1 Lichobha lya kujemeka lya juma, kundabhi muno, ahikege bhala bhakajenda kulikabuli bhakapetula mahuta gakunungila bhabhakagabheka tayali. 2 Bhakakolela liganga lyela lipilingitwe kutali ja nnyango gwa likabuli. 3 Nambo pabhakajingila nkati, bhangagubhona mmele gwa Hangwana Ayesu. 4 Pabhakibhanga tangu bhatekuhechukanga nnani ja chikubho hecho, gunakamo akanalome bhabhele bhabhakawala ngobho yakung'anyima muno, handa nga njahi. 5 Bhakajingilwa na bhoga, akahikge bhenibhala bhakakotimanga pahi. Ngapena bhenibhala bhandu bhakaalobholelanga, "Kwa niki ntenda kunnolea jwabhile jwaamomi pakati ja bhabhawilinge? 6 Bhenabho bhaakwa pambani, bhatekuyoka! Nkombokelange chibhakannobholelanga pakibha konikola ku Galilaya. 7 Penipala pabhakalobhola, ‘Nenga Mwana bha Mundu mbalikwa kondekwe mmabhoko ga bhandu bhangali mmbone, akaabhou, bhamambe na lichobha lya tatu mbakuyoka.’" 8 Penipala bhenibhala akaikege bhakagakombokela malobhe gakwe, 9 pabhakabhujanga kubhoka kulikabuli, bhakaalobholelanga bhenibhala komi na bhamo pamo na bhangi bhoa chikubho chenecho. 10 Bhandu bhabhakakongolela yeniyela ngani kwa akaandundame bhenabho bhakibha Amaliamu Magidalene na Ayoana na Amaliamu anyongo bhabhe Ayakobo, pamo na bhangi bhabhakalongana nabho. 11 Nambo Akandundame bhenibhala bhangahobhalelanga malobhe genigala gabhakalobholelwanga na bhenibhala akahikege na ngani hibhatendita kulongela. 12 Nambo Apetulo bhakabhoka, bhakabhutuka lubhelo mpaka kulikabuli. Pabhakalingulila nkati ja likabuli bhakalola tu jeni jela chanda hitekuhigalila penipala. Bhakabhuja kaja kongo bhatenda kuhechukanga nnani ja gagabhokile.

13 Lichobha lyolyo, bhanapunji bhabhele nkati ja bhanapunji bha Ayesu bhakibha bhatenda kujaula mu chijiji chimo chikemitwa ku Emau, kukibha kutali kwa handa maili saba kubhoka ku Yelusalemu. 14 Bhakibha bhatendakongoloka akaachinabhene nnani ja hikubho yoha hihibhokile. 15 Pabhakibhanga tangu bhatendakulongela na kulobholelana nnani ja ngani jenejo, Ayesu bhene bhakabhokela, kujenda nabho pamo. 16 Bhakaabhona kwa miho gabhenji, nambo bhangakombolanga kwaamanya. 17 Bhakaakonyanga, "Nkongolokanga hikubho niki kongo mmi kujendanga?" Bhenibhala bhandu bhakajemanga jihi, pamiho pabhe pakibha na lukenja. 18 Jumo jwabhe, jwaakemitwa Akileopa, bhakajangula, "Bholi, mwenga nga ageni jika jinu pa Yelusalemu yakubhehe mwangamanya gagabhokile machobha gani?" 19 Nabhena bhakajangula, "Hikubho niki?"

Bhenabho bhakaajangulanga, "Hikubho hiyapatite Ayesu bha ku Nazaleti. Bhenabho bhakibha alondoi akola machili ga kutenda na kujigananga nnoongi ja Annoongo na nnongi ja bhandu bhoha. 20 Akolo bha akaakung'i na akaakolo bha bhandu bhakaabhoa ili bhakomekwe, na bhenabho bhakaabhamba panchalaba.

21 Nambo twenga tukahobhalela yakubhehe bhenabho nga bhapakuchikomboa chilambo cha ku Isilaeli. Kupunda genago goha, leleni nga lichobha lya tatu tangu hikubho heyo hiibhokile. 22 Kabhele, akaikege teno bha kwaachitu bhatekutung'ang'anua. Bhakajahulanga kulikabuli kundabhi muno, 23 Bhanga gukolelanga mmele gwa Ayesu. bhakabhujanga bhakalobholanga bhatekulola maganikiho ga antumich bha kunani kulihunde bha Hangwana kubhee bhakaalobholelanga yakubhehe Ayesu bhamomi. 24 Bhangi bhitu bhakajaulanga kulikabuli bhakalolange genigala gagakalobholekwa na bhenabho akahikege, nambo bhenabho bhangaabhona Ayesu." 25 Ngapena Ayesu bhakaalobholelanga, "Mbona ntekubhee mwaajinga henela na mu mitima jinunji jakutopa henela kugahobhalela goha gagalobhwile na akaaondohi? 26 Bholi, yangapalikwa Akilisito bhabhatekuagulikwa na Annoongo kulaga, na henela bhajingile mu nng'anyimo gwabhe?" 27 Na Ayesu bhakaalobholelanga hikubho yoha gagapalikwa bhenabho mu Majandiko ga Annoongo kujemeka Majandiko ga Amusa mpaka ga akaalondoi bhoha. 28 Pabhakabhandikilanga chenichela chijiji chibhakachijendelanga, Ayesu bhakatenda handa bhajaula nnongi mu ulendo, 29 Nambo bhenaangota bhakaapembelea Ayesu na kwalobholela, "Ntame pamo na twenga, maana kutekupilila, na kilo chitekubhandikila." Bahi, bhakajingila pachijiji, bhakatama pamo nabho. 30 Pabhakatama kulyee chakulya pamo na bhenaangota, bhakagutola nkate, bhakagutendela yammbone, ngapena bhakagumetula, na kwapekeanga. 31 Popopo miho gabhenji gakaunukulikwa, na bhenaangota bhakaamanya, nambo bhenabho bhakabhoka pakati jabhenji. 32 Bahi, bhakakongolelananga, "Bholi, mitima jinunji jangaachu wala kuhangalala pabhakibha bhatenda kutulobholela Majandiko ga Annoongo konikola kundela?" 33 Penapo bhakajimukanga gunakamo na kubhujanga kuchilambo cha ku Yelusalemu, konokwe bhakaakolelanga bhenibhala komi na jimo na bhandu bhangi bhabhakibhanga pamo bhakondekininge. 34 Bhakalobholanga, "Kweli Hangwana bhatekuyoka, bhaabhokile Asimoni." 35 Ngapena bhenibhala bhanapunji bhabhele bhakakongolela gagabhokile nndela na namuna chibhakaamanya Ayesu penipala pabhakagumetula nkate.

36 Pabhakibhanga bhatendakubholanga ngani hejo, bhenabho Ayesu bhene bhakajema pakati jabhenji, bhakaalobholelanga, "Upalyo gwa Annoongo gubhehe na mwangota." 37 Bhena angota bhakang'ang'anuka na kujogopa bhakiganikiha kubhehe bhatekulolanga lihimwi. 38 Nambo Ayesu bhakaalobholelanga, "Kwaniki ntenda kujogopanga, kwaniki mbilinge na lipamba mu mitima jinunji? 39 Nnolange mmabhoko gangu na mmakongono gangu, yakubhehe nga nenga namwene. Nngwaange nnolange, kwa maana lihimwi lyanga mmele na wala mahupa handa chimmonanga nenga." 40 Pabhakalobhola genago, bhakaalangia mabhoko na makongono gabhe. 41 Wakati tangu bhangakombolanga kuhobhalela kubhee nga bhenabho ligongo lya kuhangalala na kangachanga, bhakaakonyanga, "Mmi na chilebhe chohachela cha kulyee?" 42 Bhakaapekea chipande cha homba jubhammanike. 43 Bhakachitola chipande na kulyehe, bhoha bhabhikwaalola. 44 Ngapena Ayesu bhakaalobholela, "Heye nga ngani hiinakannobholela panakibha tangu na mwangota gagapalika gaapitile goha gagajaandikwe mu malagilo ga Amusa na akaalondohi na mu chitabu cha Zabuli gapaliikwa gakwele." 45 Ngapena, bhakagawekula malango gabhenji ili bhakombolange kugamanya Majaandiko ga Annoongo. 46 Na bhakaalobholelanga, "Nga gajaandikwe gangani mu Majaandiko ga Annoongo, kubhee Akilisito bhapakulaga na kujomoka na lichobha lya tatu bhapakuyoka, 47 nga kubhee hilambo yoha hipakutangachiwa n kwa lihina lyangu kwa ngani ya kuleka mabhou na kulekelelwa mabhou gabhenji. 48 Mwangota nga bhannolitinge na kujoha hikubho heyo 49 Na nenga namwene mbakutumianga bhenibhala yakubhee Atati bhangu bhatekuhaidi, nambo mwangota mu heche chilambo mpaka penapo pampakupokelanga machili kubhoka kunani kulihunde."

50 Ngapena bhakaalongolela panja ja kunnyini mpaka ku Betania, nga bhakanyolola mabhoko gabhe kunani, bhakaajopelanga gammbone ga Annoongo. 51 Pabhatendita kwaajopela gammbone kubhoka kwa Annoongo, muuda bhakatolekwa na kwalekanga na bhakajaula kunani kulihunde. 52 Ngapena bhenaangota bhakaajopa bhenabho, bhakabhujanga ku Yelusalemu bhabhi kuhachukanga muno. 53 Muda goa bhakatamanga nkati ja Nyuumba ja Annoongo bhabhi kwaalumbalilanga Annoongo.