1 Lichobha limo Ayesu, pabhatendita kujigana bhandu mu Nyuumba ja Annoongo na kwaatangachia Ngani Jammbone, akaakolo bha makuhani na bhabhajigana malagilo ga Amusa pamo na akanahota bhakahika kwaachabhe, 2 bhakaakonya, "Ntulobholele, ntenda hikubho heye kwa mamulaka ga aganiki? Nga aganiki bhabhampekie mamulaka gangani?" 3 Ayesu bhakaajangulanga, "Nanenga mbakunkonyanga. 4 Bholi, mamulaka ga kubaticha kwa Ayohana gakabhoka kunani kulihunde kwa Annoongo au kwa bhandu?" 5 Nambo bhakakongolelanga akachinabhene, "Handa tulobhwile, gubhokite kunani kulihunde kwa Annoongo, bhapakutukonya, kwa niki mwangahobhalelanga? 6 Nambo handa tulobhwile, gubhokite kwa bhandu, bhandu bhoha bhapakutupota maganga, ligongo bhatendakuhobhalela yakubhee Ayohana bhakibha akaalondohi." 7 Bahi bhakajangulanga, "Ngaimanya mamulaka genago gakabhoka koji."

8 Ayesu bhakalobholelanga, "Na nenga ngaannobholelanga ndenda kutenda kwa mamulaka aganiki."

9 Ayesu bhakaendelea kwakongolela bhandu kulandanikia hoko, "Mundu jumo bhakapanda nng'onda gwa mizabibu, bhakalijaika kwa akaalemi, na bhena bhakajaula kutama chilambo cha kutali, bhakatama konokwe kwa machobha gajingi. 10 Machobha ga mahuno pagakahika, amundu bhenibhala bhakaatuma antumichi bhabhe kwa akaalemi bhenibhala nng'oonda ili bhakapetule mabibo kachoko ga nng'onda kwa mzabibu. Nambo bhandu bhenibhala bhabhakajaika bhakampota na bhakammujia mabhoko jika. 11 Bhenibhala Hangwana bhakaatuma ntumichi jongi, nambo bhenabho kabhele bhakampota yela yela na kwaatendela hikubho ya honi na kwaabhujia mabhoko jika. 12 Bhakaatuma kabhele antumichi bha tatu, na bhena bhakanhulaa na kwaajea panja ja ng'onda. 13 Bahi jonojwe nkola nng'onda gwa mizabibu akalobhola, ‘Ndende niki? Mbankuntuma mwana jwangu junaampala, ngomboleka habhabha bhapakwatopea.’ 14 Nambo bhenibhala akaalemi bhabhakajahika nng'oonda pabhakaabhona bhakakongolelana akaachinabhena, ‘Hojo nga nnekelwa, bahi twaakome ili hilebhe yabhe hibhee yitu.’ 15 Henela bhakampianga panja ja nng'onda gwa mizabibu, bhakankoma." Bahi Ayesu bhakakonya, "Bholi, bhena akola nng'onda gwa mizabibu bhapakwatendelanga niki bhenibhala bhabhakajaika ng'onda? 16 Bhapakuhika kuwakoma bhenabho akaalemi bhabhakajahika na kwaapekeha akaalemi bhangi gono nng'onda gwa mzabibu." Bhandu pabhakajoha genago bhakalobhola, "Annoongo bhalipitie kutali ngani hejo jikoto kubhokela!"

17 Nambo Ayesu bhakaalolanga, bhakaalobholelanga muno "Majaandiko haga ga Annoongo gabhile na maana niki? Gagalobhola,

Liganga bhalikaniite na akaachengi,

nangocheni litekubhehe liganga likolongwa lya nnyenje lya kuchengela nyuumba!"

18 "Amundu bhohabhala bhabhagwee nnani ja liganga helyo bhapakuhengeleka hipande hipande na bhohabhala lilipakwaagwela lipakwaayaga kubhehe ukobha."

19 Bhabhajigana malagilo ga Amusa na akaakung'i bhakolongwa bhakaimanya kubhee kulandanikia konokwe kukibha kwaachabhenji, bhakalolea ndela ja kwaakamula palapala ila bhakaajopanga bhandu. 20 Bahi, bhakaloleanga upenyo gwammbone gwa kwaakamula. Bhakaahonga bhandu teno bhabhachitembanga kubhehe bhakuaminika, bhakaatumanga bhaakamule Ayesu kwa makonyekelo, na henela bhakombolange kwaabheka mu machili na kwaapeleka kwa akakolo bha chilikali ja ku Loma. 21 Bhenabho bhakulolekea bhakaakonya Ayesu, "Bhannyigana tuimanyite kubhee nnobhola na kujigana gabhile kweli, tutenda kuhimanya kubhehe mwenga mwanga ngapendelea, mwenga mwajigana ukweli nnani ja ndela ja Annoongo. 22 Bholi, malagilo ga Amusa gatendakutelekelea twenga kulepa kodi kwa akolo bha ku Loma? 23 Nambo Ayesu bhakahimanya kujanjaluka gwabhenji, bhakaalobholelanga, 24 Nnangiange mbiha. Bholi, pamio na majandiko gagabhile nnani jabhe nga ga aganiki?" 25 Na bhenaangota bhakajangula, "Nga ja akolo akolongwa bha ku Loma." Ngapena Ayesu bhakaajangula, "Bahi mwaapekee akolo bha Loma chichibhile cha akolo bha ku Loma, na chiibhile cha Annoongo mwapekee Annoongo." 26 Bhakalepela kwaakamula kwa lilobhe lyoha lyela penipala nnongi ja bhandu henela bhakatamanga jihii bhakikangachanga chibhakajangula.

27 Ngapena Masadukayo teno yakubhehe bhalobholaga kwaakwa kuyoka, bhakaajendela Ayesu na kwaakonya, 28 "Bhannyigana, Amusa bhakatujandikila yakubhehe handa anung'una jumo bhawile na kwaaleka hanu bhabhe pangali yaana bahi ipaalikwa anung'una bhaabhujile malekwe ila bhakoombole kwaabhelekea bhaana bhenabho anung'una bhabhe. 29 Bahi, pakibha na akaalongo saba, bhakujemeka bhakalombela haikege bhakawee pangali kubheleka mwana 30 Anung'una bha bhabhele na bhenabho bhakawee pangali kubheleka mwana. 31 Na ikabhee henela kwa anung'una bha tatu bhakalombela nhwelwa Ikabhehe yelayela kwa anung'una bhoha saba bhakalombela bhenabho ahikege na bhoha bhakawee pangali kubheleka mwana 32 Kwa kujomolekea na bhenibhala haikege bhakawee 33 Bholi, lichobha lya bhabhawilinge kuyoka bhenibhala haikege bhapakubhee hanu bha aganiki? Ligongo akaanung'una bhoa saba bhakannombela bhena haikege." 34 Ayesu bhakaajangulanga, "Bhandu bha chilambo cha nangocheni bhatenda kulombela na kulombwa, 35 Nambo bhandu yakubhee Annoongo bhapakulola bhapalikwa kuyoka na kutama mu chilambo chichiika bhenabho ngalombela na wala kulombwa kabhele. 36 Bhenabho ngajomoka kabhele ligongo bhapakubhanganga handa akaatumichi bha kunani kulihunde bha Hangwana na bhenaangota bhapakubhanganga bhana bha Annoongo, ligongo Annoongo bhatekwajalianga kutama kabhele. 37 Hata Amusa bhakaalangia kubhee bhabhawilinge bhapakuyoka. Mu majaandiko gabhe gagajaandikwe nnani ja chitekete chichijakita mooto, pabhakalobhola Hangwana nga Annoongo bha Aibulahimu nga Annoongo bha Aisaka na nga Annoongo bha Ayakobo. 38 Bahi, bhenabho ngabha Annoongo bhabhawilinge kwa kubhee bhoha bhabhatamanga kwaachabhe nga bhabhabhilinge bhamomi."

39 Bhangi bha bhenibhala bhabhajiga Malagilo ga Amusa bhakajangulanga, "Bhannyigana nga ntekujangula maha." 40 Pabhakajomola genago bhakwa amundu bhangi bhangalenganga kwaakonya kabhele nkonyekelo gongi.

41 Ayesu bhakaakonyanga, "Bhandu bhalongela bholi kubhee Akilisto bhabhagulikwe na Annoongo nga amwana bha Adaudi? 42 Ligongo Adaudi bhene mu chitabu cha Zabuli bhalobhola,

Hangwana bhakaalobholela, Hangwana bhangu,

Ntame upande gwangu gwa ukolo na mamulaka

43 Mpaka akaapwati pabhapakubhee chitengu cha kulebhata makongono ginu."

44 Bahi handa Adaudi bhakaakema, "Hangwana, ikomboleka bholi Akilisito kubhee mwana bha Adaudi?"

45 Bhandu bhoa pabhatendita kwaajonikia, Ayesu bhakaalobholelanga bhanapunji bhabhe, 46 "Mmangange miho na bhabhajigana malagilo ga Amusa bhabhapalanga kujendajenda kongo bhabhibhawalitinge ngobho hitandamao. Na kupala kuchalimiwa na bhandu pamakonganilo ga bhandu na kutama pa hitengu ya kutopeka mu lichobha likolongwa na kutama mu hitengu yakutopea mu Nyuumba ja konganilana Bhayahudi. 47 Bhabhaapokonyola nyuumba hakaikege bhabhawelilwe na akanalome bhabhenji na kuchali chala jitandamao ili bhabhonekane kwa bhandu. Ligongo lyenelyo bhapakuhukumulwa pakolongwa muno kupunda bhandu bhangi!"