1 Ayesu bhakaalobholela bhanapunji bhabhe, "Pakibha na amundu bhamo akola hilebhe bhabhakibha bhajemelela hilebhe yabhe. Akola hilebhe bhakajoa kubhee ajemelei bhabhe bhatenda kujita jita hilebhe yatendita kujemelela. 2 Lichobha limo jono akola hilebhe bhakaakema na kwaakonya yakubhee nga chikubho niki heche chinichijoine nnani jinu, ‘Nangocheni mmalangane mabhalangano ga hilebhe hintenda kujemelela kwa kubhee ligongo ngaendelea kubhee mwa ajemelei bhangu.’ 3 Bhenibhala ajemelei bhakaganikia muntima gwabhe, ‘Mbakutenda niki nangocheni? Hangwana bhangu bhatenda kumoa lihengo lya kujemelela hilebhe yabhe. Nanga machili gakombola kulema, nanenga mona honi kujopajopa. 4 Nangocheni niimanyi chimbakutenda ili handa bhamoite lihengo lyangu lya kujemela hilebhe yabhe, bhandu bhakombolange kumbokela mu nyuumba yabhenji.’"

5 Henela akaakema kila jumo jwa bhenibhala bhabhaalonganga. Bhakaalobholela bhenibhala bha kujemeka, "Mwakajahika hilengwa kwa akola hilebhe bhangu?" 6 Ngapena bhakajangula, "Mangondingo mia jimo makomi nane na nhano ga mahuta ga mzeituni, bhenibha ajemelei akaalobholela, ntole likalatachi lya ligambo linu, ntame chindema, nnyandike makomi tisa na nusu. 7 Ngapena bhakaakonya jwa bhele, mwenga mwakajaika hilengwa? Bhakajangula, magunia makomi gabhele ga ngaano. Bhenibhala ajemelei bhakaalobholela, mtole likalatachi lya ligambo nyaandike chindema magunia mia jimo na makomi sita! 8 Bhenibhala hangwana bhakaalumbalila bhenibhala ajemelei namuna chibhabhile bhakupenya. Kwa maana bhandu bha chilambo heche bhapenyitinge muno. Nambo bhandu bhabhakagula Annoongo ngabha bhakumanya handa bhenaangota."

9 Ndendakunnobholelanga, "Ayesu bhakaendelea kulongela ntumiange hilebhe ya pachilambo kuchipatilanga maganja, ili pahipakujomoka mpokelwange na Annoongo mu matamo ga machobha goha. 10 Amundu bhoha bhala bhabhaaminika mu hilebhe hichoko muno bhaaminika mu hilebhe hikolongwa, na bhoabhala bhangaaminika mu hilebhe hichoko muno ngaaminika mu hilebhe hijingi. 11 Bahi, Handa mwangabhee bhakuaminika kwa kutumia hilebhe ya pachilambo hilebhe ya pachilambo, nga ganiki jwapakunhamini kwa hilebhe ya kweli? 12 Handa ngaaminika kwa hilebhe ya amundu bhangi nga aganiki bhabhapakunhamini kumpekea hilebhe hinu mwabhene?"

13 "Jwaakwa antumichi jwakombola kwatumikilanga akakolo bhabhele. Kwa kubhee bhapakwaapala jumo na kwaachimwaa joongi. Ngakombolanga kwatumikila Annoongo na mbiha kwa wakati gumo."

14 Nambo Mafalisayo bhabhakibhanga bhapalanga mbiha pabhakagajoha genago, bhakajemeka kwaabhelua Ayesu. 15 Ayesu bhakaalobholelanga, "Mwangota bhandu mchitendanga kubhee bhammbone nnongi ja bhandu, nambo Annoongo bhatenda kuimanya mitima jinunji. Kwa kubhee yakubhee bhandu bhachilola kubhee chammbone muno chitenda kuchimwa nnoongi ja Annoongo."

16 "Malagilo ga Amusa na majigano ga akaalondohi bha Annoongo gatendita kutangachwa mpaka muda gwa Ayohana. Kujemeka gono muda Ngani Jammbone ja Ukolo gwa Annoongo jitenda kutangachwa na kila jumo bhajingila monomwe kwa machili. 17 Nambo nga kujojoka muno kunani kulihunde na chilambo kupeta kupunda hata lijaandiko limo kubhoka mu Malagilo ga Amusa."

18 "Mundu johajola jwampekea hanu bhabhe talaka na kulombela hanu jongi bhatenda ngongola, na amundu bhoa bhala bhabhalombela ahikege bhabhalekitwe, bhatenda ngongola."

19 "Pakibha na mundu jumo akola hilebhe bhabhatendita kuwala ngobho ya kualala na ya bei ngolongwa na bhatendita kutama umomi gwa kuchikonja machobha goha. 20 Pannlyango pa bhena akolo hilebhe pakibha na haocho bhamo lina lyakwe Alazalo bhabhakibha hilonda mmele goha. 21 Bhenabho Alazalo bhakalokolila kuchijukutia kwa chakulya chichikagwehe pahi ja mecha kwa bhenibhala akola hilebhe. Hata himbwa hikahikanga kwaalamba hilonda yabhe! 22 Lichobha limo bhenibhala haocho Alazalo bhakajomoka, nabhena antumichi bha kunani kulihunde bha Hangwana bhakaapetula bhatame pamo na Aibulahimu, na bhenibhala akola hilebhe bhakajomoka na bhakaachika. 23 Jonojwe akola hilebhe, pabhakibha mu hibhini muno mahali kwa bhandu bhabhawilinge, bhakalola kunani, na bhakaabhona Aibulahimu kwa kutali na Alazalo kubhandikila na bhena. 24 Henela bhenibhala akola hilebhe bhakaakema kwa lilobhe likolongwa, ‘Mwe Atati Aibulahimu ngolee kiha na mwaatume Alazalo bhachubhike lukonji lwabhe nkati ja machi bhagukolonikie lulimi lwangu, ligongo ndenda kuulala muno pamoto mahali pambani. 25 Nambo Aibulahimu bhakaajangula, mwanangu nkombokele mwenga nkapokela yaambone mu umomi gwinu, nambo Alazalo bhakapokela gangalimmbone mu umomi gwabhe. Nambo nangocheni Alazalo bhatendakuchikonja pambani na mwenga ntendakulaga. 26 Kupunda ja genago nkati jitu na mwangota konokwe, kubhekitwe lihembo likolongwa, ili bhenibhala bhabhapalanga kubhoka kongo kuhika konokwe bhakotokombola, wala mundu joha jola bkotokombola kujoomboka konokwe kuhika kwaachitu.’ 27 Bhenibhala akola hilebhe bhakaapembelea, atati Aibulahimu ndenda kunnyopa, muntume Alazalo bhajaule kwa akaanung'una bhangu, 28 maana ndekola akaanung'una bhangu nhano. Bhajaule bhakaakelebhue ili bhenaangota bhakoto kuhikanga kongoni ku hibhini. 29 Aibulahimu bhakajangula, anung'una bhinu bhabhii na Amusa na akaalondohi bha Annoongo, mwaalekange bhabhajohanikiange bhenaangota. 30 Bhenibhala akola hilebhe bhakalobhola, ngabha henela atati Aibulahimu, nambo amundu handa bhayookite na kwaajendelela na kwaakelebhua bhapakulekanga mabhou na kwaatendebhukila Annoongo, 31 Na bhena Abulahimu bhakaalobholela, handa bhangajohanikianga Amusa na akalondohi bha Annoongo, na hata handa bhajawile amundu bhabhayookite kubhoka kwa bhabhawilinge ngaajonikianga."