1 Kundabhi tuputupu, akolongwa bha akaakug'i pamo na akanahota, bhabhajigana malagilo ga Amusa yakubhee nga Chebule joa, bhakapalanga kwaapeleka Ayesu kwa Apilato kilongoi kubhoka ku Loma. 2 Apilato bhakaakonya Ayesu, "Bholi, mwenga nga Akolo bha Bhayahudi?"

Ayesu bhakajaangula, "Eloo, handa mwenga chinnongila."

3 Akolongwa bha akaakung'i bhakaahukumula Ayesu kwa hilebhe hijingi. 4 Apilato bhakaakonya kabhele Ayesu, "Bholi, ngajaangula lilobhe? Nnole nga hikubho hilengwa hiitendakunhukumula?"

5 Nambo Ayesu bhangajaangula lilobhe, henela Apilato bhakakangacha muno.

6 Kila lichobha likolongwa lya Pasaka, Apilato handa chiikayobheleka Apilato bhatenditakwaajogolela jubhantabhite jumo jwaampalite. 7 Bahi pakibha na amundu bhamo bhabhakemwa Abalaba, bhakibha bhatabhitwe pamo na matimbanyundo bhangi ligongo lya kukoma na kugaluka. 8 Nkutuli gwa bhandu gukaajendela Apilato na kwaajopa ili bhaaatendelange handa chibhayobhalile. 9 Apilato bhakaakonyanga, "Bholi, mpalanga naalekelelee habha Akolo bha Bhayahudi?" 10 Akalongela henela ligongo bhakaimanya kubhee akaakolongwa bha akaakung'i bhakankamua Ayesu kwaachakwe ligongo lya bwiu.

11 Nambo akolongwa bha akaakung'i bhakagukolokea nkutuli gwa bhandu bhannyope Apilato bhaajogolelee Abalaba. 12 Apilato bhakaakonyanga kabhele, "Bholi, ngocheni mpalanga naatendele chiniki na habha amundu bhamunkemanga Akolo bha Bhayahudi?"

13 Bhandu bhoa bhakapalianga lilobhe kabhele, "Mwabhambe panchalaba!"

14 Nambo Apilato bhakaakonyanga, "Kwa niki! Bholi, bhalemwite niki?"

Nambo bhenaangota bhakapundanga kupalianga lilobhe, "Mwabhambe panchalaba!"

15 Apilato bhakapala kugukolonia gono nkutuli kwa bhandu, bahi, bhakaelekelea Abalaba kubhoka mu chitabho. Ngapena bhakalagakia Ayesu bhapotwe nkela gwa ndomondo, ngapena bhaabhambe panchalaba.

16 Manyemba bhakaatola Ayesu bhakajaula nabho ku nyuumba ja Apilato, nyumba jenejo jikakemitwa Plaitolia, monomwe bhakakondekana manyemba goa. 17 Bhakaaweka Ayesu ngobho ja Chikolo, bhakatotanga hiingwa ya miibha, bhakaaweka Ayesu mmutwe.* 18 Bhakajemekanga kwachalimia, "Chalamu Akolo bha Bhayahudi!" 19 Bhakibha bhatendakumpota nhimbati mmutwe, bhakaahunila mata, bhakaatindibhalila majugwa na kwaakotimila. 20 Ngapena pabhakajomolanga kwaatendela mbenje, bhakaahula ngobho jenijela ja Chikolo na kwaaweka ngobho yabhe. Ngapena bhakampia panja bhakaapeleka kwaabhamba panchalaba.

21 Pabhakibhanga nndela, bhakakongana na amundu bhamo lina lyabhe Asimoni, amundu bha ku Kilene. Bhena bhakibha atati mundu bha Alekisanda na Alufo, penapo pabhatendita kubhoka kumigonda. Bahi, manyemba bhakaakulumikia bhagupetule nchalaba gwa Ayesu. 22 Ngapena bhakampeleka Ayesu mpaka mahali pakemitwa ku Goligota, maama jakwe, "Lingambwa lya mutwe." 23 Bhakampekea Ayesu divai jibhakajiangalana na ntela gukemitwa manemane, nambo bhena bhakakana kung'wee. 24 Bahi bhakaabhamba panchalaba, bhakabhagananga ngobho yabhenji kwa gudugudu ili bhaimanye aganiki bhapakupata chiniki. 25 Jikibha kundabhi handa ja chaa tatu pabhakaabhamba Ayesu panchalaba. 26 Ligongo lya kwahukumula likabhekwa nnani ja mutwe gwabhe na likajaandikwa malobhe gangani, "Akolo bha Bhayahudi." 27 Ngapena bhakaabhamba Ayesu pamo na bhakupokanga bhabhele pamichalaba, bhamo bhakibha upande gwabhe gwa kunnelo na bhangi akibha upande gwabhe kwa kunchiji. 28 Na penapo Majaandiko ga Annoongo gakakwela, genigala gagakalobhola, "Bhakabhekwa pamo na akaakola mabhou."*

29 Bhandu bhabhapetita kubhandikila na penapo bhakaatukana na kupukunya mutwe yabhenji na kulongela, "Aha! Mwenga mwakalobhola mpakubomolana Nyuumba ja Annoongo na kuchenga kwa machobha gatatu! 30 Nchiokoe ntuluke nangocheni panchalaba!"

31 Hela hela akaakolongwa bha akaakung'i na bhabhajigana Malagilo ga Amusa bhakaatendela mbenje Ayesu na kulongela, "Bhakahokoa bhangi, nambo kuchiokoa bhene ngakoombola! 32 Nneke twaalole Kilisito, Akolo bha Isilaeli! Nangocheni bhatuluke kubhoka panchalaba ili tulole na kuhobhalela."

Hela hela na bhenibhala bhandu bhabhele bhabhakabhambwa pamo na Ayesu na bhenaangota bhakaatukana.

33 Pajikahika saa sita muhi chilambo choa chikawekelwa na lubhendu kwa muda gwa masaa gatatu. 34 Pajikahika saa tisa Ayesu bhakaguta kwa lilobhe likolongwa, bhakalobhola, "Aeloi, Aeloi, lema sabakatani?" Maana gakwe, "Annoongo bhangu, Annoongo bhangu, mboni ntekunneka?"

35 Bhandu bhangi bhabhakibha bhajemitinge penipala pabhakajoanga henela, bhakalobholanga, "Nnyoanikiange! Bhatendakwakema alondoi Aelia." 36 Amundu bhamo bhakabhutuka, akatobhela siponji mu siki, akatabhalila nnani ja nnai, akampekea ang'wee akalobhola, "Bahi tulole handa alondoi Aelia bhapakuhika kwaatulua panchalaba!"

37 Ayesu bhakaguta kwa hibhini, bhakajomoka.

38 Penapo lipanjia lilikibha mahali panng'anyimo mu Nyuumba ja Annoongo likapapunika hipande hibhele kubhoka nnani mpaka pahi. 39 Akolo bhamo bhamanyemba bhabhakajema nnongi jabhe Ayesu pabhakabhona kubhehe Ayesu bhatekujomoka namuna jenejo, bhakalobhola, "Nga kweli habhabha bhakibha Amwana bha Annoongo!"

40 Pakibha na akaahikege bhabhalolita kwa kutali, pakati jabhenji bhakibha Amalia kubhoka chilambo cha ku Magidala na Asalome na Amalia anyongo bha Ayakobo achoko na Ayose. 41 Hakaahikege habha bhabhakalongana na Ayesu konokwe ku Galilaya na kwaatumikila. Pakibha na hakaikege bhangi bhajingi bhabhakahikanga ku Yelusalemu pamo na bhena.

42 Pajikabhandikila kimuo, kwa kubhee likibha lichobha lya Kuchiandaa, lichobha limo kabula ja Lichobha lya Kupomolela, 43 penapo bhakahika Ayosefu bha ku Alimataya, anyumbe bha Lichebule likolongwa, amundu bhabhakatopewa muno. Bhena kabhele bhatenditakulolea kuhika kwa ukolo gwa Annoongo. Bahi bhakaajendela Apilato pangali kujogopa bhakaajopa ampekee mmele gwa Ayesu. 44 Apilato bhakakangacha kujoa kubhehe Ayesu bhatekujomoka. Bahi bhakaakema akolo bha manyemba, akaakonya handa Ayesu bhajomwike kweli. 45 Apilato pabhakalobholelwa na bhena akolo bha manyemba kubhehe Ayesu ajomwike, akaalekelea Ayosefu bhagutole mmele gwabhe. 46 Ngapena Ayosefu akaemela chanda, akagutulua pahi gono mmele, bhakaguhiligila chanda. Akagubheka mu likabhuli libhakalibhacha pamwala. Ngapena akalimbikia liganga likolongwa nnongi ja nnyango gwa likabhuli. 47 Na angota Amalia kubhoka chilambo cha ku Magidala na anyongo bhabhe Ayose bhakapabhona penapo pabhakaagoneka Ayesu.