1 Lichobha likolongwa lya mikate jangalekelwa chilongo, jikemitwa Pasaka, jikibha jitenda kubhandikila. 2 Akaakung'i Akolo na bhabhajigana bha Malagilo ga Amusa bhakibha bhakilolekea ndela ja kwaakoma Ayesu, na bhenaangota bhatenditanga henela chitikita ligongo bhakaajogopanga bhandu. 3 Bahi, lichetani bhakaajingila Ayuda bhakemitwa Aisikalioti, jumo jwa bhenibhala akandundame komi na bhele. 4 Henela Ayuda bhakajaula, na kulongela na akahakolo bha Akaakung'i na akaajemelei bha Nyuumba ja Annoongo nnani ja chibhapakwaakoma Ayesu. 5 Na bhenaangota bhakaangalala na kulagana nabho kwaapekea mbiha. 6 Ayuda bhakajeketela, na bhakibha bhakilolea namuna ja kwaagaluka wakati bhandu bhakibha bhakwa.

7 Bahi, Lichobha lya mikate jangalekelwa chilongo jikahika. Helyo nga lichobha lya mwanangondolo jwa lichobha likolongwa lya kulyehe bhatenda kuchenjwa. 8 Ayesu bhakaatumanga Apetulo na Ayohana, bhakaalobholelanga, "Nnyaulange nkatutelekele chakulya cha lichobha likolongwa lya Pasaka ili tupate kulyehe."

9 Na bhena angota bhakaakonya Ayesu, "Mpala tunpanganikie koji hecho chakulya cha lichobha likolongwa lya Pasaka?"

10 Ayesu bhakaajangula, "Nnyohanikiange! pampakuhika kunnyini, mpakwalola amundu bhamo bhabhapetwile chibhega cha machi, mwakagulange mpaka mu nyuumba chibhapakujingila, 11 na mwangota mwalobholele akola Nyuumba, bhakujigana bhankonya, chibhi koji chuumba yakubhee nenga na bhanapunji bhangu tupakulyee chakulya mu lichobha likolongwa lya Pasaka? 12 Na bhenabho bhapakunlangia chuumba chikolongwa kulitatali, yakubhee chibhile na kila chilebhe chibhekitwe tayali. Ntupanganikie mwonomwe." 13 Na bhenabho pabhakajaula bhakakolela kila chilebhe handa Ayesu chibhaalobholile. Henela bhakabheka tayali Pasaka.

14 Muda pagukahika, Ayesu bhakatama pamo na akaandundame bhabhe kulyee chakulya. 15 Ngapena bhakaalobholela, "Ndekulokolila muno kulyee Pasaka jenjeni pamo na mwangota kabula ja kulaga kwangu. 16 Nannobholelanga kubhee, ngalyee hopo kabhele lichobha likolongwa lya Pasaka mpaka Annoongo pabhapakubhee bhatekwaakomba bhandu bhabhe bhoa na kutabhala?"

17 Pabhakatola chikombe chichibhii na divai bhakaachukulu Annoongo, bhakalobhola, "Mpokelange heche chikombe cha divai mng'wangange mwabhoa. 18 Kwa kubhee nannobholelanga, ngang'wee hopo kabhele divai ja libibo lya zabibu mpaka ukolo gwa Annoongo chigupakuhika." 19 Ngapena bhakatola nkate, akaachukulu Annoongo, bhakagumetula, bhakaapekea akaandundame bhabhe bhabhi kulobhola, "Gongo nga mmele gwangu gugubhoitwe ligongo linu. Ntendange henela kwa kungombokela nenga." 20 Yela yela pabhakajomolanga kulyee bhakatenda yela yela, bhakatola chikombe cha divai bhakalobhola, "Jenje divai mu chikombe nga lilagalo liyono, kupetela mihai jangu. Mihai jangu jipakujitika ligongo lya mwangota."

21 "Nambo nnolange! Bhenibhala bhabhapakung'aluka bhalyee na nenga pambani pamecha. 22 Kweli mwana jwa Annoongo bhajenda komekwa handa chibhakapanga Annoongo, nambo kulaga kupakubhehe kwaachakwe, bhenibhala bhabhapakwaagaluka."

23 Penapo bhakajemeka konyana nga bheneki nkati jitu pabhapakutenda ngani hejo?

24 Kukabhokela kutaukananga nkati ja bhenabho akandundame nnani ja nga aganiki nkati jabhenji bhapakuganikilwa kubhehe akolo kupeta bhangi. 25 Ayesu bhakaakongolela, "Akaakolo bha pachilambo bhaakulumikia bhandu kwa machili na bhena bhapalanga kemwa, bhandu bhabhajangatilanga bhangi. 26 Nambo jikoto kubhehe henela nkati jinunji, ila bhoa bhala bhabhabhile akolo nkati jinu hipalikwa bhabhee achoko kupeta bhoa, na jwabhile akolo hipalikwa bhabhee antumichi kwa bhoa. 27 Kwa maana, nga aganiki bhabhile akolo? Bhenibhala bhabhatamite pahi kulyee chakulya, au bhenibhala bhabhatumikila? pangali lipamba nga bheni bhala bhabhatama pamecha kulyee chakulya! Nambo nenga ndekubhee nkati jinunji handa antumichi."

28 "Mwangota nga muigalile pamo na nenga mu machobha goha ga kulengelwa kwangu, 29 na, handa Atati bhangu bhabhambile ukolo, hela hela nanenga mbakwapekeanga mwangota ukolo, 30 ii mkombolange kulyee na kung'wee pamecha jangu ja ukolo gwangu na kutama mu hitengu ya ukolo kuhihukumula hilongelo komi na bhele ya chilambo cha ku Isilaeli."

31 Ayesu bhakalobhola, "Asimoni, Asimoni, nnyohanikie, lichetani bhakapala kunpepetanga mwangota handa amundu chibhapeta ngano. 32 Nambo nenga ndekunnyopela mwenga ili kuhobhalela kwinu kukoto pongoka. Namwenga chimpakumujila nenga nbhahimalichange akaanung'una bhinu." 33 Nabhena Apetulo bhakajangula, "Hangwana nenga ndekujeketela kujaula pamo na mwenga kuchitabho na hata Kujomoka," 34 Ayesu bhakaajangula, "Ndenda kunnobholela mwenga Apetulo, tangu likambaliko kujemba kilo cha leleni mpakungana patatu kubhee ngamanya nenga."

35 Ngapena, Ayesu bhakaakonyanga bhanapunji bhabhe, "Penipala panakampalanga nnyaulange pangali nhuko gwa mbiha, pangali nhuko gwa champali nkapongokewa na choha chela?" Bhakajangulanga, "Hopo, twangapongokewa na chilebhe choha chela." 36 Na bhena Ayesu bhakaalobholelanga, "Nambo nangocheni, bhabhabhile na nhuko gwa mbiha gwaupetule, na bhabhi na chikoba hela hela gwaupetule. Na bhoha bhala bhabhangabhee na upanga bhauche likoti na bhaguhemele gumo. 37 Kwa kuhee Majandiko ga Annoongo gajaandikwe, ‘Bhakabhekwa mu lilubhalo limo na akaabhou,’ Nanenga nannobholelanga chikubho heche chipalikwa likweele kwaachangu. Chichijandikwe nnani jangu chipalikwa chikweele. Annoongo galobhwile, Annoongo, ‘Bhakabhekwa pamo na akaabhou,’ gapalikwa gakweele." 38 Akandundame bhabhe bhakalobholanga, "Hangwana, nnyohanikie pambani gabhile mapanga gabhele." na bhenabho bhakajangula, "Bahi itoshite."

39 Ngapena Ayesu bhakabhoka na kujaula kulitombi lya Mizeituni handa chibhakayobholela, na akanapunji bhabhe bhakaakagula. 40 Pabhakahika konokwe, bhakaalobholela bhanapunji bhabhe, "Nnyopange nkotojingilanga mmalengelo." 41 Ngapena bhakabhoka bakajaula kutali kachoko kwa amundu kujeha liganga, bhakatindibhala majugwa, na bhakajopa, 42 bhakalobhola, "Atati, handa ikombolike kulaga kongo kubhee kutali na nenga. Nga handa chimbala nenga ila kwa upaliho gwinu ili gukweele." 43 Penapo, akaatumichi bha Kunani kulihunde bha Annoongo bhakaabhokela na kwalekela ntima. 44 Nabhena bhakibha mu kulaga muno, bhakajopa kwa kuchimila, na lihuke likaapita handa mandondo ga mihai gakagwee pahi. 45 Pabhakajaomola kujopa, bhakaabhujila bhanapunji bhabhe, bhakaakolela bhate kugolokanga kwa kubhehe bhakibha bhatekuhechukanga. 46 Nabhena bhakaakonyanga, "Bholi ntegolokanga? Nnyimukange nnyopange ili nkoto kujingilanga mmalengelo."

47 Ayesu pabhakibha tangu bhatenda kulongela nabho, nkutuli nkolongwa gwa bhandu gukahika, gubhi kulongolelwa na bhenibhala bhabhakemitwa Ayuda, jumo jwa bhenibhala akandundame komi na bhabhele. Ayuda bhakajaula kwaapekeha chalamu kwa kwaanyambatila. 48 Nambo Ayesu bhakalobholela, "Bholi Ayuda! Ntenda kung'aluka nenga Mwana jwa Mundu kwa kunjalimiha kwa kunyambatila?" 49 Bheni bhala bhanapunji bha Ayesu pabhakabhonanga genigala gagabhandikile kubhokela, bhakalobhola, "Hangwana, twaheketange kwa mapanga gitu?" 50 Na jumo jwabhenji bhakampota abhanda bha akung'i akolongwa, bhakaheketa lichikilo lyabhe lya kunnelo. 51 Nambo Ayesu bhakalobhola, "Nkotoke!" Bhakalikwaa chikilo lya jonijola mundu bhakalama. 52 Ngapena Ayesu bhakaabholelanga akaakung'i akolo, akolongwa bha bhabhalolekeha Nyuumba ja Annoongo na akanahota bhabhakahikanga kwaakamula, "Bholi, ntekuhikanga na mapanga na himbonga, handa nenga ndekuhengelana malagilo? 53 Machobha goa nakibha pamo na mwangota mu lugwani lwa Nyuumba ja Annoongo machobha goha mwangangamulanga. Nambo, gongoni nga muuda gwinunji, nga muuda gwa utawala gwa lubhendu."

54 Ngapena bhakakamula Ayesu, bhakaapetula kujaula nabho kunyuumba ja Akung'i akolongwa. Nambo Apetulo bhakaakagula Ayesu kwa kutali. 55 Pabhakakungananga moto pakati ja lugwani na kutamanga pamo, Apetulo nabhenabho bhakatama pamo nabho. 56 Antumichi bhamo bha Annoongo haikege, pabhakaabhona Apetulo bhatekutama kubhandikila na mooto bhakaalolekea muno, bhakalobhola, "Hojo mundu bhakibha pamo na Ayesu!" 57 Nambo Apetulo bhakaakana na kulobhola, "Mwee ahikege! Naamanya hopo habha amundu" 58 Pabhakajomola kulongela, amundu bhangi bhakabhona Apetulo, bhakalobholela, bhakahika mundu jongi bhakaabhona Apetulo bhakalobhola, "Mwenga nga jumo jwabhenji!" Nambo Apetulo bhakaajaangula, "Hangwana mwee, ngabha nenga!" 59 Palikapeta lichaa limo, bhakapunda kulongela, "kweli habha mundu bhakibha pamo na Ayesu, kwa maana na bhenebho bhabhokite ku Galilaya!" 60 Nambo Apetulo bhakajangula, "Hangwana mwee, nenga nichimanya hopo chinnongela!" Na popopo pabhakibha tangu kulongela, likambaliko likajemba.

61 Nabhena Hangwana bhakaatendebhukila na kwalola Apetulo. Nabhena Apetulo bhakakombokela genigala malobhe yakubhehe Hangwana bhakaalobholela, "Leleni tangu likambaliko kujemba mpakungana patatu." 62 Apetulo bhakapita panja, bhakapata hibhini muntima gwabhe na bhakaguta muno.

63 Bhenihala bhandu bhabhakibhanga bhatenda kwalendelela Ayesu bhakajemekanga kwatendelanga mbeenje na kumpota. 64 Bhenaangota bhakaatabha chitambaa kumiho na kwaakonya, "Nnondole! ntulobholele aganiki jwampotite?" 65 Bhakaendelea kulobhola malobhe gajingi ga kwaatukana.

66 Pajikahika kundabhi, chebule cha akanaota bha bhandu pamo na akolo bha akaakung'i na bhabhajigana Malagilo ga Amusa, bhakakongana pamo, na bhakaaleta Ayesu nnongi ja chebule jenijela. 67 Bhakaalobholela, "Handa mwenga nga Akilisito, ntukongolele."

Ayesu bhakajangula, "Hata nankongolilinge ngahobhalela nenga. 68 Na handa nankonyitinge likonyekelo, nganyangula hopo. 69 Nambo kujemeka nangocheni, nenga Mwana jwa Mundu mbakutama upande gwa kutopea gwa Annoongo Akola machili."

70 Penapo bhoha bhakaakonyanga, "Mwenga nga Mwana jwa Annoongo?"

Bhenabho bhakaajangulanga, "Mwangota ntekulobholanga yakubhee nenga nga nenga."

71 Ngapena bhakalobholanga, "Bholi, tupala niki chakupunda? Twenga twachinabhene tujowine bhabhi kulobhola pakang'wa jabhe mwene."