1 Ayesu bhakajemeka kujigana kabhele bhakibha kubhandikila na litanda lya ku Galilaya. Lilubhalo likolongwa lya bhandu bhajingi likaatimbilila na hikaapalikwa bhajingile mu ntumbwi gugukibha mu litanda na kutama monomwe. Na bhena bhandu bhoha bhakibha bhatamitinge nngulugulu ja litanda pachilambo chijomo panga machi. 2 Akaajigananga hilebhe hijingi kwa kulandanakia, na mu majigano gabhe akaalobholelanga,

3 "Nyoonikiange! Alemi bhamo akajaula kumicha mbeju. 4 Pabhatendita kumicha mbeju, yengi hikagwee nngulugulu mwa ndela, hijuni hikaika na kulyee. 5 Yengi hikagwee pamwala pangali na undopi nniyngi, hikamela chindema kwa kubhehe undopi gukibha kachoko. 6 Lyobha palikapitila, hikanyalila, na kwa kubhehe mikega yabhe ikibha yangatibhila pahi muno, hikajoma. 7 Mbeju yengi hikagwila mu miibha, na yene miibha hikakola na kuhiminya minya henela yangahogola mbeju joajela. 8 Yengi hikagwila mu undopi gwammbone, hikamela maha na kukola na kuogola, gumo gukaogola makomi gatatu, gongi makomi sita na gongi makomi komi."

9 Ngapena Ayesu akaalobholelanga, "Bhabhabhii na machikilo gakujohanikia na bhajoanikie!"

10 Nambo Ayesu pabhakibha jikajabhe, pakati ja bhenibhala bhabhannyoa bhakaajendelela pamo na bhanapunji bhabhe komi na bhabhele bhakahika kwaakonya maana ja kulandanikia konikola. 11 Na Ayesu akaalobholelanga, "Mwangota ntekupatanga kuimanyanga chili ya ukolo gwa Annoongo, nambo bhenibhala bhabhabhilinge panja bhapakulobholelwanga kila chilebhe kwa kulandanakia, 12 ili,

‘Bhalolange kweli, nambo bhakotokubhonanga.

Bhajoange kweli, nambo bhakotokuhimanyanga.

Handa bhaimanyitinge, bhapakwaabhujila Annoongo ili bhaalekelelanga.’"

13 Ngapena, Ayesu akaakonyanga, "Bholi, mwangota ngamanya maana ja kulandanakia kongoni? Nangocheni mpakombola bholi kumanyanga kulandanikia kongi? 14 Bhabhamicha kumicha lilobhe lya Annoongo. 15 Bhandu bhangi nga handa mbeju hiikagwila nngulugulu ja ndela bhalandala na bhandu bhabhajoine lilobhe lya Annoongo nambo baada ja kulijoa Lichetani kuhika na kulitola lilobhe lilipandintwe nkati jabhenji. 16 Mbeju hiigwila pa undopi nchokochoko nga handa bhandu bhabhajoa lilobhe na kulipokela kwa kuhangalala. 17 Nambo bhabhahobhalela lilobhe kwa muda n'jipijipi ligongo bhabhilinge handa mimea yanga mikega. Pabhalaganga na kuangaika ligongo lya lilobhe lya Annoongo penapo kuengeleka mitima. 18 Mbeju hiikagwela pamiibha hilandana na bhandu bhabhajoanga lilobhe, 19 nambo kuhabhukila umomi gwa pachilambo na kupala hilebhe na kulokolila hilebhe yengi kuhika na kuliminya minya lilobhe na bhalitendelahopo lihengo. 20 Bhangi nga handa yeniyela mbeju hiipanditwe mu undopi gwammbone. Pabhakajoanga lilobhe lya Annoongo bhalijoanga na kulitendela lihengo, yengi hikaogola makomi tatu, yengi hikaogola makomi sita na yengi hikaogola makomi komi."

21 Ayesu bhakapunda kwalobholelanga, "Bholi, bhandu kujakia lumuli na kujiwekela na chijaluba au kujibheka kuhi ja chindanda? Bholi, ngajaakia na kujibheka pachitombenga? 22 Hela hela, choachela chibhachiite chipakubhonekana, na chilebhe choachela chichitekuwekelwa chipakuhunukulilwa. 23 Bhabhakweti na machikilo gakujioanikia na bhajoanikie!" 24 Ayesu bhakapunda kulongela, "Nnyoonikiange muno hela hela chichibhoite kujoanikia lilobhe! Henela nga Annoongo chiapakututenda kuimanye kabhele Annoongo bhapakuntenda lilobhe mulimanye muno. 25 Bhenibhala amundu bhabhajoanikia lilobhe lya Annoongo na kulimanya, Annoongo bhapakwajangatila na kwaatenda bhalimanye muno. Handa amundu ngajoanikia lilobhe lya Annoongo hata lilobhe lichoko lya Annoongo libhaliamanya bhapakwapokonyola."

26 Ayesu bhakapunda kulongela, "Ukolo gwa Annoongo gubhi handa henela. Mundu jumo bhakamicha mbeju kumigonda. 27 Kilo bhatenda kugoloka na muhi bhabhee miho na wakati gonogwe mbeju hitendakumela na kukola, pangali bhenabho kuhimanya chiitenda namuna hitenda kukola. 28 Hikabhee henela ligongo undopi gwene kujangatila mbeju kumela na kukola na kuogola mabibu, kujemeka kuhipuka oti lihamba, ngapena liache, na ngapena kubhoa njelegwa jijibhii muliache. 29 Puunje pajikomala, bhena amundu kujingila kumigonda na chikwakwa jakuhunila kwa kubhee muda gwa kuhuna guhikite."

30 Ayesu bhakaakonyanga, "Tugulandanakie Ukolo gwa Annoongo na chiniki? Tugukongolele kwa kulandanikia na chiniki? 31 Ukolo gwa Annoongo nga handa mbeju ja haladali yakubhee nga jichoko kupunda mbeju yoha hiibhi pachilambo. 32 Nambo anajipanditwe, kumela na kubhehe nkongo nkolongwa kupunda mikongo yoha ya mumigonda. Nyaambi yabhe kubhehe ngolongwa hata hijuni hikombola kuchenga yua yabhenji mu nheka gwa nyaambi yakwe."

33 Kwa kulandanikia kongi kujingi Ayesu bhakalongela nabho kwa lilobhe lyabhe. Kwa namuna chibhakakombola kumanyanga. 34 Ayesu bhangalongela nabho chohachela panga kulandanakia, nambo pabhakibha pamo na bhanapunji bhena bhatendita kwaalobholelanga na kwaatambulilanga kila chilebhe.

35 Lichobha helyo pajikabhandikila kimuo, Ayesu bhakaalobholelanga bhanapunji bhabhe, "Tujoomboke kuntundu ja litanda." 36 Bahi, bhakalileke lyene lilubhalo lya bhandu bhajingi, bhanapunji bhakajingilia muntumbwi mwabhakibha Ayesu bhakajaula pamo nabho. Na mitumbwi yengi hikalongana nabho kongo hibhii na bhandu. 37 Pakabhokela na chimboonga chikolongwa, mawimbi ga machi gakapota gonigola ntumbwi pamwakibha Ayesu na penapo gonigo ntumbwi kugajemeka kutwelela machi. 38 Ayesu bhakibha kuyetu ja ntumbwi, bhagolwike nnaji ja nhegamo. Bahi, bhanapunji bhenabho bhakannyimua na kwaalobholela, "Bholi, bhannyigana, mmonahopo handa twenga tutendakutibhila?"

39 Ayesu bhakajimuka, bhakachikopokea chenichee chimboonga, bhakagahukumula genigala mawimbi, "Mme jii! Nkotoke!" Cheni chela chimboonga chikakotoka, na chikabhee jii. 40 Ngapena Ayesu bhakaakonyanga bhanapunji bhabhe, "Kwaniki ntenda kujogopanga? Bholi, tangu mwangaobhalelanga?"

41 Na bhanapunji bhabhe bhakajogopa muno, bhakibha bhatendakonyananga, "Habha nga aganiki bahi, hata chimboonga na mawimbi gatendakunyoonikia?"