1 Ayesu bhakaakemanga pamo bhenibhala komi na bhabhele, na kwaapekeha machili ga na mamulaka ga kubhoa mahoka goha, na uwecho gwa kwaalamia akaatamwa. 2 Ngapena bhakaatumanga bhajaulange kutangachanga ntandaa gwa Annoongo na kwalamianga akaatamwa. 3 Bhakaalagiaga bhabhikulobhola, "Nkotokupetulanga choha chela pamjaulanga ulendo, wala nkotokupetula nhimbati, wala nkoba, wala chakulya, wala mbiha, na wala ngobho ja kutingiganya. 4 Nyuumba joha jela jimpakujingilanga na kupokelwa, mtamange monomwe mpaka pampakubhoka mu chilambo chenecho. 5 Handa bhandu bhapakunkananga kumpokelanga mu nyuumba yabhenji mmokange mu chilambo chabhenji, nkung'undange lutukunda mumakongono ginu ili kulangiha kubhehe bhenaangota bhatekana kupokela Lilobhe lya Annoongo." 6 Henela, bhenibhala komi na bhabhele bhakajemeka ulendo kujenda kila chijiji mpaka chijiji, bhabhikutangachanga Ngani Jammbone ja Annoongo na kulamiha akaatamwa kila mahali.

7 Bahi, Ahelode atabhala jwa ku Galilaya bhakajohanikiha ngani ja goha gagatendikaje, na bhenabho bhakahechuka kwa kubhehe bhandu bhakibha bhakilobholanga, "Bhenibhala Ayohana ambatichaji bhatekuyoka!" 8 Nambo bhangi bhakalobholanga Aeliya bhatekwaabhokela, na bhangi bhakalobholanga kubhehe jumo jwa akalondohi bha Annoongo bha lolo bhatekuyoka. 9 Nambo Ahelode bhakalobhola, "Bhena Ayohana nakaheketa mutwe. Nangocheni nga aganiki chindenda kujohanikiha ngani yabhe?" Bahi bhakapala muno bhaalole.

10 Bhenibhala akandundame pabhakabhujanga, na bhakaalobholela Ayesu yoha hibhakatendanga. Ayesu akabhapetulanga, bhakajaulanga akachinabhene kwa kuchiiya ku chilambo chimo chichikemwa Betisaida. 11 Nambo lilubhalo lya bhandu pabhakahimanya kubhakajaula Ayesu, bhakaakagula. Bhakaapokelanga na kulobhola nabho nnani ja ukolo gwa Annoongo na kwaalamiha bhenibhala bhoha bhabhakapalanga kulamiwa. 12 Lyobha palikajemeka kutipika, bhenibhala akandundame komi bhabhele bhakaajendela Ayesu na kwaalobholela, "Mwataukange bhandu bhajaulange mu hijiji na migomba hihibhandikile, bhakachipatilange chakulya na mahali pakugolokanga, kwa kubhehe pambani patubhile pangali chilebhe." 13 Nambo Ayesu bhakaalobholelanga, "Mwapangange mwangota chakulya."

Bhenibhala bhakajangula, "Tubhile na mikate nhano na homba bhabhele tu. Labuda tujabhule tukahemele chakulya cha kwakwelanga bhandu bhoa!" 14 Kwakubhehe bhakibhanga na akanalome handa 5,000.

Bahi, Ayesu bhakalobholelanga bhenibhala komi na bhabhele, "Mwalobholelange bhandu bhatamange mu mabhoga ga bhandu makomi nhano makomi nhano." 15 Bhenibhala komi na bhabhele bhakatendanga handa chibhalobholilwe. Na bhakaatamianga bhoha. 16 Ngapena Ayesu bhakatola yeniyela mikate nhano na homba hibhele, bhakalola Kunani kulihunde, bhakaachukulu na kwaalumbalila Annoongo na bhena bhakajimetula ngapena bhakaapekeanga bhanapunji ili bhaapekeange bhandu. 17 Bhandu bhoha bhakalyehe, bhakajukutanga. Na bhenibhala akaandundame bhakakumbanga mbakatika ya hiikahigalila, bhakatweleanga hikapu komi na hibhele.

18 Lichobha limo, Ayesu bhatendita kujopa pa ntemela, bhakibha pamo na bhanapunji bhabhe. Bhakaakonyanga, "Bholi, bhandu bhalobhola nenga nga aganiki?" 19 Bhanapunji bhakaajangula, "Bhangi bhalobhola mwenga nga Ayohana mmbatichaji, na bhangi bhalobhola mwenga nga Aelia, na bhangi bhalobhola mwenga nga jumo jwa alondoi bha Annoongo bha lolo bhabhayokite."

20 Ngapena Ayesu bhakaakonyanga, "Bholi, mwangota mwalobholanga nenga nga aganiki?"

Apetulo akajangula, "Mwenga nga Akilichito bhabhaagaulikwe na Annoongo."

21 Ayesu bhakaakelebhua muno bhakoto kwaalobholela amundu bhoha bhala ngani hejo. 22 Ayesu bhakalobhola kabhele, "Jitekwaapala Mwana jwa Amundu kulaga muno mu hilebhe hijingi kukanwa na akahokolo, na akaakolo bha akaakung'i na bhabhajigana amuli ga Amusa, na bhenabho lazima bhakomekwe nambo mu lichobha lya tatu baada ja malilo gabhe bhapakuyoka." 23 Ngapena bhakalobholelanga bhoha, "Mundu johajola bhabhapala kungagula nenga nga hipalikwa bhachikane bhene, na bhapaalikwa bhabhee amundu bhabhangagula nenga kila lichobha. 24 Kwa maana mundu jwapala kugukomboha umomi gwabhe bhene, bhapakugahobha, nambo bhoha bhala bhabhapakugujeha umomi gwabhe kwa ligongo lya nenga, amundu habho bhapakugakomboa. 25 Bholi, bhapakupata chiniki amundu kuchipata chilambo choha na kugutinia umomi gwabhe? 26 Handa amundu bhoha bhala bhapakumonela honi nenga na majigano gangu, Mwana bha Amundu bhapakummonela honi amundu habho chibhapakuhika mu ng'anyimo gwabhe na ng'anyimo gwa Atati, na ng'anyimo gwa akaatumichi bha kunani kulihunde bhabhabhii bha Annoongo. 27 Kweli ndenadakunnobholelanga, bhabhilinge bhandu bhangi bhabhajemitinge pambani ngawee mpaka pabhapagubhona ukolo gwa Annoongo."

28 Likibha lichobha lya nane baada ja Ayesu kulobhola genago, bhakaapetula Apetulo, na Ayohana, na Ayakobo bhakakwelanga pamo nabho kulitombi kujopa. 29 Pabhakibha bhatendita kujopa, kubhonekana kwabhe kumiho kukatendebhuka umiho, ngobho yabhe hikibha hihuhu muno na kumelemeta muno. 30 Popopo bhakabhonanga bhandu bhabhele, Amusa na Aeliya bhabhi kulongela nabho, 31 bhakabhonekanga bhabhi na ng'anyimo, bhabhi kulobholanga na Ayesu ngani ja malilo gabhe kubhehe bhapakomekwa konokwe ku Yelusalemu. 32 Apetulo na akaajabhe bhakibha bhatekugoloka lugono lwa kutopa, nambo pabhakajimuka bhakabhonanga ng'anyimo gwa Ayesu na bheni bhala bhandu bhabhele bhabhakibha bhatekujema pamo na bhenabho. 33 Bahi, bhenabho bhandu bhabhele pabhakibha bhatendakujaula, Apetulo bhakaalobholela Ayesu, "Hangwana nga yammbone twenga tutame pambani, bahi tuchenge hilendo hitatu, chimo chinu mwenga na chengi ja Amusa, na chengi ja Aelia". Nambo Apetulo bhakibha ngachimanya chibhalongile. 34 Apetulo pabhakibha bhalongela malobhe, likahikila lihunde likaawekelanga na bhenaangota bhakajogopanga pabhakajingilanga nkati ja lihunde lyene. 35 Lilobhe likajohanika kubhoka mu lyela lihunde, likalobhola, "Habha nga mwana jwangu ndekunhagula, munnyohanikiange jonojwe." 36 Baada ja lilobhe helyo kujohanikiha, Ayesu bhakabhonekana bhakibha jika jabhe. Na bhabapunji bhabhe bhakakotokanga bhakotokunnobholela amundu wakati gonogwe.

37 Malabhi jakwe baada ja kubhoka kulitombi, lilubhalo likongana lya bhandu likakongana na Ayesu. 38 Penapo amundu bhamo mu lyeni lyela lilubhalao bhakapota nyenye bhabhi kulobhola, "Bhakujigana ndenda kunnyopa mwaalole mwanangu kwa ligongo nga mwana jwangu jwa jika! 39 Ligonog lihoka litenda kwaajingila, bhatendakupota bhapote nyenye, na bhannekela chihundu hindu, na kwaagwia na lipou lyabhoka mkang'wa. Benabho lihoka lyalagia muno na ngaaleka ila mala kachoko. 40 Ngajopanga bhanapunji bhinu bhammoe bhenabho lihoka, nambo bhangakombola." 41 Ayesu bhakajangula, "Mwe chibhelei chibhou na changahobhalelaa na ndame na mwangota muuda ntandao kiasi niki nga nkombolange kunhobhalela?" Ngapena Ayesu bhakaalobholela bhena amundu, "Munnete mwana jwinu pambani." 42 Hata bhenibhala amwana pabhatendita kuhika, bhenibhala lihoka bhakaagwia pahi na bhakalekela chihindu hindu. Nambo Ayesu bhakalikapila lyenelyo lihoka bhaabhoke mwana, bhakaalamia bhenibhala mwana na kumujia kwa atati mundu. 43 Bhandu bhoha bhakakangachanga muno kwa ukolo gwa Annoongo.

Bhenibhala bhandu pabhakibha tangu bhakakangachanga nnani ja goha gagatendikwe, na Ayesu bhakalobholelanga bhanapunji bhabhe,

44 "Nnyohanikihange maha ganga gampakunnobholelanga nangocheni, Amwana bha Amundu bhajaula kubhekwa pahi ja mamulaka ja bhandu." 45 Nambo bhenaangota bhangabhahimanyanga maana jakwe niki. Maana ja malobhe genago gakachihiya kwabhenji, henela bhakajogopanga kwaakonya maana ja chilongelo chenecho.

46 Kukabhokela kutaukananga akaachinabhene bhenibhala bhanapunji nnani ja aganiki jwaapakubhehe akolo kupunda bhangi bhoha. 47 Nambo Ayesu bhakagamanya maganikilo hgabhenji, bahi, bhakaapetula amwana chilemba, bhakaabheka kubhandikila na bhenabho, 48 ngapena bhakaalobholelanga, "Amundu bhoha bhala jwaapakumpokela habha amwana nchoko kwa lihina lyangu, bhambokelanga nenga, na bhoha bhala bhabhambokela nenga, bhaapokela bhenibhala bhabhandumite. Kwa kubhehe jonijola jwabhile achoko muno kupeta bhoha pakati jinunji nga jwabhile akolo kupeta bhoha."

49 Ayohana bhakalobhola, "Hangwana, tutekummona amundu bhabhi kubhoa mahoka kwa lihina linu na twenga tukaakanikia, kwa kubhehe bhenabho ngabha jumo jwitu." 50 Nambo Ayesu bhakalobhola, "Nkotokwaakanikia, kwa kubhehe bhoabhala bhabhangataukana na mwaangota bhabhii upande gwinu."

51 Bahi, wakati pagukabhandikila machobha ga Ayesu kupetulikwa kunani Kulihunde, bhenabho bhakapala muno kujaula ku Kuyelusalemu. 52 Bahi bhakaatuma bhabhatumwanga kulongolela, na bhenaangota bhakajaulanga na kujingila mu chijiji chimo cha ku Samalia, bhaatendelee kila chilebhe. 53 Nambo bhandu bha chijiji chela bhakakana kwaapokela Ayesu kwa kubhehe bhakahimanya kwakubhehe bhapala kujaula Kuyelusalemu. 54 Bhanapunji bhabhe, angota Ayakobo na Ayohana pabhakabhona genago, bhakalobholanga, "Hangwana, mpala tulagie moto kubhoka Kunani Kulihunde ili gwaatiniange?" 55 Nambo Ayesu bhakaatendebhukila, na kwaakalipilanga. 56 Ayesu pamo na bhanapunji bhabhe bhakabhoka na kujaula ku chijiji chengi.

57 Pabhakibhanga nndela bhahi kujaula, mundu jumo bhakalobholela Ayesu, "Mbakunkagula kohakola kumpakujaula." 58 Ayesu bhakaajangula, "Mabweha gatekola mbako, na hijuni ya kunani bhatekola yuho, nambo Mwana jwa Amundu bhangali pakugoloka wala kupomolela". 59 Ayesu bhakalobholela amundu bhangi, "Nngagule."

Nambo bhenabho bhakajangula, "Hangwana, nneke hoti nnyaule ngaachike atati bhangu" 60 Ayesu bhakaalobholelanga, "Mwaleke bhabhawilinge bhaachike bhabhawilinge ajabhe, nambo mwenga nnyaule nkatangache ukolo gwa Annoongo." 61 Na mundu jongi bhakaalobholela, Hangwana, "Nakunkagula nambo ndenda kunnyopa oti ngaatabhuke bha kwaachangu". 62 Ayesu bhakaalobholela, "Amundu joha jola bhabhajemeka kulema na kongo bhabhii kulola kuyeto, bhena amundu ngapaalikwa mu ukolo gwa Annoongo."