1 Muda gonogwe bhandu kukibha na bhandu teno, bhabhakaalobholela Ayesu nnani ja bhandu teno bha ku Galilaya yakubhehe Apilato akolo bha ku Yuda bhakakulumikia bhakomekwe na miyahi yabhenji jihangalanwe na hinyama hiichinjitwe ligongo lya mbeeko. 2 Nabhena Ayesu bhakalobholelanga, "Nng'anikianga yakubhehe bhandu bha ku Galilaya yakubhe bhakawe malilo ga namuna yeneyo bhenaangota bhakalemwanga kupeta bhandu bha ku Galilaya bhangi? 3 Ngabha hopo! Mwangota handa ngalekanga mabhou ginu, mwangota mpakuwenga helahela. 4 Au bhenibhala bhandu komi na nane bhabhwilinge pabhakagwelwanga na nnala konokwe kuchilambo cha ku Siloamu, nng'anikianga habhobho bhakibhanga akabhou kupeta bhandu bhoha bhabhatamitanga ku Yelusalemu? 5 Nanobholelanga, ngabha hopo! Mwangota handa ngalekanga mabhou ginu bhoa mpakuwenganga hela hela."

6 Ngapena Ayesu bhakaalobholelanga ngani heje, "Amundu bhamo bhakibha na nkongo gwa ntini gugupanditwe mu ng'oonda gwabhe gwa mzabibu, bhakahika ili kulolea tini mu nkongo hogwe, nambo bhangapata hata limo. 7 Henela bhakaalobholela bhakulolekea nng'onda, ‘Nnole, kwa muda gwa yaaka hitatu nangocheni ndekubhehe kuhika kulolea mabibo mu ntini hogo, nanenga nangapata hata limo. Nhekete! kwaniki guendelee kuhalibiana mmandopi?’ 8 Nambo Jonijola jwakulokea nng'onda akajangula, ‘Hangwana, nneke kabhele kwa chaka chimo na kupunda, nanenga mbakulemela na kubhekela mbolea. 9 Handa ngaogolahopo mabibo chaka chichiika, yammbone, mguhekete,’"

10 Lichobha limo Ayesu bhatendita kujigana mu Nyuumba ja konganilana Bhayahudi lichobha lya kupomolela. 11 Mu Nyuumba jenejo kukibha na mwikege jumo bhabhakatamikwa na mahoka kwa yaaka komi na nane, ng'ongo gwabhe kugapenda na bhakalepela kujema gwema. 12 Ayesu pabhakaabhona, bhaakakema, na kwaalobholela, "Mwikege nnamite chitamwa chinu," 13 Ayesu bhakabheka mabhoko nnani jabhe, mala bhakajema gwema bhakajemeka kwalumbalila Annoongo. 14 Nambo akolo bha nnyumba ja konganilanga Bhayahudi bhakatumbala ligongo Ayesu bhatekwalamia bhena haikege lichobha lya kupomolela. Henela akolo bha nyuumba ja konganilanga Bhayahudi bhakaendelea kugulobholela nkutuli gwa bhandu, "Gabhi machobha chita mpalikwanga kutenda lihengo, mu machobha hago, nhikange nnamange, nambo nkotokuhikanga Lichobha lya Kupomolela." 15 Pena bahi Hangwana bhakaajangulanga, "Mwe mwangota akandendemundu! Bholi, kila jumo jwinu ngaajogolela ng'oombe jwabhe au liponda jwabhe kubhoka mu lichinga bhakaapelekwa kwaang'wea machi Lichobha lya Kupomolela? 16 Na hojojo mwikege, bha ubhelehi gwa Aibulahimu, Lichetani bhaatabhite kwa yaaka komi na nane yenjeni, yangapaalikwa kujogolekwa chitabho chenjeni Lichobha lya Kupomolela?" 17 Pabhakajomola kulobhola genago, akapwati bhabhe bhakaabhona honi nambo bhena bhangi bhoha bhakaahangalalanga ligongo lya hikubho yoha hiibhakaitenda.

18 Ngapena Ayesu bhakakonya, "Bholi, Ukolo gwa Annoongo gulandine na niki? au mbakugulandanikia na chiniki? 19 Ukolo gubhile handa mbenu njook ja nkongo gugukemwa nhaladali, yakubhehe amudu bhakajitola bhakajipanda mu ng'onda gwabhe, jikakola na kubhehe nkongo nkolongwa na hijuni ya kunani bhakachenganga hiyua mu nyaambi yabhe."

20 Ayesu bhakakonya kabhele, "Mbakugulandanikia ukolo gwa Annoongo naniki? 21 Gulandana na chilongo yakubhe mwikege jwatolite na kuangalana mu madebe gatatu ga ukobha mpaka goha gukatutumuka."

22 Ayesu bhakapeta mu hilambo na hijiji, bhabhi kwaajigananga bhandu wakati bhakibha mu ulendo kujaula ku Yeluchalemu. 23 Mundu jumo bhakaakonya, "Hangwana, nga bhandu kachoko tu bhapakuokolewanga?" 24 Ayesu akalobhola, "Nchimilange kujingila kwa kupetela nniyango gwa nying'inying'i, kweli ndendakukongolelanga, bhandu bhajingi bhapakujigana kujingila nambo bhakombolanga hopo. 25 Wakati gutendakuhika akola nyuumba pabhakujimuka na kujigala nnliyango, mpakujemanga panja na mmi kong'onda nnliyango na kulobhola, ‘Hangwana, ntujogolele nniyango.’ Nambo bhenabho bhapakuunyangulanga, ‘Nimmanyanga hopo Mwangota wala kunpitilanga.’ 26 Ngapena mpakujangulanga, ‘Tukalyehe na kung'wee pamo namwenga, kabhele nkatujigana palugwinjili.’ 27 Nambo bhenabho bhapakunnyangula na kulobhola, ‘Nimmanyangahopo mwangota wala kumpitilanga. Mmokange kwachangu mwakakola mabhou!’" 28 "Penapo bhapakuhechukanga na lilaka muno, chimpakwabhona Aibulaimu, Aichaki na Ayakobo na akaalondohi bhoha bhakibha mu ukolo gwa Annoongo, nambo mwangota mpakubhehe bhapakuunyeha panja. 29 Bhandu bhapakuika kubhoka kuuwelo, kuulabho, na kuchini, na kachikachini bhoha bhapalyehe yakulya yakubhehe Annoongo bhatekwaapanganikiha na bhapakubhehe Akolo bhabhenji. 30 Bhenibhala bhakujomolekeha na bhapakubhehe bha kujemeka, na bhenibhala bha kujemeka bhapakubhehe bha kujomolekeha."

31 Muda gogogo Mapalichayo na bhandu bhangi bhakajendela Ayesu na kwalobholela, "Mmoke pambani nnyabhule chehemu jengi kwa kubhehe Ahelode bhapala kunkoma." 32 Ayesu bhakajangula, "Nnyabhulange nkaalobholele bhena libweha, kubhehe, ‘Leleni na malabhi mbakugabhenga mahoka na kwalamianga akaatamwa, na lichobha lya tatu mbakujomola lihengo lyangu.’" 33 Hata henela, kwa leleni, malabhi na pakelu, hipalikwa nnyaule na ulendo ngwangu, kwa kubhehe bhakwa alondohi bhapakomekwa panja ja ku Yeluchalemu!. 34 "Mwe Yelusalemu, mwenga bhamwakoma akaalondoi kwa kwapotanga maganga! mala hijingi ndekulokolila kwaakumbanga bhana bhinu pamo handa ngoko chibhakondekana yaana yabhe kuhi mapapatilo gakwe nambo mwangapala! 35 Nnolange nyumba jinunji jilekitwe ukebha, ndenda kunnobholelanga ngamonanga kabhele mpaka muda gola pampakulobholanga, ‘Bhatekutendelwa gammbone bhenabho bhabhahika kwa lihina lya Hangwana.’"