1 Bahi, pabhakajomola kutenda genago, Hangwana bhakaagula bhanapunji bhangi makomi saba na bhabhele, bhakaatumanga bhalongolele bhanapunji bhabhele bhabhele mu kila chijiji na kila mahali pabhakapala kujaula. 2 Bhakaalobholela, "Mahuno nga gajingi, nambo bhabhaunanga nga kachoko, bali mwajopange Hangwna bha mahuno, bhaatume bhabhapangana mahengo mu nng'onda gwabhe. 3 Nangocheni nnyabhulange, muhimanyange yakubhehe ndenda kuntumanga handa ngondolo bhabhajaulanga pakati ja mamehi. 4 Nkotokutolanga nhuko gwa mbiya, wala nkoba, wala hilatu, wala kwaalamukila amundu bhoha hala nndela. 5 Handa mpakujingila mu nyuumba joha jela nnobholange oti, ‘Kuchitimalika kubhehe mu nyuumba heje!’ 6 na handa bhabhile amundu bhabhapala kuchitimalika, bahi kuchitimalika kwinunji kupakubhehe na bhenabho, handa ngabha henela jipakummujianga. 7 Bahi, ntamange mu nyuumba jenajo, kongo mtendanga kulyehe na mmi kung'wenganga chelichela chibhapakumpekeanga, kwa kubhehe bhabhatenda lihengo hipalikwa kupokela malepo. Nkoto kubhoka mu nyuumba jenejo kujaula ku nyuumba jengi. 8 Bahi pampakujingilanga mu chilambo choha chela nnlyengange na kung'wee hibhapakumpekeanga, 9 Mwalamiange akaatamwa bhabhabhilinge konokwe, mwaalobholelange bhandu, ‘Ukolo gwa Annoongo gubhandikile kwaachinu.’ 10 Nambo pampakujingila mu chilambo choha chela, na handa bhanganpokelanga, mmokange, nkung'undange lutukunda mmokange monomwe na mwangaota pampakupeta mu ndela yabhenji nnobholange, 11 ‘Hata lutukunda lwa chilambo chinunji gagatekunnamatilanga mu makongono gitunji tupakugakung'unda. Nambo muhimanyange yakubhehe ukolo gwa Annoongo gubhandikile.’ 12 Ndenda kunnobholelanga kubhebhe, Mu lichobha lyela kuhukumula, bhandu bha chilambo chenecho pabhakubhehe na hibhini muno kupunda hibhini ya bhandu bha ku Sodoma na ku Gomola."

13 "Mpakulaganga mwaangota bhandu bha ku Kolazini! na mpakulaganga mwangota bhanntamanga ku Betisaida! Ligongo hilolelo heyo hiikatendeka kwaachinu konikola mu chilambo cha ku Tilo na ku Sidoni, bhandu bha konokwe bhakawalanga ngobho ya magunia kulangia kokoleka kwabhenji kubhehe bhatenditinge mabhou. 14 Nambo lichobha lya kuhukumula lipakubhehe lya kupepeka mu hilambo ya ku Tilo na ku Sidoni kuchitimalikanga mu hibhini yabhenji kupeta mwangota. 15 Na mwangota bhangu bha Kapelunaumu, bholi! mpakuchikweanga mpaka kunani kulihunde? Ngabha hopo bhapakuntuluhanga mpaka kwa bhabhawilinge." 16 Ayesu bhakaendelea kwaalobholela bhanapunji bhabhe, "Bhabhapakunnyoanikianga mwangota, bhannyonikia na nenga, na bhabhakana kumpokelanga mwangota, bhakana kumbokela na nenga. Na bhoabhala bhabhakana kumbokela nenga, bhakana kwaapokela bhanibhala bhabhandumite."

17 Bhenibhala makomi saba na bhabhele bhakabhujanga bhabhi kuhangalala bhakalobhola, bhakalongolanga, "Hangana hata mahoka gakaabhoka bhandu pebipala patukakaalipilanga kwa lina linu." 18 Ayesu bhakaalobholelanga, "Nkaabhona lichetani namuna chibhatendita kugwee kubhoka kunani kulihunde handa lumuli lwa njahi. 19 Nnole nimpekiinge uwecho gwa kulebhata majoka na likalambwi, na uwecho nnani ja machili goha ga bhenibha apwati, chakwa choachela chichipakunhulaa. 20 Hata henela, nkoto kuhachukanga ligongo lihoka litennyeketela, bali nnyangalange ligongo mahina ginunji gatekujaandikwa kunani kuliunde."

21 Wakati gogo Ayesu bhakibha bhatwelile na Mboomo ja Annoongo bhakahangalala bhakalobhola, "Ndenda kunchukula mwe Atati, Hangwana bha kunani kulihunde na pachilambo, maana ntekwahianga hakola malango na bhabhakweti lunda hikubho heyeye, ntekwaunukulilanga yana hilemba. Eloo, atati, gonogwe nga gukibha upalio gwinu." 22 Ngapena bhakalobhola, "Atati bhangu bhatekukombolea kupangala hilebhe yoha. Jwaakwa jwaamanya mwana ila nga atati, wala jwaamanya atati ila mwana, na bhoha bhala yakubhehe amwana bhapala kwahunukulila." 23 Bahi Ayesu bhakatendebhukia bhanapunji bhabhe na kulongela nabho kwa kuchihiya bhabhi kulobhola, "Ntekutendelwa gammbone na Annoongo amundu yakubhehe bhagalola bhabhagalola! 24 Nannobholelanga, akalondohi bhajingi bha Annoongo bhakapala kugalola chimmona na bhapala kugajoha genigala nambo bhangakombola kugalola."

25 Wakati pagukahika bhakajema bhabhajigana bhamo bha amuli ja Amusa bhakaakonya Ayesu kwa kwaalenga, "Bhakujigana, ndendeniki ili mbate umomi gwa machobha goha?" 26 Ayesu bhakaakonya, "Muhimanya niki pamchoma mu amuli ja Amusa?" 27 Bhenibhala bhabhajigana amuli ja Amusa, bhakalobhola, "Mwapale Hangwana Annoongo bhinu kwa ntima gwinu goha, na kwa machili ginu, na kwa malango ginu goha na kwa umomi gwinu goha. Na mwapale andami ajinu handa chimchipala mwabhene." 28 Ayesu bhakaalobholela, "Ntekujangula maha. Na ntende henela na mwenga mpakutama." 29 Nambo bhenabho bhabhajigana amuli ja Amusa bhakapala kuchilangia kubhehe amundu bha umanyo, bhakaakonya Ayesu, "Bhenabho andami ajangu nga aganiki?" 30 Ayesu bhakaajangula, "Mundu jumo bhakibha bhatenda kutuluka kubhoka Kuyeluchalemu kujenda Kuyeliko. Pabhakibha nndela bhakaabhona amundu bhakupoka hilebhe, bhakaahula ngobho, bhakaapota, bhakajaula na kwaaleka bhabhi kubhandikila na Kujomoka. 31 Kwa kubhehe, akung'i bha Annoongo bhamo bhakibha bhatenda kupeta ndela jela jela, bhakammona, bhatenda kupeta nnyenje. 32 Hela hela bhajangatila akung'i bha Annoongo bhamo na bhena pabhakahika mahali penipala bhakaamona na bhenabho bhakapeta upande gongi, bhakaaleka penapo pandela. 33 Nambo amundu bhamo bha chilambo cha ku Samalia bhabhatendita kujaula ulendo, bhakahika chehemu jela pabhakibha mundu jola bhakakolela kiha. 34 Bhakahika chehemu jela bhakankolela bhakaajelela hilonda yabhe na kwaapakala mahuta na divai, Ngapena bhakaakweha mu liponda lyabhe bhakanneta mpaka ku nyuumba ja akaageni ili kwaalolekeha. 35 Malabhi jakwe kundabhi, bhakapetula hipande hibhele maganga ga ulohi nkolongwa na bhakaapekeha bhenibhala akola nyuumba ja akaageni na kulobhola, ‘Mwalolekee amundu habha na chohachela chichipakupunda mbakunnepa, ili atamwa bhalame.’ "

36 Ngapena Ayesu bhakaakonya, "Pakati ja habha bhandu bhatatu, nga aganiki bhakalangia kubhehe nga ajabhe jonijola jwabhampotite na matimbanyundo?"

37 Bhenibha bhabhajigana amuli ja Amusa bhakajangula, "Bhenibhala bhabhakolile kiha nga andami ajabhe." Ngapena Ayesu bhakaalobholela, "Nnyaule nkatende helahela,"

38 Ayesu pamo na bhanapunji bhakwe pabhakibhanga mu ulendo, bhakahikanga pachijiji chimo chichikibha na mwikege jumo jwaakemitwa Amalita, bhakaapokela panyuumba jabhe.

39 Amalita bhakibha na adada bhabhe bhaakemitwa Amalia, habhobho bhakatama kubhandikila makongono ga Ayesu bhabhi kujohanikia majigano gabhe.

40 Nambo Amalita bhatendita kuchiabhua na hilebhe hijingi, Henela Amalita bhakajaula pabhakibha Ayesu, bhakaalobholela, "Hangwana, ngalola yakuhehe anung'una bhangu ndende lihengo lyangu jika jangu? Mwakongolele bahi, bhanyangatile." 41 Nambo Hangwana bhakalobholela, "Amalita, Amalita, ntenda kuchiabhua na hikubho hijingi, 42 Nambo chilebhe chimo tu chichipalikwa, Amalia bhatekuhagula chenichela chichibhii chammbone muno jwakwa mundu jwapa kumpoka."