1 Lichobha limo Ayesu bhakibha chehemu jimo bhakijopa. Pabhakajomola kujopa, bhamo bha bhanapunji bhabhe bhakaalobholela, "Hangwana, tutenda kunnyopa ntujigane kujopa handa Ayohana ambatichaji chibhakajigananga bhanapunji bhabhe."

2 Ayesu bhakaalobholelanga, "Pannyopanga, nnobholange henela,

‘Atati bhitu mummile Kunani Kulihunde,

lina linu litopewe kubhehe chwaapi muno,

kuhangalala na amani mu Mboomo jinu jihike.

3 Ntupekee chakulya chitu cha machobha goha.

4 Ntubhokee gatulemwite gitu,

handa tweenga twaabhokeanga bhabhatulemwite,

kabhele nkoto kutupelekanga mu malengelo,’"

5 Ngapena bhakalobholelanga, "Nga aganiki nkati jinu bhabhile na aganja bhabhe bhakaajabhulila nkati ja kilo na kwaalobholela, ‘Tulobhole jumo jwinu jwabhi na aganja, na bhakaajendelela pakati ja kilo na kwaalobholela, aganja nnyahike mikate jitatu na nenga mbakummujikiha. 6 Kwa kubhehe aganja bhangu bhatekuhika kubhoka mu ulendo, nanenga nanga chilebhe chakwaapekeha.’ 7 Ngapena bhenibhala bha nkati bhajaangula na kulobhola, ‘Nambo hata bhapakujimukahopo kwaapekeha nkate, nambo kwa kubhehe namuna chibhakapunda kwaapembelea bhapakujimuka na kunpekeha chohachela chibhachipala. 8 Kweli nannobholelanga, bhapakombola hopo kujimuka na kwaapekeha jenijela mikate jitatu kwa kubhehe aganja bhabhe, nambo kwa kubhehe bhena amundu bhakapunda kwaabhua bhapakujimuka na kwaapekeha chibhachipala.’"

9 Bahi na nenga nannobholelanga, nnyopange mwaangota mpakupatanga, nnolehange na mwangota mpakulolanga, nhodikange na mwangota bhapakunyogolela,. 10 Kwa kubhehe bhoha bhala bhabhajopa bhapata, bhabhalolea bhalola, bhabhaodichanga, nnyango bhajogolelwa. 11 "Bholi nga atati niki nkati jinu, handa mwana jwabhe bhaajopite homba, bhapakwaapekea lijoka badala ja homba? 12 Na handa mwana bhaajopite litaji bhapakwaapekeha likalambwi.? 13 Handa mwangota mmilinge akaabhou, mmanyanga kwaapekea bhana bhinu hilebhe yammbone, kweli Atati bhinu bha Kunani Kulihunde bhapakupunda kuntendelanga, bhapakwaapea Mboomo Ja Annoongo bhoha bhabhaajopanga."

14 Lichobha limo Ayesu pabhakibha bhatenda kulibhenga lihoka lilikaatenda amundu kubhehe ngalongela, bahi lyenilyela lihoka palikaamoka kwa bhena amundu bhabhakibha ngalongela, na lilubhalo lya bhandu likakangachanga. 15 Nambo bhangi bhakalobhoka, "bhangabhoa mahoka gabhou kwa machili ga Abelizebuli akolongwa bha mahoka." 16 Bhandu bhangi, bhakaalenga Ayesu, kwa kupala bhalangie milolelo kubhoka Kunani Kulihunde. 17 Nambo kwa kubhehe bhena Ayesu bhakagamanya maganikilo gabhenji, bhakaalobholelanga, "Bhandu bha ukolo gohagola handa bhapwatilininge achinabhene kwa achibhene, ukolo hogwe gupakugwee na bhandu bha nyuumba johajela handa bhapwatilana na bhandu bha nyuumba jengi, bhandu bha nyuumba hejo bhapakupwilinganika. 18 Handa ukolo gwa lichetani gutenda kutaukana gwenw kwa gwene, ukolo gwabhe gupakujema bholi? nongela henela ligongo ndenda kubhoha mahoka kwa machili ga Abeelizebuli.? 19 Bhanapunji bhinu bhagabhoa mahoka handa chindenda kumoa nenga, ibhehe bhoili nenga ntenda kunobholelanga nagabhoa maahoka kwa machili ga Abeelizebuli, bahi bhanabho nga bhabhapanhukumula mwangota. 20 Nambo handa ndenda kugabhoa mahoka kwa machili ga Annoongo muhimanyange yakubhehe ukolo gwa Annoongo gutekubhandikila."

21 "Mundu jwabhile na machili bhabhabhile ya kupotanila yoha pabhalendelela nyuumba jabhe, hilebhe yabhe yoha ngakomboleka kupelikwa. 22 Nambo, handa bhaikite mundu bhabhii na machili kupeta bhenabho, bhakaapota na kwaachinda bhena bhapakwaapokonyola chilaha yabhe hibhaitegemea na kubhagana hilebhe yabhe.

23 Amundu bhoha bhala jwangabhehe pamo na nenga, bhena bhatekubhehe kuyeto na nenga, na bhoha bhala bhangakumba pamo na nenga bhatenda kumalagana."

24 "Lihoka palyaabhoka amundu, bhatendakutindila kulikonja mahali panga machi bhabhikulola mahali pa kupomolela. Nambo handa bhalepile kupata mahali kuchilobholela bhene mbakubhuja mu nyuumba jangu konikola kummokite. 25 Pabhahika, na kujikolela nyuumba jitekupyagilwa na jibhekitwe maha. 26 Bahi, bhenibhala lihoka likajaula na kwatolanga mahoka gangi chaba gabhou kupunda bhenibhala, goha mahoka bhajingila mu mmele gwa bhena amundu."

27 Ayesu pabhakalobhola genago, jumo jwa akahikege bhabhabhilinge mu lyelilyela lilubhalao bhakajomboa lilobhe na bhakalobhola, "Bhatekutendelwa gammbone ahikege bhammelike na kunnjongeha,"

28 Ayesu bhakajangula, "Nambo bhatekundelwa gammbone bheni bhala bhabhajohanikiha lilobhe lya Annoongo na kulijeketela"

29 Nkutuli gwa bhandu pagukapunda kujonjokeka, Ayesu bhakalobhola, "Chenjeni nga chibhelehi chibhou. Chipala hilolelo ila jenijela ja Ayona. 30 Handa henela Ayona chibhakibha chilolelo kwa bhandu bha ku Ninawi, nga chipakubhehe kwa mwana jwa mundu kwa chibhelehi cha nangocheni. 31 Lichobha lya kuhukumula, alongoli akolo haikege bha ku Sheba bhapakubhokela pamo na bhandu bha chibhelei heche na bhena bhapakulobhola ubhelei gongio gulemwite. Kwa kubhehe bhakabhokela kutali na bhakahika kujohanikia malobhe gammbone ga akolo Aselemani, nambo pambani bhabhii akolongwa kupunda Aselemani. 32 Lichobha lyela lya kuhukumula, bhandu bha ku Ninawi bhapakujema pamo na bhandu hubhelei, bhenaangota bhapakulobholanga ubhelei hogo gulemwite. Kwa kubhehe bhandu bha ku Ninani bhakalekanga mabhou. Kwakubhehe bhakalekanga gabhou Ayona bhakaatangachianga, nambo pambani bhabhile akolongwa kupunda Ayona."

33 "Jwakwa mundu jwaajakia lumuli na kuluwekela pachibhega, bali kulubheke nnani ja chinala, ili bhandu bhabhajingila nkati ja nyuumba bhakombolange kulola. 34 Liho linu nga lumuli lwa mmele gwinu, handa miho ginu nga gamomi, bahi mmele gwinu goha gupakumilikilwa. Nambo handa miho ginu ngalola, bahi mmele gwinu goha gupakubhehe mu lubhendu. 35 Mme miho bahi, nhana gugubhile nkati jinu gukoto kubhehe lubhendu. 36 Bahi, handa mmele gwinu goha handa gubhile na nhana, pangali chiungo chohachela kubhehe mu lubhendu, mmele gonogwe gupakung'anyima maha handa lumuli palummulikila."

37 Ayesu pabhakajomola kulobhola genago, Amfalisayo bhamo bhakaalalika ku nyuumba jabhe kwa chakulya. Nabhena Ayesu bhakajingila na kutama kulyehe. 38 Bhenibhala Mpalisayo bhakakangacha pabhakolola Ayesu bhakalyehe chakulya pangali kuha mabhoko. 39 Nambo Hangwana bhakaalobholela, "Mwangota Mafalisayo, ntenda kujelejeha chikombe na yaani kwa panja, nambo kwa nkati ntwelilinge kulyee muno na ubohu. 40 Mwangota mwapumbapu! Bholi, bhabhatekunhalakia panja ngati nga bhobhobho bhabhatekunhalakia nkati? 41 Nambo yoha hiiminayo mwaapangange akaahocho kwa ntima guhuhu na mwangota mpakondekwa handa chiiyobholilike mu kwaachalila Annoongo."

42 "Nambo mpakulaganga Mafalisayo, ligongo ngapala kwaatendelenga bhangi maha na kwaapala Annoongoi. Bali mwaabhokea Annoongo lilubhalo limo mu malubhalo komi ya hilebhe hichokochoko handa mbooga ya mahamba na hiikolonikia chaakulya chinong'e. Hipaalikwa kwaatendelanga bhangi maha na kwaapala Annoongo pamo na kubhoka lilubhalo limo mu malubhalo komi." 43 "Mpakulaganga mwangota Mafalisayo, ligongo mwangota mpalanga kutamanga mu hitengu ya nnongi ya akaakolongwa mu nyuumba ya konganilana Bhayahudi na kuchalimiwa kwa kuntopeanga palundwanje. 44 Mpakulaganga, lingongo mwangota mmilinge handa makabuli gangabhekelwa alama, na bhandu bhapetanga nnani jabhenji pangali kuimanya."

45 Jumo jwa bhabhajigana malagilo ga Amusa bhakajangula, "Bhannyigana, pannongela hikubho heye, ntendakututukana na twenga kabhele."

46 Ayesu bhajangula, "Mpakulaganga mwangota bhannyigana malagilo ga Amusa, ligongo mwatwekanga bhandu mihigo jakutopa yangapetulikwa, kongo mwangota akaachinabhene ngakwaa hata lukonji kwajangatilanga. 47 Mpakulaganga, kwakubhehe mwaachengelanga makabuli akaalondoi bha Annoongo bhabhawilinge na akaatati bhinunji. 48 Kwakubhehe nnangianga mmilinge pamo na akaabhelehi bhinu chibhatenditinge akanahota bhinu ligongo bhenaangota bhakaakomanga akaalondoi bha Annoongo yakubhehe makabuli gabhenji ntekwaachengelanga, ntendakukweanga malilo gabhenji na ngakagulanga genigala gabhatekutangachanga." 49 Na kwa ligongo lyenelyo, Annoongo mu malango gakwe bhakalobhola, "Nnole, mbakutuma kwabhenji akaaalondohi bha Annoongo na akaandundame, bhanaangota bhapakwaakomanga pakati jabhenji na bhangi bhapakwaalagianga." 50 Ngocheni, bhandu bha chibhelei chenjeni mpakuhukumulwanga kwa ligongo miyahi ya akaalondoi bhoha bha Annoongo jijikajitika kubhokela kujemeka kwa chilambo, 51 kubhokela komekwa kwa Babeli mpaka Azakalia bhabhakakomekwa pa litatali lya kubhokea mbeeko kwa Annoongo mu Nyuumba ja Annoongo. Eloo, ndendakunnobholelanga, kweli chibhelei chenjeni chipakupotekwa kwa hikubho yabhenji. 52 "Mpakulaganga mwangota bhannyigana malagilo ga Amusa, ligongo ntekwaabhilanga bhandu kwaamanya Annoongo. Mwangota mwabhene mwangaamanya Annoongo na bhenibhala bhabhakapala kwaamanya ntekwaahibhilanga."

53 Ayesu pabhakabhoka konokwe, bhabhajigana malagilo ga Amusa na Mafalisayo bhakajemekanga kwaatauka kwa machili muno na kwaanjimwa kwa makonyekelo gakulimba, 54 ili bhapalitange kwaakamula kwa malobhe gakwe.