1 Lichobha limo bhabhatochanga kodi na akakola mabhou bhajingi bhakajaulanga kwajohanikia Ayesu 2 Mafalisayo na bhabhajigananga Malagilo ga Amusa bhakajemekanga kwakokolekela, bhabhi kulobholanga, "Mwalolange habha amundu! Bhatenda kwapokelanga bhabhilinge na mabhou, na kulyee nabho." 3 Ayesu bhakajangula kwa kulandanikia.

4 "Handa jumo jwinunji bhabhi na ngondolo makomi komi na handa bhahimanyite jumo jwabhe atekuhobha, bhapakutenda niki? Bholi, ngaaleka bheni bhala makomi tisa na tisa kulikonja na kujaula kunnolea bhamo bhabhahobhite mpaka bhampate? 5 Nabhena handa bhampatite, kwa kuhangalala bhapakumpapa pa mabhega gabhe 6 na handa bhabhujite kwachabhe. Ngapena bhapakwakema maganja gabhe na akaandami na kwalobholelanga, ‘Nhangalalange pamo nanenga, ndekumpata ngondolo jwangu jumo jwaakahobha.’ 7 Ndenda kunkongolelanga, hela hela kupakubhee na kuhangalala muno kunani Kulihunde ligongo lya akola mabhou bhamo bhabhalekite kulemwa, kupunda bhenibhala makomi tisa na tisa bhabhakondekwa nnongi ja Annoongo yakubhee bhanga na lilemwa lyakupala kuleka."

8 Ayesu bhakaendelea kulongela, "Handa haikege bhabhile hipande komi ya madini ga mbiha na bhakaobhea chipande chimo, bholi, ngajakiha lumuli na kupyagila mu nyuumba na kujilolea muno mpaka bhajipate?" 9 "Handa bhajipatite, bhapakwaakema akaaganja bhabhe na akaandami ajabhe na kwaalobholela, ‘Nhangalalange pamo na nenga, nijipatite chipande changu chimo cha madinu ga mbiha chichikahobha nichipatite.’ 10 Kabhele ndendakunnobholelanga, henela nga chibhapakuhachukanga bhatumichi bha kunani kulihunde bha Hangwana ligongo lya jwaalemwite jumo na kuleka mabhou."

11 Ayesu bhakapunda kulongela, "Pakibha na mundu jumo bhakibha na akakombo bhabhele akanalome. 12 Jonijola nchokochoko bhakaalobholela atati bhabhe, ‘Atati, mmbekehe hilebhe yangu.’ Henela bhakaametulilanga na kwaapekeanga bhaana bhabhe bhoha bhabhele. 13 Penapo, jonijola nchoko choko bhakakumba hilebhe yakwe yoha yakibha nayo, bhakajaula chilambo cha kutali na konokwe bhakajita jita hilebhe yabhe kwa uloloi. 14 Pabhakajomola kujita jita hilebhe yoha hiyakibha nayo, kukibha na njala jalikuluta ku chilambo chela choha, na bhenabho bhakajemeka kulaga. 15 Ngapena nkakombo jola bhakajaula kujopa lihengo kwa akola chilambo bhamo bha cheni chela chilambo, na bhenibhala akola chilambo bhakaapekea lihengo lya kuliha magolobhe. 16 Bhenibhala nkakombo bhakalokolila kulyee chakulya chibhalilinge magolobhe nambo jwakwa mundu jwakaapekeha chakulya. 17 Nambo luunda gwabhe pagukajemeka kwaabhujila, bhakaganikia mu ntima gwabhe bhakalobhola, ‘Bhatumichi bhalengwa bhabhatendanga lihengo kwa atati bhangu yakubhee bhatenda kulyanganga chakulya chijingi na kuhiigaa, na nenga nibhii pambani ndenda Kujomoka na njala! 18 Mbakubhoka na kubhuja kwa Atati bhangu na kwalobholela, atati, ndekulemwa kwinu atati na nnongi ja Annoongo kunani Kulihunde. 19 Mbalikwa hopo kabhele kungema mwana jwinu nndende jumo jwa akaabhanda bhinu.’" 20 Bahi, bhakabhoka kujaula kwa atati bhabhe.

"Nambo pabhakibha tangu kutali, atati bhakaalola, ntima gwabhe gukatwelela kiha. Bhakaabhutukila amwana bhabhe, na kwanyambatila na kwaachalimia kwa kuhangalala." 21 Jonijola nkakombo bhakaalobholela Atati bhabhe, "Ndekulemwa nnoongi jinu na nnoongi ja Annoongo kunani kulihunde. Mbalikwahopo kabhele kukemwaa mwana jwinu." 22 Nambo atati bhabhe bhakalobholela bhatumichi, "Nnetange chindema!" "Nnetange ngobho jijibhile jammbone muno, mwaweke pete mulukonji lwabhe na champali ya bei ngolongwa mmakongono gabhe. 23 Ngapena nkaapetule mwana jwa ng'oombe jwakunakana twaachinje ili tutendange lichobha likolongwa na tulyee. 24 Kwa maana jonjoni mwanangu bhakajomoka na nangocheni bhamomi, bhakibha bhahobhite nangocheni bhabhonikine! Ngapena bhakajemekanga kuhangalala."

25 "Muda gonogwe, jonijola mwana nkolongwa bhakibha kumigonda. Pabhakabhandikila kaja, bhakajoa lilobhe lya mijembo na bhandu bhatenda kuhinanga. 26 Bhakaakema antumichi bhamo bhakaakonya, ‘Chibhi niki?’ 27 Bhenabho antumichi bhakaalobholela, ‘Anung'una jwinu bhatekuhika, Atati bhinu bhatekwachinjila ng'ombe nchokochoko jwakunakana ligongo mwana jwabhe bhatekubhuja bhabhi bhamomi.’ 28 Jonijola mwana nkolongwa bhakatumbala na bhakakana hata kujingila nkati ja nyuumba. Bahi atati bhabhe bhakabhoka panja na kwapembelea. 29 Nambo bhenabho akakombo bhakaajangula atati bhabhe, ‘Atati nnyohanikie! yaaka yoha heye ndekuntumikila kwa yaaka hijingi na hata lichobha limo nangaleka kutenda chikanobholela, nambo mwanga mbekeha hata mwana jwa mbuhi ili hangalale na akaaganja bhangu! 30 Nambo pabhahikite kaaja habha mwana bhinu yakubhehe bhatekujita jita hilebhe yoha kwa akaikege bhakupala muno ngongola mwenga ntekwachinjila mwana jwa ng'oombe jwakunakana!’ 31 Atati bhabhe bhakaajangula, ‘Mwana jwangu, ntekubhee nanenga machobha goha na yoha himi nayo nga hinu. 32 Nambo chiipalikwa kutendeka nga kuhachuka na kuhangalala ligongo hojojo anung'una bhinu bhakajomoka nangocheni bhabhi bhamomi, bhakibha bhahobhite leleni bhabhonikine.’"