1 Ayesu bhakajingila kunnyini ku Yeliko, na pabhatenditakupeta mu ndela ja chene chilambo. 2 Pakibha na amundu bhamo lihina lyabhe Azakayo, bhabhakibha akolo bha akaatocha kodi, na bhena bhakibha akola hilebhe. 3 Bhenabho bhakibha bhatenda kupala kwabhoona Ayesu nga amundu bha namuna niki. Nambo bhakalepela kwaabhoka ligongo bhakibha ajipijipi, na bhandu bhakibhanga bhajingi muno. 4 Henela bhakabhutukila nnongi, bhakakwela nnani ja nkongo gwa nkuyu ili bhakombole kwaalola Ayesu, kwa kubhee bhakaimanya Ayesu bhakibha bhatendakupeta ndela hejo. 5 Ayesu pabhakahika penipala pahi ja gono nkongo gwa nkuyu, bhakalola nnani, bhakaalobholela, "Azakayo, ntuluke chindema, kwakubhee leleni mbakubhehe ageni ku nyuumba jinu!" 6 Henela Azakayo bhakatuluka chindema, na bhakaapokela Ayesu mu nyuumba jabhe kwa kuhangalala muno. 7 Bhandu bhoa pabhakalolanga genago, bhakajemekanga kokolekanga bhabhi kulobhola, "Bhajaula kubhee ageni kwa amundu akola mabhou." 8 Nambo Azakayo bhakajema kwalobholela Hangwana, "Nnyohanikie, Hangwana! Nenga mbakwapekeanga chibhoga chimo mu mabhoga komi ya hilebhe yangu mbakwapekea akahocho, na nenga handa ndekwapokonyola amundu chilebhe choha chela, mbakwabhujikia pa ncheche." 9 Ngapena Ayesu bhakaalobholela Azakayo, "Leleni, mwenga na bhandu bha yuumba jinu bhatekuokolewa, kwakubhee amundu habha kabhele nga amwana bha Aibulahimu. 10 Kwakubhee nenga Amwana bha Amundu ndekuhika kulolea na kuokoa chenichela chichihobhite."

11 Bhandu pabhatenda kujohanikia Ayesu, bhatendita kuganikia kubhee Ukolo gwa Annoongo gubhandikile kupiitila, ligongo bhakibha bhabhandikile kuhika ku Yelusalemu. Napena Ayesu bhakaalobholelanga kwa kulandanikia. 12 Henela bhakaalobholela, "Amundu bhamo bha chilagwa cha ukolo, bhakajaula chilambo cha kutali ili bhakapokele mamulaka ga kubhehe akolo, ngapena bhakabhuja. 13 Henela bhakibha tangu kujaula, bhakabhakema akaatumichi bhabhe komi na kila bhamo kwaapekeha libhoga lya mbiha na kwaalobholelanga, ‘Bhatendelange mahengo mpaka pabhapakubhuja.’ 14 Nambo bhandu bha chilambo chabhe bhakaachimwa na kwapelekela chalaamu na kulobhola, ‘Tupaalahopo amundu habha kubhee akolo bhitu.’"

15 "Hata henela amundu bhenabho bhapata mamulaka na kubhuja kwaachabhe kubhee akolo, ngapena bhenibhala bhatumichi bhabhe bhabhatekwapekeanga mbiha, ili bhaimanyange nga chilebhe niki chichijonjokike kwa kila jumo jwabhenji chibhapatite baada ya kutendela lihengo. 16 Antumichi bha kujemeka bhakahika na kulobhola, Hangwana, kwa chibhoga cha mbiya chenichela chinkambekea ndekupata pa komi kwa chibhoga chiukambekea. 17 Bhenibhala Hangwana bhakaajangula, ntekutenda yammbone mwenga antumichi bhambone! Kwakubhee ntekubhehe antumichi bhakuaminika mu hilebhe hichoko, mpakubhee ajemelei mu hilambo komi. 18 Antumichi bhabhele bhakahika, bhakalobhola, Hangwana, mbatite mabhoga nhano kubhoka mu libhoga limo linkambekea. 19 Hangwana bhabhe bhakajangula, mwenga ndendakummeka ajemelei bha hilambo nhano. 20 Antumichi bhangi akahika na kulobhola, Hangwana, mbiha jinu jenje pambani. Ngajibheka maha mu chitambaa. 21 Ligongo ngannyogopa kwakbhee mwenga nga amundu bha mandolotolo. Ntenda kutola mahali mwangabheka chilebhe na ntendakuhuna mahali yakubhee mwangapanda chilebhe. 22 Hangwana bhabhe bhakajangiula, mbakunhukumula kwa malobhe ginu mwabhene, mwenga antumichi mwabhou! Handa mwakahimanya yakubhee nenga nga amundu bha mandolotolo, yakubhee ndenda kutola hilebhe na kuhuna pangapanda. 23 Kwa niki mwangapeleka mbiha yangu kwa bhandu bhabhatendanga mahengo ili bhakombolange kumujikia hiijonjokike, na nenga ndole jijibhi jangu na liba jabhe? 24 Ngapena bhakaalobholelanga bhenibhala bhabhakibhanga bhabhajemite pakubhandikila, mwaapokonyole mbiha yabhe mkaapekehe jonijola jwapatite mabhoga komi. 25 Na bhenabho bhakaalobholela, Hangwana, bhenabho tayali bhakolite mabhoga komi ga mbiha? 26 Na bhenabho bhakaajangula, ndendakunnobholelanga kubhee, kila jwabhile na chilebhe, bhapakunjokewa, na bhenibhala bhanga chilebhe, hata chenichela chihabhii nacho chipakupetulikwa. 27 Nambo bhena akaapwati bhangu, yakubhee ngapalanga kubhee akolo bhabhenji, mwaletange pambani, mwakomange papapa nnongi jangu!"

28 Ayesu pabhakajomola kulobhola genago, bhakalongolela kujaula ku Yelusalemu. 29 Nabhena pabhakabhandikila chilambo cha ku Betifage na ku Betania kubhandikila na litombi lilikemwa Mzeituni, bhakaatuma bhanapunji bhabhe bhabhele na kwalobholela, 30 nyabhulange mu chijiji chela chichibhile nnongi jinunji, "Pampakujiingila monomwe, mpakunkolela mwana jwa liponda, yakubhee bhangaapetula amundu nnani jabhe, bhabhi bhatabhwite penapo, munnyogole, munnete pamba. 31 Handa amundu bhankonyite, kwa niki ntenda kunnyogola, mumnobholele, ‘Hangwana bhatenda kumpala.’"

32 Bhenibhala bhabhakatumwanga bhakajaula, bhakakolela kila chilebhe handa chibhakalobholelwanga na Ayesu. 33 Pabhakibhanga bhatenda kunnyogola jonijola mwa liponda, akola liponda bhakaakonyanga, "Kwa niki ntendakunyogolanga jonojwe mwana jwa liponda?" 34 Bhenibhala bhanapunji bhakajangulanga, "Hangwana bhatenda kwapala." 35 Bahi, bhakaapelekela kwa Ayesu, na bhena baada ja kutandika ngobho yabhenji nnani ja jonojwe mwana liponda, na Ayesu bhakantamila panani jakwe. 36 Pabhatendita kuendelea na ulendo, bhandu bhakajanjaanga ngobho yabhenji mundela.

37 Pabhakahika kubhandikila ku Yelusalemu, pa kujemeka chielelo cha litombi lya Mizeituni, nkutuli goha gwa bhanapunji bhabhe bhakajemeka kwaalumbalila Annoongo kwa kuhangalala kwa lilobhe likolongwa ligongo lya yakangachika hibhaibhonitinge. 38 Bhakalobholanga, "Bhatendelwa gammbone Akola bhabhahika kwa lihina lya Hangwana! Amani kunani kulihunde kwa Annoongo na ng'anyimo konokwe kunani muno."

39 Penapo Mafalisayo teno bhabhakibha mu nkutuli gwa bhandu bhakakongolela Ayesu, "Bhannyigana, mwakanakie bhanapunji bhinu!" 40 Ayesu bhakajaangulanga, "Ndenda kunnobholelanga mwangota, handa habha bhakotwikinge, maganga gapakupota nyenye."

41 Ayesu pabhakabhandikila chilmbo cha ku Yelusalemu na kuchilola chilambo, bhakachigutila, 42 bhabhi kulobhola, "Mbaya nkahimanyate leleni genigala yakubhee gagaleta amani! Nambo nangocheni gatekuchiia pamiho ginu. 43 Machobha gatenda kunhikila, yakubhee akapwati bhinu bhapakuntindila na kumpota kubhoka pande yoha. 44 Bhapakung'wia pahi mwenga na bhandu bhinu. Ngannekelanga hata liganga limo nnani ja likukumba linu. Ligongo bhakibha ngapala kugumanya muuda yakubhee Hangwana bhapakunnetela wokopu."

45 Ngapena Ayesu bhakajingila mu Nyuumba ja Annoongo, bhakajemeka kwabhenganga panja bhenibhala bhabhatenditakuuchanga hilebhe monomwe, 46 nabhena bhakaalobholelanga, "Jijaandikwe, ‘Nyuumba jangu jipakubhee nyumba ja kwaajopa Annoongo, nambo ntenditinge mbaako ja akaabwihi.’"

47 Ayesu bhatendita kwaajigana kila lichobha mu Nyuumba ja Annoongo. Akaakung'i bhakolongwa, bhabhajigananga malagilo ga Amusa na akaakolo bha bhandu bhakapalanga kwaakoma, 48 nambo bhangapatanga ndela ja kwaakamula ligongo bhandu bhoha bhakaakagula bhabhikujoonikia malobhe gakwe kwa kutungamanika.