1 Ayesu bhakaendelea kwaalobholelanga, "Kweli ndendakunnobholelanga, bhabhilinge bhangi pani pani kubhehe ngawenganga tangu kugubhona ukolo gwa Annoongo gubhikuhika kwa machili."

2 Pagakajomoka machobha sita, Ayesu bhakaapetula Apetulo na Ayakobo na Ayohana bhakaapelekanga nnani ja litombi litandamao, gubhakibha jikajabhenji. Konokwe Ayesu bhakabhonekana mu nng'anyimo gwakwe nnongi jabhenji, 3 na ngobho yabhe hikibha hiyuu kuu, namuna yakubhee amundu bhoabhala bhabhachapa pambani padunia bhakoombolahopo kuijelejea namuna jenajo. 4 Ngapena bhanapunji bhatatu bhakaabhonanga alondohi Amusa na alondohi Aelia, bhabhikulongela na Ayesu. 5 Apetulo akaalobholela Ayesu, "Bhannyigana, nga yammbone twenga kubhee pambani. Bahi, mbaya tucheenge hilendo hitatu, chimo chinu mwenga, chimo cha Amusa na chimo cha Aelia." 6 Apetulo na bhakaajabhe bhakajogopanga muno hata bhangamanya cha kulongela.

7 Ngapena likabhokela lihunde likaawekelanga, na lilobhe lya Annoongo likajoanika kubhoka mu lyenilela lihunde hibhikulobhola, "Jonjo nga Mwana jwangu junaapala, munnyonikiange." 8 Popopo bhanapunji bhabhe bhakalolanga kongo na kongo, nambo bhangammona amundu bhangi bhoabhala pamo na bhenaangota, ila nga Ayesu jikajabhe.

9 Pabhatendita kutuluka kubhoka kulitombi, Ayesu bhakaakelebhuanga, "Bhakotokunnobholelanga amundu bhoabhala hikubho hibhaibhonitinge, mpaka nenga Amwana bha Amundu chimbakuyoka."

10 Bhakagakamula malagilo genago, nambo bhatendita konyananga bhenaangota akaachinabhene, "Kongo kuyoka maana gakwe niki?" 11 Na bhenaangota bhakankonya Ayesu, "Kwa niki bhabhajigananga malagilo ga Amusa bhalobholanga kubhehe nga hipaalikwa bhaike oti Aelia bhabhitangu kuhika Akilisito?"

12 Ayesu bhakaajangulanga, "Eloo, Aelia bhatendakuhika oti kubheka hilebhe yoa maha. Hata henela, kwa niki bahi hitekujaandikwa mu Majaandiko ga Annoongo kubhehe Amwana bha Amundu bhapakulaga muno na kwaabhelua? 13 Nambo ndendakunnobholelanga, Aelia aikite, bhenaangota bhakaatendela chibhakapalanga handa chiikajaandikwa nnani jabhe."*

14 Ayesu pamo na bhenibhala bhanapunji bhabhe bhatatu pabhakahikanga kwa bhanapunji bhangi, bhakaakolelanga bhatekutindilwanga na lilubhalo likolongwa lya bhandu na teno ja bhabhajigana Malagilo ga Amusa bhakibha bhatendakulongela nabho. 15 Kachoko bhenibhala bhandu pabhakammona Ayesu, bhoa bhakakangachanga muno, bhakammutukila ili kwaachalimia. 16 Ayesu akaakonyanga bhanapunji bhabhe, "Ntaukananga na bhenaangota nnani ja niki?"

17 Amundu bhamo pakati ja lyalyee lilubhalo likolongwa lya bhandu bhakajaangula, "Bhannyigana, naaletite mwana jwangu kwaachinu, bhatekola lihoka lilyatenditendite kulepela na kulongela. 18 Kila mala lyene lihoka palyaajingila, kwaagwia pahi na kwaatenda lyabhoke lihuluhulu nkang'wa, bhabhikuyaga mino na kakamala mmele goha. Nakaajopanga bhanapunji bhinu bhammoe lyene lihoka nambo bhakalepelanga."

19 Ngapenga Ayesu akaalobholelanga, "Mwangota chibhelei changahobhalela! Mbakutama na mwangota mpaka lii? Mbakumpumilianga mpaka lii? Munnetange jono kakombo kwaachangu." 20 Bhaangota bhakanneta jonijola kakombo. Lyenileya lihoka palikaabhona Ayesu.

Kachoko bhakaalekela chitamwa cha chihinduhindu jonijola kakombo, bhakagwee pahi, bhakagalabhuka pahi kongo lihuluhulu libhii kwaapita nkang'wa. 21 Ayesu bhakaakonya atati bhabhe,

"Mwana jwinu bhajeemike kulwala henela kubhokela lii?" Na atati bha jonijoo mwana bhakaajangula, "Habhitangu mwana. 22 Nambo mala hijingi lyene lihoka litendita kwaagwia pa moto au pa machi ili bhaakome. Nambo handa nkombwile kutenda chikubho chohachela choonde ntukolee kiha ntujangatile!"

23 Ayesu bhakaalobholela, "Handa nkombwile! Goha gakomboleka kwa bhoabhala bhabhahobhalela."

24 Ngapena bhenibhala atati bhakaguta kwa lilobhe, "Ndendakuhobhalela, nambo nnyangatile ili ngombole kohobhalela."

25 Ayesu pabhakabhona lilubhalo lya bhandu bhajingi litendakujonjokeka chindema nnongi jabhe, bhakaakalipila lyenilyee lihoka na bhakaalobholela, "Mwenga lihoka lilyatenda hojo kakombo kubhehe ngalongela na nkomela, ndendakunhukumula, mwaabhoke hojo kakombo na wala nkotokwaajingila kabhele!"

26 Ngapena lene lihoka likapalia lilobhe, akaagwia jono kakombo pahi, ngapena akaabhoka. Jonijola mwana akibha handa malilo, na bhangi bhakalobolanga kubhee, "Ajomwike!" 27 Nambo Ayesu bhakaakamula lubhoko, bhakannyimua, nabhena bhakajema.

28 Bahi, Ayesu pabhakajiingila mu nyuumba, bhanapunji bhabhe bhanankonya bhabhjikajabhenji, "Bholi, kwa niki twenga twangakoombola kwaabhoa lenilyee lihoka?"

29 Na bhena Ayesu akaalobholelanga, "Lihoka lya jonjoni ngakombola kubhoka ila nga hipaalikwa kwa kujopa tu."

30 Ayesu na bhanapunji bhabhe bhakabhokanga penapo, bhakaendeleanga na ulendo kupetela chilambo cha ku Galilaya. Ayesu bhangapala bhandu bhaimanye pabhabhile, 31 ligongo bhatendita kwajigana bhanapunji bhabhe. Bhakaalobholelanga, "Nenga Amwana bha Amundu mbakugalukwa na kulekelwa mu mabhoko ga bhandu na bhenaangota bhapakungoma, nambo lichobha lya tatu mbakuyoka."

32 Nambo bhanapunji bhabhe bhangaimanya maana ja chenichela chibhakalobholelwa, bhakajogopanga kwaakonya.

33 Ayesu na bhanapunji bhabhe pabhakahikanga ku Kapelenaumu, na pabhakibhanga pakaja, bhakaakonyanga, "Ntendita kutaukana chiniki nndela?"

34 Nambo bhenaangota bhakatamanga jii, maana nndela bhatendita kutaukana nga ganiki bhabhabhii akolo pakati jabhenji.

35 Ayesu bhakatama pahi, bhakaakemanga bhenibhala bhanapunji komi na bhabhele, akaalobholelanga, "Mundu bhoabhala bhabhapala kujemeka hipaalikwa bhabhee bha mwicho kwa akaapangana mahengo bhoha." 36 Ngapena akaatola mwana achokochoko, bhakannyemea pakati jabhenji, bhakaakumbatila, na kwaalobholelanga, 37 "Bhabhampokela mwana handa hojo ligongo lya lihina lya Ayesu, bhambokile na nenga, na bhabhambokela nenga, bhambokelahopo nenga jika jangu, bali nga bhaapokela bhenibhala bhabhandumite."

38 Ayohana akaalobholela Ayesu, "Bhannyigana, tumweni mundu jumo bhabhikubhoa lihoka kwa lihina linu, na twenga twakalenga kwaakelebhua ligongo nga jumo jwitu."

39 Nambo Ayesu akalobhola, "Nkotokunkanikia, maana bhakwa amundu bhabhatenda yakangachika kwa lihina lyangu, ngapena kombola kulongela gangalimmbone nnani jangu. 40 Ayesu bhakaalobholelanga nkotokwahibhila amundu habha chibhatenda. Kwakubhee amundu bhaobhala bhangatukaana twenga, bhabhii pamo na twenga. 41 Ndenda kunnobholelanga kweli mundu johajola jwaampekeanga chikombe cha machi ga kung'wee kwa lihina lyangu, ligongo mwangota nga bhandu bhabhe Kilisito, kweli ngapelela kupata hingwa yabhe."

42 "Handa mundu johajola bhaanyambukia jumo jwa akaachokochoko habha bhabhatendakunhobhalela kutendanga mabhou, hikabhehe mbaya mundu jonojwe kutabhwa liganga likolongwa lya kuyagila muntandala gwakwe na kwaatumbukia mubahali. 43 Handa lubhoko lwinu lunyaambwie kutenda mabhou, muguhekete! Nga mbaya kujiingila mu umomi gwa machobha goha mmi na lubhoko lumo, ila nga kubhehe na mabhoko goha na kujiingila mu lihembo lyangapela konokwe nga kubhii na moto gwabhe ngahimika machobha goha. 44 Monomwe, mmi na unyee yangawee, na moto gwabhe ngahimika.* 45 Na lukongono lwinu handa lunyaambwie kutenda mabhou, muguhekete! Mbaya kujiingila mu umomi gwa machobha goha pangali kubhehe na lukongono lumo, ila nga kubhehe na makongono goha na kujiingila mu lihembo lyangapela konokwe yakubhee moto gwabhe ngahimika. 46 Monomwe, mmi na unyee yangawee, na moto gwabhe ngahimika. 47 Na lio linu handa linyaambwie kutenda mabhou, mulibhoe! Mbaya kujiingila mu ukolo gwa Annoongo kongo mmi na lio limo tu, kuliko kubhehe na mio goha na kunnyea mu lihembo lyangapela. 48 Monomwe, unyee yabhe ngawee, na moto gwabhe ngahimika."

49 "Annoongo bhapakwapetea kila amundu mu hibhini hiilandana na moto, handa henela bhandu chibhapakalanga mwinyo mu ndulu tangu kujitinia."

50 "Mwinyo nga gwammbone, nambo handa kunong'a kwakwe kuhobhite, mpakutenda chiniki ili jinong'e kabhele?"

"Na mwangota mmangange handa mwinyo gugukolonika, yani mmangange bhandu bha kuchikichana mwakaachinabhene."