1 Wakati hogwe, nkutuli nkolongwa gwa bhandu bhajingi bhakakongana pamo, mpaka bhatendita kulebhatana, Ayesu akajemeka kwaalobholelanga oti bhakanapunji bhabhe, "Nchilolekeange na nkotokwaajiganga Mafalisayo, yakubhehe nga undendemundu. 2 Chakwa chohachela chichiwekilwe, chipakunukulilwa, na chichitekuchiiya, chipakubhonekana. 3 Kwa henela, chohachela chintekulongelanga mu lubhendu chipakujoanika muhi. Na chinnongilinge kwa kuhiiya mu yuumba hiitabhwitwe, chipakutangachwa nnani ja litatali lya nyuumba."

4 "Ndendakunnobholelanga mwangota hakaaganja bhangu, nkotokujogopanga bhenibhala bhabhakoma mmele, yakubhehe baada ja penapo bhakotokombolanga kutenda chohachela. 5 Nambo mbakunnangia bhenibhala bhampalikwa kwajogopa, Mwajogope bhenibhala yakubhehe baada ja koma mmele bhakombola kwaajeanga mu mooto gwangaimika machobha goha! Eloo, ndendakunnobholelanga kweli bhenabho munnyogopange.

6 Bholi itendakumanyikana kubhehe ngunda nhano bhatendakuuchikwa kwa mbiya kachoko? Nambo Annoongo ngalibhalila chijuni hata chimo. 7 Eloo, Nkotokujogopanga, mwangota nga bhammbone kupunda yene ngunda, hata idadi ja majungu ga mmutwe gatekubhalanganikwa."

8 "Ndendakunnobholelanga kubhehe, johajola jwaatangacha nnongi ja bhandu kubhehe bhabhii pamo na nenga, helahela Mwana jwa Amundu nabhena bhapakuntangacha kubhehe bhabhii pamo na bhena nnongi ja akaatumichi bha kunani kulihunde bha Hangwana. 9 Nambo amundu bhoabhala bhabhangana nenga nnongi ja bhandu, nabhena Amwana bha Amundu bhapakunkana nnongi ja akaatumichi bha kunani kulihunde bha Annoongo."

10 "Amundu bhoabhala bhabhalongela lilobhe lyakuntauka Amwana bha Amundu pabhakulekelelwa nambo bhabhapakwatukana Mboomo ja Annoongo ngalekelelwa machobha goha."

11 "Pabhapakumpelekanga mwangota mu Nyuumba ja konganilanga Bhayahudi nnoongi ja akaakolo na bhatawala mamulaka, nkotokuchikonya konya nga namuna niki chimpakujangulanga. 12 Kwa maana Mboomo Annoongo apakunnyigananga cha kulongelanga gono wakati hogwe."

13 Mundu jumo mu nkutuli gwa bhandu bhakaalobholela Ayesu, "Bhannyigana, mwakongolele anung'una bhangu tumetulane hilebhe hibhatulekile atati bhitu."

14 Ayesu bhakajaangula, "Mwaganja, nga ganiki jwaamekite nenga kubhehe ajamelei bha kubhagana kwinunji hilebhe ya atati bhinu?"

15 Ngapena Ayesu akaalobholelanga bhandu bhoha, "Ntamange kutali na kupala kwa hilebhe hijingi, kwa ligongo umomi gwa amundu ngabhona mu hilebhe hijingi hibhabhinayo."

16 Ngapena Ayesu bhakaalobholela, kulandanakia hokoko, "Pakibha na amundu bhabhabhile na hilebhe na ng'omba gugukaogola muno. 17 Bhabhabhi na hilebhe hijingi bhakajemeka kuganikiha muntima, ‘Nanga ngokwe jakubheka mahuno gangu.’" 18 "Ngapena jono tajili akalobhola, ‘Mbakutenda henela, Mbakubhomolana ngokwe yangu na kuchenga jengi ngokwe ngolongwa. Monomwe nga mahuno gangu na hilebhe yangu.’ 19 Ngapena nanenga mbakuchilobholela namwene, ‘Nenga ndekola hilebhe hijingi ndekuchibheekela kwa yaaka hijingi. Ngocheni, mpomolele, nlyee, na ng'wee na nhangalale.’" 20 "Nambo Annoongo bhakalobholela, ‘Mwapumbapu mwenga! Kilo cheni umomi gwinu gutendakupalikwa. Nangocheni yeneyo hiintekubhekela hipakubhehe ya aganiki?’ "

21 Ayesu bhakajomolekea kulongela, "Henela nga chihibhile kwa bhenibhala bhabhachibhekela hilebhe, bhangali chilebhe chammbone nnongi ja Annoongo."

22 Ngapena Ayesu bhakaalobholela bhanapunji bhabhe, "Kwa hiyo ndendakunnobholelanga, nkotokuchiabhuanga nnani ja umomi gwinunji, kubhehe mpakulyanganga niki, au nnani ja mimele jinunji kubhehe mpakuwalanga chiniki. 23 Ligongo umomi nga gwammbone kupunda chaakulya na mmele gwammbone kupunda ngobho. 24 Mwaaganikiange makongolo, genago ngapandanga wala ngauna, bhangali ngokwe wala pakubhekela chakulya, nambo Annoongo bhatendakuilia. Mwangota nga mwammbone muno kupunda hijuni! 25 Nga ganiki pakati jinunji yakubhehe bhabhachihabhua muno bhabhakombola kuchijonjokea kachoko umomi gwabhe hata kwa lichaa limo? 26 Bahi, handa ngakombolanga kutenda chikubho chichokochoko handa chenecho, ligongo lya niki ntendakuchiabhua na kutenda genago gangi? 27 Nng'anikiange malobha chigakola. Ngatenda mahengo wala kuchitota, nambo ndendakunnbholelanga kubhehe hata akolo Aselemani yakubhehe akawala ngobho yakuhalala muno nambo bhangajibhajila handa limo lya gena malobha. 28 Bahi ikibha Annoongo bhagaweka henela mahamba ga gakumigonda yakubhehe leleni gabhile malabhi na kugwehe na kugajocha kumooto, bholi apakwawekelanga mwangota bhantenda kuhobhalela kachoko?"

29 "Wala nkotokuchiabhuanga mpakulye niki au mpakung'we niki. Nkotokubhehe na lipamba nnani ja gangani. 30 Ligongo genago goha gantendakuchilagianga bhandu bhangaamanya Annoongo. Nambo Atati bhinu bha kunani kulihunde bhaimanyi mpalanga genago. 31 Nambo nnoleange oti ukolo gwa Annoongo na hilebhe heye yoha mpakupekewanga."

32 "Nkotokujogopa mwe mwa lilubhalo lichokochoko, ligongo Atati bhinu bhalolite yammbone kumpekeanga mwangota ukolo gwabhe. 33 Nhuchange hilebhe hinunji mkapekeange hakaocho mbiha heyo. Nchitendelange mihuko ya mbiya ngauumala, na nkachibhekelange hilebhe yangapongoka kuanni kulihunde, mahali yakubhehe hakabwihi ngajibha wala yakubhehe hikoko ngaalibhianga. 34 Kwakubhehe penipala pahibhile hilebhe yinu, ngapena na ntima gwinu pagupakubhehe."

35 "Nchiandaange kutenda mahengo, na himuli hijunji hibhikujaka, 36 handa akaatumichi yakubhebhe bhabhuje kubhoka ku ulombela, ili chibhapakuika na kong'onda nnlyango bhakombolange kwaajogolela guna kamo. 37 Akaatumichi bhenibhala bhapakuhachukanga Hangwana bhabhenji pabhapakwakolela bhatendakwaalendela. Nannobholelanga kweli, bhapakuwala ngobho ya kitutumichi na bhapakwaalobholela ntamange pahi na nenga mbakunhudumianga. 38 Akaatumichi bhenibhala bhapakuhachukanga Hangwana bhabhenji pabhapakwakolelanga bhabhilinge maha kwa kwaapokela hata handa bhapakuhika kilo muno, au kubhandikila na kuchehe. 39 Nambo muhimanyange ngani heje yakubhehe, handa hakola nyumba bhakaimanya muda niki abwihi bhatenda kuhika, bhangecheha, wala bhakalekite hopo nyumba jabhe kubhomolekwa. 40 Na Mwangota mwenga hipalikwa kubhehe tayali muda goha, kwa maana Amwana jwa Amundu bhapakuhika muda mwangahobhalela."

41 Ngapena Apetulo bhakakonya, "Hangwana, kulandanikiha hoko kutukongolela twenga jika jitu au bhandu bhoha?" 42 Hangwana bhakaajangula, "Nga jwaa bahi antumichi jwakuaminika na bhakutungamanika yakubhehe hangwana bhabhe bhapakwatenda ajemelei nnani ja nyumba jabhe joha, nabhena bhapekehe bhatumichi bhangi chakulya chabhenji kwa muda gugupalikwa? 43 Ipakubhee nga kuhachuka kwa antumichi jonijola yakubhehe hangwana bhabhe chibhapakubhuja bhapakwakolela bhabhi kutenda henela. 44 Ndenda kunnobholelanga kweli, bhapakwabheka bhajemelele hilebhe yabhe yoha. 45 Nambo chihibhile jonijola antumichi bhapakuganikia mu ntima gwabhe, ‘Hangwana bhangu bhatenda kabha kubhuja,’ ngapena bhakajemeka kwaapotanga bhenibhala akantumichi akanalome na haikege na kulyehe na kung'we na kolelwa, 46 hangwana bhabhe bhenibhala habhanda bhapakuhika lichobha lyangaganikiana muda gwangagumanya. Bhenabho hangwana bhabhe bhapakwalagia muno na kwabheka pamo na bhandu bhangaaminika."

47 "Bhenibhala antumichi bhabhahimanya maha upaliho gwa hangwana bhabhe na bhakoto kuchibheka maha wala kutenda handa chibhapala hangwana bhabhe, bhapakwanyamuka muno. 48 Nambo amundu bhoha bhala bhabhangaimanya lilipalikwa kutendekwa na handa bhateendite hikubho yangapalikwa bhapakwaanyamuka kachoko, na amundu bhabhatati hijingi bhapakulongwa hijingi muno, amundu bhabhabhile na mamulaka makolongwa bhapakonywa muno."

49 "Ndekuhika kujakia mooto pachilambo, ndendakulokolila gukabhii tayali gujemike kujaka! 50 Nambo minayo hibhini muno hiimbalikwa nage, ndendakubhuka muno mpaka pagapakweela! 51 Nng'anikianga ndekuhika kuleta amani pachilambo? Ngabha, ndenda kunnobholelanga ngabha, ndekuhika kuleta mpwilingano. 52 Kujemeka nangocheni, kupakubhehe na bhandu nhano mu nyuumba jimo, bhatatu kwa bhabhele na bhabhele kwa bhatatu. 53 Bhapakupwatanilanga atati na mwana jwabhe na mwana na atati mundu, anyongo na mwali jwabhe na mwali na hanyongo mundu, hakibhabhe na haki mundu. Nabhena hakimundu na hakibhabhe."

54 Ayesu bhakagulobholela gonigola nkutuli gwa bhandu, "Handa mmonitinge lihunde litendakupitila kuuwelo, guna kamo, ‘Hula jipakoma,’ na kweli jitenda koma. 55 Na mwangota handa mujibhonite mboongo ja kuchini jitenda kupoga, na mwangota mwalobhola, kupakubhehe na lyoto, na kubhehe hiyoyo. 56 Mwe mwangota andendemundu! Ntendakuhimanya namuna ja kuhimanya kubhonekana kwa chilambo na Kunani. Kwa niki ngaimanya maana ja hikubho hiibhokela ngocheni?"

57 "Kwaniki ngakombolanga mwachinabhene kuamuanga chikubho chichibhi maha? 58 Panyaula na nchitaki jwinu ku mahakama, nchimile kuelewana na bhenabho mmi ndela. Ngabha henela, bhapakumpeleka kwa machili kwa aliwali, na bhena aliwali bhapakumpeleka kwa linyema na linyemba lipakumpeleka muligelecha. 59 Nannobholelanga, ngabhoka monomwe mpaka nnepe ulohi gwa mwicho."