1 Mu chaka cha komi na nhano cha utawala gwa ukolo gwa Akaichali Tibelio, Apontio Pilato bhakibha akolongwa bha Kuyuda. Ahelode bhakabhehe akolo bha ku Galilaya, na hanug'una bhabhe Apilipo bhakibha akolo bha Kuitulea na Kutulakoniki. Na Alusania bhakibha akolo bha ku Abilene, 2 na Aanasi na Akayafa bhakibhanga bhakukung'na bhakolongwa. Wakati gonogwe lilobhe lya Annoongo likaikila Ayohana amwana bha Achakalia, konokwe palulema. 3 Bahi, Ayohana bhakajaula mu hilambo yoha hiibhii ngulugulu mwa loochi lwa ku Yolodani. Bhakabhe bhatenda kwaubilianga ligongo bhandu bhakotimange na kubhatichwa ili Annoongo bhabhokange mu yaambi. 4 Handa chiijaandikwe mu chitabhu cha Alondoi bha Annoongo Aichaya,

"Lilobhe lya mundu litendakema kubhoka palulema,

‘Munhalakiange ndela ja Hangwana,

nnyululange mu chehemu bhabhapala kupeta.

5 Kila likote lipakuyelelwa,

litombi na hitombi hipakuyalagalilwa,

papapendite bhapakunyulula,

na ndela yangali mmbone hipakuhalakilwa maha.

6 Na, bhandu bhoha bhapakugubhona bhokopu kubhoka kwa Annoongo.’"

7 Bahi, Ayohana bhakaalobholelanga lilubhalo lya bhandu bhajingi bhabhahikanga ili bhabatichwe, "Mwaangota ubhelehi gwa lijoka! Nga ganiki bhabhankongolilinge mpakombola kujibhutuka lilaka lya Annoongo jijibhandikile kuhika? 8 Nnangiange kwa hikubho yakubhe nnekitinge chaambi. Nkotokujemakanga nangocheni kuchilobholelanga mumitima jinunji, ‘Tubhi nabho atati bhitu Aibulahimu!’ Ndendakunnobholelanga ukweli, Annoongo bhakombola kugalobholela maganga gangani kubhehe bhana bha Aibulahimu. 9 Bahi, libhago libhekitwe maha pamikega ja mikongo, henela kila nkongo gwanga hogola mabibho gambone gupakuheketwa na kugujeha pamoto." 10 Na nkutuli gwa bhandu gukaakonya, "Tutende niki bahi?" 11 Ayohana bhakajangula, "Jwaabhile na ngobho hibhele hampekehe jwaanga ngobho, na jonijola jwaabhile na chakulya bhampekee nnyakwe." 12 Nabhena bhabhatochanga kodi bhakaikanga ili bhabatichwe, gubhaakonyitaje Ayohana, "Bhaajigana natwenga, tutende niki?" 13 Nabhena bhakalobholela, "Nkotokutolanga kodi kupeta chibhannobholile." 14 Ngapena manyemba bhakaankonya Ayohana, "Natwenga tutende niki?" Nabhena Ayohana bhakaajangula, "Nkotokwaapokonyolanga hilebhe ya bhandu kwa machili wala kwahukumula kwa unami. Nkolonikange na nchahala gwinunji." 15 Bhandu bhoha bhakibhanga bhalendelanga kuhika kwa bhena Akilichito bhabhaagulikwe na Hangwana, na bhenaangota bhatendita kuchikonya konya mu mitima jabhenji nnani ja Ayohana komboleka habha nga bheni bhala Akilichito yakubhehe Annoongo bhabhatumite. 16 Penapo Ayohana bhakajangulanga bhoha, "Nenga ndenda kummatichanga kwa machi, nambo bhatenda kuika bhabhakolite na machili kumbeta nenga na nenga ngapalikwa hopo kujogola migoji ya champali yabhe na bhenabho bhapakummatichanga kwa Mboomo ja Annoongo na mooto. 17 Bhanabho bhatekola na chipalo chakupepetela mmabhoko gabhe na bhena bhapakuhalakia pakukobhatela mapemba, na kukumba mapemba gammbone na kubheka mu ngokwe na mapohi na kugajocha mooto gwangahimika." 18 Kwa malobhe gangi gajingi Ayohana bhakaalobholelanga bhandu bhalekange yaambi kwa kwaakongolelanga Ngani Jammbone. 19 Nambo Ayohana pabhakaakalipila akolo Ahelode, ligongo bhaatolite Ahelodia hanu bha anung'una bhabhe, na gabhou goa gabhatendite. 20 Ngapena Ahelode bhakapundia ubhou gwabhe kwa kwatabha mu ligelecha Ayohana.

21 Bhandu bhoha pabhatendita kubatichwanga na bhena Ayesu bhakabatichwa. Na pabhatendita kujopa, kunani kulihunde kukajogoka, 22 Mboomo ja Annoongo akatulukia hakibha handa njebha. Lilobhe likajoanika kubhoka kunani kulihunde, "Gwenga nga amwana jwangu junampala, ndekubhajilwa namwenga."

23 Ayesu pabhakajemeka lihengo lyabhe, na bhakibha na yaaka makomi gatatu, na bhandu bhakaganikia bhena bhakibha nga amwana bha Achupu na Achupu bhabhakibha amwana bha Aheli. 24 Aheli bhakibha amwana bha Amatali, na Amatati bhakibha amwana bha Alawi, na Alawi bhakibha amwana bha Ameliki, na Ameliki bhakibha amwana bha Ayanai, na Ayanai bhakibha amwana bha Achupu, 25 na Achupu bhakibha amwana bha Amatia, na Amatati bhakibha amwana bha Aamochi, na Aamochi bhakibha amwana bha Anahumu, na Anahumu bhakibha mwana jwa Ahechili, na Ahechili bhakibha mwana jwa Anagai, 26 na Anagai bhakibha mwana bha Amaati, na Amaati bhakibha mwana bha Amatatia, na Amatatia bhakibha amwana bha Achemeni, na Achemeni bhakibha mwana jwa Ayocheki, na Ayocheki bhakibha amwana bha Ayoda 27 na Ayoda bhakibha mwana jwa Ayohanani, na Ayohanani bhakibha mwana jwa Alesa na Alesa bhakibha mwana jwa Azelubabeli, na Achelubabeli bhakibha mwana jwa Asheatieli na Asheatieli bhakibha mwana jwa Aneli, 28 na Aneli, bhakibha mwana jwa Aameliki, na Ameliki bhakibha mwana jwa Bahi, na Bahi bhakibha mwana jwa Akochamu, na Akosamu bhabhakibha mwana jwa Aelimadamu, na Aelimadamu bhakibha mwana jwa Aeli, 29 na Aeli bhabhakibha mwana jwa Ayochua, na Ayoshua bhakibha amwana jwa Aeliezeli, na Aeliezeli bhakibha mwana jwa Ayolimu, na Ayolimu bhakibha mwana jwa Amatati, na Amatati bhakibha mwana jwa Alawi, 30 na Alawi bhabhakibha mwana jwa Asimeoni, na Asimeoni bhakibha mwana jwa Ayuda, na Ayuda bhakibha mwana jwa Achupu, na Achupu bhakibha mwana jwa Ayonamu, na Ayonamu bhakibha mwana jwa Aeliakimu, 31 na Aeliakimu bhakibha mwana jwa Amelea, na Amelea bhakibha mwana jwa Amena na Amena bhakibha mwana jwa Anatani, na Anatani bhakibha mwana jwa Adaudi, 32 na Adaudi bhabhakibha mwana jwa Ayese, na Ayese bhakibha mwana jwa Aobedi, na Aobedi bhakibha mwana jwa Aboazi, na Aboazi bhakibha mwana jwa Asolomoni, na Asolomoni bhakibha mwana jwa Anashoni, 33 na Anashoni bhakibha mwana jwa Aminadabu, na Aminadabu bhakibha mwana jwa Aadimini, na Aadimini bhakibha mwana jwa Aalini, na Aalini bhakibha mwana jwa Ahesiloni, na Ahesiloni bhakibha mwana jwa Apelesi, na Apelesi bhakibha mwana jwa Ayuda, 34 na Ayuda bhabhakibha mwana jwa Ayakobo, na Ayakobo bhakibha mwana jwa Aisaka, na Aisaka bhakibha mwana jwa Abulaamu, na Abulaamu bhakibha mwana jwa Atela, na Atela bhakibha mwana jwa Anaoli, 35 na Anaoli bhakibha mwana jwa Achelugi, na Aselugi bhakibha mwana jwa Aleu, na Aleu bhakibha mwana jwa Apelegi, na Apelegi bhakibha mwana jwa Aebeli, na Aebeli bhakibha mwana jwa Ashela, 36 na Achela bhakibha mwana jwa Akainamu, na Akainamu bhakibha mwana jwa Alufakisadi, na Alufakisadi bhakibha mwana jwa Ashemu, na Ashemu bhakibha mwana jwa Anoa, na Anoa bhakibha mwana jwa Alameki, 37 na Alameki bhakibha mwana jwa Ametusela, na Ametusela bhakibha mwana jwa Ahenoki, na Ahenoki bhakibha mwana jwa Ayaledi, na Ayaledi bhakibha mwana jwa Amahalaleli, na Amahalaleli bhakibha mwana jwa Akainamu, 38 na Akainamu bhakibha mwana jwa Aenoshi, na Aenoshi bhakibha mwana jwa Aseti, na Aseti bhakibha mwana jwa Aadamu, bhakibha bha Annoongo.