago gabhalongile bhena aliwali bhangatenda lihengo lyabhe chiipalikwa chibhalongela. 7 Bholi, Annoongo ngaatetelanga bhenibhala bhangu bhabhahagwile, bhabhaagutila kilo na muhi? Bholi, bhapakana kwaajonikia? 8 Ndendakunnobholelanga, bhapakwapekea chimpalanga chindema. Nenga Amwana bha Amundu chimbakuhika, bholi mbakwakolela tangu bhandu bhatendakuhobhalela pachilambo?"

9 Ngapena Ayesu bhakaabholelanga kwa kulandanikiha, bhandu yakubhee bhabhachibhonanga kubhee bhatendakondekwa nnongi ja Annoongo na bhabhaabheluanga bhangi, bhakalobhola. 10 "Bhandu bhabhele bhakajaulanga mu Nyuumba ja Annoongo kujopa, jumo jwabhenji bhakibha Amfalisayo na jongi bhakibha antocha kodi. 11 Bhenibhala Amfalisayo bhakajema, chibhabhile bhene bhakalobhola, Annoongo, ndendakunchukulu kwakubhee nenga ngabha handa bhandu bhangi yakubhee, akaabhwihi, akaabhou na bhangoongola hata mmihopo handa atocha kodi habha. 12 Nenga ndendakutabha pa bhele kwa juuma, ndendakubhoa libhoga limo mu mabhoga komi ya hilebhe hiimbata. 13 Nambo bhenibhala antocha kodi bhakajema kwa kutalika, pangali hata kunyakula miho gabhe kunani kulihunde, bali bhakachipota pantima kwa kuhumala, bhabhikulobhola, mwee Annoongo, nngoole kiha nenga naakola mabhou. 14 Ayesu bhakaalobholelanga, ndendakunnobholelanga, habhabha antocha kodi bhakabhuja kaja bhakibha bhatekondekwa nnongi ja Annoongo kuliko bhenabho Amfalisayo. Kwakubhee bhohabhala bhabhachikwea bhapakutuluka, na bhohabhala bhapakutulukikwa bhapakwaakwea."

15 Bhangu bhatendita kwaapelekela Ayesu bhana bhachokochoko ili bhaabhekele mabhoko gabhe. Bhanapunji bhabhe bhapakabhonanga henela, bhakaalipilanga kwa malobhe gankalipa. 16 Nambo Ayesu akaikemanga yeniyela yaana bhahikange kwaachabhe, bhakalobhola, "Mwaalekange bhana bhachoko choko bhaikange kwaachangu, wala nkoto kwahibhilanga, kwakubhee ukolo gwa Annoongo nga gwa bhandu handa heye yaana. 17 Ndendakunnobholelanga kweli, amundu bhaobhala bhabhangapokela ukolo gwa Annoongo handa amwana habha achoochoko, ng'o ngajiingila mu ukolo gwa Annoongo."

18 Akolo bhamo, Ayahudi, bhakaakonya Ayesu, "Bhannyigana bhammbone, ndendee chiniki ili ngombole kugupata umomi gwa machobha goha?"

19 Ayesu akaajangula, "Kwa niki kungema nenga nammbone?" Ayesu akaakonya, "Bhakwa bhabhabhile bhammbone ila nga Annoongo jika jabhe.

20 Ntenda kuhimanya amuli, ‘Nkototenda ngoongola, nkotokoma, nkotokujibha, nkotokulobhola unami, mwatopehe atati bhinu na anyongolo bhinu.’"

21 Bhakajangula, "Amuli yoha heyeye ndekamula kubhokela ugwana gwangu." 22 Ayesu pabhakajoha haga, bhakalobholela, "Tangu ntekupongokelwa na chilebhe chimo. Nnyabhule nkauche kila chilebhe chimminacho, mwapekehe hakaocho, na mwenga mpakubhee na ngokwe kunani kuliunde. Ngapena nhike nngagule." 23 Pabhaakajoha ngani jenejo, bhakahumalika muno, kwakubhee akibha mundu jwabhile na hilebhe hijingi.

24 Ayesu bhakaalola kulobhola, "Nnyoanikie namuna chiibhile kulimba kwa amundu bhabhabhile na hilebhe hijingi kujiingila mu Ukolo gwa Annoongo! 25 Nga kujojoka muno kwa chinyama chikolongwa chichikemwa ngamia kupeta mu lipobhole lya chindano kuliko amundu bhabhabhile na hilebhe hijingi kujingila mu Ukolo gwa Annoongo." 26 Bhenibhala bhabhakajoanga genago, bhakaakonya, "Nga aganiki bahi, bhabhapakombola kuokoka?" 27 Ayesu bhakajaangula, "Gangakomboleka kwa bhandu, kwa Annoongo gatendakomboleka."

28 Ngapena Apetulo bhakaalobholela Ayesu, "Twenga tutekuileka yoha hiitubhinayo na kunkagula mwenga." 29 Ayesu bhakajaangula, "Nhobhalelange ndendakunkongolela, jwakwa hata jumo jwalekite nyuumba jabhe, au hanubhabhe, au hanung'una, au atati bhabhe na anyongo bhabhe au bhana ligongo lya Ukolo gwa Annoongo,

30 Yakubhee ngapokelahopo pa hijingi muno mu machobha gangani na machobha gagahika na kugupata umomi gwa machobha goha."

31 Ayesu bhakaatolanga nyeenje bhenibhala bhanapunji komi na bhabhele na kwalobholelanga, "Nyoanikiange! Tupakujenda ku Yelusalemu na konokwe kila chilebhe chichijaandikwe na akaalondohi nnani jangu nenga Amwana bha Amundu chipaakwela. 32 Amwana bha Amundu bhapakwakamua mmabhoko ga bhandu bhangaamanya Annoongo na bhengaangota bhapakwabhelua na kwaatukana na kwahunila mata. 33 Bhapakwapota mihimbati na kwakoma, nambo lichobha lya tatu bhapakuyooka." 34 Nambo bhanapunji bhabhe bhangaelewa mana gakwe ngani hejo, ligongo jikibha ja chitibha kwachabhenji, na bhenaangota bhangaimanyanga Ayesu bhakongolela niki.

35 Ayesu pabhatendita kubhandikila ku Yeliko, bhangalola bhamo bakibha batamite nngulugulu ja ndela bhabhikujopa kwaajangatila. 36 Jwangalola hojwe pakajoha nkutuli gwa bhandu gutendakupeta, bhakakonya, "Chibhile chiniki?" 37 Bhakalobholela, "Ayesu bha ku Nazaleti bhatendakupeta." 38 Ngapena bhangalola bhenabho bhakakwea lilobhe, bhakalobhola, "Ayesu, Amwana bha Adaudi, nngolehe kiha!" 39 Bhenibhala bhabhalongolile nnongi bhakaakalipila ili bhakotoke! Nambo bhenabho bhangalola bhakapunda bhakakwea libhole, bhabhikulobhola, "Amwana bha Adaudi ngolee kiha!"

40 Ayesu bhakajema, bhakakulumikia bhenabho amundu bhalete kwachabhe. Pabhakabhandikila, Ayesu bhakaakonya, 41 "Mpala niki nintendele?" Bhakajangula, "Hangwana, mbala kulola."

42 Ayesu bhakaalobholela, "Nnole kuhobhalela kwinu kutekunnamia."

43 Popopo bhangalola bhenabho bhakakoombola kulola na bhakaakagula Ayesu, kongo bhabhikwalumbalila Annoongo. Bhandu bhoha pabhakabhonanga lyenelyo, na bhenaangota bhakaalumbalila Annoongo.