1 Lichobha limo lya kupomolela Ayesu pabhakalalikwa kulyehe chakulya kaja kwa bhamo bha akaakolo bha makaafalisayo na bhandu bhabhakibhanga penapo bhatendita kwaalolekea muno. 2 Popopo nnongi jabhe Ayesu pakibha na amundu bhamo bhabhakibha na chitamwa cha kutupa mmele goha. 3 Bahi, Ayesu akaakonyanga Mapalichayo na bhabhajiganga malagilo ga Amusa, "Bholi, malagilo gapala kunnamia mundu lichobha lya kupomolela au ngabha?" 4 Nambo bhakatamanga jiii. Nambo Ayesu bhakankamula bhena atamwa na kwalamia, gubhannekitaje ajabhule. 5 Ngapena Ayesu akaakonyanga, "Nga aganiki pakati jinunji mwana au ng'ombe bhagwiile mulihembo ngateenda chindema kwaabhoa hata likabhehe lichobha lya kupomolela?"

6 Na bhenaangota bhakibha hopo na chakulongela.

7 Ayesu bhakabhona bhenibhala akaageni bhabhaalalikwe bhatendakuchiagulila kutama hitengu ya nnoongi bhakaalobholelanga kwa ngani heje, 8 "Handa amundu bhannalike paulombela, nkoto kutama hitengu ya kutopea ikoto kubhehe bhatekupanganikiwa chene chitengu bhabhaalikwe akolongwa kupunda mwenga. 9 Handa ntamite penapo bhenibhala bhabhannalikinge mwangota bhabhele bhapakuhika kunnobholela, ‘Mmoke pachitengu chinu mwape bhatame bhenabho,’ penapo mpakola honi nnongi ja bhandu na mapakujemeka kuhegelela na kutama pa hitengu yangatopea. 10 Nambo handa bhannalike paulombela nnyabhule nkatame pa hitengu yangatopea ili pabhapakuhika bhenibhala bhabhannalike bhannobholele, ‘Aganja bhangu nnyaule nkatame pakutopea muno.’ Penapo mpakutopela nnoongi ja akaageni bhoha bhabhanlola. 11 Kwa kubhehe kila amundu bhabhapakubhehe akolongwa bhapakubhehe achoko choko, na bhabhabhile achoko choko bhapakubhehe akolongwa." 12 Ngapena Ayesu bhakaalobholela na bhenibhala bhabhakaalalikanga, "Handa mpakwatelekelanga bhandu chaakulya cha muhi na kimuho, nkoto kwaalalikanga akaaganja bhinu bhabhabhii na hilebhe, wala akaanung'una bhinu, wala akaandami ajinu, bhakoto na bhenabho bhakaannalika, mpakubhehe ntekulepwa chinkaatendelanga. 13 Nambo panhalakia chaakulya cha paulombela mwakemange bhandu akaahocho na akanangwabha na bhabhapolite na bhangalolanga, 14 namwenga nga chimpakutendelwa gammbone na Annoongo ligongo bhenaangota bhanga cha kummujikia mwenga. Maana Annoongo bhapakunmujikiha mwenga lichobha lya kwaayohanga bhandu bhabhakondekwa nnoongi ja Annoongo."

15 Bahi pabhakajoa genago jumo jwa bhenibhala bhabhakatama nabho kulyee chaakulya pamo na Ayesu bhakalobhola, "Mbaya jonijola jwapakulyehe chaakulya mu ukolo gwa Annoongo."

16 Ayesu bhakaajangula, "Pakibha na amundu bhamo bhabhakahalakia lichobha likolongwa lya kulyee na kwaalalikanga bhandu bhajingi. 17 Palikahika lichobha likolongwa lya kulyee chaakulya bhakantuma mmanda bhajaule bhakaakeme bhandu bhabhalalikwe, ‘Nhikange kwa maana hilebhe yoha hibhile maha.’ 18 Nambo bhandu bhoha bhakajemekanga kuchitetelanga ligongo lya kulepelanga kuhika. Bha kujemeka bhakaalobholela bhenabho abhanda, ‘Ndekuhemela nng'onda, hipalikwa nyahule ngagulole, choonde nnjamehe.’ 19 Joongi bhakalongela, ndekuhemela ng'ombe komi bha kulemela, nangocheni ndendakunnyopa nyaule kwaajiganga, choonde nnjamehe. 20 Joongi bhakalobhola, ndekulombela mwikege nangocheni, ngombolahopo kuhika.

21 Jonijola mmanda bhakajaula, kwalobholela Hangwana bhabhe gagabhokile. Bahi, bhenibhala hakola nyuumba bhakatumbala, bhakalobholela abhanda bhabhe, ‘Mmoke chindema, nnyaule mu ndela ngolongwa na ndela njokonjoko mu chilambo, nkaaletange pambani hakaocho, bhabhapolite, na bhangalolanga na akanangwabha.’ 22 Bhenibhala abhanda bhakalobhola, ‘Hangwana, chenichela chinntekunagia chitendikwe handa chintekunnagia nambo tangu gubhi upenyo mahali pa lichobha likolongwa.’ 23 Hangwana bhakaalobholela abhanda, nnyaule mu ndela ngolongwa na ndela njokonjoko ya pachilambo nyaule nkaakulumikiange bhandu bhajingilange na bhatwelelange mu nyuumba jangu. 24 Maana ndenda kunnobholelanga pakati ja bhenibhala bhabhaalalikwe na kukananga bhaakwa bhabhapakulyanganga chaakulya changu cha lichobha likolongwa!"

25 Bahi bhandu bhajingi bhakalongana na Ayesu. Ngapena Ayesu akaatendebhukila bhandu na kwalobholelanga, 26 "Handa amundu bhoabhala jwaapala kubhee anapunji bhangu hipaalikwa bhambale nenga kupeta chibhaapala atati bhabhe na anyongo bhabhe na hanu bhabhe na bhaana bhabhe na akaanung'una analome na akahikege, na hata chibhachipala bhene na handa ngatenda henela ngapalikwa kubhehe bhanapunji bhangu. 27 Mundu johajola jwakoondahopo kulaga na kujomoka pabhangagula ngakombola kubhee anapunji bhangu."

28 "Maana nga ganiki pakati ja mwangota, handa bhapalite kuchenga nyuumba ngolongwa, ngatama hopo pahi na kubhalangana na kulola handa bhabhile na ulohi gwa kujomolekea kucheengela? 29 Kwa kubhee handa bhajeemike kuchenga nyuumba ja matopaali na kuchenga nchingi ngapena na kulepela kujomolekea kuchenga jene nyuumba, bhandu bhabhaalola bhapakujemekanga kwaaheka, 30 Bhapakulobholanga, ‘Habha amundu bhakajemeka kuchemga nambo bhaleepile kujomolekea.’"

31 Nnobhole kulandanikia kongi ikabhee bhabhii akolo, bhabhapala kujaula kupootana na akolo bhangi, bhatama hopo pahi na kuganikia manyemba gakwe elufu komi bhapakombolanga kupootanga na akolo bhabhabhii na manyemba elufu makomi gabhele bha akolo bhangi? 32 Handa bhabhonite ngakombola, bhapakwatumanga akaatumichi bhabhe bhajaulange ili bhakombolange kuelewana muuda gonowe akolo bhangi bhabhii tangu kutali. 33 Henela, bahi, jwaakwa hata jumo jwinunji jwapakubhee bhanapunji bhangu handa ngaleka yoha hibhabhii nayo.

34 "Mwinyo nga gwammbone, nambo handa kuhobhie kunong'na kwakwe mpakulekela chiniki ili jibhujile kabhele mu kunong'na kwakwe? 35 Mwinyo ngapaa kabhele kulekelwa mu mandopi wala kutenda mbolea, bhandu bhapakujijea tu. Mgakamulange genigala gabhankongolilinge!"