1 Ngapena nkutuli goha gwa bhandu gukajimuka na kwapeleka Ayesu kwa Apilato, 2 Na bhenabho bhakajemekanga kwachitaki bhabhi kulobhola, "Tutekwalola habha amundu bhabhi kwalobholelanga bhandu bhitu, bhabhi kwaibhilanga bhandu bhakotokulepanga kodi kwa akolo bha ku Loma na kuchikema bhena nga Akilisito, akolo." 3 Bahi, Apilato bhakaakonya Ayesu, "Mwenga nga akolo bha Bhayahudi?" Ayesu akajangula, "Mwenga nga bhannobhola." 4 Ngapena Apilato bhakaalobholelanga akakolo bha akaakung'i na nkutuli goha gwa bhandu, "Nangakubhona kulemwa koha kola kwa habha amundu" 5 Nambo bhenaangota bhakachimilanga kulongela, "Bhatenda kwakolekea bhandu kwa majigano gabhe kubhee bhakupendekula malagilo mu chilambo choa cha ku Yudea, bhakajemekanga ku Galilaya. Nangocheni bhabhi pambani Payelusalemu!"

6 Apilato pabhakajoa genago, bhakakonya, "Bholi, hojo mudu nga bha ku Galilaya?"

7 Pabhakahimanya yakubhehe Ayesu bhakibha pahi ja mamulaka ga Ahelode, bhakaapeleka kwa Ahelode, yakubhe kwa gono muda bhakibha ku Yelusalemu. 8 Ahelode bhakahachuka muno chibhakaabhona Ayesu. kwa kubhee kwa muuda ntandamao bhakibha bhatekujoha ngani hijingi nnani ja bhenabho, kabhele bhakapala kwaalola bhabhi kutenda yakangachika hijingi. 9 Bahi, Ahelode bhakaakonya makonyekelo gajingi, nambo Ayesu bhangaajangula lilobhe lyoha lyela. 10 Gono muuda akolo bha akaakung'i na bhabhajigana Malagilo ga Amusa bhakibhanga bhabhi kubhoa machitaka gabhenji kwa machili muno.

11 Bahi, Ahelode pamo na manyemba gabhenji bhakabheluha Ayesu na kwatendela mbenje, ngapena bhakaweka ngobho yakuhalala muno, bhakaabhujia kwa Apilato. 12 Lichobha helyo Ahelode na Apilato bhakibha maganja ligongo lya chikubho hecho kwa kubhee pena kandai bhakibhanga akaapwati.

13 Bahi, Apilato bhakaakema pamo, akaakung'i akolo, na akaakolo bha bhandu, 14 na bhakaalobholelanga, "Munnetitinge mundu hojo pambani na kwaachitaki kubhee bhatenda kwaakolekea. Nangocheni nnyohanikiange! Panakalolekea muno nnongi jinu ndekolela bhangalemwa choa chela. 15 Nga nenga jika, ila hata Ahelode bhangachibhona chalemwite chohachela, nga kwa maana bhaabhujie kwaachitu. Nga kweli yakubhehe amundu habha bhangalemwa choachela chichipakwaatenda komekwa. 16 Kwa henela mbakulumikiha bhapotwe mihimbati, na mbakwaleka." 17 Jikibha nga chiiyobhalilike Kwakubhee jikabhee nga hipalikwa kwajogolela atabhwa jumo muuda gwa lichobha likolongwa. 18 Nambo bhandu bhoha kwa lilobhe limo bhakapotanga nyenye, habha amundu bhakomekwe! "Tupala ntujogolele Abalaba!" 19 Bhenabaho Abalaba bhakibha bhatabhwite muchitabho ligongo lya bhandu bhakaatendea bhandu kutenda gangali kubha, na kwaatenda bhandu bhakomekwe. 20 Apilato bhakapala kwalekela Ayesu, henela bhakalobhola nabho kabhele. 21 Nambo bheni bhala bhakapotaanga nyenye, "Mwaabhambe panchalaba, mwaabhambe panchalaba!" 22 Apilato bhakaalobholela patatu, "Bhalemwite niki habha amundu? monahopo chaalemwite lilyapaliha kunkoma, kwa henela mbakwapota luyakato, ngapena nalekelele."

23 Nambo bhandu bhakapunda kupota nyenye kwa machili bhabhi kulonganga kubhehe Ayesu bhabhambe panchalaba. Henela nyenye yabhenji hikajohanika. 24 Henea, Apilato bhakakoonda kwaabhoa Ayesu handa chibhakapalanga. 25 Bhakaajegolea bhenibhaka bhabhakatabhwa mu chitabho ligongo lya undendemundu, na hikubho yakoma bhandu, bhenibhala bhabhampalanga akaabhoa Ayesu bhaatendele chibhapalanga.

26 Manyemba pabhakibhanga bhatenda kwapeleka Ayesu, bhakakongana na mundu jumo kubhoka ku chilambo cha ku Kilene bhabhakibha bhabhokita kumigoda. Bhakaatweka nchalaba bhakaakulumikia bhagutole kuyeto kwa Ayesu. 27 Nkutuli nkolongwa gwa bhandu gukaakagula Ayesu, nkati jabhenji bhakibha na akaikege bhakibhanga bhatenda kujemba kwa kuhechukanga na kwaagutila. 28 Ayesu bhakaatendebhukila na kwaalobholelanga, "Mwangota akahikege bha Kuyelusalemu! nkotokung'utilanga nenga, nambo nchigutilange mwakachina bhene na kwa ligongo lya bhana bhinu. 29 Kwa maana muda gupakuhika kubhee bhandu bhapakulobholanga, nnolange, ‘Bhatekutendelwa gammbone bhenibhala ahikege ntoonga yakubhee lutumbo lwabhe lwangabheleka na mabhele gabhe bhanganyongea bhana!’" 30 Muuda hogwe, ngapena bhandu bhapakujemeka, kulilobholela litombi, "Ntugwelange!" na litombi, "Ntuwekele!" 31 Kwa maana, handa bhatekundendela henela nenga nangalemwa ipakubhee bholi kwa amundu bhabhalemwite?

32 Bhandu bhangi bhabhele akaabhou, bhakapelekwanga kwa Ayesu ili bhaabhambange pamo na Ayesu. 33 Pabhakaikanga papakemitwa, "Lingambwa lya mutwe," penapo nga pabhakaabhamba Ayesu pamo na bhenabho na bhenabho akaabhou, bhangi upande gwa kunnelo na bhangi upande gwa kunchiji. 34 Ayesu bhakalobhola, "Hatati, mwachamee, kwa kubhehe ngamanyanga chibhatendanga." Ngapena bhakabhabhananga ngobho yabhe kwa kuhagula kwa gudugudu. 35 Bhandu bhakibhanga bhajemitinge penipala bhabhi kulolangana. Na bhena akaakolo bha Bhayahudi bhakaatendela mbenje bhabhi kulobhola, "Bhatekwaaokoa bhangi, nangocheni bhachiokoe bhene, handa bhenabho nga Akilisito, bhabhaagulikwe na Annoongo." 36 Na manyemba bhakaatendelanga kabhele mbeenje, bhakaapekeha chiki, 37 bhenaangota bhakaalobholela "Handa kweli mwenga nga Akolo bha Bhayahudi, nchiokoe mwabhene." 38 Nnani ja nchalaba gwabhe pakibha na chibao chichikajandikwa malobhe haga, "Habha bha akolo bha Bhayahudi." Majandiko haga gakibha bhatekujandikwa kwa chilongelo cha Chiyunani, na Chilatini na Chiebulania. 39 Jumo jwa bhenibhala akaabhou bhabhakabhambwa pamichalaba jitatu pamo na Ayesu, bhakaaponja bhakalobhola, "Mwenga nga kweli Akilichito? Nchiokoe mwa bhene na twenga." 40 Nambo bhenibhala abhou jongi bhakaakelebhua ajabhe bhakalobhola, "Bholi, mwenga ngaajogopa hopo Annoongo, na kwa kubhee twenga tutekubhambwa handa bhenabho? 41 Mwe na nenga tupalikwa kupata hukumu jenjeni, kwa kubhee twapokela malepo kubhokana na hikubho yitu, nambo habha amundu bhangatenda choha chela chibhou." 42 Ngapena bhenibhala abhou bhakalobholela Ayesu, "Mwee Ayesu, ngombokele chimpakujingila mu ukolo gwinu." 43 Ayesu bhakaajangula, "Nannnobholela kweli, lele nupe mpakubhee pamo na nenga kunani kulihunde."

44 Jikibha handa saa sita ja muhi, lihobha likaleka kujaka, na lubhendu lukawekela chilambo choa mpaka saa tisa, 45 kwa kubhee lihobha likaleka kubhoa nhana. Lipanjia ja Nyuumba ja Annoongo nga likapapuka ipande hibhele kubhoka kunani mpaka pahi. 46 Ayesu bhakaguta kwa lilobhe likolongwa, bhakalobhola, "Atati, mumabhoko ginu ndenda kujikamua mboomo jangu." Pabhakajomola kulobhola genago, bhakajomoka. 47 Penapo Alinyemba akolo jwa ku Loma pabhakalola gagabhokile bhakaalumbalila Annoongo bhabhi kulobhola, "Kweli hojo mundu bhakibha mundu bhabhakondekwa nnongi ja Annoongo." 48 Bhandu bhoa bhabhakibha bhatekongananga penapo ligongo lya ngani ja chikubho hecho, pabhakalola gagabhokile, bhakabhujanga kwaachabhenji, bhabhi kuchipotanga pamitima jabhenji kwa kuumalika. 49 Bhandu bhoa bhabhakakongananga penapo bhabhakaamanya Ayesu pamo na bhenibhala akahikege bhabhakibha bhabhakaakagula kubhoka ku Galilaya bhakajema kutali bhabhi kulolekea hikubho heyo.

50 Kukibha na mundu bhamo bhakemitwa Ayusufu, bhenibha bhakibha bhamo bha Chebule ja Bhayahudi, amundu bhanabho bhatenita kondekwa noongi ja Annoongo. 51 Bhenabho bhangakonda na kuhumula kwa Chebule na hikubho hibhaitenditinge, amundu bhenabho bhakibha bhabhokela mu chilambo cha Alimataya, na bhatendita kulendela kuhika kwa Ukolo gwa Annoongo. 52 Ngapena Ayusufu bhakajenda kwa Apilato, bhakaajopa bhampekee mmele gwa Ayesu. 53 Bhenabho bhakagutulua mmele hogwe kubhoka panchalaba, na kuguigilila chaanda ja kuhalala, bhakagubheka mulikabuli lilikibha bhalibhachite pamwala, kubhee likibha tangu lyangachikiwa mundu joha jola. 54 Lyenelo likibha lichobha lya kuchibheka tayali kwa kubhee jikibha kujemeka kwa lichobha lya kupomolela. 55 Bhenibhala akahikege bhabhakibha bhatenda kwaakagula Ayesu kubhoka ku Galilaya, bhakapalola mahali pabhakagugonekaa mmele gwa Ayesu. 56 Bhakabhujanga kaaja, bhakapetula mahuta bhakagabheka tayali mahuta gakunungila na mahuta gakwaapakala Ayesu.

Lichobha lya kupomolela nga bhakapomolelanga handa chiiyobhalilike.