1 Ayesu pabhakajomola kolongela genago goha nnogni ja bhandu, bhakajaula ku Kapelenaumu. 2 Konokwe kukibha na akolo bha lilubhalo lya manyemba makomi komi yakubhe bhakibha ntumichi jwabhe jwabhampalite muno. Jonojwe ntumichi hakibha ntamwa kubhandikila na kuwehe. 3 Bhenibhala akolo bha manyemba makomi komi pabhakajoa ngani ja Ayesu, bhakaatumanga hakanaota bhangi bha bhayaudi bhajaulange kwaajopa bhaike kunnamia ntumichi jwabhe. 4 Pabhakaika kwa Ayesu, bhakaajopa muno, bhakalobholanga, "Hojo mundu hipaalikwa bhajangatilwe, 5 Kwa maana bhatenda kwaapala bhandu bhitu, na bhena bhatekuchengela Nyuumba ja konganilanga."

6 Bahi, Ayesu bhakajaula pamo nabho. Pabhakabhandikila kuhika pa nyuumba ja bhenibhala akolo, bhenibha akolo bha lilubhalo bhakaatumanga akaaganja bhabhe kwalobholela Ayesu, "Hangwana, nkotokuchiabhua muno, maana mwenga mpaalikwahopo nnyingile mu nnyumba jangu. 7 Kwakubhe nangachibhona nenga namwene mbaalikwahopo hata kuhika kwaachinu. Nambo nnobhole tu lilobhe, na antumichi bhangu bhapakulama. 8 Kwakubhehe nenga kabhele nga mundu ndekubhe pahi ja mamulaka, na ndekola manyemba bhabhilinge pahi jangu bhabhajeketelanga chinaakongolelanga. Handa naalobholile bhamo, ‘Nnyabhule!’ nabhena bhatendakujaula, ndenda kwalobholela bhangi, ‘Nhike!’ nabhena bhatenda kuika, hata habhanda bhangu handa naalobholile, ‘Ntende henela!’ nabhena bhapakutenda."

9 Ayesu pabhakajoha malobhe genago, bhakakangacha, na bhena akalitendebhukila lyenilyela lilubhalo lya bhangu bhabhatendita kunkagula, na bhakaalobholelanga, "Na nangaabhona amundu bhabhabhile na imani ngolongwa handa jenjeni hata mu bhandu bha ku Isilaeli"

10 Bhenibhala bhandu bhabhakatumwanga kwa Ayesu pabhabhujanga pakaja pa bhenibhala akolo bhakaakolela bhenibhala antumichi bhalamite.

11 Pabhakajomola genago tu, Ayesu bhakajaula mu chilambo chimo chikemitwa ku Naini, lilubhalo lya bhandu pamo bhakanapunji bhabhe bhakalongana nabho. 12 Bahi, pabhakabhandikila kuhika pa nnyango nkolongwa gwa chilambo, bhakabhokelanga bhandu bhapeetwilinge malilo ga analome bhamo, mwana jwa jiika jwa bhenibhala haikege nhelwa. Bhandu bhajingi bha chenichela chilambo bhakibhanga pamo na bhenibhala nhelwa. 13 Hangwana Ayesu pabhakammona haikege bhenibhala nhelwa bhakaakolee kiha, bhakaalobholela, "Nkotokuguta." 14 Ngapena, bhakajaula, bhakalikwaa jenijela njeega, na bhenibhala bhabhakalipetula bhakajekanga. Penapo bhakalobhola, "Mwee nkakombo! Ndendakunnobholela, nnyimuke!" 15 Bhenibha nkakombo bhabhakawee bhakajimuka na kutama, bhakajemeka kulongela. Na Ayesu bhakaapeleka kwa anyongolo bhabhe. 16 Bhandu bhoha bhakahechukanga, bhakabhee bhatenda kwaalumbalila Annoongo bhakalobholanga, "Alondoi akolo bha Annoongo bhatekubhokela pakati jitu. Annoongo bhatekuika kuwakombolanga bhandu bhabhe." 17 Ngani heyo jikajenela mu chilambo cha ku Yudea na mu hilambo hiitindila pa Yudea.

18 Bhanapunji bha Ayohana mmatichaji bhakannobholela Ayohana nnani ja ngaani jabhe yohoa. Nabhena Ayohana, bhakaakemanga bhakanapunji bhabhele pakati ja bhenibhala bhakanapunji bhabhe, 19 bhakaatumanga kwa Hangwana Ayesu bhaakonye, "Bholi, mweenga nga bhenibhala bhabhahika, au tuwalendelele bhangii?" 20 Bhenibhala bhanapunji pabhakahika kwa Ayesu bhakaalobholela, "Ayohana mmatichaji bhatutumite tuhike kwaachinu kunkonya, ‘Bholi mweenga nga bhenibhala bhabhapakuhika au twaalendele bhangi?’" 21 Muuda gogogo, Ayesu bhakaalamianga bhandu bhangi bhabhatendita kulaga kwa hitamwa na kubhoanga mahoka na kwaalamianga bhangalola bhakombolange kulola kabhele. 22 Bahi, Ayesu bhakaajangula bhanapunji bha Ayohana, "Nnyabhulange nkaalobhelele Ayohana genigala gamugabhonite na kugajoha, bhangalola bhatendakulola, hakanangwabha bhatendakujenda, bhabhabhile na mambujupuju bhalamitinge na nkondekwa kwaajopa Annoongo, bhangajoanga bhatendakujoa, bhabhawilinge bhatekwayoanga, na hakahocho bhatendakutangachiwanga Ngani Jammbone. 23 Bhachikonje bhenibha amundu bhanga bhoga na nenga!" 24 Bhenibhala bhandu bhabhakatumwanga Ayohana pabhakabhokanga, Ayesu bhakajemeka kwalilobholela lilubhalo ngani ya Ayohana, bhakilobhola, "Pankajaulanga palulemba nkajaulanga kulolanga chiniki? Bholi, kulola matete gagapukunyikwa na mboongo? 25 Bahi, nkajaulanga kulola chiniki? nkajaulanga kunnola mundu jwawalite ngobho ya bei ngolongwa? Bhandu bhabhawalanga ngobho ya bei ngolongwa na kubhehe na hilebhe yammbone bhatamanga mu nyuumba ya chipalume, yakubhehe ngatama kumanyai! 26 Bahi, nnobholelange, nambo nkajaulanga kulolanga chiniki? Nkajaulanga kwaalola alondoi bha Annoongo? Elo, ndendakunnobholelanga nkajaulanga kwaalola kupunda alondoi 27 Habhabha nga yakubhehe ngani yabhe hitekujaandikwa mu Majaandiko ga Annoongo,

‘Nnyoonikie mbakwaatuma nyuumbe jwangu bhannongolele,

yakubhe bhapakunhalakia ndela ja kupeta mwenga.’"

28 Ayesu bhakaalobholelanga kabhele bhandu, "Ntendakunnobholelanga, pakati ja bhandu yakubhehe mwikege bhapaapite bhakwa bhabhabhile nkolongwa muno kupunda Ayohana Mmbatichaji. Nambo, jonijola jwaabhile nchoko choko muno mu upalume gwa Annoongo nga nkolongwa kupunda Ayohana."

29 Bhandu bhoha pamo na hata akaatochanga kodi pabhakajoanga malobhe ga Ayesu, bhakakondaanga kubhehe Annoongo nga bhammbone. 30 Nambo Mafalisayo na bhabhajigana malagilo ga Amusa bhakakananga genigala yakubhehe Annoongo bhagatendange, bhakakananga kubatichwanga na Ayohana. 31 Ayesu bhaheendelea kulobhola, "Bholi, mbakwalandanakia na chiniki bhandu bha chibhelei heche? Bhalandaana na chiniki? 32 Bhenaangota nga handa bhana bhabhatamite mahali pa kuhuchianga hilebhe na kemana lilubhalo kwa lilubhalo, gwendu bhakabhee bhatekutama pamakonganilo ga bhandu na kulobholelana, libhoga limo na lyengi,

‘tumpotilinge lipyombyo, nambo mwangaina!

twakanyeembelelanga nnyeembo ya kumalilo nambo mwangaguta!’

33 Kwa maana Ayohana ambatichaji bhakahika, na bhenabho bhakibha bhatenda kutama pangali kulyehe, na mwangota nkalobholanga, ‘Bhatekupoganikwa na mahoka!’ 34 Nabhena amwana bha Amundu bhatekuhika, bhatenda kulyehe na kung'wee, na mwangota nkalobholanga, ‘Mwalole habha mundu bhakulyehe muno na bhakolelwa, aganja bha bhatochanga kodi na bhabhilinge na mabhou!’ 35 Nambo luunda lwa Annoongo jitendakulangia yakubhehe nga jammbone kwa bhenibhala bhoha bhabhajikonda."

36 Lichobha limo Amfalisayo bhamo bhakaalalika Ayesu kujaula kulyee chakulya cha kimuho kwaachakwe. Bhakajiingila nkati mwa jonojwe Mafalisayo bhakataama palikai na kulye chaakulya. 37 Bahi, mu chilambo chenichela pakibha na haikege bhamo bhabhabhile na mabhou. Pabhakajoa yakubhehe Ayesu bhatendakulyee mu nyuumba na bhenibhala Amafalisayo bhakapetula ntuumba gwa mahuta ga kunuungila muno. 38 Bhakaika, bhakakotima kuyeto ja makongono ga Ayesu, bhakaguta, na mahoi jabhe gakaagwila Ayesu mumakongono gabhe. Bhenibhala haikege bhakahunguta makongo ga Ayesu kwa majunju gakwe. Kabhele bhakaanamatila na kwasalimia kwa kuhangalala na kwaapakala mahuta ga kunuungila. 39 Jonijola Mafalisayo bhabhakaalalika Ayesu, pabhakalola genago bhakachilobholela muntima gwabhe, "Handa Amundu habha bhakabhile alondoi bha Annoongo bhakahimanya kubhehe nga aganiki bhatenda kwakwaha, na bhenabho haikege nga bha namuna niki, yakubehe bhena haikege nga bhabhii na mabhou." 40 Ayesu bhakaalobholela jonijola Mafalisayo, "Asimoni, nibhile na chilebhe cha kunnobholela."

Asimoni bhakajaangula, "Elo bhabhajigana, nnobholele."

41 Ayesu bhakajemeka kwa kulobhola, "Bhandu bhabhele bhabhakajahika mbiya kwa amundu bhabhakujahika mbiha, amundu bhamo bhakalongwa dinali mia nhano jitenda kukagulana na malepo gakutenda lihengo kwa machobha mia nhano, na bhangi bhakalongwa dinali makomi nhano jitenda kukagulana na malepo gakutenda lihengo kwa machobha makomi nhano. 42 Bahi pabhakalepela kulepa magambo genago, jonijola mundu bhakaalekelela bhoha bhabhele. Ngocheni nga aganiki bhapakwaapala muno bhena amundu bhabhaalonga?" 43 Asimoni bhakajangula, "Kweli, nga bhenibhala bhabhaalekile ligambo likolongwa nga bhabhapakumpala muno bhenibhala bhabhaalonga" Ayesu bhakaalobholela, "Ntakujaangula maha." 44 Ngapena bhakatendebhukila bhenibhala haikege na kuwalobholela Asimoni, "Asimoni mummonite hojo haikege, pangajiingila mu nyuumba jinu mwangambekea machi ga kujelejea makongono gangu, nambo habha haikege bhatekunyelenyea makongo gangu kwa mahoi gabhe na kuhunguta kwa majungu gabhe. 45 Nambo mweenga mwanganjalimia kwa kunamatila, nambo kabhokela pangajiingila mu nyuumba habha haikege bhangaleka kunjalimia kwa kuhangalala. 46 Mweenga mwangambakala mahuka mmutwe gwangu, nambo bhena haikege bhatekumbakala mmakongono gangu mahuta ga kunuugila. 47 Kwa henela ndenda kunnobholela, mabhou gabhe gagabhile gajingi gatekulekelelwa, kwa kubhehe bhatekulangia upalyo nkolongwa. Nambo bhenibhala bhabhalekelilwe mabhou kachoko, hupala kachoko." 48 Bahi, Ayesu bhaakalobholela bhenibhala haikege, "Ntekulekelelwa mabhou ginu."

49 Penapo, bhenibhala bhabhatendita kulyee pamo na Ayesu bhatendita konyananga bhabhikulobholanga, "Habha nga aganiki bhabhalekelea mabhou?" 50 Na bhena Ayesu bhakaalobholela bhenibhala haikege, "Imani jinu jitekunaamia, nnyabhule kwa amani."