1 Machobha gala Aguchitino akolo bha ku Loma, bhakalagia bhandu bhoha bha Kuloma bhabhalanganikwe. 2 Kubhalanganwa konokwe kukibha kwa mala ja kwanja, wakati Akulenio pabhakibha akolo mu chilambo cha Kusilia. 3 Bahi, bhandu bhoha bhakajaulanga kubhalanganikwanga kila mundu na chilambo chakwe. 4 Achupu kabhele bhakabhoka chilambo cha Kunazaleti, chichibhi mu chilambo cha Kugalilaya na kujaula mu chilambo cha kubetelehemu chichibhi kuyuda. Achupu bhakajaula konokwe ligongo bhakabhokela mu chilagwa cha Adaudi. 5 Bhakajaulanga konokwe kubhalanganikwa pamo na hanu bhabhe Amaliamu bhakibha bhajukwite chitumbo. 6 Pabhakibhanga konokwe Kubetelehemu, machobha gabhe ga kuchijogola Amalia likaika, 7 bhakachijogola mwana jwabhe mwanalome jwa litibho, bhakanhweka maanjala, bhakang'oneka mu lipelekete lya kubhacha lya kuliha hinyama ligongo bhangapatanga napachi mu nnyumba ja hakaageni.

8 Mahali penapo pakibha na bhakulianga bhabhakibhanga bhakitamanga kubhandikila na bhatenda kulendelanga hinyama yabhenji kilo. 9 Akaatumichi bha kunani kulihunde bha Hangwana gubhabhokilaje chikang'ang'anua, na nhana gwa kung'anyima gwa Annoongo gukaamulikilanga kohakoha, bhenaangota bhakajogopanga muno. 10 Nambo antumichi bha Hangwana gubhakalobhola, "Nkotokujogopa! ndekunnetelanga ngani jammbone ja jipakubhehe jakuhangalala kwa bhandu bhoha bha Kuisilaeli. 11 Kwa maana, leleni mu chilambo cha Adaudi, atekubhelekwa mwokochi ligongo linunji, nga Akilichito Hangwana. 12 Chenjeni chipakubhehe nga nnolelo kwaachinunji, Mpakunkolela mwana chilemba bhanwekite maanjala, bhanng'onike palipelekete lya kubhacha lya kuliha hinyama." 13 Na popopo likabhonekana lilubhalo likolongwa lya akaatumichi bha kunani kulihunde bhabhi bhabhilinge na bhenibhala antumichi bhabhikwatukucha Annoongo bhakalobhola, 14 "Bhatukuchwe Annoongo kunani kulihunde, na pambani pachilambo pabhehe na amani kwa bhandu bhoha bhabhapalite!" 15 Bheni bhala bhatumichi bha kunani kulihunde bha Hangwana bhabhapaleka na kujaula kunani kulihunde, akaachugaji bhakalobholelana, "Tujaulange mu chilambo cha Kubetelehemu yakubhehe Hangwana bhatulobholile." 16 Bahi, bhakajaulanga chindema, bhakaakolela Amalia na Achupu na jonijola mwana chilemba bhang'onikinge pakuliya hinyama. 17 Pabhakabhona mwana hojwe bhakalobholelanga bhandu bhangi ngani hibhakalobholelwanga na bhatumichi bha kunani kulihunde nnani ja jono mwana. 18 Bhandu bhoha bhabhakajohanga ngani jibhakalobholelwanga na bhachungaji bhakakangachanga muno. 19 Nambo Amalia bhakahibheka ngani muntima gwabhe na kuganikia. 20 Bhenibhala akaachungaji bhakabhujanga palulemba, kongo bhabhi kwaatopea Annoongo na kwalumbalila kwa gabhakalobholelwanga na kugabhona.

21 Mu lichobha lya nane, mwana bhakanhina na bhakampekea lihina Ayesu, lihina libhakapekewa na bhatumichi bha kunani kulihunde bhahi tangu Amalia kupata chitumbo.

22 Machobha ga kuchiking'inda Amalia pagakajomoka handa chiipaalikwa na chelia, hakabhelei habho bhakantolanga mwana, kujaula najo ku Yelusalemu ili bhammeke nnoongi ja Hangwana. 23 Handa jiijandikwe mu chelia ja Hangwana, "Kila habhelei bha kujemeka mwanalome bhapakubhokekwa ligongo lya lihengo lya Hangwana." 24 Kabhele bhakajaulanga ili bhabhoange mbeeko, njebha hibhele au mabhunda gabhele ga nguunda, handa chiipalikwa mu chelia ja Hangwana. 25 Muda hogwe konokwe mu Yelusalemu kukibha na mundu jumo, lihina lyabhe Asimeoni. Amundu bhenabho bhatendita kutenda hikubho yammbone nnongi ja Annoongo. Amundu bhenabho bhatendita kulendela ukombohi gwa bhandu bha Kuisilaeli. Na bhenabho bhakibha na Mboomo ja Annoongo. 26 Mboomo ja Annoongo bhakabhehe bhatekwaakikichia ngawee tangu bhangammona Akilichito bhabhaagulikwe na Hangwana. 27 Bahi Asimoni bhakahika pa Nyuumba ja Annoongo bhabhi kwaatandaa na Mboomo ja Annoongo na akaabheli bha Ayesu bhakannetanga mwana jwabhenji Ayesu pa Nyuumba ja Annoongo handa chiipalikwa na chelia, 28 Asimoni bhakantola mwana Ayesu mmabhoko gabhe kongo bhabhikwalumbalila Annoongo, bhakalobhola,

29 "Hangwana nangocheni, ntendite handa chinkalobhola,

mwaleke antumichi bhinu bhagoloke maha.

30 Kwa miho gangu ndekugubhona ukombohi ginu,

31 yakubhe ntekuyalicha gabhonekane kwa bhandu bha hilambo yoha,

32 Gongoni nga nhana gugupakwamulika bhandu bhabhangaamanya Annoongo,

na ukolo kwa bhandu bha Kuisilaeli."

33 Atati bhabhe Ayesu na hanyoongo bhabhe Ayesu bhakibha bhatenda kangachaanga genigala gagakalobholekwa nnani ja mwana jwabhenji. 34 Bahi Asimeoni bhakaapetelanga machi, bhakaalobholela Amalia hanyoongo bhabhe Ayesu, "Nnyoonikie mwana hojojo bhabheelikwe kwa ligongo kugwee na kuokolewa kwa bhandu bhajingi bha Isilaeli. Nabhena apakubhehe chilolelo kubhoka kwa Annoongo hiipakanikwa na bhandu bhajingi, 35 na ili maganikilo ga bhandu bhajingi gabhonekane pangali kuchiiya. Namwenga, mwabhene, mpakubhehe na kuhechuka kukolongwa." 36 Pakibha na haikege bhamo na bhena bhakibha halondoi bha Annoongo, lihina lyabhe Aana amwali bha Afanueli, bha chilongelo cha Aasheli. Mu umwali gwabhe bhakalombwa na kutama yaaka saba tu na hangwana bhabhe. 37 Nambo bhakaigalila nhwelwa mpaka pabhakahikila yaaka makomi nane na ncheche. Muuda gonogwe bhakibha ngabhoka pa Nyuumba ja Annoongo bhakatama pangali kulyee nga bhakaajopa Annoongo kilo na muhi. 38 Popopo Aana bhakachipia nnongi ja Achupu na Amalia bhakaachukulu Annoongo, nakujeenela ngani ja mwana jonojwe kwa bhandu bhoha bhabhatendita kulendelanga kwaakomboanga na kulekelelwa kwa bhandu bha Kuyelusalemu.

39 Akaabhelei bha Ayesu pabhaakajomolanga kutenda goha gagaapaalikwa na chelia ja Hangwana, bhakabhujanga kwachabheenji mu chilambo cha Kunazaleti mu chilambo cha Kugalilaya, 40 Amwana Ayesu bhakakola, bhakapunda kubhehe na machili, bhakatweeleelwa malango, na wema gwa Annoongo gukibha pamo nabho.

41 Akaabhelei bha Ayesu bhakibhanga bhayobhalilinge kujaulanga Kuyesalemu kila chaaka wakati gwa lichobha likolongwa lya Pasaka. 42 Ayesu pabhakibha na yaaka komi na hibhele, bhakajaulanga pamo na nabho mu lichobha likolongwa handa chibhayobhalilike. 43 Achupu na Amalia pabhakajomolanga kuhangalala, bhakajemekanga ulendo gwa kubhujaanga kwachabheenji nambo Ayesu bhakaigalila Kuyeluchalemu pangali kuimanya akaabhelei bhabhenji. 44 Bhakaganikianga kubhehe bhakibha pamo na lilubhalo lya bhandu bhabhakibhanga mu hulendo, bhakajendanga muhi goha bahi bhakajemekanga kunnolehanga mwakaalongo bhabhe na mmagaanja. 45 Pabhakalepelanga kwabhona, bhakabhujanga ku Yelusalemu kwaalolea.

46 Lichobha lya tatu, bhakaakolela bhatamite pakati ja bhaalimu bhachelia pa Nyuumba ja Annoongo bhakibha atendakwaajonikia na kwaakonyanga machwali. 47 Bhoa bhabhakajoanga malobhe gakwe bhakakangachanga luunda lwabhe na namuna chibhatendita kwaajangulanga. 48 Akaabheli bhakwe pabhaakammona bhakakangachanga. Amaliamu anyongo bhabhe, bhakaakonya Ayesu, "Gwe mwanangu nga niki chintutendile henela? Nenga na atati bhinu tutendita kunnolea kongoni tubhile na bhooga." 49 Ayesu bhakaakonyanga, "Kwa niki ntenda konolea? Bholi mwangaimanya kubhehe mbaalikwa kubhehe pa Nyuumba ja Atati bhangu?" 50 Nambo akaabhelei bhabhe bhangaimanya maana gakwe gabhaalongililinge. 51 Ngapena Ayesu bhakabhuja pamo na bhenaangota mpaka ku Nazaleti, nambo anyongo akagabheka genago mu ntima gwakwe. 52 Nabhena Ayesu bhakapunda kukola mu malango na kutandamala, na kupunda kupaalikwa na Annoongo na bhandu.