1 Ngapena Ayesu bhakabhoka ku Kapelenaumu na bhakajaula chilambo cha ku Yudea na kuntundu ja loochi lwa Yolodani. Nkutuli kwa bhandu bhajingi bhakaajendela kabhele, nabhena bhakaajigananga kabhele handa chiiyobhalilike.

2 Bahi, Mafalisayo teno bhakaajendela Ayesu, na kwaakonya kwa kwaajiga, "Bholi, malagilo gitu gapaalikwa hangwana kwaaleka hanu bhabhe?"

3 Ayesu akaakonyanga, "Bholi, Amusa akaampekeanga malagilo niki?"

4 Bhenaangota bhakajangulanga, "Amusa bhakalagia kubhehe hangwana bhakombola kwaajandikila hanu bhabhe talaka na kwaaleka hanu bhabhe."

5 Ayesu bhakaalobholelanga, "Amusa bhakajandika malagilo gangani ligongo ngapokelanga majiganao. 6 Nambo tangu kualakilwa kwa dunia, ‘Annoongo bhakahalakia hangwana na mwikege.’ 7 ‘Kwa ligongo lya henela mwanalome apakwaaleka atati bhabhe na anyongo bhabhe,’ na kulondanika na hanu bhabhe, 8 ‘Na bhenaangota bhabhele bhapakubhee mmele gumo.’ Henela, bhenaangota ngabhee bhabhele kabhele ila nga mmele gumo. 9 Bahi, chibhalondanike Annoongo, amundu bhakotokulekania."

10 Ayesu pabhakajingilanga kabhele nkati ja nyuumba, bhanapunji bhabhe bhakaakonya nnani ja ngani ja kulekana. 11 Na bhena bhakaajangulanga, "Hangwana bhoabhala bhabhaaleka hanu jwabhe na kuloombela bhangi, na bhena bhatenda ngoongola. 12 Na mwikege handa bhabhaaleka hangwana bhabhe na kulombelwa na hangwana bhangi, helahela bhena bhatenda ngoongola."

13 Bhandu bhakaaletela Ayesu bhana bhachoko bhachoko ili bhakombole kwakwaanga, nambo bhanapunji bhabhe bhakaakalipilanga. 14 Ila Ayesu pabhakabhona henela, bhakatumbala bhakaalobholelanga bhanapunji bhabhe, "Mwalekange bhana bhachoko bhahikange kwaachangu, wala nkotokwahibhilanga, kwakubhee bhandu bhabhalinge handa bhana bhachoko habha nga bhabhapakujingilanga mu ukolo gwangu. 15 Ndendakunnobholelanga kweli, amundu bhoabhala bhabhakana kugupokela ukolo gwa Annoongo handa mwana nchoko chibhahobhalela ngajiingila mu ukolo gwa Annoongo." 16 Ngapena bhakaanamatilanga bhena bhana, bhakaabhekelanga mabhoko gabhe nnani ja bhena bhana, bhakaalobholelanga gammbone.

17 Ayesu pabhakajemeka kabhele ulendo gwabhe, amundu bhamo bhakaabhutukila, bhakaatindibhalila majugwa nnongi jabhe, bhakaakonya, "Bhannyigana bhammbone, ndende niki ili ngombole kugupata umomi gwa machobha goha?"

18 Ayesu bhakaakonya, "Mboni mwenga ntendakungema nenga nga bhammbone? Bhakwa bhabhabhii bhammbone ila nga Annoongo jikajabhe. 19 Mugamanyi malagilo ga Annoongo, ‘Nkotokoma, nkoto kubhehe bha ngoongola, nkotokujibha, nkoto kubhoa uchahidi kwa unami, nkotokutemba, mwaatopee atati bhinu na anyongo bhinu.’"

20 Bhenabho bhakaajangula, "Bhannyigana, malagilo haga goha nagakamwile tangu nibhii kakombo."

21 Ayesu bhakapia miho, bhakaapala, bhakaalobholela, "Ntekupongokewa na chilebhe chimo, nyaule na nkauche kila chilebhe chimminacho, mwaapekee akaahocho heyo mbiya, na mwenga mpakubhee na hilebhe hijingi kunani kulihunde, ngapena nhike nngagule." 22 Bhenibhala amundu pabhakajoa genago, bhakakokoleka muno, bhakajaula kongo bhabhii bhatumbiile ligongo hakibha hilebhe hijingi.

23 Ayesu bhakalola kongo na kongo, bhakaalobholelanga bhanapunji bhabhe, "Hipakubhee lihengo muno kwa akaakola hilebhe hijingi kujingila mu ukolo gwa Annoongo!"

24 Bhanapunji bhabhe bhakakangachanga muno kwa malobhe gakwe, Ayesu akaalobholelanga kabhele, "Akaachibhanangu, nga lihengo muno amundu kujiingila mu ukolo gwa Annoongo! 25 Nga kujojoka muno kwa chinyama chichikemwa ngamia kupeta pa lipobhole lya chindano, ila nga lihengo muno kwa akola hilebhe hijingi kujiingila mu ukolo gwa Annoongo."

26 Bhanapunji bhabhe bhakakangachanga muno bhakakonyananga, "Nga ganiki bahi, bhabhapakombola kuokoka?"

27 Ayesu bhakaapia miho, bhakaalobholelanga, "Kwa amundu heche chilebhe ngakomboleka, nambo kwa Annoongo ngabha, ligongo goha kwa Annoongo gatendakomboleka."

28 Apetulo bhakaalobholela, "Twenga tulekite hilebhe yoha na kunkagula mwenga!"

29 Ayesu bhakalobhola, "Ndendakunnobholelanga kweli, bhakwa amundu bhoabhala bhabhalekite nyuumba, annung'una bhebhe mwanalome, au anung'una bhabhe mwikege, au atati bhabhe, au anyongo bhabhe, au bhana au migonda ligongo lyangu nenga na ligongo lya Ngani Jammbone, 30 bhapakupokela hilebhe hijingi muno wakati gongoni gwa nangocheni. Nyuumba nnung'una mwanalome, anung'una mwikege, anyongo, atati, bhana, migonda pamo na hibhini, ngapena umomi gwa machobha goha pa dunia guguika. 31 Nambo bhajingi bhabhakajemeka bhapakujomolekea na bhabhakojomolekea bhakujemeka."

32 Na Ayesu na bhanapunji bhabhe bhakibhanga nndela kujaula chilambo cha ku Yelusalemu, na Ayesu akaalongolelanga. Bhanapunji bhabhe bhakatwelelwanga na bhoga, na bhandu bhabhakakagulanga bhakajogopanga. Ayesu akaatolanga kabhele nnyenje bhenibhala bhanapunji bhabhe komi na bhabhele, bhakajemeka kwaakongolela genigala gagapakumpata. 33 Bhakaalobholelanga, "Nnyonikiange! Tutendakujenda ku Yelusalemu, na konokwe nenga Amwana bha Amundu mbakugalukwa na akaakolongwa akaakolingwa bha akaakung'i na bhabhajigananga malagilo ga Amusa, bhenaangota bhapakunhukumula kujomoka na kungamua kwa bhandu bhanga Bhayahudi, 34 bhenaangota bhapakundendela mbenje bhapakunhunila mata, bhapakumbota mihimbati na kungoma, nambo lichobha lya tatu mbakuyoka."

35 Ngapena Ayakobo na Ayohana, bhana Azebedayo, bhakaajendela Ayesu bhakaalobholela, "Bhannyigana, tupala ntuteendele chilebhe chitupakunyoopa."

36 Ayesu bhakaakonyanga, "Mpalanga nintendelange chiniki?"

37 Bhakaajangula, "Ntulekelee kutama bhamo lubholo lwinu lwa kunnelo na bhangi lubhoko lwinu lwa kunchiji mu ukolo gwinu."

38 Ayesu bhakaajangulanga, "Ngaimanya nnyopanga chiniki. Bholi, mpakombolanga kulaga handa chinnaganga nenga, au kujomoka handa chimbakujomoka nenga?"

39 Bhakaajangula, "Tutendakombola."

Ayesu bhakaalobholelanga, "Mpakombolanga kulaga handa chinnaga nenga na mpakujomokanga handa chimbakujomoka na mpakubatichwa handa chimbakubatichwa. 40 Nambo kutama upande gwangu gwa kunnelo au kunchiji ngabha lihengo lyangu kumpekeanga ila Annoongo bhapakwaapekeanga mpenyo bhenibhala bhabhaagulikwe."

41 Bhenibhala bhanapunji bhangi komi pabhakajoanga genago, bhakajemekanga kwaatumbalilanga Ayakobo na Ayohana. 42 Henela, Ayesu bhakaakemanga bhanapunji bhabhe pamo, na kwaalobholelanga, "Mmanyanga kubhehe bhenibhala bhabhabhonekana nga akaakolongwa bha bhandu ngabha Bhayahudi bhatendakwalimbikianga bhandu bhabhenji kwa machili na akaakolongwa bhenabho bhakweti mamulaka nnani ja bhandu bhabhenji. 43 Nambo kwaachinunji hikotokubhehe henela, ila bhabhapala kubhehe akolongwa pakati jinunji, hipaalikwa bhabhee abhanda jwinunji, 44 na bhoabhala bhabhapala kubhee akolongwa, hipaalikwa bhabhee abhanda bha bhoa. 45 Kwakubhehe nenga Amwana bha Amundu nangaika kutumikilwa, ila nga kwaatumikilanga, na kubhoa umomi gwangu kubhehe ukomboi kwa bhandu bhajingi."

46 Bahi, bhakahikanga mu chilambo cha ku Yeliko, Ayesu na bhanapunji bhabhe pamo na nkutuli nkolongwa gwa bhandu pabhakibha bhatendakubhoka mu chenichela chilambo, bhakakongana na bhangalola bhamo, bhakemitwa Abatimayo, mwana jwa Atimayo, bhakibha bhatamite ngulugulu mwa ndela bhabhikujopa bhandu bhaajangatile hilebhe. 47 Pabhakajoa kubhehe nga Ayesu bha ku Nazaleti bhatendita kupeta, bhakajemeka kupalia lilobhe bhabhikulobhola, "Mwenga Ayesu, Mwana jwa Adaudi, ngoleekiha!"

48 Bhandu bhajingi akaakalipila ili akotoke, nambo bhena akapunda kukweha lilobhe, "Mwenga, Ayesu Mwana jwa Adaudi ngoleekiha!"

49 Ayesu bhakajema na kulongela, "Munkemange bhahike."

Henela bhakaakemanga bhenibhala amundu bhangalola na kwaalobholela, "Nchipee ntima!" bhakaalobholela, "Nyimuke, bhatendakunkema."

50 Na bhena bhakajijea jenijela ngobho jabhe, bhakahomba nnani, na kwaajendelela Ayesu.

51 Ayesu akaakonya, "Mpala nintedelee chiniki?"

Bhena bhangalola bhakajaangula, "Bhannyigana, ndendakunnyopa ngombole kulola."

52 Ayesu akaalobholela, "Nnyaule, kuhobhalela kwinu kutekunnamia."

Popopo bhenibhala bhangalola bhakajemeka kulola, bhakaakagula Ayesu nndela.