1 Pabhakibha bhatendakubhandikila ku Yelusalemu, upande gwa chijiji cha ku Betifage na chijiji cha ku Betania, kubhandikila na litombi lya Mizeituni. Ayesu bhakaatumanga bhanapunji bhabhe bhabhele bhaalongolele, 2 bhakaalobholelanga, "Nnyendange mu chijiji chichibhii nnongi jinunji. Pampakujiingilanga monomwe, mpakunkolela mwana liponda atabhitwe, yakubhehe bhangatamilwa na amundu bhoabhala panng'ongo gwabhe. Mung'opolange munnetange pambani. 3 Handa amundu bhoabhala bhankonyitinge, ‘Mboni ntendanga henela?’ Munnobholele, ‘Hangwana bhatendakumpala na bhapakwabhujia pambani muuda nyipinyipi.’"

4 Bahi, bhakajaulanga, bhakaakolela mwana jwa liponda atabhitwe nngulugulu mwa ndela, kubhandikila na nlyango gwa nyuumba, pabhakibha bhatendakwaagopola, 5 bhandu bhangi bhabhakibha bhabhandikile na penapo bhakaakonyanga, "Mwangota ntendanga niki penapo, kwa niki ntendakung'opolanga mwana jwa liponda?"

6 Bhenibhala bhanapunji bha Ayesu bhakajangulanga handa chibhakalobholelwanga na Ayesu, na bhakaalekeleanga bhajaulange. 7 Bhakaapelekela Ayesu jono mwana jwa liponda, bhakatandikanga ngobho yabhenji nnani ja mwana jwa liponda jonojwe na Ayesu bhakatama nnani jakwe. 8 Bhandu bhajingi bhakatandikanga ngobho yabhenji nndela, na bhangi bhakatandikanga nyaambi ya mikongo hibhakaheketanga mmigonda. 9 Bhandu bhabhakalongolelanga Ayesu na kwaakagula kuyetu, bhakakweanga malobhe gabhenji bhabhi kulobholanga, "Alumbalilwe Annoongo! Atendelwe gammbone bhenabho bhabhahika kwa lina lya Hangwana! 10 Annoongo agutendele gammbone ukolo guguhika gwa atati bhitu Adaudi. Alumbalilwe Annoongo bha kunani kulihunde!"

11 Ayesu bhakajiingila ku Yelusalemu na kujaula jimo kwa jimo pa Nyuumba ja Annoongo, bhakalolekea kila chilebhe maha. Nambo kwakubhehe ikabhehe kimuo, bhakabhuja ku Betania na bhanapunji bhabhe bhenibhala komi na bhabhele.

12 Malabhi jakwe pabhakibhanga bhatendakubhoka ku Betania kujaula ku Yelusalemu, Ayesu bhakibha na njala. 13 Bahi, bhakabhona kwa kutali nkongo gwa ntini gubhii na mahamba gajingi. Akaujeendela ili bhalole handa gubhii na libibo lyohalela. Pabhakaguhikila, bhakakolela gubhii na mahamba jika, kwakubhehe gukibha ngabha muuda gwa kuhogola mabibo. 14 Ayesu bhakagulobholela gonigola nkongo gwa ntini, "Kubhokela leleni na hata machobha goha gongo ntini ngaogola kabhele mabibo."

Bhanapunji bhabhe bhakaajoa bhabhikulongela genago.

15 Pabhahikanga ku Yelusalemu, Ayesu bhakajingila mu luhani lwa Nyuumba ja Annoongo na kujemeka kwaabhenganga panja bhandu bhabhatendita kuucha na kuhemela hilebhe monomwe. Bhakaipendekula meecha ya bhenibhala bhabhatundigananga mbiha, na hitengu ya bhenibhala bhabhauchitanga njebha, 16 na Ayesu bhakaahibhilanga bhandu kupetula chilebhe choachela pa luhani lwa Nyuumba ja Annoongo. 17 Na bhena Ayesu bhakaajigananga, "Bholi, jangajaandikwa, ‘Nyuumba jangu jipaakemwa nga nyuumba ja kujopela bhandu bhoa.’ Nambo mwangota mujitendite kubhehe nyuumba ja bhabhapoka hilebhe!"

18 Akaakolongwa bha akaakung'i na bhabhajigana Malagilo ga Amusa pabhakajoanga genago, bhakajemekanga kulolea ndela ja kupala kunkoma Ayesu. Nambo bhakaajogopa kwa ligongo nkutuli gwa bhandu gukakangacha majigano gakwe.

19 Pajiikibha kimuo, Ayesu na bhanapunji bhabhe bhakabhokanga ku Yelusalemu.

20 Kundabhi tuputupu, pabhakibha bhatendakupeta, bhakagubhona gonigola nkongo gwa ntini gujomite gwoa, kubhokela kumikega mpaka nnani kumahamba. 21 Apetulo bhakagukombokela, bhakaalobholela Ayesu, "Bhannyigana, nnole! Gonigola ntini guntekugulaani, gujomite!"

22 Ayesu bhakaalobholelanga, "Munhobhalelange Annoongo. 23 Ndendakunnobholelanga kweli, amundu handa bhalilobholile litombi hele, ‘Nnyikuke nkachijee mu bahali,’ pangali kubhehe na bhoga muntima gwabhe, ila handa bhahobhalile hikubho yoha kubhee gabhalongile gatendakuteendeka, bhapakuteendelwa chikubho chenecho. 24 Ligongo lya henela ndendakunnobholelanga, goha pannyopanga na kuchali na kwaajopa Annoongo choachela nhobhalelange kubhehe nchipokilinge na chene chipakubhee chinunji. 25 Kila pannyopanga, munnekelele kila amundu bhabhannemwitinge, nabhena Atati bhinunji bha kunani kulihunde bhapakunnekelelanga mwangota kulemwa kwinunji." 26 Nambo, "Handa mwangota ngaalekeleanga bhandu kulemwa kwabhenji, hata Atati bhinunji bhabhabhii kunani kulihunde bhapakwalekeleangahopo mwangota kulemwa kwinunji."*

27 Ayesu na bhanapunji bhabbhe bhakahikanga ku Yelusalemu, pabhakibha bhatendakujenda paluhani lwa Nyuumba ja Annoongo, akolongwa bha akaakung'i na bhabhajigana Malagilo ga Amusa pamo na akanahota bhakaajendelela Ayesu. 28 Bhakaakonyanga, "Genigala gantenda kila lichobha, bholi, ntenda kwa mamulaka niki? Ganiki bhabhampile mamulaka ga kutenda heye hikubho?"

29 Ayesu bhakaajangulanga, "Mbakunkonyanga likonyekelo limo, handa mpakujangula, na nenga mbakunnobholelanga ndenda hikubho heye kwa mamulaka niki. 30 Nnobholelange, mamulaka ga Ayohana ga kwaabatichanga bhandu gakabhoka kwa Annoongo au kwa bhandu?"

31 Bhakajemekanga kuchikonyanga bhakalobhola, "Handa tuloobhwile, ‘Gakabhoka kwa Annoongo,’ bhapakonya, ‘Mboni mwangahobhalelanga Ayohana?’ 32 Na handa tuloobhwile, ‘Gukabhoka kwa bhandu,’ bhandu bhapakuchimwanga." Bhakaajogopanga bhandu kwakubhehe bhoa bhakahobhalelanga kubhehe Ayohana bhakibha alondoi bha Annoongo. 33 Henela bhakaajangula Ayesu, "Twenga tuhimanyi hopo."

Na bhena Ayesu akaalobholelanga, "Na nenga ngaalobholelanga ndenda hikubho heye kwa mamulaka niki."