1 Ayesu bhakaalobholela bhanapunji bhabhe, "Hilebhe hiiyajambukia amundu kutenda mabhou hibhile machoba goha, kulaga kupakubhee kwaachebha amundu bhenibha bhenibhala bhabhapakwaajambukia amundu kutenda mabhou. 2 Hikabhii mbaya kwa amundu bhanabho kwaatabha liganga likolongwa pantandala gwabhe na kwaajea mubahali kuliko kwaabhila jumo jwa akaanung'una habhabha." 3 Henela, nchilolekeange! "Handa anung'una bhinu bhatendite mabhou mwaakelebhue, na bhena handa bhalekite mabhou, mwaalekelele. 4 Handa bhannemwite pa saba kwa lichobha, na penipala pabhabhuja kwaachinu kulobhola na kuleka mabhou gabhe nga hipaalikwa mwaalekelele."

5 Akaandundame bhabhe bhakaalobholela Hangwana, "Nntujonjokee kuhobhalela." 6 Na bhena Ayesu bhakajangula, "Handa nkolitinge kuhobhalela kuchoko choko hana njelegwa ja haladali, nkombolanga kugulobholela hogo nkongo gwa nkuyu, ‘Ntupuke nkamele mubahali,’ Na gonogwe gukajeketela."

7 Ayesu bhakalobhola, "Ikabhee bhamo bhinunji atekola abhanda bhabhalema kuming'onda au bhabhailia ngondolo, bholi, pabhakwalobholela abhanda bhabhe pabhabhuja kubhoka kumigonda, nhike pambani ntame nlyee chakulya? 8 Bholi, badala jakwe, ngaalobholela, ndelekele chaakulya, nilyee, nchijigane kundumikila pandendakulyee na kung'wee, baadae mpakombola kulyee na kung'wee? 9 Bholi, jono mundu apakunchukulu antumichi hojwe ligongo bhakatenda chenichela chichikapaalikwa kutenda? 10 Hela hela na mwangota handa nnyomwilinge kutenda gabhannagihe, nnobholange, twenga nga bhatumichi tu bhatutendite gagapaalikwa."

11 Ayesu pabhatendita kujaula Kuyelusalemu, bhakapeta kunpaka gwa ku Samalia na ku Galilaya. 12 Pabhakibha bhatenda kujingila mu chijiji chimo, bhakakongana na bhandu komi bhabhakibhanga na itamwa ya mambujupuju. Na bhenaangota bhakajemanga kutali, 13 bhakakwe lilobhe, bhakaalobholela, "Ayesu, Hangwana, ntukolee kiha!" 14 Pabhakabhonanga bhakaalobholelanga, "Nnyaulange nkachilangiange kwa akaakung'i." Nabhena pabhakibhanga nndela bhabhi kujaula, bhakalamanga itamwa yabhenji na kondekwa handa chiiyobhalilike kwa kujopa. 15 Jumo jwabhenji pakabhona kubhee bhalamite, bhakabhuja kongo bhabhikwaalumbalila Annoongo, kwa lilobhe likolongwa. 16 Bhakachijeha pa makongono ga Ayesu na kwaachukulu. Amundu bhenabho bhakibha Amsamalia. 17 Henela Ayesu bhakaakonya, "Bholi, nangaalamianga bhandu komi na bhenaangota bhakakondekwa handa chiiyobhalilike ja kwaajopa? Bholi bhabhilinge koji bhenibhala tisa? 18 Bhakwa hata bhamo bhabhabhonikine bhabhikubhuja kwaatopea Annoongo nga habha ageni tu?" 19 Ngapena Ayesu bhakaalobholela, "Nnyimuke nnyaule kwaachinu, kuhobhalela kwinu kutekunnamia."

20 Lichobha limo Mapalisayo bhakaakonya Ayesu, "Ukolo gwa Annoongo gupakuhika lii?"

Bhenabho bhakaajangula, "Ukolo gwa Annoongo ngahika kwa namuna ja kubhonekana kwa miho, 21 Wala bhakwa amundu bhabhapakulongela, gongo pambani, au gwago kwakola, kwakubhee Ukolo gwa Annoongo gubhii nkati jinunji."

22 Ngapena Ayesu bhakaalobholela bhanapunji bhabhe, "Machobha gatendakuika yakubhee mpakulokolilanga kulola lichobha limo lya machobha ga nenga Amwana bha Amundu, nambo ngajibhona. 23 Bhandu bhapakunnobholelanga, ‘Nnolange bhenibhala kwakola!’ Au, ‘Habha pambani!’ Nkotokubhutukilanga. 24 Kwakubhee nenga Amwana bha Amundu mu lichobha lyangu mbakubhee handa kung'anyima kwa njahi, gugumulikila kulihunde kujemeka kujomolekeha kongi mpaka bhangi. 25 Nambo mbaalikwa nenga Amwana bha Amundu kulaga oti, na nkanikwa na bhandu bha chibhelei hecheche."

26 Handa chiibhile mu machobha ga Anuhu, nga chiipakubhee mu machobha ga nenga Amwana bha Amundu. 27 Mu machobha ga Anuhu bhandu bhatendita kulyee, na kung'wee, na kulombelanga na kulombwanga mpaka lichobha lela Anuhu pabhakajingila mu ntumbwi nkolongwa gugukakemwa chapina, hula ngolongwa jikakoma jikaakomanga bhandu na hilebhe yoha hikajomoka. 28 Ikibha hela hela mu machobha ga Alutu. Bhandu bhatendakulyee na kung'wee, bhatendita kuhemela na kuuchanga, na bhatendita kulemanga na kuchenganga. 29 Nambo lichobha lyela Alutu pabhakabhoka ku Sodoma, moto gwa chibeliti kubhoka kunani gukajitika na kwaatinianga bhoha. 30 "Henela nga chiipakubhehe lichobha lyela nenga Amwana bha Amundu chimbakubhokela. 31 Mu lichobha helyo, mundu joha jola jwabhile litatali lya nyuumba jakwe, bhakoto kutuluka ili kuhipetula hilebhe yakwe hibhile nkati ja nyuumba na bhabhabhii kumigonda bhakoto kubhuja kwaachabhe. 32 Nkombokelange gagaakolile hanu bha Alutu! 33 Mundu johajola jwaajiga kuguokoa umomi gwabhe bhapakugahobhea na johajola jwapakuobheha umomi gwabhe bhapakugaokoa. 34 Ndenda kunnobholelanga, mu kilo hecho bhandu bhabhele bhapakubhee bhagolwike pa chindanda chimo, bhamo bhapakwaanyakula, bhangi bhapakulekwa. 35 Hakaikege bhabhele bhapakubhehe bhabhi kuyaga yaakulya pamo palikanga lya kuyagila yaakulya, bhamo bhapakunyakulwa na bhangi bhapakulekwa. 36 Bhandu bhabhele bhapakubhenganga kumigonda bhamo bhapakunyakulwa na bhamo bhapakulekwa."

37 Ngapena bhakaakonya, "Haga gapakubhokela kooji Hangwana?"

Bhakaajangula, "Papabhile na chinyama chichiwile, ngapena matumbuhi gapakondekana."